Hebreu 1:2 - ꞌRe Ihâimana Uꞌâsi Mono Zadawa Wasuꞌu

² Tane nherẽ, ti'ra si ma tô oto pisutu, isadawa nhipai u te te oto wama ãma 're irowasu'u za'ra mono zéb da hã, rob'rãsutuzéb u romhutu na za 're iwahâimana za'ra mono norĩ ma. Taha si ma tô Timama zadawa para uburé te te ro'apoto. Taha si ma tô duré pisutu Imama hã, niwapsi uburé roptede'wa na 're hâimana mono da oto.

Hebreu 1:2 ပူးပေါင်းရင်းမြစ်များ

Zenezi 49:1

Tawamhã Zaco ma tô ti'ra norĩ zô sima sô tihârâ za'ra. Tahawa, ma tô ãne tãma nharĩ za'ra: — Ma'ãpé asiwi ĩ'uirĩ wa'aba, apto'oré aihâiba mono bâ wa'aba za marĩ aima ihâimana za'ra wa'aba zém na te aima nharĩ za'ra wa'aba da.

Daniéu 10:14

Wa hã awa'awi na wa we atẽme mo, asib'a'uwẽ norĩ ma, za iromhâimanazém na te ãma aima saprĩ da. E marĩ wa. Ã hã i'ab'madâ'â mono hã apto'oré za marĩ iwatobrozém na te rowasu'u.

Daniéu 2:28

Tane nherẽ, te hâiwa ãma 'Re ihâimana u'âsi mono hã 're sãmra, uburé marĩ dama iwaihu'u'õ hâi'ré'wa hã. Õ hã irosawẽrẽzém na ma tô aima waihu'u siro, za marĩ iwatobrozéb da hã. Tahawa, apito awa'awi na wa za asimirosawẽrẽ hã asõtõ 'rowi marĩ i'madâ'âzé hã aima ãma saprĩ za'ra.

Mateu 13:39

Duré buru tede'wa nhitob'ru hã wab'ru iburu na te te tiwi i'azuri mono wa'uburé norĩ nhib'apito te wasu'u, tô õ hã. Duré da te 're iroptehâri za'ra mono zé hã rob'rãsutuzéb ãma za da'ãma isipo'ozé, te wasu'u. Duré buru nho ubumroi'wa norĩ hã hâiwa ãma 'Re ihâimana u'âsi mono ma, romhuri'wa norĩ, te wasu'u.

Mateu 17:5

Tawamhã ãne Pedru te te tãma nharĩ ré, ma tô hâiwa nhirõno hã we hâiba zuwa za'ra, Zezusi norĩ hã. Tawamhã hâiwa nhirõtõ zarob'a hawi, ma tô 'Re ihâimana u'âsi mono hã mre, ãne: — Ã hã ĩ'ra, te 're isawi pese mono. Tãma 're ĩto za'ẽtẽ mono di. Ma'ãpé isimiroti hã 're wapari pese za'ra wa'aba mono za.

Mateu 21:38

Tawamhã wisi wamhã, buru 'madâ'â'wa norĩ hã te te duré sima sãmri za'ra wamhã, te ãne sima 'mahârâ za'ra: “Õhõta buru tede'wai 'ra hã te wei mo, timama uirĩ na buru tede'wa da hã. Wa te wasiwi wĩrĩ aba, buru hã wate za'ra da.” Ãne ma tô sima 'mahârâ za'ra, buru 'madâ'â'wa norĩ hã.

Mateu 26:63

Tane nherẽ, te Zezusi hã ari'iwi za. Tawamhã sasedoti ipire uptabi hã te duré sadanha, ãne: — E a hã Danho'reptui'wa da, 'Re ihâimana u'âsi mono te te i'aipisudu. E a hã 'Re ihâimana u'âsi mono 'ra. Ma'ãpé sena na wama asiwasu'u na. Duré wawi ai'udâ tõ, 'Re ihâimana u'âsi mono nho'a hã.

Mateu 28:18

Tawamhã Zezusi hã ma tô 'râwi itẽme timorĩ za'ra oto. Taha wamhã, ma tô tãma nharĩ za'ra, ãne: — Ĩmama hã ma tô ĩma pisutu, isadawa para dama ĩpire na 're ĩhâimana mono da, ti'ai ãma, duré hâiwa ãma zama.

Mateu 3:17

Tawamhã hâiwa hawi te we tinha ãne: — Ã hã ĩ'ra. Ĩma sawi uptabi di. Tãma ĩto za'ẽtẽ uptabi di. — Ãne te we tinha, Imama hã.

Marcu 1:1

Ãhã na isãna'rata hawi, wa za aima rowasu'u za'ra wa'wa, Zezu Cristuhu wasu'uwẽ na, 'Re ihâimana u'âsi mono 'ra wasu'u na. Romhâ ré, ma tô ãma rob'ui'éré siro, Izaia hã, 'Re ihâimana u'âsi mono zadawa 'mahârâ 'rata 'wa hã. Duréihã 'Re ihâimana u'âsi mono hã, ti'ra ma, te te iwaihu'uzém na ma tô ãma rob'ui'éré, ãne: “Wa hã wa za satõ ĩzadawa wasu'u'wa hã, aiwana, te te asô ropese mono da. Ãne te za te te dama 're rob'mahârâ, mreme 'rãihâ sina, a'ubuni wi: Ni'wa hã te za te te dama 're rob'mahârâ, a'ubuni wi: Bâdâdi hã asiwi ropese aba, Wanhib'apito zô. Imana 'rãmi bâdâdi hã sô sa'ra wa'aba mono, awa'awi si da.”

Marcu 12:6

Tawamhã buru tede'wai 'ra si te oto i'rata 're hâimana, danhowa're're te te isatõrĩ da hã, iburu na romhuri'wa norĩ u. I'ra hã tãma sawi pese uptabi di. Tãma sawi nherẽ, ma tô satõ, buru na romhuri'wa norĩ u, morĩ da. Ãne te imama hã sima rosa'rata: “Ĩ'ra si'aibâ hã te itẽme satõrĩ za'ra wamhã, ãté te za siwi hâiba wazé.”

Marcu 12:7

Tane nherẽ, buru na romhuri'wa norĩ u wisi wamhã, te ãne sima 'mahârâ za'ra: “Õhõta buru tede'wai 'ra hã te wei mo, timama uirĩ na buru tede'wa na 're ihâimana mono da hã. Wa te wasiwi wĩrĩ aba, buru hã wate za'ra da.” Ãne ma tô sima 'mahârâ za'ra, buru na romhuri'wa norĩ hã.

Zuwã 1:10

Ta hã te oto ti'ai ãma 're hâimana, 'Re ihâimana u'âsi mono mreme na isisi hã. Tazahã 'Re ihâimana u'âsi mono zadawa para, te te ro'apoto mono nherẽ, ro'apoto mono 'wa na da te waihu'u za'ra õ di. Tisiré zudeu norĩ rob u, ma tô wei mo. Tane nherẽ, sô 're tob'uzu za'ra mono õ di, ta norĩ hã.

Zuwã 1:14

'Re ihâimana u'âsi mono mreme hã wa'rata 're sãmra mono da, ma tô sihâiba. Simizawi pese uptabi di. Isimiroti hã wẽ uptabi di. 'Re ihâimana u'âsi mono 'ra wa, õhõ si 're morĩ wẽ uptabi di. Misire i'ra hã. Õhõ si, waihu'u pese uptabi di. Wa norĩ hã wa tô wasiwi waihu'u za'ra ni, 're imorĩ wẽ uptabi na. Iwaihu'u pese na zama, wa tô duré wasiwi waihu'u ni.

Zuwã 1:3

Taha nhimi'manharĩzéb zarina ma tô 'Re ihâimana u'âsi mono hã uburé te te ro'apoto. Te te ro'apoto mono õ 'wa'âhã, aré marĩ õ uptabi di.

Zuwã 13:3

Zezusi hã ma tô Imama hã pisutu, dama pire da. Uburé marĩ ma, pire da, ma tô pisutu, ti'ai ãma hâiwa ãma zama. 'Re ihâimana u'âsi mono hawi, ma tô wei mo. Apâ te za oto itẽme mo. Ãne ma tô sina waihu'u siro, Zezusi hã.

Zuwã 13:32

Isiré ãma 're dawata za'ra mono wamhã, te za duré ãma tiwata, 'Re ihâimana u'âsi mono hã. Ãhã na awa'awi te za ãma tiwata su'u.

Zuwã 15:15

Danhib'apito norĩ hã uburé tinhimiroti hã te te tãma 're waihu'u za'ra mono õ di, tãma iromhuri'wa norĩ ma hã, tãma iromhuri'wa norĩ si 're hâimana za'ra mono wa. Tanei õ di, wa hã. Uburé, wa tô Ĩmama nhimiroti hã te aima 're wasu'u za'ra wa'wa. Tahawa, ĩma romhuri'wa na si te 're asisi za'ra wa'aba mono õ di za oto. Te 're i'asawi pese za'ra wa'aba mono na zama, wa za oto te 're asisi za'ra wa'wa.

Zuwã 16:15

Aiwa wanhimiroti hã, Ĩmama me. Tahawa, te za ĩnhimiroti si te te aima 're waihu'u za'ra wa'wa, Ĩmama pẽ'ẽzani hã.

Zuwã 17:2

A hã ma tô ĩma 're ida'apisutu mo, ĩzazei'wa 're danomro mono da. Wa hã ma tô duré ĩpisu, uburé dama ĩpire uptabi da. E marĩ da. Ĩzazei'wa norĩ ma, te 're apisutu mono da, robzei u'âsi ĩ'ãma 're nomro u'âsi mono da, duré 're dâ'â za'ra mono ãna, ai'rata 're hâimana u'âsi za'ra mono da, hâiwa ãma.

Zuwã 3:16

'Re ihâimana u'âsi mono ma, tãma dazawi pese uptabi wa, ma tô ti'ra hã misi nherẽ, we tisõ, dazada dâ'â da. Tawamhã i'ra, da te dasina 're umnhasi za'ra mono wamhã, dadâ'â ãna te za hâiwa ãma i'rata 're dasi'ubumroi u'âsi. Ropipa ãma isiti 're dasi'ubumroi mono õ di za.

Zuwã 3:25

Nima norĩ Zuwãhã siré 're inomro mono norĩ hã ma tô siwi sada'â zudeu hã, dahâiba wẽ da, idasihâiba upsõ na hã.

Zuwã 5:26

Imama hã dapẽ'ẽ 're, dadâ'â ãna rowẽ na 're idahâimana u'âsi za'ra mono zé nhomri'wa dama. I'ra wa, ma tô duré pisutu, taha zama 're idahâimana u'âsi za'ra mono zé nhomri'wa na dama 're ihâimana mono da hã.

Zuwã 5:27

Ta hã ma tô duré tãma tinha, ti'ai ãma dahâimanazéb zarina, te te dama 're arowairébé mono da, isadawa para ti'ai ãma Dasiré Ipodo hã 're hâimana mono wa.

Zuwã 9:29

'Re ihâimana u'âsi mono, ma tô Mozésihi ma pisutu, isadawa para datẽme 're morĩ da. Ãne wama waihu'u pese za'ra di, wa norĩ hã. Zezusi hã bété e ma hawi we imorĩ. Wa norĩ hã ãne na hã wa te waihu'u za'ra õ di.

Zezusihi zadawa wasuꞌuꞌwa norĩ nhimiromhuri na robꞌuiꞌéré 10:36

'Re ihâimana u'âsi mono zadawa wasu'u hã ma tô iwaihu'u za'ra wa'wa. Tizadawa wasu'u hã ma tô wama waihu'u za'ra, wasiré Izaraéu nhihudu norĩ ma. Zezu Cristu hã ma tô watẽme satõrĩ za'ra, te te wama rowasu'u za'ra da, 'Re ihâimana u'âsi mono ãma rowẽ na 're idanomro mono zém na hã. Zezu Cristu hã, uburé Danhib'apito uptabi. Taha wasu'u ma tô iwaihu'u za'ra wa'wa.

Zezusihi zadawa wasuꞌuꞌwa norĩ nhimiromhuri na robꞌuiꞌéré 2:17

“Ãne wa za 'manha: Rob'rãsutu u ti'a si'utõrĩ õ ré, wa za Ĩpẽ'ẽzani hã te dama 're anhomri, daro mono bâ. Tawamhã asihudu za'ra wa'wa, aibâ norĩ hã, duré pi'õ norĩ hã te za te te 're ĩzadawa wasu'u za'ra. Ihi norĩ ma, sõtõ 'rowi te te 're irosawẽrẽ za'ra mono na wa za tãma 're ĩsiwaihu'u za'ra, ĩnhimiroti na hã. Duré, ipréduptém norĩ ma zama sõtõ 'rowim ne, wa za tãma 're ĩsiwaihu'u za'ra, ĩnhimiroti na.

Roma 1:4

Duré 'Re ihâimana u'âsi mono 'ra na, wama waihu'u pese za'ra di, dâ'â uptabi nherẽ, Imama hã tiwaihu'u pese na te te hâiwa'utu wa. Duré Timama hawi we imorĩ na hã wama waihu'u pese za'ra di. Duré 're imorĩ wẽ na zama, wama waihu'u pese za'ra di.

Roma 8:17

'Re ihâimana u'âsi mono 'ra, oto 're wanomro mono wa, marĩ iwẽ na tinhib'a'uwẽ ma, 're isõpru mono zéb da, te te tãma 're iropisutu za'ra mono zéb ré, wa za 're wahâimana za'ra. Duré uburé marĩ iwẽ na Cristuhu ma, isõprubzéb da, te te tãma iropisutuzéb ré, wa za isiré 're wahâimana za'ra. Zezusihi ne, wa te 're robzépata za'ra mono wamhã, wa za isine rowẽ uptabi na 're wahâimana za'ra.

1 Corĩtu 2:7

E 'wa iwaihu'u pese nhimiroti, te dama 're iwasu'u mono hã bété. 'Re ihâimana u'âsi mono nhimiroti hã aré dama iwaihu'u'õ si, wa wa hã te dama 're wasu'u u'âsi, iwaihu'u pese zarina isimiroti wẽ uptabi si. Ta hã ma tô aré dawi udâ, da te 're waihu'u za'ra mono tõ da a'â, isimiroti wẽ wasu'u hã. Tane nherẽ, te te aropoto mono õ ré, ma tô te te sima 're wa'apisutu siro, iwaihu'u pese siré si oto 're wahâimana u'âsi za'ra mono da, rowẽ uptabi na.

1 Corĩtu 8:6

Tane nherẽ, te siwaprosi wama 're hâimana, 'Re ihâimana u'âsi mono si, wasiré wa te 're isaze za'ra mono norĩ ma hã. Ta hã uburé Wamama, 'Re ihâimana u'âsi mono hã. Taha ma si, wa oto 're wahâimana za'ra. Wanhib'apito si te duré siwaprosi 're hâimana, Zezu Cristuhu si. Taha si, ma tô Timama zadawa para te te ro'apoto. Taha nhimipawaptobzéb zarina si, ma tô 'Re ihâimana u'âsi mono hã te te 're wa'anho'reptu, õhõ ãma si 're wahâimana u'âsi za'ra mono da oto.

Galata 4:4

Tawamhã bâdâ oto iwa waptã'ã wamhã, 'Re ihâimana u'âsi mono hã ti'ra ãma te te irotizéb zarina, ti'ai u we te te isatõrĩ da hã. We te te satõrĩ wamhã, ma tô pi'õi ma i'ra hã tãma podo oto, zudeu na. Zudeu na poto wa, pire na ma tô tãma 're hâimana, 'Re ihâimana u'âsi mono nhimiroti hã, Mozésihi ma te te 're i'awaihu'u mono hã.

Éfézu 3:9

Ropoto mono 'wa hã ma tô aré pisutu, ropoto na'rata hawimhã dama waihu'u ãna a'â 're hâimana mono da, te te da'ãma sima irotizé hã. Duréihé ma tô ĩpisutu, te dama 're rowasu'u mono da, za oto te te dama ãma i'uwaimramizém na hã te te sima da'ãma irotizéb zarina.

Hebreu 1:5

Duréihã 'Re ihâimana u'âsi mono mreme hã ãne: “A hã ĩ'ra te ĩme 're aihâimana mo. Tahawa, wa za oto ĩ'ra na te 're asisi, dama aipire na 're aihâimana mono da oto.” Ãne duré imreme amo hã: “Wa hã Imama na wa za tãma 're ĩhâimana. Tahawa, ĩ'ra na te za duré 're hâimana.” Tawamhã e hâiwa ãma tãma iromhuri'wa norĩ ãma zama, ma tô ãne na hã tinha, 'Re ihâimana u'âsi mono hã. Mare di. Zezusihi ãma si, ma tô ãne na hã tinha.

Hebreu 1:8

Tazahã, i'ra si dama pire uptabi na 're ihâimana mono zém na ma tô rowasu'u 'Re ihâimana u'âsi mono hã, ãne: “A hã Ropoto'wa. Da'ãma 're asib'a'uwẽ mono zé hã aiwi 're si'utõrĩ mono õ di za. Te za tô aima 're hâimana u'âsi. Duré marĩ na 're upai mono ãna, te za 're ida'ab'madâ'â u'âsi mo.

Hebreu 11:3

'Re ihâimana u'âsi mono, wa te wasina 're i'umnhasi za'ra mono zéb zarina, wa tô, sena na wa te 're waihu'u za'ra, 'Re ihâimana u'âsi mono te te inharĩzéb zarina, marĩ õ uptabi ré, te te i'aropoto mono na hã. Datõmo na da te 're i'madâ'â waihu'u za'ra mono õ na si, ma tô te te ro'apoto, watõmo na wa te oto 're i'madâ'â za'ra mono da hã. Ãne na wa tô duré sena na wa te 're waihu'u za'ra, 'Re ihâimana u'âsi mono si, wa te wasina 're i'umnhasi za'ra mono zéb zarina hã.

Hebreu 2:3

Ãne wa, te te 're iwa'anho'reptui mono zéb zô, iwẽ uptabi zô, wa te sô 're rob'ruiwapari za'ra mono õ nherẽ, e isimihâzé wi, wa za wasi'uihâ na tiwi 're wasisõ'reptu za'ra. Mare di. 'Re ihâimana u'âsi mono te te 're iwa'anho'reptui mono zé wasu'u na ma tô Wanhib'apito hã dama rowasu'u 'rata, si'uihâ na. Imreme wapari'wa norĩ hã ma tô duré ãne na wama ãma rowasu'u za'ra, tô sena danho'reptuzém na wa te ãma 're isaze za'ra mono zéb da hã.

Hebreu 3:6

Tane nherẽ, te Cristuhu si tãma umnhasi na uburé isib'a'uwẽ norĩ hã te te tãma 're 'madâ'â pese za'ra, pire uptabi na, 'Re ihâimana u'âsi mono 'ra hã. Wa norĩ hã Cristuhu ãma si 're wanomro mono wa, da te wama 're rob'manharĩ wasété za'ra mono nherẽ, wapahi ãna wanhiptete sina ãma 're wanomro mono wamhã, wa za tô isib'a'uwẽ na tãma 're wahâimana u'âsi za'ra. 'Re ihâimana u'âsi mono hã iwẽ si, za te te wama ipisutu za'ra zéb zô, wama umnhasi sina sô 're iwanhimipari u'âsi za'ra mono zéb zarina, tiwi 're wasipizari za'ra mono õ wamhã, tawapsi wa za tô isib'a'uwẽ na tãma 're wahâimana u'âsi za'ra.

Hebreu 4:14

Sasedoti ipire uptabi na te tô ni'wa hã te te wa'ãma 're romhuri u'âsi. Ta hã Zezusi, 'Re ihâimana u'âsi mono 'ra. Timama u ma tô mo hâiwa u, 'râwi te te tiwi 're rowaptẽrẽ u'âsi mono da, wama za'ra. Tahawa, Zezusi, wa te 're isaze za'ra mono zém na tô sena dama 're iwasiwasu'u za'ra mono zéb zarina, wa za tô ta hawim haré wanhiptete sina ãma 're wahâimana u'âsi za'ra.

Hebreu 5:8

Zezusi hã 'Re ihâimana u'âsi mono 'ra, 're hâimana mono nherẽ, ma tô te te 're robzépata, ti'ai ãma 're morĩ ré hã. Taha zarina ma tô ãne hã si'ãma waihu'u: Ni'wam norĩ hã, 'Re ihâimana u'âsi mono nhimiroti te te 're 'madâ'â pese za'ra mono da, te te sima 're wẽ za'ra mono wamhã, taha zarina te za tô te te 're robzépata za'ra, ti'ab ré. Ãne ma tô Zezusi hã si'ãma waihu'u.

Hebreu 7:28

Duréihã 'Re ihâimana u'âsi mono nhimiroti 'rata na Mozési te te ãma irob'ui'éré zarina, ma tô sasedoti da, te te 're da'apisutu, 'Re ihâimana u'âsi mono hã. 'Re danomro wasété mono wa, danhib'uware na 're dahâimana za'ra mono nherẽ, ma tô ãne da hã te te 're da'apisutu. Tane nherẽ, ma tô 'Re ihâimana u'âsi mono hã timreme pire na ti'ra ma ropisutu, taha si sasedoti na misi wama 're hâimana za'ra mono da oto. Ta hã te uburé marĩ hã Imama te te tãma 're i'apisutu mono zéb zarina, te te tãma ãma 're a'uwaimrami u'âsi, Timama ma hã.

Hebreu 7:3

Taha mama nhisi ui'éré hã hâimana õ di, ibaihâ na hã, ina nhisi me. Ihi'rata norĩ nhisi ui'éré zama, hâimana õ di duré. Iwaptã'ãzém na ãma irob'ui'éré hã hâimana õ di duré, idâ'âzém na irob'ui'éré na zama. 'Re ihâimana u'âsi mono 'ra ne, te pire na dama 're hâimana u'âsi ta hã, Wanhib'apito ne, sasedoti na da'ãma romhuri'wa 're hâimana u'âsi mono wa.

Hebreu 9:26

Cristu hã wahub sidâpâsi 'Re ihâimana u'âsi mono ma, dazada 're sisõmri u'âsi mono 'wa'âhã, te aré ropoto na'rata hawim haré dazada 're dâ'â u'âsi. Tawamhã robzépata za'ẽtẽ na te aré tô te te 're robzépata u'âsi. Tane nherẽ, za rob'rãsutu u irob'umhutuzéb u si ma tô misi haré tãma sisõ, 'Re ihâimana u'âsi mono ma hã, dazada dâ'â da, taha zarina dawasédé hã te te dama 're apari mono da oto, 'Re ihâimana u'âsi mono hã.

1 Pedru 1:20

'Re ihâimana u'âsi mono hã te te ro'apoto mono õ ré, ma tô Cristu hã pisutu siro, dazada dâ'â da, dawasété wa'âbâzéb da hã. Ãhã na ro isi'utõrĩzéb u hã, ma tô we datẽme wi oto Cristu hã, aima ãma 're irowẽ za'ra wa'aba mono zéb da hã.

2 Pedru 3:3

Marĩ ipire na, wa za oto aima rowasu'u za'ra wa'wa, waihu'u za'ra wa'aba da. Rob'rãsutu u hã romhuture wamhã, te za ni'wam norĩ hã ãne 're hâimana za'ra. Marĩ iwasété zô si te za te te 're rowasutu za'ra. Ãne te za te te aima 're nharĩ za'ra wa'wa: “Oro apâ wei morĩ 'ruza Zezu Cristu hã, te te sina iropisutuzéb zarina. E mahãta tawamhã. Wamama norĩ hã ma tô wawi 're dâ'â za'ra. Tane nherẽ, te õhõ u'â zahadu 're ropsa'wari, Ropoto na'rata hawim haré.” Ãne te za te te aima 're nharĩ za'ra wa'wa.

Zuda 1:18

Ãne ma tô ta norĩ hã wama waihu'u siromo za'ra: “Nimahã na iropsi'utõrĩzéb u hã aibâ norĩ te za dawazari 're hâimana za'ra, iwasété norĩ hã. 'Re ihâimana u'âsi mono hã te te siwi 're wazé mono õ di za. Te za duré ai'ãma 're wa'ẽ za'ra wa'wa. Si'uihâ na marĩ hã te te sima 're iwẽ za'ra mono zéb uwaibaba si, te za te te 're 'manharĩ za'ra, iwasétére hã.” Ãne ma tô wama waihu'u siromo za'ra, Zezu Cristuhu zadawa wasu'u'wa norĩ hã.