Luca 10:16 - ꞌRe Ihâimana Uꞌâsi Mono Zadawa Wasuꞌu

¹⁶ Tawamhã te tãma nharĩ za'ra, tisiré 're inomro mono norĩ ma, ãne: — Ni'wam norĩ hã ĩzadawa wasu'u na, te te 're aiwapari pese za'ra wa'aba mono wamhã, ĩmreme 'madâ'â pese 'wa na, wa za ta norĩ hã te ĩsina 're awaihu'u. Duré ni'wam norĩ hã ĩzadawa wasu'u na te te 're aiwẽ'õ za'ra wa'aba mono wamhã, ĩwẽ'õ'wa na, wa za duré ta norĩ hã ĩsina te 're awaihu'u. We ĩzatõrĩ'wai wẽ'õ'wa na zama, wa za ta norĩ hã te ĩsina 're awaihu'u.

Luca 10:16 ပူးပေါင်းရင်းမြစ်များ

Ezodu 16:7

Awẽ wi mararé te za Uburé Danhib'apito hâiba na rowa'a hã i'madâ'â za'ra wa'wa, iwẽ uptabi hã. E marĩ wa. Sada aihâimana za'ra wa'aba wa, tãma i'aiwapsari za'ra wa'aba zé hã te te wapari wa. Wazada hã aihâimana za'ra wa'aba õ di. Õhõ da, aihâimana za'ra wa'aba wa, ma tô aiwapsari za'ra wa'wa. E marĩ 'manharĩ'wa pâ bété, wa norĩ hã wama i'aiwapsari za'ra wa'aba da hã.

Ezodu 16:8

Tawamhã te zahadu Mozési dama tinha ãne: — Uburé Danhib'apito, te za hâiwahâ sidâpâsi romnhi 're ihuri aba mono da hã te te aima 're sõmri za'ra wa'wa, duré mararé sidâpâsi i'u'ẽtẽ wapu asima iwẽ na 're ihuri aba mono da zama. E marĩ wa. Uburé Danhib'apito zada, aihâimana za'ra wa'aba wa, i'aiwapsari za'ra wa'aba zé hã te te wapari wa. Wazada hã aihâimana za'ra wa'aba õ di. Õhõ zada aihâimana za'ra wa'aba wa, ma tô tãma aiwapsari za'ra wa'wa. E marĩ 'manharĩ'wa pâ bété wa norĩ hã wama i'aiwapsari za'ra wa'aba da hã.

Mateu 10:40

— Ni'wam norĩ hã te te 're aiwaibui wẽ wa'aba mono wamhã, ta norĩ hã ai'u'âbâ wa'aba te za te te siwi 're ĩmrami wẽ. Ta norĩ hã te te siwi 're ĩmrami wẽ mono wa, we ĩzatõrĩ'wa zama hã te za duré ĩsiré te te siwi 're mrami wẽ.

Mateu 18:5

Duré ni'wam norĩ hã te te 're ĩzawi pese za'ra mono wa, ai'uté zô 're tob'uzu za'ra mono wamhã, ta norĩ u'âbâ te duré ĩzô hã 're tob'uzu za'ra.

Luca 9:48

Te duré tãma nharĩ za'ra, ãne: — Ni'wam norĩ hã te te 're ĩzawi pese za'ra mono wa, ai'uté zô 're tob'uzu za'ra mono wamhã, ta norĩ u'âbâ te duré ĩzô 're tob'uzu za'ra. Tawamhã e ĩzô si te 're tob'uzu za'ra. Mare di. We ĩzatõrĩ'wa zô zama te duré sô 're tob'uzu za'ra. Dama iwapu norĩ hã 're sawi pese za'ra wa'aba mono wamhã, asima ai'maipire zô asõpré wa'aba ãna, wa za aipire na te 're ai'awaihu'u 'wa.

Zuwã 12:44

Tawamhã Zezusi te da'ab'mahâ: — Ni'wam norĩ hã Danho'reptui'wa na te te sina 're ĩ'umnhasi za'ra mono wamhã, ĩzazei'wa si 're nomro mono õ di za. Ĩ'u'âbâ te za we ĩzatõrĩ'wa zazei'wa duré 're nomro.

Zuwã 12:48

Ni'wam norĩ hã te te 're ĩwẽ'õ za'ra mono wamhã, duré ĩmreme te te 're wẽ'õ za'ra mono wamhã, zahadu wapsi te za oto siwaihu'u za'ra, tiwasété na. Ti'a isi'utõrĩzéb ãma ĩmreme na po're pu'u za'ra wa, te za bâtâ na siwaihu'u za'ra, tiwasété na hã.

Zuwã 13:20

Ĩwapari pese za'ra wa'aba. Zahadu wapsi, wa za ĩzazei'wa norĩ hã datẽme te 're satõrĩ za'ra, te te dama 're ĩzadawa wasu'u za'ra mono da. Tawamhã imreme za'ra hã da te 're wapari za'ra mono wamhã, da te dasiwi 're sawi pese za'ra mono wamhã, ta norĩ u'âbâ te za duré ĩzama hã da te dasiwi 're ĩzawi pese. Da te dasiwi 're ĩzawi pese za'ra mono wamhã, ĩ'u'âbâ te za duré we ĩzatõrĩ'wa hã da te dasiwi 're sawi pese.

Zezusihi zadawa wasuꞌuꞌwa norĩ nhimiromhuri na robꞌuiꞌéré 5:4

Asipti'a, da te aiwi uipra õ ré hã, ate hã. Duré, da te aiwi uipra wamhã, iwa'âbâ zama ate hã. E marĩ da, ma tô bété wama asadawa nhipe. E wama si ma tô asadawa nhipe. Mare di. 'Re ihâimana u'âsi mono ma zama ma tô asadawa nhipe.

Galata 4:14

Tawamhã ĩhâzé ré, atẽme ĩwisi za'ra wa'aba nherẽ, ĩhâzé wa, asiwi ĩwẽ'õ za'ra wa'aba õ di. Mare di. Hâiwa ãma 'Re ihâimana u'âsi mono ma romhuri'wa, wẽ na asiwi i'âri aba ne, niha wamhã, Cristu Zezusi, wẽ na asiwi i'âri aba ne, ma tô wẽ na asiwi ĩ'âri 'wa.

1 Tesalonita 4:8

Tahawa, ãne wa te aima iroti za'ra wa'wa hã, asiwi wẽ'õ za'ra wa'aba õ di za. Ni'wa hã te te siwi wẽ'õ wamhã, e ta hã ti'ai ãma dahâiba te za siwi wẽ'õ. Mare di. 'Re ihâimana u'âsi mono te za siwi wẽ'õ, wama Tipẽ'ẽzani nhomri'wa hã.