Hebreu 2:8 - ꞌRe Ihâimana Uꞌâsi Mono Zadawa Wasuꞌu

⁸ Ma tô duré dama ipisu oto, uburé marĩ hã niwapsi da te 're 'madâ'â za'ra mono da, dapire na.” 'Re ihâimana u'âsi mono hã ma tô oto dama pisutu, niwapsi uburé marĩ hã da te 're i'madâ'â za'ra mono zéb da hã, dapire na. Marĩ hã taré 're 'maihâimana mono õ di za, da te 're i'madâ'â za'ra mono õ na hã. Tane nherẽ, zahadu uburé marĩ hã da te 're 'madâ'â za'ra mono õ di, ti'a 're dahâimana za'ra mono ré hã.

Hebreu 2:8 ပူးပေါင်းရင်းမြစ်များ

Salmu 2:6

Tawamhã te ãne tinha: “Apito da, te ipisudu hã wa tô dasimasisizé ipire na hã tisã, Siã ẽtẽ 'rãihâ nhisi ĩte iwazéb zahi ãmamhã.”

Salmu 8:6

Uburé asimipoto norĩ ma, siptete na 're hâimana za'ra mono da hã, ma tô i'apisu. Ma tô duré uburé marĩ hã ipara 'rowib za'ra i'anhoré mo,

Daniéu 7:14

Ma tô isimiroti pire na 're ihâimana mono zé, duré apito wa, da te ãma 're iwazé mono zé duré te te 're ida'a'madâ'â mono zé hã tãma pisutu ni. Tawamhã dapoto mono bâ, duré daro mono bâ 're idahâimana za'ra mono hã, duré damreme mono bâ 're idamreme zusi mono hã ma tô uburé ãma 're dawata za'ra. Ĩsiptetezé hã isi'utõrĩ waihu'u'õ. Duré te te 're ida'a'madâ'â mono zé isi'utõrĩ waihu'u'õ na.

Mateu 28:18

Tawamhã Zezusi hã ma tô 'râwi itẽme timorĩ za'ra oto. Taha wamhã, ma tô tãma nharĩ za'ra, ãne: — Ĩmama hã ma tô ĩma pisutu, isadawa para dama ĩpire na 're ĩhâimana mono da, ti'ai ãma, duré hâiwa ãma zama.

Zuwã 13:3

Zezusi hã ma tô Imama hã pisutu, dama pire da. Uburé marĩ ma, pire da, ma tô pisutu, ti'ai ãma hâiwa ãma zama. 'Re ihâimana u'âsi mono hawi, ma tô wei mo. Apâ te za oto itẽme mo. Ãne ma tô sina waihu'u siro, Zezusi hã.

Zuwã 3:35

Ti'ra te te 're sawi pese uptabi, 'Re ihâimana u'âsi mono hã. Tawamhã ma tô pisutu, uburé dama pire uptabi da. Duré uburé marĩ ma pire da, ma tô ti'ra hã pisutu, hâiwa ãma ti'ai ãma zama.

1 Corĩtu 15:27

Duréihã apito Dawi hã ma tô ãne na ãma rob'ui'éré siro, Cristuhu ãma: “Ta hã ma tô 'Re ihâimana u'âsi mono hã pisutu, uburé marĩ hã pire na te te 're ab'madâ'â mono da, siwaprosi.” E tawamhã, pire na dama 're ihâimana mono zéb da, Cristuhu pisutu'wai ma zama, te za pire na tãma 're hâimana, 'Re ihâimana u'âsi mono ma. Mare di. Taha ma zama, te te wasu'u õ di, ãne hã. Tizapari'wai ma si, ma tô pisutu, 'Re ihâimana u'âsi mono hã. Ãhã wasu'u hã wama pibui pese za'ra di oto.

Hebreu 1:13

Ãne ma tô duré 'Re ihâimana u'âsi mono hã tãma waihu'u siro: “Ĩ'rata te za 're asãmra u'âsi mo ĩnhimire niwĩ, dama aipire na ĩsiré 're aihâimana u'âsi mono da. Asitob'ru norĩ nhiptetezé hã wa za tiwi uprosi za'ra, wapu na aima 're hâimana za'ra mono da oto, duré aima sib'uware na 're hâimana za'ra mono da oto.” Tawamhã e hâiwa ãma tãma iromhuri'wa norĩ ma, ma tô ãne hã waihu'u za'ra, 'Re ihâimana u'âsi mono hã. Mare di. Ti'ra ma si, ma tô ãne hã waihu'u siro, ta norĩ ma, pire u'âsi 're hâimana mono wa za, Zezusi hã.

Hebreu 1:2

Tane nherẽ, ti'ra si ma tô oto pisutu, isadawa nhipai u te te oto wama ãma 're irowasu'u za'ra mono zéb da hã, rob'rãsutuzéb u romhutu na za 're iwahâimana za'ra mono norĩ ma. Taha si ma tô Timama zadawa para uburé te te ro'apoto. Taha si ma tô duré pisutu Imama hã, niwapsi uburé roptede'wa na 're hâimana mono da oto.

Hebreu 2:5

Za 're idahâimana téb za'ra mono na, wa tô aima ãma rowasu'u pari za'ra wa'wa. E tahawa, te za hâiwa ãma tãma iromhuri'wa norĩ hã pisutu za'ra 'Re ihâimana u'âsi mono hã, ta norĩ hã pire na te te 're da'madâ'â za'ra mono da, za 're idahâimana téb za'ra mono ãma hã. Mare di. Ta norĩ hã danhib'apito da, te te pisutu za'ra õ di.

1 Pedru 3:22

Cristu hã hâiwa u morĩ wa, te oto pire na Timama nhimire niwĩ 're sãmra, Danho'reptui'wa hã. 'Re ihâimana u'âsi mono ma romhuri'wa norĩ 'madâ'â'wa, te 're hâimana. Uburé hâiwa nho're ãma, pire na duré waihu'u pese na 're ihâimana za'ra mono norĩ ma zama, te pire uptabi na hã tãma 're hâimana za'ra.

Apocalipsi 1:18

Wa tô dârâ aré. Ĩdâ'â nherẽ, wa oto tô 're ĩhâimana u'âsi. Duré oto ĩdâ'â waihu'u õ di za. Ma'ãpé, ãne na hã awaihu'u pese. Te ĩsima ipisutuzéb zarina, wa te te 're da'anho'reptu, adâ 're ihâimana za'ra mono zém hawi, 'Re ihâimana u'âsi mono 'rata, oto 're dahâimana u'âsi za'ra mono da.

Apocalipsi 1:5

Zezu Cristuhu zama te te 're aipawaptob u'âsi za'ra wa'aba mono da, wa duré ai'ãma te 're rosa'rata u'âsi za'ra wa'wa. Ta hã dama i'umnha, te simi'ẽ na 're hâimana, 'Re ihâimana u'âsi mono zadawa wasu'uwẽ 'wa da hã. Ta hã ma tô dawana tihâiwa'utu 'rata, ihâiba si'utõrĩ waihu'u õ na. Uburé ti'ai ãma danhib'apito norĩ nhipai u, Zezusi hã te 're hâimana. Misi Danhib'apito uptabi na, te tô 're hâimana. Ta hã te te 're wa'azawi pese. Tahawa, ma tô wazada dârâ. Wazada dâ'â wamhã, iwapru ma tiwi puru. Tawamhã wawasété na 're wanomro mono ré, ma tô tiwapru na tidâ'âzém na te te 're wa'a'upsõ, wawasété ãna ãma 're wanomro mono da oto.