Galata 4:9 - ꞌRe Ihâimana Uꞌâsi Mono Zadawa Wasuꞌu

⁹ 'Re ihâimana u'âsi mono hã ma tô oto Aimama na asiwi iwaihu'u za'ra wa'wa. Tahawa, aima 're rowẽ za'ra wa'aba mono di oto. Taha nhipai u, ti'ra na te te oto sina ai'awaihu'u aba wa, aima 're rowẽ uptabi za'ra wa'aba mono di. Ãne wamhã, e niha te za bété apâ aipizari za'ra wa'wa, asimizazezéb 'rata u hã, taha zarina asina uwaimrami za'ra wa'aba õ nherẽ, asõ'reptu za'ra wa'aba zé hã, duré taha zarina rowẽ si aima 're hâimana za'ra wa'aba mono õ nherẽ. E niha te za bété asima iwẽ za'ra wa'wa, danhimiwada'uri zarina si pawa'âbâ ãna 're ihâimana za'ra mono norĩ ne, apâ 're aihâimana za'ra wa'aba mono da, robzei'õ na hã.

Galata 4:9 ပူးပေါင်းရင်းမြစ်များ

Salmu 1:6

Ite bâdâdi na 're inomro wẽ mono norĩ si, te tô Uburé Danhib'apito hã te te 're awẽsãmri. Tane nherẽ, 're inomro wasété mono norĩ nhibâdâdi hã te 're isi'utõrĩ mono zéb u si te te 're ãwisi za'ra.

Ezodu 33:17

Uburé Danhib'apito Mozésihi ma, te duré ãne tãma tinha: — Ĩwi iwaptẽrẽzém na hã wa za tô aiwapa. E marĩ wa. Ĩma i'aiwaihu'u wẽ zarina, duré asina ĩma irowẽ wazere zarina.

Provébiu 2:5

Ãne hã 're 'manharĩ mono wamhã, te za Danhib'apito 'Re ihâimana u'âsi mono wazébzé hã iwaihu. Te za duré i'aza'rese mo, rowaihu'u wẽ zé hã.

Mateu 11:27

— Ĩmama ma tô ĩma waihu'u, uburé za 're ihâimana mono zé hã. Ni'wam norĩ hã si'uihâ na te te 're ĩwaihu'u za'ra mono õ di, 're ĩhâimana mono zém na hã. Ĩmama si ma tô ti'ra na ĩwaihu'u pese, 're ĩhâimana mono zém na hã. Duré dasi'uihâ na Ĩmama, da te 're waihu'u za'ra mono õ di za. Ĩwétési wa tô Ĩmama hã waihu'u pese, 're ihâimana mono zém na hã. Te ĩsima 're i'awẽ mono zéb uwaibaba si, wa za ni'wam norĩ ma si te 're awaihu'u, ta norĩ zama Ĩmama hã te te 're waihu'u za'ra mono da, 're ihâimana mono zém na hã.

Luca 5:38

Itép si'uiwa 'rem na si te za rob'rãi wa'u isé tébre hã da te iwa 're 'masisi za'ra.

Zuwã 10:14

Wa hã pone'ẽrebâ 'madâ'â'wa, isimizawi pese na, wa tô ĩsina simiré'é, ĩzazei'wa norĩ te 're azawi pese mono wa. Ĩmama hã ma tô ĩwaihu'u, ti'ra na. Wa hã wa duré õ hã waihu'u, Ĩmama na. Tane duré ĩzazei'wa norĩ hã wa tô te 're awaihu'u u'âsi, ĩnhib'a'uwẽ na. Ĩzazei'wa norĩ hã ma tô duré ĩwaihu'u za'ra, tinhib'apito na. Ta norĩ zada, wa za ĩsisawi ãna hã dârâ, te 're anho'reptui mono da.

Zuwã 10:27

Ĩnhib'a'uwẽ si te za ĩmreme hã te te 're wapari pese za'ra. Duré pone'ẽrebâ tede'wa, tinhimizama te te 're i'awaihu'u mono ne, wa tô ĩnhib'a'uwẽ norĩ hã waihu'u za'ra. Ta norĩ si te za ĩnhimiroti hã te te 're 'madâ'â pese za'ra.

Zuwã 17:3

A hã misire Danhib'apito uptabi. Wa hã Zezu Cristu Danho'reptui'wa da, ĩpisudu, we datẽme ĩzatõrĩ. Ãne na, da te 're wawaihu'u za'ra mono wa, da te 're wazazei pese za'ra mono wamhã, robzei u'âsi te za ĩ'ãma 're danomro. 'Re dadâ'â za'ra mono ãna, te za duré 're dasi'ubumroi u'âsi, hâiwa ãma.

Roma 8:29

Duréihã marĩ õ ré hã, 'Re ihâimana u'âsi mono te te sima ãma irotizéb zarina, te te sima 're iwa'apisutu mono norĩ hã, i'ra ne, tô Zezusihi ne, oto 're wahâimana za'ra mono da, ma tô duré te te 're wa'apisutu siro. Ta hã uburé isazei'wa norĩ dub'rada, 're hâimana mono da, ma tô ãne te te 're wa'apisutu siro, sima.

Roma 8:3

'Re ihâimana u'âsi mono nhimiroti 'rata na Mozési te te irob'ui'érézé hã wa te 're i'madâ'â pese za'ra mono zéb zarina, te te sima wa'ãma 're aroti mono õ di za 'Re ihâimana u'âsi mono hã, wawasédé hã te te oto wa'ãma 're ab'madâ'â tõ mono da, taha zarina te te oto 're wa'awẽsãmri mono da. E marĩ wa. Wawasété u'âsi wahâimanazém hawi, wanhib'uware na 're wanomro u'âsi mono wa. Tahawa, wa te wasina 're uwaimrami waihu'u za'ra mono õ di, 'Re ihâimana u'âsi mono nhimiroti 'rata na rob'ui'éré hã. Wawasété si, wa te 're i'manharĩ za'ra mono zé hã ma tô te te siwi 're awẽ'õ pese, 'Re ihâimana u'âsi mono hã. Tahawa, ma tô ti'ra hã we satõ ti'ai u, da'upana dazada dâ'â da, dawasété u'âsi 're idahâimana za'ra mono zém hawi, te te 're da'anho'reptui mono da. Ti'ai ãma dahâiba na ma tô 're mo, Cristu hã. Tane nherẽ, dasine ti'ai ãma hã tiwasédé hã te te 're ab'manharĩ mono õ di, tihâiba na hã.

1 Corĩtu 13:12

Tane duré, wa norĩ hã dasi'madâ'âzé i'uzurire na ãma 're idasi'madâ'â pibui prã za'ra mono ne, 'Re ihâimana u'âsi mono hâimanazé hã wama waihu'u prã za'ra di, ti'ai ãma 're wahâimana za'ra mono ré hã. Tane nherẽ, nimahã na si, wa za 'râwi wa te 're 'madâ'â za'ra oto, 'Re ihâimana u'âsi mono hã. Tawapsi wama waihu'u pese za'ra di za oto, 'Re ihâimana u'âsi mono hâimanazé hã. 'Re iwahâimana za'ra mono zém na, te te 're iwa'awaihu'u pese mono ne, wama waihu'u pese za'ra di za oto duré.

1 Corĩtu 15:34

Ni'wam norĩ hã asiré 're ihâimana za'ra wa'aba mono norĩ hã 'Re ihâimana u'âsi mono hã 'râwi te te 're waihu'u za'ra mono õ di. E ãne na 're siséb za'ra mono ãna. Asimiza'rese ãna 're aihâimana za'ra wa'aba mono zém hawi, te za oto aipizari za'ra wa'wa, aiwasédé hã rẽme pese za'ra wa'aba da, aiwẽ uptabi na si 're anomro aba mono da oto.

1 Corĩtu 8:3

Ni'wam norĩ ma, 'Re ihâimana u'âsi mono, tãma isawi za'ra si, te za 'Re ihâimana u'âsi mono hã tinhib'a'uwẽ na te te sina 're awaihu'u.

2 Corĩtu 11:20

Ni'wam norĩ hã ma tô 're ihâimana za'ra mono zéb zarina, 're aihâimana za'ra wa'aba mono da, te te aima 're 'rui u'âsi za'ra wa'wa, ta norĩ zadawa para si, uburé marĩ hã 're 'manharĩ za'ra wa'aba mono da si. Tane nherẽ, asiwi 're wẽ'õ za'ra wa'aba mono õ di, ta norĩ hã. Sadawa nhipese na, aiwi 're sipsaihuri u'âsi za'ra wa'aba mono nherẽ, duré ta norĩ ma si, 're aihâimana za'ra wa'aba mono da, te te 're aiwaibui wa'aba mono nherẽ, e niha bâ bété, asiwi 're wẽ'õ za'ra wa'aba mono õ di. Ta norĩ si, aima pire na 're hâimana za'ra wa'aba mono newa, 'râwi 're si'madâ'â ze za'ra mono nherẽ, duré te te ai'ãma 're wasété za'ra wa'aba mono da, atob'rata wi te te 're aihâ za'ra wa'aba mono nherẽ, e asiwi hã 're wẽ'õ za'ra wa'aba mono ãna bété.

2 Corĩtu 4:6

Duréihã ropoto na'rata hawimhã, 'Re ihâimana u'âsi mono ma tô tinha, ãne: “Ãhã na hã robra si 're asa'wari mono nherẽ, oto airowa'a na.” Ãne te tinha. Tane ma tô duré wapẽ'ẽ 're, te te wama 're arowa'a oto, isadawa wasu'u hã wa te oto ãma 're iwaihu'u pese za'ra mono zéb da hã. Cristu hã ma tô wama waihu'u za'ra, Imama 're imorĩ wẽ uptabi na hã.

Galata 3:3

E niha te bété oto rosa'rata waihu'u ãna, 're anomro aba mo. 'Re ihâimana u'âsi mono, Tipẽ'ẽzani te te aima isõmri za'ra wa'aba zarina, ma tô aihâimanazép tém na ãma isãna'rata za'ra wa'wa, iwẽ na. E niha te bété oto 'râwi 're asi'madâ'â za'ra wa'aba mo asi'uihâ na, asina uwaimrami za'ra wa'aba da newa, asisõ'reptu za'ra wa'aba zé hã.

Galata 4:3

Tane wa norĩ hã, ai'uté ne, roti sena hã wama iwaihu'u pese za'ra õ zarina, wa tô aré 're wahâimana za'ra, roti da te wama 're iwaihu'u za'ra mono zéb zarina si.

Éfézu 1:17

Wamama hã waihu'u pese za'ẽtẽ na dâ'âsina, wa aima za'ra wa'aba te tiwi 're rowaptẽrẽ u'âsi, hâiwa hawi dahâimanazém na rowaihu hã Tipẽ'ẽzani na te te aima 're sõmri u'âsi za'ra wa'aba mono da, duré Wamama hã ihâimanazém na 'râwi 're waihu'u za'ra wa'aba mono da, 'Re ihâimana u'âsi mono hã, Wanhib'apito Zezu Cristuhu 'madâ'â'wa hã.

2 Timotiu 2:19

Tane nherẽ, ẽtẽ 'manharĩ na 'ri na'rada hã, siptete na 're ihâimana mono ne, te za 'Re ihâimana u'âsi mono nhimiroti hã pire na 're hâimana u'âsi. Ãne isimiroti na rob'ui'éré hã: “Wanhib'apito hã te za tinhib'a'uwẽ norĩ hã tite na te te 're awaihu'u.” Ãne duré ãma irob'ui'éré hâiba amo hã: “Ni'wam norĩ hã Wanhib'apito nhib'a'uwẽ na dama 're siwasu'u za'ra mono wamhã, te za tiwasédé hã rẽme pese za'ra, 're nomro wẽ mono da oto.” Ãne isimiroti na rob'ui'éré hã.

Hebreu 7:18

Ãne wa, 'Re ihâimana u'âsi mono nhimiroti 'rata na Mozési te te ãma irob'ui'éré hã pire na dama 're hâimana mono õ di oto. E marĩ wa. Marĩ dai õ wa oto, te te ãma 're ida'anho'reptui mono zéb da hã. 'Re ihâimana u'âsi mono nhimiroti 'rata zarina, da te dasina tãma 're uwaimrami waihu'u za'ra mono õ wa, taha na te te sima da'ãma 're aroti mono õ di, dawasédé hã te te oto da'ãma 're i'ab'madâ'â mono õ zéb da hã, duré taha zarina te te 're ida'awẽsãmri mono da hã. Tahawa, aimawi hã iwẽ uptabi hã ma tô 'Re ihâimana u'âsi mono hã wama pisutu za'ra oto, sô 're iwanhimipari za'ra mono zéb da hã: Cristuhu si te oto sasedoti na pire uptabi na dama 're hâimana. Taha zô si wasina 're wanhimipari za'ra mono wamhã, wa za itẽme 're wasihutu wapẽ'ẽ 'remhã 'râwi, 'Re ihâimana u'âsi mono u hã.

2 Pedru 2:20

Ãté ta norĩ hã Danho'reptui'wa na ma tô Wanhib'apito Zezu Cristu hã te te 're waihu'u za'ra. Taha zarina ma tô isazei'õ'wa hâimana wasétézém hawi 're sipizari za'ra. Tane nherẽ, apâ dasiré 're hâimana wasété za'ra mono wamhã, e niha za tawamhã, 're ihâimana za'ra mono zé hã. Wanhib'apito hã te te 're saze za'ra mono õ ré, rowẽ'õ na 're ihâimana za'ra mono zém nhipai u hã, tãma 're rowẽ õ uptabi za'ra mono di za oto.

1 Zuwã 5:20

Ãne wa tô duré waihu'u za'ra ni. Zezusi hã, 'Re ihâimana u'âsi mono 'ra hã ma tô wei mo, ti'ai u. Ta hã ma tô tinhimiroti na te te 're wa'apawapto, 'Re ihâimana u'âsi mono hã tô sena uptabi hã wa te 're iwaihu'u pese za'ra mono zéb da hã. I'ra ãma, Zezu Cristuhu ãma 're wanomro mono wa, wa duré Imama ãma 're wanomro, tô sena uptabi 're ihâimana mono ãma. Zezusi hã, ta hã uburé Danhib'apito uptabi. Ta hã dapẽ'ẽ 're dadâ'â ãna 're idanomro u'âsi mono zé hã, te te dama 're i'apisutu mono. Ãne na wa tô wasiwi waihu'u pese za'ra ni.