Hebreu 5:3 - ꞌRe Ihâimana Uꞌâsi Mono Zadawa Wasuꞌu

³ Duré ta norĩ hã dawasété u'âbâ si, marĩ hã 'Re ihâimana u'âsi mono ma, te te 're sõmri za'ra mono õ di, dawasédé hã te te dama ãma 're i'apari mono zéb da hã. Si'udâna zama ma tô marĩ hã te te tãma 're sõmri za'ra sasedoti norĩ hã, dasine tiwasédé hã te te 're 'manharĩ za'ra mono wa.

Hebreu 5:3 ပူးပေါင်းရင်းမြစ်များ

1 Corĩtu 15:3

Zezusihi wasu'uwẽ hã danhipai u ipire uptabi hã, wa tô te aima 're wasu'u za'ra wa'wa, da te ĩma 're irowasu'u za'ra mono zéb zarina. Ãne, Zezusihi wasu'u hã ipire uptabi hã: Cristu hã ma tô, u, wazada dârâ, uburé wawasété na 're iwahâimana za'ra mono norĩ zada. Taha pari, ma tô dasiwi sẽrẽ ni, u, ab're 're. Tawamhã bâdâ maparane ãma si'utõrĩ õ ré, ma tô duré Imama hã, u, hâiwa'utu, 'Re ihâimana u'âsi mono hã. Ãne ma tô tãma tiromhâiba, duréihã 'Re ihâimana u'âsi mono zadawa 'mahârâ'wa norĩ hã ibaihâ na te te ãma irob'ui'éré siromo za'ra zéb zarina.

Hebreu 10:12

Cristuhu si, ma tô misi haré tihâiba hã tãma tisõ, dazada dâ'â da, õhõ na si dawasédé hã te te dama ãma 're apari mono da. Taha pari, te 'Re ihâimana u'âsi mono nhimire niwĩ 're sãmra, pire uptabi na isiré te te 're da'ab'madâ'â mono da oto, õne u'âsi.

Hebreu 7:27

Duréihã sasedoti norĩ 're ihâimana za'ra mono ne, 're hâimana mono õ di, Zezusi hã. Ta norĩ hã awẽ sidâpâsi te za tinhoprubzé hã si'udâna te te tãma 're sõmri 'rata za'ra 'Re ihâimana u'âsi mono ma, tiwasété parizéb da hã. Taha pari, te za duré da'udâna zama danhoprubzé hã te te tãma 're sõmri za'ra, dawasédé te te dama ãma 're apari mono da. Tanei õ di, Zezusi hã sasedoti na te te wa'ãma 're iromhuri za'ra mono zé hã. Niwa marĩ te te 'manharĩ wasété waihu'u õ wa, awẽ sidâpâsi si'udâna tinhoprubzé hã te te tãma 're anhomri mono õ di, Timama ma hã. Misi haré ma tô tinhoprubzém na hã tãma sisõ, 'Re ihâimana u'âsi mono ma, dazada dâ'â da, sihâiba zawi ãna tãma sisõmri wamhã, õhõ haré dawasédé hã te te oto dama ãma 're i'apari mono zéb da hã.

Hebreu 9:7

Tane nherẽ, sasedoti norĩ nhib'apito, tisiré norĩ nhipai u ipire uptabi si ma tô maparane ãma 'ri 're wa'wa u 're zasi, 'Re ihâimana u'âsi mono te hã, danhipai u iwẽ uptabi hã iwa 're isãmra mono zéb u hã. Wahub sidâpâsi ma tô misi haré 're zasi. Tamomo 're zasi mono wamhã, danhimizama waprui ré, te 're zasi, dawasédé za te te ãma dama 're ipari mono zéb ré, ta hã 'Re ihâimana u'âsi mono ma, te te tãma 're sõmri mono da, si'udâna, duré da'udâna zama, da te dasina 're waihu'u za'ra mono õ nherẽ, dawasédé da te 're i'manharĩ za'ra mono zé, za te te dama ãma 're ipari mono zéb da hã.