Hebreu 13:5 - ꞌRe Ihâimana Uꞌâsi Mono Zadawa Wasuꞌu

⁵ Rob'uiprazéb zawizé, te te aima 're roti za'ra wa'aba mono tõ da, tãma asina 're rowairébé za'ra wa'aba mono õ di za. Asibro hã aima 're ihâimana za'ra wa'aba mono na si, te za asima 're irowẽ za'ra wa'aba mo. Duréihã 'Re ihâimana u'âsi mono hã ma tô ãne dama sina ropisutu: “Niwamhã te airẽme za'ra wa'aba õ di za. Duré asiwaprosi 're aihâimana za'ra wa'aba mono da, asiti za'ra wa'aba 're ĩhâimana waihu'u mono õ di za.”

Hebreu 13:5 ပူးပေါင်းရင်းမြစ်များ

Zenezi 28:15

Wa hã wa za asiré 're ĩhâimana u'âsi. Wa za duré ai'wawimhã 're ĩsimapa, nimomo 're ane mono sidâpâsi. Wa za duré ã hã ti'ai u we apâ ai'ãma siri. Te i'airẽme da hã mare di, uburé ĩnhimiropisutuzé te aima ãma i'uwaimramizéb u.

Zenezi 30:31

Tawamhã Labã te duré ãma sadanha ãne, tô õhõ na: — E niha te asima iwẽ, za nasi te aima iwa'âbâzéb da hã. Tawamhã Zaco, ma te ãma sada'â ãne: — Te ĩsima wẽ õ di, dapawa'âbâzé hã. Wa za tô asimizama 'madâ'â na romhuri na ãma aima uzusi za, ãne na ĩnhimirosa'rada te aima ipibuzém na ãma ĩzaze da hã wamhã.

Zenezi 31:5

Tawamhã itẽme simasisi wamhã, te ãne tãma nharĩ zahuré: — Aimama 'wa ĩsiwaihu'u na imorĩ'rata na ĩma ihâimana nei õ na isihâi'rézém na wa tô 'madâ'â waihu'u. Tane nherẽ, ĩmama te, 'Re ihâimana u'âsi mono hã te ĩsiré 're hâimana u'âsi.

Salmu 10:3

Iwasété norĩ hã te mreme nhiséb ãna marĩ iwasété si te te sima 're i'ruiwapari za'ra mono na 're mreme zusi, isi'madâ'â ze zéb zarina. Duré danhimarĩ zô hâimana nhipese sina te te sima 're ida'wani za'ra mono norĩ hã, te Uburé Danhib'apito ãma te te 're wasété za'ra.

Salmu 119:36

Ĩma 're 'manharĩ mono, asimiroti si te 're 'madâ'â pese mono da, 're ĩsisibro pese mono zô si, te ĩsima 're irob'ruiwapari mono upana, ãma 're ĩhâimana wẽ mono da, taha na si.

Ezodu 2:21

Tawamhã Zetru, Mozési te hâiba waptẽ, i'rata 're hâimana mono da. Tahawa, ma tô sina saze, tô i'rata 're hâimana mono da hã. Tawamhã Zetru ma tô ti'ra Zipora na isisi Mozésihi ma tisõ, ãma mro da.

Ezodu 20:17

— Asiré nhorõwa hã 're 'ruiwapari za'ra wa'aba mono tõ. Duré asiré mro hã 're 'ruiwapari za'ra wa'aba mono tõ, pawa'âbâ ãna tãma romhuri'wa norĩ zama, ite powawẽ hã, duré ite awaru po're pore hã. Siwa'ru uburé marĩ tãma 're ihâimana za'ra mono hã 're 'ruiwapari za'ra wa'aba mono tõ.

Provébiu 23:4

Asisibro pese da, 're asipãrĩ mono tõ, romhuri na hã. Asimiza'rese wẽ zarina te za ãma 're irosahâri mo.

Mateu 6:19

— Marĩ iwa'âbâ za'ẽne hã asima si 're ubumroi pese za'ra wa'aba mono õ di za, ti'a 're anomro aba mono ré. Ti'ai ãma marĩ na 're idanhimarĩ za'ra mono hã si'utõrĩ pese di, dawi 're u're su'u za'ra mono wa, duré zazahâi hâzapu'u'wa hã te te dawi 're hâiwasété za'ra mono wa. Isipsaihuri norĩ hã te za duré dawi sô 're sisisi, dawi ãma 're simisaihuri za'ra mono da, danhimarĩ na.

Mateu 6:25

— Tahawa, wa za duré ãne aima waihu'u za'ra wa'wa. Marĩ na 're aihâtâ'â za'ra wa'aba mono õ di za, asazé wa'aba na, duré 're i'âhuri wa'aba mono õ na zama. Duré ai'uzazém na zama, asina 're aihâtâ'â za'ra wa'aba mono õ di za. E taré wasa zô si wa za 're wahâimana za'ra. Mare di. Wasazé nhipai u pire uptabi di, wahâimanazé hã. E taré 're iwasi'uza za'ra mono zép si, te wahâiba hã wama 're hâimana za'ra. Mare di. Marĩ iwẽ uptabi da, te wahâiba hã wama 're hâimana za'ra.

Mateu 6:34

Awẽ sidâpâsi te marĩ hã asada 're hâimana za'ra wa'wa. Tane nherẽ, oto ai'ãma 're awẽ za'ra wa'aba mono wamhã, te za asina 're iwaihu'u za'ra wa'aba mo, 'Re ihâimana u'âsi mono te te 're i'aipawaptob za'ra wa'aba mono zém na hã, marĩ hã asada 're hâimana za'ra wa'aba mono nherẽ. Tahawa, za duré ai'ãma 're i'awẽ za'ra wa'aba mono zé bâtâ na hã 're aihâimana za'ra wa'aba mono zém na hã, asina 're aihâtâ'â za'ra wa'aba mono õ di za. 'Re ihâimana u'âsi mono si te za awẽ sidâpâsi bâdâ hã te te ai'ãma 're ab'madâ'â 'wa.

Luca 3:14

Tawamhã da'wapéi'wa norĩ hã te duré siwi 'mahâ, ãne: — Wa norĩ hã bété, e marĩ, wa za 'manharĩ za'ra ni, iwẽ hã, 'Re ihâimana u'âsi mono te te wama rob'manharĩ za'ra tõ da hã. Tawamhã asa te tãma nharĩ za'ra, duré ãne: — Asiptete na, rob'uiprazé dawi 're waibu za'ra wa'aba mono õ di za. Duré asadawa nhipese na, rob'uiprazé hã dawi 're waptẽrẽ za'ra wa'aba mono õ di za. Duré aipawa'âbâ 'wa hã 're iwaibui aba mono na hã te za asima ãma 're irowẽ za'ra wa'aba mo.

Luca 8:14

Duré amnho hã wab'ru wazari i'a'a mono hã, aimawi a'uwẽ, te wasu'u. Ta norĩ hã ãté te za taré tipo're na te te 're wapari za'ra, isadawa wasu'u hã. Tazahã, marĩ wamhã, õhõ ãma si 're nomro mono õ di za. Ãté, marĩ na si te za te te 're rosa'rata za'ra sima, ãté rob'uiprazém na si, ãté titozém na si. Tawamhã rob'rã i'rã wẽ prã ne, 're hâimana wẽ uptabi za'ra mono õ di za.

Roma 1:29

Ta norĩ hã wasété uptabi na te 're hâimana za'ra. Marĩ zô si te te sima 're rob'ruiwapari za'ra. Te duré te te dama 're rob'manharĩ wasété za'ra. Marĩ na te te duré 're da'ruiwapari u'âsi za'ra. Te duré te te 're danhimro. Siti'ru sina, te ta norĩ hã dazô 're nomro, te te dama 're nharĩ za'ra mono da. Sadawa nhipese uptabi na, te 're hâimana za'ra. Niha te te dama 're rob'manharĩ za'ra mono da, te da'ãma te te sima 're rosa'rata wasété u'âsi za'ra. Taré te te duré sima 're dabâsi wasété u'âsi za'ra.

1 Corĩtu 5:11

Ãne si, wa tô aima roti za'ra wa'wa, ni'wam norĩ hã Zezusihi zazei'wa na dama 're siwasu'u za'ra mono nherẽ, 're hâimana wasété za'ra mono wamhã, ta norĩ hâimanazém na ãma 're asapa'a za'ra wa'aba mono tõ da. Ãté isazei'wa na dama 're siwasu'u za'ra mono nherẽ, te pi'õi hâiba na tiwasédé te te 're 'manharĩ za'ra, aibâ wamhã. Duré pi'õi wamhã, ãté aibâ hâiba na te tiwasédé te te 're 'manharĩ za'ra. Duré ãté 're simarĩ ahâ za'ra mono da si, te danhibrom na te te 're da'ruiwapari za'ra. Duré ãté 'Re ihâimana u'âsi mono upana, te romhâiba 'manharĩ ãma si 're wata za'ra. Duré ãté dawasédé hã taré te te da'ãma 're isa'ra mono na, te ta norĩ hã te te dama 're rowasu'u wasété za'ra. Ãté âzézei'wa te duré 're hâimana za'ra. Ãté danhibrom na te duré dawi 're sipsaihuri za'ra. Ãne hã ni'wam norĩ hã zahadu tihâimana wasété na 're hâimana u'âsi za'ra mono nherẽ, asiré isazei'wa na aima 're siwasu'u za'ra wa'aba mono wamhã, ihâimanazém na ãma 're asapa'a za'ra wa'aba mono õ di za. Duré nimahã bâtâ na isiré 're asaihuri aba mono da hã, mare di za.

2 Corĩtu 4:9

Wazada hã ahâ di wanhitob'ru norĩ hã. Tane nherẽ, da te 're iwarẽme za'ra mono na 're wahâimana za'ra mono õ di. Te duré da te 're wa'ahâri sa'ẽtẽ uptabi. Tane nherẽ, wazô 're rob'é'é waihu'u mono õ di.

Éfézu 5:3

A norĩ wa'wa hã 'Re ihâimana u'âsi mono nhib'a'uwẽ 're anomro aba mono nherẽ, siwa'ru aiwasédé hã 're 'manharĩ za'ra wa'aba mono õ di za, pi'õ na, duré aibâ na zama. Duré aihâimana nhiséb'õ na 're anomro aba mono õ di za. Duré danhibrom na 're da'ruiwapari za'ra wa'aba mono õ di za, ta hã i'uwaibaba õ wa 're idahâimana wasété za'ra mono zé hã.

Éfézu 5:5

Tahawa, te za oto iwaihu'u za'ra wa'wa, ãne: Sina 're isimisaihuri za'ra mono norĩ hã, duré dahâimana nhiséb'õ na 're inomro mono norĩ hã itẽme 're sisisi mono õ di za, 'Re ihâimana u'âsi mono u hã, duré Cristuhu u hã, da'ãma 're isib'a'uwẽ zahuré mono zéb u hã. Duré danhibrom na te te 're ida'ruiwapari za'ra mono norĩ zama itẽme 're sisisi mono õ di za, marĩ zô si te te sima 're rosa'rata u'âsi za'ra mono wa ta norĩ hã, 'Re ihâimana u'âsi mono upana. Tahawa, duré ta norĩ hã marĩ iwẽ na tinhib'a'uwẽ norĩ ma te te iropisutuzéb ré, 're hâimana za'ra mono õ di za.

Colosu 3:5

Ti'ai ãma isazei'õ'wa norĩ hâimanazéb zarina, marĩ wasété zô 're irob'ruiwapari za'ra wa'aba mono zé hã te za 'râwi asiwi 're i'uprosi pese za'ra wa'aba mo, 're dadâ'â za'ra mono wa, marĩ zô da te oto 're irob'ruiwapari za'ra mono õ ne. Pi'õ na aibâ na zama siwa'ru aiwasédé, 're i'manharĩ za'ra wa'aba mono zé hã te za 'râwi 're i'uprosi pese za'ra wa'aba mo asiwi, duré asisô 're irowasutu za'ra wa'aba mono zé hã, duré marĩ wasété zô si asima 're irob'ruiwapari za'ra wa'aba mono zé hã, duré danhipai u asibro pese na 're aihâimana za'ra wa'aba mono da, marĩ zô si asima 're i'asõpré wa'aba mono zé hã. Ãne hã 'Re ihâimana u'âsi mono ma, wẽ õ di, marĩ zô i'upana asima 're irob'ruiwapari za'ra wa'aba mono zé hã. Tahawa, te za tô uburé aiwasédé hã asiwi 're i'uprosi pese za'ra wa'aba mo, aiwi 're si'utõrĩ pese za'ra wa'aba mono wa, 're anomro wẽ wa'aba mono da oto.

1 Timotiu 3:3

Duré âzézei'wa, 're nomro mono õ di za. Duré da'ahâri zei 'wa, 're hâimana za'ra mono õ di za. Simizawi pese uptabi na, te za dama 're hâimana za'ra. Duré rob'uiprazéb zô si te te sima 're rob'ruiwapari za'ra mono õ di za.

Zozué 1:5

Tawamhã niwamhã da te ai'ãma i'ai'uté da hã mare di za. E marĩ wa. Wa hã za asiré 're ĩhâimana u'âsi mono wa, Mozésihi siré 're ĩhâimana mono ne. Niwamhã te airẽme õ di za.

Zozué 7:21

Marĩ hã te iwaibu za'ra 'remhã, wa tô Babilonia hawi da'uza ihâpa iwẽ hã 'madâ. Duré ẽtẽ waipo prã prata zama wa tô 200 na iwa'õno hã 'madâ, duré ẽtẽ waipo pré oru aiwa ãma isipo'o na ipire pibuzém na hã. Ã norĩ hã ĩma 'ruiwapari za'ẽtẽ wa, wa tô ĩsima sa'ra za'ra. Ĩte romhâ 'manharĩ na 'ri 're, te daba'wara simi'uri pese na, ti'ai 'rowi. Da'rowimhã prata hã te duré daba'wara.

2 Pedru 2:14

Senai'õ na rowasu'u'wa norĩ hã te pi'õ iwasété norĩ zô te te 're rob'madâ'â u'âsi za'ra. Ta norĩ ma hã wẽ za'ra di, tiwasédé hã te te ãma 're i'manharĩ u'âsi za'ra mono zéb da hã. Hâimana nhipese na te ta norĩ hã 're nomro, da te ãma 're sasõmri za'ra mono da. Tawamhã ni'wam norĩ hã siptete sina Wanhib'apito ãma 're nomro mono õ wamhã, te za ta norĩ ãma te te 're sasõmri za'ra. Duré senai'õ na rowasu'u'wa norĩ hã te tinhimarĩ wẽ zô si, te te sima 're rob'ruiwapari u'âsi za'ra. Tahawa, ta norĩ hã tãma wẽ õ di, 'Re ihâimana u'âsi mono ma hã.

2 Pedru 2:3

Tô senai'õ na rowasu'u'wa norĩ hã te za taré rob'uiprazéb zô, tinhimirosa'rata na si, marĩ na te te aima 're rowasu'u za'ra wa'wa. Tane nherẽ, ta norĩ hã iwasété na 'Re ihâimana u'âsi mono ma, waihu'u pese di. Tahawa, isimihâzé wi, 're sisõ'reptu waihu'u za'ra mono õ di za.

Zuda 1:11

Ta norĩ ma, tãma ropipa uptabi za'ra di za, duréihã Caĩ, 're ihâimana wasété mono zém ne, 're hâimana za'ra mono wa. Duré Balaã hã rob'uiprazéb zô 're imorĩ wasété ne, te te 're rob'ruiwapari za'ra mono wa, tãma 're ropipa uptabi za'ra mono di za. Duréihã Cora hã ma tô ti'madâ'â'wa hã wẽ'õ, 'Re ihâimana u'âsi mono nhimipisutu nherẽ. Tane te duré aibâ iwasété norĩ hã isazei'wa norĩ 'madâ'â'wa norĩ nhimiroti hã te te 're wẽ'õ pese za'ra, 'Re ihâimana u'âsi mono nhimipisutu nherẽ. Tahawa, Cora isi'utõrĩ ne te za duré ai'utõ za, aibâ iwasété norĩ hã.

1 Samuéu 10:7

Tawamhã ãne hã marĩ aima hâimana wamhã, uburé marĩ hã i'uwaibaba si 're ab'manharĩ mono za. E marĩ wa. 'Re ihâimana u'âsi mono hã za aime 're hâimana mono wa.

1 Samuéu 12:22

Tawamhã Wanhib'apito 'Re ihâimana u'âsi mono nhisi za'ẽtẽ zarina ma tô ropisutu, te te airẽme za'ra wa'aba tõ da hã. E marĩ wa. Tãma wẽ uptabi wa, ai'ãma isib'a'uwẽ za'ra wa'aba da hã.