Hebreu 3:9 - ꞌRe Ihâimana Uꞌâsi Mono Zadawa Wasuꞌu

⁹ Ãne duré, 'Re ihâimana u'âsi mono mreme na rob'ui'éré hã: “Aihi'rata norĩ hã ma tô siwi ĩpibu, ãma ĩwa'a su'u za'ra õ zarina, niha te tãma rob'manharĩ za'ra õ zô pé, 40 na ãma wahub za'ra ré, marĩ iwẽ na si te 're pawaptob u'âsi za'ra mono nherẽ.

Hebreu 3:9 ပူးပေါင်းရင်းမြစ်များ

Salmu 95:9

Tame ma tô ta norĩ hã siwi ĩpibu. Ĩzada ma tô duré tihâimana za'ra, uburé marĩ te tãma 're i'manharĩ za'ra mono zé hã te te siwi 're 'madâ'â mono nherẽ.

Ezodu 19:4

“Wa hã Uburé Danhib'apito, ezipsiu norĩ ma, te i'manharĩzé ma tô atõmo na a norĩ wa'wa hã i'madâ'â za'ra wa'wa. Si'õmo wawẽ tipaihi na ti'ra te te 're i'upari za'ra mono ne, 'râwi te we ĩsitẽme i'asimroi wa'aba mono zéb zama ma tô atõmo na hã i'madâ'â za'ra wa'wa.

Ezodu 20:22

Uburé Danhib'apito, Izaraéu nhihudu norĩ ma, te te tãma nharĩ za'ra da, ma tô Mozésihi ma waihu'u ãne: — Hâiwa hawi te inharĩzé hã, ma tô a norĩ wa'wa hã i'madâ'â za'ra wa'wa.

Luca 7:22

Tawamhã te te da'apese parimhã, te oto tãma nharĩ zahuré, Zuwã Batistaha mreme 'madâ'â pese 'wa norĩ ma, ãne: — Apâ te za ane wa'wa Zuwãhã u, tãma ĩwasu'u wa'aba da. Itob'a norĩ hã to pese za'ra wa, ma tô apâ te te 're rob'madâ'â za'ra. Imorĩ'õ norĩ hã te oto para na 're nomro. Duré i'wa're ré norĩ hã ma tô tipese za'ra. Hâiba wẽ na te oto 're nomro. Duré ipo'reptõ norĩ hã te oto 're simipari za'ra. Duré 're idâ'â za'ra mono norĩ hã ma tô duré apâ 're hâiwa'utu za'ra. Ĩwasu'uwẽ hã ma tô duré isibrob'õ norĩ hã te te 're wapari za'ra. Ãne na te za tãma irowasu'u wa'wa, Zuwãhã ma.

Zezusihi zadawa wasuꞌuꞌwa norĩ nhimiromhuri na robꞌuiꞌéré 7:36

Tahawa, ma tô Mozési hã te te danhimro tô, Ezitu hawi. Duré Ezitu ãma zahadu 're sãmra mono ré, ma tô marĩ hã dama i'manharĩ waihu'u'õ hã te te dama 're ab'manharĩ. Â pré na â poré nhisi ãma, ma duré dama rob'manha, iwaihu'u'õ na. A'ubuni wi siwa'ru 're danomro mono ré, ma duré marĩ dama i'manharĩ waihu'u'õ hã te te dama 're ab'manharĩ, 40 na da'ãma wahub za'ra ré.

Zozué 23:3

Uburé Danhib'apito, wate za'ra 'Re ihâimana u'âsi mono, ã hã a'uwẽ norĩ ma, ai'u'âbâ za'ra wa'aba te te i'manharĩzé hã ma tô a norĩ wa'wa uburé i'madâ'â za'ra wa'wa. Ma tô duré ta hã ai'ãma ai'wapé za'ra wa'wa.

Zozué 24:7

Tahawa, Izaraéu nhihudu norĩ te te ĩwi rowaptẽrẽ za'ra wamhã, wa tô robra wa hã 'manha, ezipsiu norĩ wi te ãma isimi'uri za'ra zéb da hã. Duré â ma, wa tô tinha ezipsiu norĩ nhisiwi sisa'wari da hã. Ãhã wa, ma tô suwa za'ra. Tawamhã a norĩ wa'wa atõmo na, wa hã, ezipsiu norĩ ma, te i'manharĩzé hã ma tô i'madâ'â za'ra wa'wa. Taha pari ma tô duré rop si a'ubuni wi 're irosa'wari mono ãmamhã, 're aihâimana hâ za'ra wa'aba mo.

Zozué 5:6

40 na ãma iwahub za'ra na ma tô Izaraéu nhihudu norĩ hã 're nomro, supara 'ré na si. Taha ré, uburé aibâ hã za oto 're isi'wapé za'ra mono wabre ãma iwahub za'ra hã Ezitu hawi iwairébé norĩ hã ma tô tidâ'â za'ra. E marĩ wa. Uburé Danhib'apito nhimiroti te te 're wapari za'ra mono õ wa. Tahawa ma tô 'Re ihâimana u'âsi mono hã sena na tãma ropisutu za'ra, ti'a iwe isimarĩ pe hã titõmo na te te i'madâ'â za'ra da hã, te te tãma isa'ré za'ra õ na, ihi'rata za'ra norĩ ma, te te ãma tãma iropisutu za'ra hã, i'uirĩ na te te wama isõmri za'ra da hã.