Hebreu 11:6 - ꞌRe Ihâimana Uꞌâsi Mono Zadawa Wasuꞌu

⁶ Ni'wam norĩ hã 'Re ihâimana u'âsi mono te te sina 're umnhasi za'ra mono õ nherẽ, ta norĩ ma hã, 're toi mono õ di za, 'Re ihâimana u'âsi mono hã. Duré ni'wam norĩ hã 'Re ihâimana u'âsi mono ãma 're wata za'ra mono da, tipẽ'ẽ na 'râwi itẽme 're sihutu mono da, te te sima 're wẽ za'ra mono wamhã, tô sena 're ihâimana mono na, te za te te 're saze za'ra a'â. Duré 'Re ihâimana u'âsi mono zô si 're isõpré mono norĩ ma, iwẽ na za te te ta norĩ ma iwa'âbâ za'ra na, te za ta norĩ hã te te sina 're umnhasi u'âsi za'ra.

Hebreu 11:6 ပူးပေါင်းရင်းမြစ်များ

Zenezi 15:1

Tawamhã ãhã parip si Abrã ma tô sõtõ 'rowim ne marĩ 'madâ. Taha na te Uburé Danhib'apito ãne tãma tinha: — Abrã, aipahi tõ. Marĩ isimimnhasi wi wa za wa hã 're ĩsimapa, ai'wawi. Duré iwẽ wa za te aima 're anhomri.

Salmu 119:10

Wa hã wa ĩpẽ'ẽ na niha na ai'ãma si 're ĩmorĩ da hã ĩsima te 're rosa'rata. Ma'ãpé tahawa, ĩwi sawi na, aimreme te rẽme tõ da.

Salmu 78:22

E marĩ wa. Ta norĩ hã 'Re ihâimana u'âsi mono te te 're saze za'ra mono õ wa, duré tiwaihu'u pese na za te te 're isõ'reptu za'ra mono zém na te te sina 're umnhasi za'ra mono õ wa.

Salmu 78:32

Tawamhã marĩ dama iwaihu'u'õ te te tãma 'manharĩ parib za'ra nherẽ, ma tô nasi tiwasété 'manharĩ na hã te te ãma uzusi u'âsi za'ra. 'Re ihâimana u'âsi mono na tinhimizaze hã te te sima 're wẽ za'ra mono õ di.

Provébiu 11:18

Iwasété norĩ pawa'â hã, tô senai'õ i'uptabi'õ, duré iprãire. Tane nherẽ, marĩ i'uwaibaba si te te 're i'manharĩ za'ra mono norĩ hã te za tipawa'â hã sena uptabi hã te te sima 're waibu, i'uwaibaba na si da te 're robzuri mono wa, sa'ẽtẽ na amnho da te dasima 're itehâri za'ra mono ne.

Provébiu 8:17

“Ĩzawi pese 'wa norĩ hã ĩma sawi pese di. Ni'wa ĩzô rĩtĩ wamhã, te za ĩnhopẽtẽ.

Mateu 11:26

Tane tô, Ĩmama. Asima 're i'awẽ mono zéb uwaibaba si, ma tô õ norĩ ma si 're i'awaihu'u mo.

Mateu 5:12

Tahawa, ma'ãpé atoi u'âsi, ãma 're anomro aba mono za. 'Re ihâimana u'âsi mono hã te za marĩ iwẽ hã sa'ẽtẽ na te te aima 're sõmri za'ra wa'wa, hâiwa ãma asô 're isimi'wara aba mono hã. Duréihã 'Re ihâimana u'âsi mono zadawa 'mahârâ 'rata 'wa norĩ ma, ma tô da te tãma 're rob'manharĩ u'âsi za'ra, da te aima 're irob'manharĩ wasété za'ra wa'aba mono ne. — Ãne na ma tô Zezusi hã tãma waihu'u siromo za'ra romhâ ré, te te waihu'u zara da.

Mateu 6:16

— 'Re ihâimana u'âsi mono ma, 're aimreme zusi aba mono da, asai ãna a'â 're aihâimana za'ra wa'aba mono wamhã, ai'ubu zei õre na hã 're aihâimana za'ra wa'aba mono õ di za. Ni'wam norĩ si te za ubu toi ãna sai ãna 're mreme zusi, 're nomro wẽ mono newa, da te 're 'madâ'â wẽ za'ra mono da. Tawamhã da te 're 'madâ'â wẽ za'ra mono wa, ãma 're dawata za'ra mono wamhã, taha si te za tô tãma 're hâimana za'ra. Nimahã na 'Re ihâimana u'âsi mono nhoprubzé hã tãma 're hâimana za'ra mono õ di za, ta norĩ ma hã. Tô sena wa ãne na hã aima waihu'u siromo za'ra wa'wa.

Mateu 6:33

'Re ihâimana u'âsi mono hã ãma 're isib'a'uwẽ za'ra mono norĩ ma, iwẽ uptabi hã te te tãma 're isõmri za'ra mono zéb zô si, te za asima 're asõpré u'âsi aba mo. 'Re ihâimana u'âsi mono te te sima 're aiwẽ za'ra wa'aba mono zéb zarina si, 're anomro wẽ wa'aba mono da, te za asima 're iwẽ u'âsi za'ra wa'aba mo. Tawamhã ãhã zô si 're asõpré wa'aba mono wamhã, marĩ zô aiwi 're irowaptâ'â za'ra wa'aba mono zéb uwaibaba, te za tô te te aima 're anhomri 'wa, Aimama 'wa hã.

Mateu 6:5

— Duré ni'wam norĩ hã te te sima 're iwẽ za'ra mono zéb zarina, te danho'a 're mreme zusi, 'Re ihâimana u'âsi mono ma. Hâiwi 're simasa mono sina, te 'Re ihâimana u'âsi mono ãma 're idawata za'ra mono zéb ãma, 're mreme zusi, 're hâimana wẽ za'ra mono newa, da te 're 'madâ'â wẽ za'ra mono da. 'Ri nhi'riti wa, bâdâdi sitob ãma, te duré ãne 're mreme zusi, da'ahâ norĩ nho'a. Tawamhã da te 're 'madâ'â wẽ za'ra mono wa, ãma 're dawata za'ra mono wamhã, taha na si te za tô ãma 're hâimana za'ra. Nimahã na hã 'Re ihâimana u'âsi mono nhoprubzé hã tãma 're ihâimana za'ra mono da hã, mare uptabi di za, ta norĩ ma hã. Tô sena wa ãne na aima waihu'u siromo za'ra wa'wa.

Marcu 16:17

Da te dasina 're ĩ'umnhasi za'ra mono wamhã, wa za te 're da'apawapto, ĩwaihu'u pese zarina, marĩ dama i'manharĩ waihu'u'õ hã te te dama 're ab'manharĩ wẽ mono da, ĩwasu'u na tô sena na da te 're waihu'u za'ra mono da. Ãne te za te te 're dapawaptob za'ra. Ĩnhisi na te za wa'uburé hã te te dama 're sãmra za'ra, ĩzadawa para. Duré 're idasisadaihu'u za'ra mono õ na zama, te za 're mreme zusi.

Luca 6:35

Dawasété na 're idanomro mono ne, 're anomro aba mono õ di za. Uburé te za 're idazawi pese za'ra wa'aba mo. Asitob'ru norĩ zama, te za 're isawi pese za'ra wa'aba mo. Uburé te za marĩ hã tãma 're i'manharĩ wẽ za'ra wa'aba mo. Ãté marĩ hã te za da te aiwi 're waptẽrẽ za'ra wa'wa, suru na a'â dama 're sõmri za'ra wa'aba mono da. Tawamhã te za dama 're isõmri za'ra wa'aba mo. Iwa'rãmib zô 're asimnhasi za'ra wa'aba mono õ di za. Ãne wamhã, te za iwẽ na te te 're asawi za'ra wa'wa, 'Re ihâimana u'âsi mono hã. I'ra te za 're aihâimana za'ra wa'aba mo, danhipai u ipire uptabi 'ra na. Marĩ wẽ na, uburé te dama 're sõpru. Isõprum na ãma 're idawata za'ra mono õ norĩ ma zama, te dama 're sõpru. Dawasété na 're idanomro mono ma zama, te uburé 're sõpru.

Zuwã 14:6

Tawamhã Zezusi ma te asa ãma tãma wa'rã ãne: — Wa hã bâdâdi uptabi na, wa ĩsiwasu'u, duré tô sena na rowaihu'u wẽ nhomri'wa na, duré 're idanomro u'âsi mono zé nhomri'wa na. Tahawa, ni'wa hã ĩ'ãma 're morĩ õ nherẽ, Ĩmama u hã wisi waihu'u õ di za.

Zuwã 8:24

A norĩ wa'wa hã aiwasété ré, te za 're atâ'â za'ra wa'aba mo. Ãne wa tô aima rowasu'u za'ra wa'wa aré. Tawamhã wa hã aima ĩsiwasu'u za'ra wa'aba zéb zarina, 're ĩhâimana mono na 're ĩzaze za'ra wa'aba mono õ wamhã, te za tô aiwasété ré 're atâ'â za'ra wa'aba mo.

Roma 10:14

E niha te za tawamhã da te tiwi 're waptẽrẽ za'ra, te te 're da'apawapto mono da hã, Cristu, da te dasina 're umnhasi za'ra mono õ nherẽ. Ãne wamhã, dama waihu'u õ di. Duré Zezusihi wasu'uwẽ hã dapo're na da te 're wapari za'ra mono õ ré hã, e niha te za da te dasina 're umnhasi za'ra, Zezusi hã. Da te dasina 're umnhasi waihu'u za'ra mono õ di. E niha te za duré Zezusihi wasu'uwẽ na, da te 're dapawaptob za'ra mono õ nherẽ, da te 're wapari za'ra. Dama waihu'u õ di.

Galata 5:6

Simisutu Cristu Zezusihi nhib'a'uwẽ oto 're wanomro mono wamhã, 'Re ihâimana u'âsi mono hã te te 're wa'aba'a mono õ di za, isihâiwata nhihâri ré norĩ hã, duré isihâiwata nhihâri õ norĩ hã. Zudeu na duré zudeu'õ na 're iwahâimana za'ra mono zém na hã, te te oto 're wa'awaihu'u mono õ di za. Zezu Cristu Danho'reptui'wa na, wa te wasina 're umnhasi za'ra mono wa, wanhimizawi pese na 're iwahâimana za'ra mono zém na si, te za oto te te 're wa'awaihu'u, 'Re ihâimana u'âsi mono hã.

Hebreu 11:26

Apito Fara'oho nhorõwa ãma 're sãmra u'âsi mono 'wa'âhã, te aré marĩ iwa'âbâ za'ẽtẽ na tinhibro pese, Ezitu ãma uburé marĩ hã iwa'âbâ za'ẽne hã 're isimi'wara mono na. Ta hã marĩ wa'âbâ za'ẽtẽ mono hã wẽ nherẽ, taha upana marĩ iwẽ uptabi si ma tô sima wẽ, Mozési hã. Danho'reptui'wa da, 'Re ihâimana u'âsi mono te te ipisutu ma si, te te 're robzépata mono da si, ma tô sima wẽ pese. Iwẽ hã 'Re ihâimana u'âsi mono, niwa za te te tãma isõmri na si, ma tô te te ãma 're rosa'rata u'âsi, Mozési hã.

Hebreu 3:12

Ĩsisãnawã norĩ, 'râwi te za 're asi'madâ'â pese za'ra wa'aba mo, 'Re ihâimana u'âsi mono nhimiroti hã asimirosa'rata wasété aba zarina, asiwi 're wẽ'õ za'ra wa'aba mono wa, tiwi 're aipizari za'ra wa'aba mono tõ da, aré i'rata 're dasi'ubumroi u'âsi mono da, dapisutu'wai wi hã.

Hebreu 4:2

Ta norĩ hã 'Re ihâimana u'âsi mono nhimiropisutu wẽ hã te te wapari za'ra nherẽ, te te sina uwaimrami za'ra õ di, te te ãma saze za'ra õ wa. Tane duré, wa norĩ zama wa tô 'Re ihâimana u'âsi mono wasu'uwẽ hã wa te 're wapari za'ra. Tane aiwa isimiropisutu wẽ na wa te 're saze za'ra mono õ wamhã, wa norĩ zama tô wa te wasina 're uwaimrami za'ra mono õ di za, te te wama iropisutu za'ra zé hã, 're idawa'utu u'âsi za'ra mono ne, 're wahâimana za'ra mono da hã oto, rowẽ uptabi na.

Hebreu 4:6

Duréihã ti'ai wẽ wa, 're idanomro wẽ mono zé wasu'u wapari 'rata 'wa norĩ hã, ta norĩ 're idawa'utu u'âsi za'ra mono ne, iwa 're hâimana za'ra mono da, 'Re ihâimana u'âsi mono te te tãma ipisutu za'ra zé hã te te sina uwaimrami za'ra õ di, isimiroti hã te te 're 'madâ'â za'ra mono õ wa, ta norĩ hã. E tawamhã õhõ haré ma tô dawi sizâ 'Re ihâimana u'âsi mono hã, 're idawa'utu u'âsi za'ra mono ne, rowẽ uptabi na 're idanomro u'âsi mono zé hã. Mare di. Si'utõrĩ waihu'u õ di, ta hã. Ni'wam norĩ hã te za tô rowẽ uptabi na 're idahâimana za'ra mono zéb u 're sisisi, 'Re ihâimana u'âsi mono te te tãma ipisutu za'ra zéb zarina.

Hebreu 7:25

Tahawa, te te 're da'anho'reptui waihu'u pese mono di ta hã, da te dasina 're i'umnhasi za'ra mono zéb zarina, 'râwi dapẽ'ẽ 're itẽme 're idasihutu mono norĩ hã, 'Re ihâimana u'âsi mono u. 'Re ihâimana u'âsi mono ma, da'ãma 're mreme mono da, dama 're hâimana u'âsi mono wa, te te 're da'anho'reptui waihu'u pese mono di, ta hã oto.

2 Pedru 1:10

Ĩsisãnawã norĩ, tô sena ma tô 'Re ihâimana u'âsi mono hã aipisutu za'ra wa'wa, isib'a'uwẽ 're anomro aba mono da. Ãne wa, te za sada 're asiptete za'ra wa'aba mo, ãma 're aihâimana wẽ za'ra wa'aba mono da, 'râwi isib'a'uwẽ na asina 're waihu'u za'ra wa'aba mono da. Ãne wamhã, Wanhib'apito hã 're rẽme za'ra wa'aba mono õ di za. Duré aiwasété u 're aipizari za'ra wa'aba mono õ di za oto.

2 Pedru 1:5

Ãne wa, isazei'wa 're aihâimana za'ra wa'aba mono wa, te za sada 're asiptete za'ra wa'aba mo, aiwẽ uptabi na si ãma 're aihâimana za'ra wa'aba mono da oto. Duré Wanhib'apito nhimiroti hã te za 're iwaihu'u pese za'ra wa'aba mo. Duré aiwasété wi, te za asina 're asiptete za'ra wa'aba mo. Duré ro'wa'rudu hã ai'ãma 're hâimana za'ra wa'aba mono nherẽ, te za õne haré Wanhib'apito ãma si 're aihâimana za'ra wa'aba mo. Te za duré 'Re ihâimana u'âsi mono nhimiroti na si, 're aihâimana wẽ za'ra wa'aba mo. Duré, asisãnawã norĩ hã 're isawi pese za'ra wa'aba mono ne, te za asiré isazei'wa norĩ hã 're isawi pese za'ra wa'aba mo. Te za uburé 're idazawi pese za'ra wa'aba mo duré.

2 Pedru 3:14

Tahawa, ĩsiwadi norĩ, ĩma asawi pese za'ra wa'aba norĩ hã, rowẽ zô 're asimipari za'ra wa'aba mono sina, te za sada 're asiptete za'ra wa'aba mo, aihâimana wẽ na 're aihâimana za'ra wa'aba mono da, 'Re ihâimana u'âsi mono hã aihâimana wẽ uptabi na, te te 're aiwaihu'u za'ra wa'aba mono da, rowẽ u'âsi ãma 're anomro aba mono da.

Apocalipsi 21:8

Tane nherẽ, ni'wam norĩ hã te za unhama ro'o u'âsi wa'wa 're hâimana u'âsi za'ra, aré da te 're simroi mono pipa te, ĩwi 're isipizari za'ra mono norĩ hã, duré te te 're ĩzazei utõrĩ za'ra mono norĩ hã, duré marĩ iwasété uptabi na 're ihâimana wasété za'ra mono norĩ hã, duré dapãrĩ'wa norĩ hã, duré dahâiba na 're ihâimana wasété za'ra mono norĩ hã, duré simi'â na 're ihâimana za'ra mono norĩ hã, duré romhâiba 'manharĩ ãma ĩ'upana 're iwata za'ra mono norĩ hã, duré sadawa nhipese na 're ihâimana za'ra mono norĩ hã. Uburé pese, te za ẽtẽ ro'o nhizédé uzé pire wa'wa 're dahâimana u'âsi za'ra, 're idahâimana wasété za'ra mono norĩ hã, unhama ro'o u'âsi wa'wa. Unhama ro'o u'â hã maparane ãma 're idadâ'â zahu za'ra mono zé, te wasu'u.

Ruti 2:12

Uburé Danhib'apito si te za uburé aima wa'â, marĩ hã 're i'ab'manharĩ mono zé hã. Ta hã Izaraéu nhihudu norĩ nhib'apito isimi'madâ'â wẽ zéb zarina we aimorĩ hã sa'ẽtẽ na te te aima wa'âbâ da, wa ĩsima wẽ.