Hebreu 1:9 - ꞌRe Ihâimana Uꞌâsi Mono Zadawa Wasuꞌu

⁹ Uburé marĩ iwẽ hã da te 're i'manharĩ za'ra mono si, aima wẽ uptabi di. Duré uburé marĩ iwasédé hã da te 're i'manharĩ za'ra mono si, ma tô da'ãma 're i'a'ruiwapari mo. Tahawa, wa hã 'Re ihâimana u'âsi mono, Asib'apito hã wa tô aipisutu, uburé asiré 're ihâimana za'ra mono norĩ nhipai u, aipire na tãma 're aihâimana za'ra mono da, duré ãne zarina ãma 're atoi u'âsi mono da.”

Hebreu 1:9 ပူးပေါင်းရင်းမြစ်များ

Salmu 119:104

Ĩ'rã nhimiza're hã te asimiroti hawim na te te ĩma sina 're hâimo. Tahawa, bâdâdi senai'õ da hã wa sada 're ĩnhiti'rui pusi.

Salmu 119:128

Tahawa, wa wa hã asimiroti zarina si 're mo. Wa duré uburé dazadawa nhipese na si 're idanomro mono zé bâdâdi hã ĩsiwi te 're wẽ'õ pese.

Salmu 2:2

Ti'ai ãma isib'apito norĩ hã, duré dama i'rãnho'õmo norĩ hã te Uburé Danhib'apito zada te te sima 're rowa'õtõ za'ra, duré za apito te te ipisutu da zama.

Salmu 2:6

Tawamhã te ãne tinha: “Apito da, te ipisudu hã wa tô dasimasisizé ipire na hã tisã, Siã ẽtẽ 'rãihâ nhisi ĩte iwazéb zahi ãmamhã.”

Salmu 23:5

Dasa isa'ẽne hã te ĩma 're i'a'manharĩ u'âsi mo, ĩnhitob'ru norĩ tõmo nho'a hã. A hã te ĩpire na 're ĩnhimizusi mo. Te duré ĩnhimihâsizé hã ĩma 're i'masisi mo, taré 're ipu'u mono zéb u.

Salmu 40:8

Ĩte 'Re ihâimana u'âsi mono, ĩma 're i'apisutu mono zéb zarina, marĩ te 're i'a'manharĩ mono da hã ĩma sei uptabi di! Asimiroti wa tô ĩpẽ'ẽ 'remhã te ĩsima 're tété u'âsi.”

Salmu 45:6

'Re ida'a'madâ'â mono zé hã 'Re ihâimana u'âsi mono te te aima isõmri hã, te za õne u'â 're hâimana. Apito, a hã te sena na i'uwaibaba na si dama i'rãnho'õmo na hã 're aihâimana mo.

Salmu 45:7

Dawẽ na 're idanomro mono zép si, te 're isawi u'âsi mo. Dawasété na 're idanomro mono zép si hã te 're i'ruiwapari u'âsi mo. Tahawa, ate 'Re ihâimana u'âsi mono ma tô aipisutu. Taha zarina ma tô robzezé hã te te aima 're anhomri, uburé ti'ai ãma danhib'apito 're ihâimana za'ra mono norĩ nhipai u hã.

Salmu 89:20

Ĩnhib'a'uwẽ Dawi, si'apito da hã, wa hã wa tô pisutu. Wa tô rob'rãi wa'u to iwazéb zahi na hã 'rãti'i.

Salmu 89:26

Tahawa, Dawi te za ãne ĩma tinha: ‘A hã, Ĩmama, duré ĩte 'Re ihâimana u'âsi mono. A hã, ẽtẽ tõmo wawẽ ne, na 're ĩnho'reptui mono 'wa.’

Provébiu 8:13

Uburé Danhib'apito, da te 're wazéb za'ra mono wamhã, uburé marĩ iwasété da, 're idanhiti'ru za'ra mono zé, te wasu'u. 'Râwi 're idasi'madâ'â ze za'ra mono zé hã ĩma 'ru ti, dasina 're idawata za'ra mono zéb zama, dahâimana wasété zama, duré damreme wasété zama.

Luca 4:18

“'Re ihâimana u'âsi mono, ma tô ĩma tisõ, Tipẽ'ẽzani hã. Ta hã ma tô ĩpisutu, iwasu'uwẽ na, isibrob'õ norĩ hã te 're apo're pu'u mono da. Ma tô we ĩzatõ, dama romhuri'wa da, da te iwaibu za'ra norĩ hã te 're apawapto mono da, apâ oto 're nomro mono da, robze u'âsi. Duré itob'a hã te 're ato pese mono da, ma tô we ĩzatõ, datõmo wẽ na apâ oto 're danomro mono da, robze na. Duré ma tô we ĩzatõ, da te tãma 're i'manharĩ wasété za'ra mono zém hawi, te 're da'awaibui mono da.

Zuwã 1:41

Tawamhã tidub'rata zô te mo, Ãdré hã. Te te sãmri wamhã, ãne te tãma rowasu'u: — Danho'reptui'wa hã wa tô sõpẽtẽ ni, 'Re ihâimana u'âsi mono te te ipisudu hã. Danho'reptui'wa hã ta hã “Cristu”, damreme amo na hã.

Zuwã 10:17

— Tahawa, Ĩmama te te 're ĩzawi pese, ĩsisawi ãna, sada ĩdâ'â za'ra wa za, apâ ĩhâiwa'utu pari, 're ĩmorĩ u'âsi da.

Zuwã 20:17

Tawamhã Zezusi te tãma tinha, ãne: — Ĩtété õ di za. Zahadu apâ ĩmorĩ õ di, Ĩmama u hã. Mo oto aimorĩ, ĩsisãnawã norĩ u tãma ĩzadawa wasu'u za'ra da. Ĩmama u, wa za oto mo apâ hâiwa u, Aimama aba u. Ĩnhib'apito u, wa za oto mo, Asib'apito za'ra wa'aba u. Ãne tãma ĩzadawa wasu'u za'ra na za.

Zuwã 3:34

Ti'ra we te te satõrĩ wamhã, ma tô Tipẽ'ẽzani hã tãma tisõ, iré 're morĩ u'âsi da. Tahawa, te Timama nhimiroti si te te dama 're wasu'u.

Zezusihi zadawa wasuꞌuꞌwa norĩ nhimiromhuri na robꞌuiꞌéré 10:38

'Re ihâimana u'âsi mono hã ma tô Tipẽ'ẽzani hã tãma tisõ, Zezusihi ma, Nazaré ãma aré 're isãmra mono ma. Tiwaihu'u pese zama ma tô tãma tisõ. Tahawa, wasiré Izaraéu nhihudu norĩ nhipti'ai wa'wai baba, ma tô 're mo, marĩ iwẽ hã te te dama 're ab'manharĩ mono da, dama i'manharĩ waihu'u'õ hã. Duré, Wa'uburé nhimiwada'uri nhiptete zarina 're ihâimana siwamnarĩ za'ra mono norĩ hã ma tô te te 're apese. Ãne ma tô iwẽ hã te te dama 're ab'manharĩ, Imama hã isiré 're morĩ u'âsi wa, 'Re ihâimana u'âsi mono hã. Ãne Zezu Cristu 're ihâimana mono zém na ma tô iwaihu'u za'ra wa'wa.

Zezusihi zadawa wasuꞌuꞌwa norĩ nhimiromhuri na robꞌuiꞌéré 4:26

Roti'wa norĩ hã te sada aimasa. Isadawa para da'uwati'wa norĩ me, ma sada atob za'ra, Wanhib'apito 'Re ihâimana u'âsi mono zada, duré Danho'reptui'wa da, te te ipisutu zada.”

Zezusihi zadawa wasuꞌuꞌwa norĩ nhimiromhuri na robꞌuiꞌéré 4:27

— Ãhã na, tô sena Zeruzalẽ ãma ma tô tasi'rã'õtõ ni, aima romhuri wẽ 'wa zada, Zezusihi zada, Danho'reptui'wa da ipisutu zada. Erodi norĩ hã ma tô sitẽme ubumro, Põsiu Pilatuhu me. Ta norĩ hã zudeu'õ norĩ me duré Izaraéu nhihudu norĩ me, ma tô sada si'rã'õtõ, te te siwi wĩrĩ da.

Roma 12:9

Taré asimizawizé hã aima 're hâimana za'ra wa'aba mono tõ da, te za tô sena na asimizawi pese zé hã aima 're hâimana u'âsi za'ra wa'wa. Uburé marĩ wasété nhiti, te za 're aihâimana za'ra wa'aba mo, asiwi 're wẽ'õ pese za'ra wa'aba mono sina. Uburé aihâimanazé iwẽ na si te za oto 're aihâimana za'ra wa'aba mo.

Roma 15:13

'Re ihâimana u'âsi mono hã waihu'u pese wa, te za te te 're wa'apawaptob u'âsi, marĩ iwẽ hã te te wama 're ipisutu za'ra mono zéb zarina, za te te wama ãma 're i'a'uwaimrami mono zéb zô, wa te wasiwi 're umnhasi za'ra mono sina, sô 're wanhimipari u'âsi za'ra mono da. Tahawa, wa ai'ãma tãma 're ĩmreme u'âsi za'ra wa'wa, atoi uptabi na 're aihâimana u'âsi za'ra wa'aba mono da, duré rowẽ si te te aima 're pisutu za'ra wa'aba mono da, asina 're i'umnhasi za'ra wa'aba mono paramhã. Ipẽ'ẽzani nhimipawaptobzéb zarina, marĩ iwẽ uptabi hã 'Re ihâimana u'âsi mono, za te te aima 're isõmri za'ra wa'aba mono zéb zô, asiwi 're umnhasi za'ra wa'aba mono sina, sô 're asimipari za'ra wa'aba mono zém na, 'râwi asima ãma 're sa'ẽtẽ za'ra wa'aba mono da, wa tô te ĩsima 're aiwẽ za'ra wa'wa.

1 Corĩtu 1:9

'Re ihâimana u'âsi mono hã wama umnhasi za'ra di, uburé te te wama 're i'aropisutu mono zéb zarina, te te wama ãma 're i'a'uwaimrami mono zéb da hã. Ta hã ma tô te te 're aipisutu za'ra wa'wa, i'ra siré 're anomro aba mono da, Wanhib'apito Zezu Cristuhu siré.

2 Corĩtu 11:31

'Re ihâimana u'âsi mono hã, Wanhib'apito Zezusihi mama hã, taha ma si ĩwaihu'u pese di, ĩzadawa nhipese ãna aima ĩsiwasu'u za'ra wa'aba zém na hã za. Taha ãma si, wa za 're wawata u'âsi za'ra, wa norĩ hã.

Galata 5:22

Ãne 're danomro wasété mono õ di za, 'Re ihâimana u'âsi mono pẽ'ẽzani nhimiwada'uri zarina 're danomro mono wamhã. Te za da te 're dazawi pese za'ra. Duré dapẽ'ẽ 're datoi u'âsi, te za 're dahâimana za'ra. Duré dapẽ'ẽ toi u'âsi, te za 're dahâimana za'ra. Duré dawara sina dasisada 're dazahi za'ra mono õ di za. Duré danhimizawi pese na te za 're dahâimana za'ra. Duré marĩ iwẽ na te za dama 're danhoprub za'ra. Duré tô sena wa, ropisutu wẽ na, te za da te dama ãma 're rob'manharĩ wẽ za'ra.

Éfézu 1:3

'Re ihâimana u'âsi mono hã sõpru uptabi di, Wanhib'apito Zezu Cristuhu mama hã. Ta hã Cristuhu ãma 're wanomro mono wa, ma tô marĩ mono bâ wama ãma 're sõpru, uburé marĩ iwẽ na, hâiwa hawi. Tahawa, wama 're sõprub za'ra mono wa, ãma 're wawata u'âsi za'ra wa'aba mono za.

Filipu 2:9

Tahawa, 'Re ihâimana u'âsi mono hã ma tô tãma pisutu, dâ'â nherẽ, apâ hâiwa'utu wa, danhipai u pire uptabi na 're hâimana mono da oto, wẽ uptabi na. Ma tô duré isisi hã tãma pisutu, dama sisi pire uptabi na 're hâimana mono da, uburé danhisi nhipai u.

Hebreu 2:11

Zezusi hã ma tô dawasédé hã te te dama 're apari. Taha zarina te iwasédé te te tãma 're i'apari mono norĩ ma, isiré misire Imama za'ra na hã tô õhõ si tãma 're hâimana za'ra. Tahawa, Zezusi hã ãma 're sisé mono õ di, ta norĩ hã tisisãnawã na za te te 're anhisi mono na dâ'âsina, 'Re ihâimana u'âsi mono hã misire Imama za'ra wa, simisutu. Te za tô tisisãnawã na te te 're anhisi, Zezusi hã.

Hebreu 2:9

Zezusi 're imorĩzép si wa tô wa te 're waihu'u pese za'ra. Ta hã ma tô 'Re ihâimana u'âsi mono hã pisutu, ti'ai ãma 're hâimana mono ré hã, hâiwa ãma tãma iromhuri'wa norĩ ma, wapu na a'â 're hâimana mono da, dasine. Zezusi hã dazada dâ'â da si, ma tô pisutu 'Re ihâimana u'âsi mono hã, da'ãma 're pẽ'ẽzé mono wa, da'ãma 're isiwãrĩ mono zéb da hã oto. Ma tô duré pisutu ti'ra hã, pire na dama 're hâimana u'âsi mono da oto, dazada idâ'âzéb zarina, te te irobzépata na te te sina tãma ãma uwaimrami wa, Timama ma hã.

Hebreu 7:26

Tahawa, te oto õhõ si sasedoti ipire uptabi na hã wama 're hâimana za'ra, Timama ma, te te wa'ãma 're romhuri mono da. Taha si te 're timorĩ wẽ uptabi. Õhõ si ma tô 'Re ihâimana u'âsi mono hã te te 're wẽsãmri, marĩ te te 're ab'manharĩ wasété mono õ wa. Tahawa, iwasédé hã sena na da te ãma 're sa'ra waihu'u za'ra mono õ di. 'Re ihâimana u'âsi mono hã ma tô tãma pisutu, ti'ai ãma dawasété na 're idanomro mono norĩ nhiti 're sãmra mono da oto, hâiwa ãma danhipai u dama pire uptabi na 're hâimana u'âsi mono da.

1 Pedru 1:3

'Re ihâimana u'âsi mono ãma si oto 're wawata u'âsi za'ra wa'aba mono, Wanhib'apito Zezu Cristuhu mama ãma. E marĩ wa. Ipẽ'ẽzézé hã sa'ẽtẽ na tãma 're hâimana mono wa, ma tô wa'apoto té, wapẽ'ẽ 're, wahâimanazép té iwẽ na si oto ãma 're wahâimana za'ra mono da. Zezu Cristu hã dâ'â uptabi nherẽ, ma tô Imama hã ab're hawi hâiwa'utu, tiwaihu'u pese na. Taha zarina, wa za duré wasina sô 're wanhimipari za'ra, 're wadâ'â za'ra mono pari, te te 're iwa'ahâiwa'utu mono zéb zô.

1 Zuwã 1:3

E marĩ da, wa ãne aima rowasu'u za'ra wa'aba ni, wa te 're i'madâ'â za'ra mono zém na hã, duré wa te 're iwapari za'ra mono zém na zama. Wamama siré 'râwi 're iwahâimana za'ra mono ne, duré i'ra siré Zezu Cristuhu siré 'râwi 're iwahâimana za'ra mono ne, a norĩ wa'aba zama isiré 're aihâimana za'ra wa'aba mono da, wa ãne aima waihu'u za'ra wa'aba ni.

Apocalipsi 2:15

Tane, te ãhã na ni'wam norĩ hã Nicora'ihi nhimiroti wasété na 're hâimana za'ra, asiré 're aihâimana za'ra wa'aba mono norĩ hã.