Hebreu 10:8 - ꞌRe Ihâimana Uꞌâsi Mono Zadawa Wasuꞌu

⁸ Ãne ma tô Cristu hã imorĩ'rata na Timama ma rowasu'u, tô: “Danhimizama dawasété parizéb da, da te aima 're izata za'ra mono zô, duré dasazém na aima 're idanhoprub za'ra mono zô, asina 're asimipari mono õ di a hã. Duré taha na a hã asima ãma 're rowẽ mono õ di.” Ãne na ma tô Cristu hã Timama ma rowasu'u, Mozési hã isimiroti 'rata na te te ãma irob'ui'éré zarina, ãne hã da te 're 'manharĩ za'ra mono nherẽ.

Hebreu 10:8 ပူးပေါင်းရင်းမြစ်များ

Salmu 40:6

A hã danhimizama zata na duré amnho na aima danhoprubzé hã, asima wẽ õ di. Danhimizama wahuré ẽtẽ za'ra na, da te aima 're zata za'ra mono da hã waptẽrẽ õ di, dawasété parizéb da. Taha wa'rãmi ma tô ai'ãma 're ĩsipo're pu'u mono zéb da si, ĩpo're hã ĩma i'rida.

Marcu 12:33

Tahawa, wa za tô wa te 're sawi pese za'ra, 'Re ihâimana u'âsi mono hã. Taha zarina, wa za isimiroti na wa te ãma 're rosa'rata u'âsi za'ra. Wa za duré wanhimi'ẽ na wa te tãma 're romhuri u'âsi za'ra. Wa za duré wa te 're dazawi pese za'ra. Marĩ iwẽ zô wasima 're iwanhopré mono ne, wa za uburé dama zama sô 're wanhopré, iwẽ zô. Wa norĩ hã wa za wanhimizama hã duré wanhimarĩ hã wa te tãma 're sõmri za'ra, 'Re ihâimana u'âsi mono ma, da te tãma 're zata za'ra mono da, izatazém na. Ãne wamhã, tãma wẽ di, 'Re ihâimana u'âsi mono ma. Tane nherẽ, maparane isimiroti hã ipire uptabi hã wa te 're 'madâ'â pese za'ra mono wamhã, tãma wẽ uptabi di za.

Roma 8:3

'Re ihâimana u'âsi mono nhimiroti 'rata na Mozési te te irob'ui'érézé hã wa te 're i'madâ'â pese za'ra mono zéb zarina, te te sima wa'ãma 're aroti mono õ di za 'Re ihâimana u'âsi mono hã, wawasédé hã te te oto wa'ãma 're ab'madâ'â tõ mono da, taha zarina te te oto 're wa'awẽsãmri mono da. E marĩ wa. Wawasété u'âsi wahâimanazém hawi, wanhib'uware na 're wanomro u'âsi mono wa. Tahawa, wa te wasina 're uwaimrami waihu'u za'ra mono õ di, 'Re ihâimana u'âsi mono nhimiroti 'rata na rob'ui'éré hã. Wawasété si, wa te 're i'manharĩ za'ra mono zé hã ma tô te te siwi 're awẽ'õ pese, 'Re ihâimana u'âsi mono hã. Tahawa, ma tô ti'ra hã we satõ ti'ai u, da'upana dazada dâ'â da, dawasété u'âsi 're idahâimana za'ra mono zém hawi, te te 're da'anho'reptui mono da. Ti'ai ãma dahâiba na ma tô 're mo, Cristu hã. Tane nherẽ, dasine ti'ai ãma hã tiwasédé hã te te 're ab'manharĩ mono õ di, tihâiba na hã.

Hebreu 10:5

Tahawa, Cristu hã ti'ai u wei imorĩzéb u, ma tô Timama ma tinha, ãne: “Danhimizama na duré dasazém na aima 're danhoprub za'ra mono da, a hã asina sô 're asimipari mono õ di. Tane nherẽ, ĩhâiba hã ma tô ĩma isõ, da'upana ĩsina aima ĩnhoprubzéb da hã.