Hebreu 3:1 - ꞌRe Ihâimana Uꞌâsi Mono Zadawa Wasuꞌu

¹ Ĩsisãnawã norĩ, a norĩ wa'aba zama ma tô 'Re ihâimana u'âsi mono hã aipisutu za'ra wa'wa, isib'a'uwẽ si oto 're anomro aba mono da, hâiwa ãma i'rata 're aihâimana u'âsi za'ra wa'aba mono da. Tahawa, te za Zezusihi ãma si 're irosa'rata u'âsi za'ra wa'aba mo, 'Re ihâimana u'âsi mono hã ti'ai u, we te te isatõrĩ na, duré dama isadawa wasu'u'wa na. Ta hã sasedoti ipire uptabi na te wa'ãma te te 're romhuri u'âsi, iwasu'uwẽ na wa te 're isaze za'ra mono zém na te te 're wa'apawapto mono da.

Hebreu 3:1 ပူးပေါင်းရင်းမြစ်များ

Salmu 110:4

Uburé Danhib'apito uptabi, tinhimiropisutu na apâ te te ãma isiri waihu'u õ na, ma tô mreme pire na ropisutu, ãne: “A hã sasedoti norĩ, dama 're ihâimana za'ra mono ne, te za dama 're aihâimana u'âsi mo, duréihã Mequizédéqui hã sasedoti na pire na dama 're ihâimana mono zéb zarina.”

Zuwã 17:3

A hã misire Danhib'apito uptabi. Wa hã Zezu Cristu Danho'reptui'wa da, ĩpisudu, we datẽme ĩzatõrĩ. Ãne na, da te 're wawaihu'u za'ra mono wa, da te 're wazazei pese za'ra mono wamhã, robzei u'âsi te za ĩ'ãma 're danomro. 'Re dadâ'â za'ra mono ãna, te za duré 're dasi'ubumroi u'âsi, hâiwa ãma.

Zuwã 20:21

Tawamhã Zezusi te duré tãma nharĩ za'ra: — Rowẽ na 're aihâimana za'ra wa'aba mono. Ĩmama we te te datẽme ĩzatõrĩ ne, wa za duré datẽme asatõrĩ za'ra wa'wa isine.

Zuwã 20:27

Tawamhã Zezusi te Tomehẽ ma tinha, ãne: — We ĩtẽme aimorĩ, ĩnhib'rada 'madâ'â da. Ĩnhib'rata zapu'uzéb 're, asipto hã sẽrẽ. Duré ĩ'a're wi ĩwa'rézéb 're, asib'rada hã sẽrẽ. Ĩhâiwa'utuzém na ĩwasu'u na, ĩwawã tõ. Te za oto ĩzaze, ĩhâiwa'utuzém na hã.

Zezusihi zadawa wasuꞌuꞌwa norĩ nhimiromhuri na robꞌuiꞌéré 1:15

Tawamhã bâdâ hã siwaptom na ãma ne pari, ma tô isazei'wa norĩ hã si'rã'õtõ, 120 na ihâiba za'ra hã. Tawamhã Pedru hã ma tô wahudu hâiwi, te te tãma rowasu'u za'ra da. Ãne te tãma rowasu'u za'ra:

Roma 11:17

Ãne na, wa za duré aima ãma romnhimiré'é za'ra wa'wa. Ãté azeitona wede hã te a'ubuni wi 're sa, oriwera na isisi hã 'madâ'â ãna iprédu hã, tede'wai õ nherẽ. Ta hã zudeu'õ norĩ, te wasu'u. Duré azeitona wede hâiba amo hã te duré 're sa, danho'a da te dasiwi 're i'madâ'â pese mono hã. Ta hã zudeu norĩ, te wasu'u. Tawamhã ãté azeitona wede hã danho'a 're isa mono panhipti hã te za nima niwĩp si panhipti nhi'ẽ za'ra ni, taré simi'wara da, dasiré 're 'rã za'ra mono õ wa. Ta hã, zudeu norĩ hã 'Re ihâimana u'âsi mono te te 're isaze za'ra mono õ norĩ, te wasu'u. Ãté a'ubuni wi azeitona wede 're isa mono panhipti hã te za misi wẽ'ẽ ni, azeitona wede hâiba amo hã dama i'madâ'â pese u iwede wãi wa, da te ãma wasisi da, dasiré oto 're 'rãi mono da. Ta hã, zudeu'õ norĩ ãma, 'Re ihâimana u'âsi mono, oto ãma 're isib'a'uwẽ za'ra mono zé, te wasu'u. Tawamhã azeitona wede, dama i'madâ'â pese wede wa'u na te za oto tipanhipti prédu, wẽ na, a'ubuni wi azeitona wede 're isa mono panhipti hã rob'rãi wede amoi u, da te ãma iwasi hã. Tane duré, zudeu norĩ ma, 'Re ihâimana u'âsi mono hã marĩ wẽ na tãma 're isõprub za'ra mono zé hã, te duré aima 're hâimana za'ra wa'wa oto, zudeu'õ norĩ na 're aihâimana za'ra wa'aba mono ma hã.

Roma 15:27

Ta norĩ hã zudeu'õ isazei'wa norĩ hã si'uihâ na ma tô sima pisutu za'ra, te te siwi ãma ipawaptob za'ra zéb da hã, zudeu norĩ hã. Ãne hã tô i'uwaibaba ma tô siwi ãma pawaptob za'ra. E marĩ wa. Duréihã zudeu norĩ ma, ma tô 'Re ihâimana u'âsi mono hã tiwasu'uwẽ na tãma siwaihu'u na'rata za'ra, tipẽ'ẽ na robzei u'âsi ãma 're nomro mono da. Taha na ma tô zudeu'õ norĩ hã te te siwi ãma 're pawaptob za'ra iwasu'uwẽ na, aiwapsi oto õhõ ãma si 're hâimana za'ra mono da. Ãne wa'rãmi, te za tô zudeu'õ norĩ hã tinhimarĩ na te te siwi 're pawaptob za'ra, zudeu norĩ hã, tô isarina si.

Roma 15:8

Cristu hã ma tô we ti'ai u datẽme mo, zudeu norĩ hã te te 're apawapto mono da, duréihã zudeu norĩ hi'rata ma, dama ipire za'ra norĩ ma, 'Re ihâimana u'âsi mono te te tãma 're iropisutu za'ra mono zéb zarina, te te dama ãma 're a'uwaimrami mono da, duré uburé 'Re ihâimana u'âsi mono te te dama ãma 're i'a'uwaimrami mono zém na, tô sena na da te ãma 're waihu'u pese za'ra mono da.

Roma 9:24

Wa norĩ hã ma tô 'Re ihâimana u'âsi mono hã te te 're wa'apisutu, isib'a'uwẽ uptabi hã oto 're wanomro mono da. E 'wam norĩ hã tawamhã, 'Re ihâimana u'âsi mono te te 're i'apisutu mono norĩ hã. Wa norĩ hã zudeu norĩ hã aihĩni õ nherẽ, duré zudeu'õ norĩ hã aihĩni õ nherẽ, ma tô wasiwazari te te 're wa'apisutu, isib'a'uwẽ oto 're wanomro mono da, wasiré.

1 Corĩtu 10:17

Zezusi hã wazada idâ'âzém na 're wasipo're pu'u za'ra mono da, wasiré 're wasi'rã'õtõ mono wamhã, wa'ahâ nherẽ, wa za i'u'ẽne hã wa te wasima 're wẽ'ẽ za'ra, misi nherẽ, wa te 're ihuri mono da hã. E marĩ te wama wasu'u za'ra, misi i'u'ẽne hã. Wa norĩ hã wasiré isazei'wa norĩ hã wa'ahâ nherẽ, simisutu Cristuhu siré 're iwahâimana za'ra mono zé, te wama wasu'u za'ra. Misi dahâiba ne oto 're iwahâimana za'ra mono zé, te duré wama wasu'u za'ra.

1 Corĩtu 9:23

Cristuhu wasu'uwẽ hã daro mono bâ da te 're iwaihu'u za'ra mono zéb da si, wa ãne dama 're ĩhâimana. Duré iwasu'uwẽ zarina, 'Re ihâimana u'âsi mono, isazei'wa norĩ ma, uburé marĩ iwẽ hã te te tãma 're i'anhomri mono zém na, dame 're ĩhâimana mono da, wa tô ãne dama 're ĩhâimana.

2 Corĩtu 1:7

Ãne na, wa tô wa te ai'ãma 're rosa'rata u'âsi za'ra wa'wa, 're robzépata za'ra wa'aba mono nherẽ, 'Re ihâimana u'âsi mono za 're irẽme za'ra wa'aba mono õ na hã. Tahawa, wasine 're robzépata za'ra wa'aba mono wamhã, tô sena te za duré 'Re ihâimana u'âsi mono hã te te 're aipawaptob za'ra wa'wa, te te 're iwapawaptob u'âsi mono ne, apâ 're aipẽ'ẽ nhimi'wara u'âsi aba mono da.

2 Corĩtu 9:13

A norĩ wa'wa hã tãma asõprub za'ra wa'aba zém na, pawaptob za'ra wa'aba wa, te za tãma ãma i'uwaimrami za'ra wa'wa, 'Re ihâimana u'âsi mono ma hã. Tahawa, ahâ na te za tô 'Re ihâimana u'âsi mono ãma tiwata zara, Cristuhu wasu'uwẽ zarina 're anomro wẽ wa'aba mono na, duré asõprub uptabi na pawaptob za'ra wa'aba wa, ta norĩ hã, duré darob amoi ãma 're ihâimana za'ra mono norĩ hã, pawaptob za'ra wa'aba wa.

Éfézu 3:6

Rowasu'u wẽ hã aré dama iwaihu'u'õ hã 're ihâimana mono hã, ãne. Zudeu'õ norĩ hã Cristuhu wasu'uwẽ te te 're saze za'ra mono wa, marĩ iwẽ na zudeu norĩ ma 're isõpru mono zéb da hã, 'Re ihâimana u'âsi mono te te tãma 're iropisutu za'ra mono zéb ré, te za 're hâimana za'ra. Simisutu te za oto 're hâimana za'ra, dahâiba misi ne. Cristu Zezusihi ãma oto 're nomro mono wa, 'Re ihâimana u'âsi mono hã tinhib'a'uwẽ norĩ ma, marĩ iwẽ na te te tãma iropisutu za'ra zéb zarina, te za zudeu'õ norĩ ma zama te te tãma ãma 're a'uwaimrami, zudeu norĩ zu. Ãne zudeu'õ norĩ ãma te te sima irotizé hã.

Éfézu 4:1

Tahawa, wa za aima roti za'ra wa'wa, Wanhib'apito ma romhuri'wa 're ĩmorĩ 'ru te, dazazéb 're da te dasiwi 're ĩzai mono wa, 're ĩza mono ré. Ma'ãpé dama 're aihâimana wẽ za'ra wa'aba mono za, 'Re ihâimana u'âsi mono te te sima 're i'aiwẽ za'ra wa'aba mono zéb uwaibaba. Taha da, ma tô te te sima 're aipisutu za'ra wa'wa.

Éfézu 4:4

Cristuhu nhib'a'uwẽ mono bâ misi dahâiba ne, wa simisutu oto 're wahâimana za'ra. Misi te Ipẽ'ẽzani hã 're hâimana. Taha si te wama 're hâimana za'ra, wapẽ'ẽ mono bâ. Duré õhõ zô si wa 're wanhimipari za'ra oto, rowẽ uptabi zô. Taha zô 're asimipari za'ra wa'aba mono da, ma tô tinhib'a'uwẽ da, aipisutu za'ra wa'wa, 'Re ihâimana u'âsi mono hã.

Filipu 3:14

Marĩ iwẽ hã da te dasina 're sõ'õtõ za'ra mono da, sô 're dasirẽme za'ra mono wa, awa'awi u'âsi 're idasisa'rei mono ne, wa marĩ iwẽ uptabi zô 're ĩsiwasutu u'âsi, Cristu Zezusihi dâ'âzém na 'Re ihâimana u'âsi mono, 're ĩhâimana mono zép té, za te te ĩma isõmri zô si.

Colosu 1:12

Ãne wamhã, Wamama ãma te za duré ãma 're aiwata u'âsi za'ra wa'aba mo. Ta hã ma tô aima pisutu za'ra wa'wa, hâiwa ãma tinhib'a'uwẽ norĩ ma, iwẽ uptabi hã te te sô 're i'apisutu mono hã aima za'ra wa'aba zama aima 're hâimana mono da dasine, da'ãma 're isib'a'uwẽ mono zéb ãma hã rowa'a za'ẽne 're isa'wari u'âsi mono ãma hã.

Colosu 1:22

Tane nherẽ, i'ra hã dasiré a'uwẽ hâiba na dazada idâ'âzéb zarina, te oto ai'ãma 're siwadi za'ra wa'wa, romhutu'õmhã sisõ're te te asõré wa'aba da, aiwasédé hã da te ai'ãma sa'ra waihu'u aba õ wa za tamemhã oto, Cristu hã tidâ'âzém na aiwasédé te te aima 're i'apari aba mono zéb zarina.

Colosu 3:12

A norĩ wa'wa hã 'Re ihâimana u'âsi mono nhib'a'uwẽ, te tô oto 're aihâimana za'ra wa'aba mo. Ta hã te te 're asawi pese za'ra wa'aba mono wa, ma tô sima aipisutu za'ra wa'wa, taha ma si tãma 're aihâimana za'ra wa'aba mono da oto. Tahawa, da te 're robzépata za'ra mono wamhã, te za tô oto da'ãma 're aiwamri za'ra wa'aba mo. Te za duré 're idapawapto wẽ za'ra wa'aba mo. Asiré norĩ ma, aipire na 're aihâimana za'ra wa'aba mono na, 'râwi 're asi'madâ'â ze za'ra wa'aba mono õ di za. Aiwaimri te za dama 're aihâimana za'ra wa'aba mo. Duré aiwara sina dazada 're asahi za'ra wa'aba mono õ di za.

1 Tesalonita 2:12

Duré da te aima 're amhâzépa za'ra wa'aba mono nherẽ, wa tô ãma aima robze za'ra wa'aba ni iwasu'uwẽ na, aiwi 're robzei'õ tõ za'ra wa'aba mono da. Wa tô aima roti pese za'ra wa'aba ni, 'Re ihâimana u'âsi mono nho'a 're anomro wẽ wa'aba mono da, toi uptabi na te te 're ai'madâ'â za'ra wa'aba mono da. Ta hã ma tô te te sima 're aiwẽ za'ra wa'wa, hâiwa ãma ihâiba na rowa'a na isiré 're aihâimana u'âsi za'ra wa'aba mono da, rowẽ uptabi na.

1 Tesalonita 5:27

Wanhib'apito zadawa para, ĩmreme pire na wa aima nharĩ za'ra wa'wa, ã hã wa te aima irob'ui'éré za'ra wa'wa hã, dama 're sõré za'ra wa'aba mono da, isazei'wai mono bâ.

2 Tesalonita 1:11

Tahawa, Wanhib'apito 'Re ihâimana u'âsi mono wi, wa wa te 're rowaptẽrẽ u'âsi za'ra, iwẽ na te te 're aipawaptob za'ra wa'aba mono da, taha zarina, 're idanomro mono zép tém na 're anomro wẽ wa'aba mono da, te te aima 're ipisutu za'ra wa'aba mono zéb zarina si. Wa duré wa te tiwi 're rowaptẽrẽ za'ra, asimirosa'rata wẽ 'manharĩ'wai wa'wa hã, tiwaihu'u pese na te te aima ãma 're uwaimrami za'ra wa'aba mono da, marĩ hã, iwẽ si 're 'manharĩ za'ra wa'aba mono da, 're sazei pese za'ra wa'aba mono wa.

2 Tesalonita 2:14

Te te 're asõ'reptu za'ra wa'aba mono da, ma tô aipẽ'ẽ 're aima nharĩ za'ra wa'wa, iwasu'uwẽ, wa te aima wasu'u za'ra wa'aba wamhã, Wanhib'apito Zezu Cristuhu siré rowẽ uptabi ré 're aihâimana u'âsi za'ra wa'aba mono da, isine rowa'a za'ẽtẽ ré.

1 Timotiu 6:12

A hã isazei'wa, 're aimorĩ wa, te za sô 're asi'wapéi u'âsi mo, 're i'aimorĩ wẽ zéb zô, duré rowẽ u'âsi ãma 're aihâimana mono wa, hâiwa ãma hã asina uwaimrami da. Taha da, ma tô bâtâ na aipisutu 'Re ihâimana u'âsi mono hã, da'ahâ norĩ nho'a isazei'wa na asiwaihu'u wẽ zé para.

1 Timotiu 6:2

Ãté pawa'âbâ ãna dama romhuri'wa norĩ 'madâ'â'wa hã te za isazei'wa 're 'maimo. E tawamhã imreme hã te te 're 'madâ'â pese za'ra mono õ di za, isisãnawã ne tãma 're 'maihâimana mono nherẽ, i'madâ'â 'wa hã. Mare di. Isimiroti na te za te te 're wazéb za'ra. Isazei'wa 're 'maimorĩ wa, duré tãma sawi pese za'ra wa, te za ti'madâ'â'wai ma, te te tãma 're romhuri wẽ uptabi za'ra. Ãne na te aima 're iroti mono zéb zarina, te za isazei'wa norĩ ma 're i'aroti pese mo, ãma 're nomro wẽ mono da.

2 Timotiu 1:9

'Re ihâimana u'âsi mono hã ma tô te te 're wa'anho'reptu, rowasété hawi. Ma tô duré te te sima 're wa'apisutu, isib'a'uwẽ oto 're wahâimana za'ra mono da, wawẽ uptabi na. E marĩ wa, ma tô sima wa'apisutu. E marĩ iwẽ hã wa te dama 're 'manharĩ za'ra mono wa. Mare di. Taha wab õ di. Taré te te sima 're wa'awẽ mono wa, duré simizawi pese wa, ma tô te te 're wa'anho'reptu. Ma tô duré wa'ãma tinhib'a'uwẽ za'ra. Zahadu ropoto na te te sãna'rata õ ré, 'Re ihâimana u'âsi mono hã simizawi pese wa, ma tô sima wa'ãma roti siromo za'ra, te te 're wa'apawapto mono da, Cristu Zezusihi nhiminho'reptuzém na hã.

2 Timotiu 2:7

Ma'ãpé, ãma 're rosa'rata u'âsi mono, te aima irowasu'uzém na hã. Ãne wamhã, Wanhib'apito hã te za te te 're aipawapto, ãhã wasu'u na hã ãma 're awaihu'u mono da.

Hebreu 10:19

Ĩsisãnawã norĩ, Zezusihi wapru hã tiwi ipu'uzém na wazada idâ'âzéb zarina, wa za oto wasina wapahi ãna 'Re ihâimana u'âsi mono u hã 're wasihutu 'râwi wapẽ'ẽ na, robzei u'âsi tãma 're wamreme zusi mono da. Duréihã sasedoti norĩ hã, 'Re ihâimana u'âsi mono 're isãmra mono zéb u, 'ri 're wa'wa u 're isisisi mono ne, wa za oto wa norĩ hã 'râwi itẽme 're wasihutu, wasina 're wapahi za'ra mono ãna, tãma hã.

Hebreu 10:21

Sasedoti ipire uptabi na hã te oto duré wama 're hâimana za'ra. Taha si te oto tãma hã duré umnhasi na uburé 'Re ihâimana u'âsi mono nhib'a'uwẽ norĩ hã te te 're ab'madâ'â, pire uptabi na.

Hebreu 10:23

'Re ihâimana u'âsi mono hã wama umnhasi za'ra di, te te wama 're i'aropisutu mono zéb uwaibaba, te te wama ãma 're i'a'uwaimrami mono da hã. Tahawa, wanhiptete sina wa za iwẽ uptabi zô 're wanhimipari u'âsi za'ra, 'Re ihâimana u'âsi mono hã te te wama iropisutu za'ra zém na wa te 're wawã za'ra mono ãna, sena na za wama 're ihâimana za'ra mono na wa te dama 're iwasu'u za'ra mono zéb zarina.

Hebreu 13:22

Ĩsisãnawã norĩ, ã te aima ãma iroti za'ra wa'aba zém na, ma'ãpé aiwaimri ãma rosa'rata pese za'ra wa'aba za. Taha da, wa tô ĩmreme 'rutu na ãma aima rowasu'u za'ra wa'wa, ã ĩnhimi'ui'éré na hã.

Hebreu 2:11

Zezusi hã ma tô dawasédé hã te te dama 're apari. Taha zarina te iwasédé te te tãma 're i'apari mono norĩ ma, isiré misire Imama za'ra na hã tô õhõ si tãma 're hâimana za'ra. Tahawa, Zezusi hã ãma 're sisé mono õ di, ta norĩ hã tisisãnawã na za te te 're anhisi mono na dâ'âsina, 'Re ihâimana u'âsi mono hã misire Imama za'ra wa, simisutu. Te za tô tisisãnawã na te te 're anhisi, Zezusi hã.

Hebreu 2:17

Tahawa, tisisãnawã norĩ me, aiwa uptabi a'â 're hâimana mono da, ma tô si'a'uwẽ Zezusi hã, sasedoti 'Re ihâimana u'âsi mono ma, da'ãma romhuri'wa tisiré norĩ nhipai u ipire uptabi ne 're hâimana mono da, tãma umnhasi na te te tãma 're romhuri mono da, da'ãma pẽ'ẽzé uptabi sina. Taha da, ma tô si'a'uwẽ tô, taha zarina dawasédé hã te te oto dama 're apari mono da. Ta hã dasiré si'a'uwẽ õ 'wa'âhã, ãne hã te te aré sina uwaimrami waihu'u õ di, 'Re ihâimana u'âsi mono ma hã.

Hebreu 3:12

Ĩsisãnawã norĩ, 'râwi te za 're asi'madâ'â pese za'ra wa'aba mo, 'Re ihâimana u'âsi mono nhimiroti hã asimirosa'rata wasété aba zarina, asiwi 're wẽ'õ za'ra wa'aba mono wa, tiwi 're aipizari za'ra wa'aba mono tõ da, aré i'rata 're dasi'ubumroi u'âsi mono da, dapisutu'wai wi hã.

Hebreu 3:14

Wa norĩ hã Zezusi, wa te 're isaze na'rata za'ra mono zém hawi, wa tô wa te 're umnhasi za'ẽtẽ za'ra. Ta hawim haré, 're iwadâ'â za'ra mono zéb u, wa te wasina 're umnhasi u'âsi za'ra mono wamhã, tawapsi wa za Zezusihi siré 're wahâimana u'âsi za'ra, isine dama wapire na wa te 're da'madâ'â u'âsi za'ra mono da.

Hebreu 6:20

Zezusi hã wa'udâna ma tô tamomo ãzé, wawana za'ra. Ta hã te oto sasedoti ipire uptabi na dama 're hâimana u'âsi, 'Re ihâimana u'âsi mono ma, da'ãma romhuri'wa na. Duréihã Mequizédéqui hã sasedoti na pire na dama 're ihâimana mono ne, te oto Zezusi hã pire uptabi na dama 're hâimana u'âsi.

Hebreu 7:26

Tahawa, te oto õhõ si sasedoti ipire uptabi na hã wama 're hâimana za'ra, Timama ma, te te wa'ãma 're romhuri mono da. Taha si te 're timorĩ wẽ uptabi. Õhõ si ma tô 'Re ihâimana u'âsi mono hã te te 're wẽsãmri, marĩ te te 're ab'manharĩ wasété mono õ wa. Tahawa, iwasédé hã sena na da te ãma 're sa'ra waihu'u za'ra mono õ di. 'Re ihâimana u'âsi mono hã ma tô tãma pisutu, ti'ai ãma dawasété na 're idanomro mono norĩ nhiti 're sãmra mono da oto, hâiwa ãma danhipai u dama pire uptabi na 're hâimana u'âsi mono da.

Hebreu 7:28

Duréihã 'Re ihâimana u'âsi mono nhimiroti 'rata na Mozési te te ãma irob'ui'éré zarina, ma tô sasedoti da, te te 're da'apisutu, 'Re ihâimana u'âsi mono hã. 'Re danomro wasété mono wa, danhib'uware na 're dahâimana za'ra mono nherẽ, ma tô ãne da hã te te 're da'apisutu. Tane nherẽ, ma tô 'Re ihâimana u'âsi mono hã timreme pire na ti'ra ma ropisutu, taha si sasedoti na misi wama 're hâimana za'ra mono da oto. Ta hã te uburé marĩ hã Imama te te tãma 're i'apisutu mono zéb zarina, te te tãma ãma 're a'uwaimrami u'âsi, Timama ma hã.

Hebreu 9:11

Cristu hã ma tô oto sisasedoti tô, sasedoti ipire uptabi na dama 're hâimana mono da, 're idanomro mono zép té hã iwẽ uptabi hã te te dama 're ab'madâ'â mono da oto. Tawamhã hâiwa ãma 'ri hã, 'Re ihâimana u'âsi mono hã iwa 're isãmra mono zéb u, ma tô oto ãzé Cristu hã, danhib'rata na da te dasiwi i'ri õ u, ropoto wazari ti'ai ãma 're isa mono õ u. Ti'ai ãma romhâ 'manharĩ na 'ri nhipai u, wẽ uptabi di 'ri, hâiwa ãma hã. Pire uptabi na te ta hã 're sab u'âsi.

Hebreu 9:15

Tahawa, te oto Cristuhu si te te da'ãma 're ab'madâ'â, 'Re ihâimana u'âsi mono te te dama iropisutuzép té hã. Tidâ'âzém na ma tô da'awa'â Cristu hã, dawasété na 're idanomro mono zém hawi te te oto 're da'anho'reptui mono da, zahadu 'Re ihâimana u'âsi mono te te dama iropisutuzéb 'rada hã dama 're hâimana mono ré. Taha zarina te za oto 'Re ihâimana u'âsi mono hã tinhib'a'uwẽ da, te te 're i'apisutu mono norĩ hã te te sima 're awaibu, iwẽ uptabi na te te tãma 're i'aropisutu mono zéb ré si, 're hâimana u'âsi za'ra mono da iré, ta norĩ hã.

1 Pedru 2:9

Tanei õ di, a norĩ wa'wa hã. 'Re ihâimana u'âsi mono, ma tô sima aipisutu za'ra wa'wa, isib'a'uwẽ si oto tãma 're anomro aba mono da. Sasedoti norĩ hã te te sima 're i'apisutu mono ne, te oto a norĩ wa'wa hã uburé Danhib'apito ma romhuri'wa, 're anomro aba mo, õhõ ãma si 're anomro aba mono da, ite da. Ta hã robra hawi ma tô rowa'a u sitẽme asô tihârâ za'ra wa'wa, 're anomro wasété aba mono zém hawi, rowẽ uptabi na si 're anomro aba mono da oto. Taha wasu'u na, tiwaihu'u pese na te te aima ãma 're i'uwaimrami wẽ za'ra wa'aba mono zém na, ma tô sima aipisutu za'ra wa'wa, ãma 're dapo're pu'u u'âsi za'ra wa'aba mono da.

1 Pedru 3:5

Ãne si ma tô wahi'rata sipi'õ norĩ hã 're nomro, 're ihâimana wẽ za'ra mono norĩ hã. 'Re ihâimana u'âsi mono si, ma tô ta norĩ hã te te sina 're umnhasi za'ra, te te 're pawapto wẽ za'ra mono da. 'Re inomro wẽ mono na, ma tô duré ta norĩ hã sina 're sõpré. Tahawa, ma tô timro mreme si te te 're wapari pese za'ra.

1 Pedru 5:1

Da'madâ'â'wa norĩ, ãhã na wa za aima ĩsiwasu'u za'ra wa'wa. Wa hã da'madâ'â'wa, wa duré 're ĩhâimana. Cristu hã te te robzépata wamhã, wa tô ĩtõmo na 'madâ, te te irobzépatazé hã. Wa hã wa za duré isazei'wa norĩ siré, rowẽ uptabi hã ĩsina waihu'u hâiwa ãma, rowẽ uptabi hã sõ'awi te te wama pisutu za'ra wapsi, Wanhib'apito hã.

1 Pedru 5:10

Tane nherẽ, 're robzépata hâ za'ra wa'aba mono õ ré, rowẽzé hã te za te te aima ãma 're a'uwaimrami 'wa, 'Re ihâimana u'âsi mono hã. Taha si te za te te 're asiptete u'âsi za'ra wa'wa, tiwaihu'u pese na, asiptete u'âsi ãma 're aihâimana za'ra wa'aba mono da. Õhõ ma si te isimizawizé hã sa'ẽtẽ na tãma 're hâimana. Tahawa, ma tô sitẽme asô tihârâ za'ra wa'wa, rowẽ isi'utõrĩ'õ ãma isiré 're aihâimana u'âsi za'ra wa'aba mono da, Cristuhu nhib'a'uwẽ oto 're anomro aba mono wa.

1 Zuwã 1:3

E marĩ da, wa ãne aima rowasu'u za'ra wa'aba ni, wa te 're i'madâ'â za'ra mono zém na hã, duré wa te 're iwapari za'ra mono zém na zama. Wamama siré 'râwi 're iwahâimana za'ra mono ne, duré i'ra siré Zezu Cristuhu siré 'râwi 're iwahâimana za'ra mono ne, a norĩ wa'aba zama isiré 're aihâimana za'ra wa'aba mono da, wa ãne aima waihu'u za'ra wa'aba ni.

Zuda 1:1

Wa hã Zuda, Zezu Cristuhu ma romhuri'wa, Tiaguhu no, wa aima ãma rob'ui'éré za'ra wa'wa. 'Re ihâimana u'âsi mono hã ma tô te te 're aipisutu za'ra wa'wa, isib'a'uwẽ na oto tãma 're aihâimana za'ra wa'aba mono da. Tahawa, tãma asawi pese za'ra wa'aba di, Wamama ma hã. Duré Zezu Cristu hã te te oto 're ai'madâ'â pese za'ra wa'wa.

Apocalipsi 17:14

Te za duré ropoto siwamnarĩ siré siwi 'wapé, Pone'ẽrebâ hã. Tane nherẽ, te za Pone'ẽrebâ hã ãma ai'uté za'ra. Ta hã Pone'ẽrebâ danhipai u Uburé Danhib'apito uptabi na 're hâimana mono wa, duré danhipai u dama pire na 're hâimana mono wa, te za ãma ai'uté za'ra. Ni'wam norĩ hã isirã zarina si 're nomro mono da, Pone'ẽrebâ te te 're i'apisutu mono norĩ hã, duré simi'ẽ na õhõ ãma si 're inomro mono norĩ hã, te za Pone'ẽrebâ siré ãma ai'uté za'ra, ropoto siwamnarĩ norĩ ãma hã.

Apocalipsi 18:20

Ãne te i'awapari mono hã, ĩnhotõ 'rowim ne, ĩpo're na. Tahawa, ma'ãpé hâiwa ãma 're aihâimana za'ra wa'aba mono hã ãma 're atoi u'âsi za'ra wa'aba mono, 'ri nho'õmo za'ẽne hã isi'utõrĩzém na. Duré 'Re ihâimana u'âsi mono nhib'a'uwẽ norĩ, ma'ãpé 're atoi u'âsi za'ra wa'aba mono, isadawa wasu'u'wa norĩ zama, duré Cristuhu zadawa wasu'u'wa norĩ zama. E marĩ wa. Babilonia ãma da te aima 're rob'manharĩ wasété za'ra wa'aba mono wa, 'Re ihâimana u'âsi mono hã te te da'uprosi wa oto. Tahawa, te za ãma 're atoi u'âsi za'ra wa'aba mo.