Galata 4:31 - ꞌRe Ihâimana Uꞌâsi Mono Zadawa Wasuꞌu

³¹ Ãhã wa, ĩsisãnawã norĩ, wa za oto marĩ hã iwasu'u na waihu'u za'ra ni. 'Re ihâimana u'âsi mono hã Agaha nhihudu na te te 're wa'anhisi mono õ di za oto, danhimiwada'uri zarina 're imorĩ nhihudu, 're iwahâimana za'ra mono na hã. Mare di. Danhimiwada'uri zarina 're ihâimana mono õ nhihudu, 're iwahâimana za'ra mono na, te oto te te 're wa'anhisi, 'Re ihâimana u'âsi mono hã, Saraha nhihudu uptabi na. Tahawa, wa norĩ hã wama 're rowẽ uptabi za'ra mono di oto.

Galata 4:31 ပူးပေါင်းရင်းမြစ်များ

Zuwã 8:36

Wa hã wa aima ĩsiwasu'u za'ra wa'wa, 'Re ihâimana u'âsi mono 'ra na. Aiwasété hawi te 're asõ'reptu za'ra wa'aba mono wamhã, tô sena te za rowẽ na ĩ'ãma 're anomro aba mo.

Galata 4:22

Ãne ta norĩ wasu'u na, rob'ui'éré hã: Abra'ãhã 'ra norĩ hã, maparane aibâ te tãma 're hâimana zahuré. Imorĩ'rada hã Agaha 'ra, iwada'uri zarina si pawa'âbâ ãna 're ihâimana mono 'ra. Duré ihâiba amo hã Saraha 'ra wada'uri ãna 're ihâimana mono zé're hawimhã, te 're hâimana.

Galata 4:30

E niha tawamhã duréi wasu'u na rob'ui'éré hã. Ãne iwasu'u hã: “I'ra ré satõrĩ, pi'õ hã romhuri'wa hã. Imama, tinhibrom na tãma ãma sipo'o zahuré õ di za, danhimiwada'uri zarina 're ihâimana mono õ 'ra me.”

Galata 5:1

Zezu Cristu hã ma tô wa'anho'reptui pa, rowẽ na ãma 're wahâimana za'ra mono da. Tahawa, 'Re ihâimana u'âsi mono nhimiroti 'rata na rob'ui'éré zarina, wa te 're irob'manharĩ za'ra mono zém na, 're wanhopré mono õ di za oto, taha zarina te te õ hã 're wa'anho'reptui mono õ wa oto. Ãne wa, tô senai'õ na rowasu'u'wa norĩ wi 're asiptete za'ra wa'aba mono za oto, isimiroti na 're aihâimana za'ra wa'aba mono wa, apâ robzei'õ na 're anomro aba mono tõ da.

Galata 5:13

Ĩsisãnawã norĩ, 'Re ihâimana u'âsi mono hã ma tô aima pisutu za'ra wa'wa, rowẽ na ãma 're aihâimana za'ra wa'aba mono da, isimiroti na rob'ui'éré 'rata zarina, 're irob'manharĩ za'ra wa'aba mono zém na 're asõpré wa'aba mono tõ da, taha zarina, 'Re ihâimana u'âsi mono te te 're asõ'reptu za'ra wa'aba mono dai õ wa. Tane nherẽ, rowẽ na 'Re ihâimana u'âsi mono ãma 're aihâimana za'ra wa'aba mono wẽ te, marĩ iwẽ'õ na aipẽ'ẽ 're, asima 're rosa'rata za'ra wa'aba mono wamhã, asina hã ãma 're rob'manharĩ za'ra wa'aba mono õ di za. Ãne te za oto 're anomro aba mo. Asimizawi pese za'ra wa'aba zéb zarina si, te za 're asipawaptob za'ra wa'aba mo niha wamhã asib'rata na, duré asimarĩ na zama, duré asimiroti na zama hã.