Galata 4:30 - ꞌRe Ihâimana Uꞌâsi Mono Zadawa Wasuꞌu

³⁰ E niha tawamhã duréi wasu'u na rob'ui'éré hã. Ãne iwasu'u hã: “I'ra ré satõrĩ, pi'õ hã romhuri'wa hã. Imama, tinhibrom na tãma ãma sipo'o zahuré õ di za, danhimiwada'uri zarina 're ihâimana mono õ 'ra me.”

Galata 4:30 ပူးပေါင်းရင်းမြစ်များ

Zuwã 8:35

Apito ma, romhuri'wa norĩ hã, apito 'ra me, aiwab õ di. Apito 'ra, te za timama nhorõwa ãma 're sãmra u'âsi, i'ra wa. Tane nherẽ, tãma iromhuri'wa norĩ si hã isõrõwa ãma 're si'ubumroi u'âsi mono õ di za.

Roma 11:2

Tinhib'a'uwẽ norĩ hã, tô sena te te siwi 're awẽ'õ mono õ di 'Re ihâimana u'âsi mono hã, duréihã isãna'rata hawimhã, te te sima 're i'apisutu mono norĩ hã. Duréihã Eliasi 'Re ihâimana u'âsi mono zadawa 'mahârâ'wa hã ma tô Izaraéu nhihudu norĩ ãma iwasété na ãma sa'ra, 'Re ihâimana u'âsi mono ma. Ãne na te te ãma irob'ui'érézé hã, aima waihu'u pese za'ra wa'aba di. Ãne ma tô ãma rob'ui'éré: “Wanhib'apito, asadawa 'mahârâ'wa norĩ hã ma tô ta norĩ hã te te 're simro. Duré ẽtẽ za'ra 'manharĩ hã, isisiwi aima danhoprubzéb da, marĩ, da te iwa 're isa'ra za'ra mono zé hã ma tô uburé te te 're prub za'ra, ẽne hã. Ĩsiwaprosi uptabi, wa oto 're ĩhâimana, te 're i'asawi pese mono hã. Taha 'ru te, te duré ĩzada 're hâimana za'ra, ĩzama te te siwi ĩwĩrĩ da.”

Roma 4:3

Duréihã ibaihâ na ma tô ni'wa hã Abra'ãhã wasu'u na ãma rob'ui'éré, ãne na: “Abra'ã hã 'Re ihâimana u'âsi mono si, ma tô te te sina 're umnhasi u'âsi, te te tãma iropisutuzém na hã. Taha ãma si, ma tô sasõ. Tahawa, ma tô 'Re ihâimana u'âsi mono hã sima ãma roti, iwasédé hã te te oto ãma 're 'madâ'â tõ mono da, duré taha zarina si te te oto wẽsãmri da. Tahawa, tãma wẽ uptabi di, 'Re ihâimana u'âsi mono ma hã.” Ã hã Abra'ã hã, marĩ hã te te 're i'ab'manharĩ wẽ mono na, 'râwi sina 're iwata mono õ zé wasu'u.

Galata 3:22

Tane nherẽ, daro mono bâ te dawasété na 're danomro. Dasi'uihâ na dawasété wi 're dasipizari waihu'u za'ra mono õ di tô. Ãne, da te iwaihu'u za'ra zéb da hã, ma tô 'Re ihâimana u'âsi mono zadawa 'mahârâ'wa hã ãma rob'ui'éré. E marĩ da. Zezu Cristu Danho'reptui'wa na, da te dasina 're umnhasi za'ra mono da, tawapsi 'Re ihâimana u'âsi mono iwẽ hã te te dama ãma 're uwaimrami mono da, te te dama iropisutuzéb zarina.

Galata 3:8

Zahadu romhâ uptabi nherẽ, ma tô zudeu'õ norĩ ãma sima roti, 'Re ihâimana u'âsi mono hã. Ãne isimiroti hã: Zudeu'õ norĩ hã, Cristu Danho'reptui'wa na te te sina 're umnhasi za'ra mono wamhã, ta norĩ ma zama te za duré tãma 're irowẽ za'ra mono zéb da hã te te tãma 're apisutu, 'Re ihâimana u'âsi mono hã. Iwasédé hã te te oto ãma 're i'ab'madâ'â mono õ zéb zarina, te za te te 're awẽsãmri. Taha zarina wasété za'ra 'ru te, te te ahâ za'ra õ di za, rob'rãsutuzéb ãma hã. Ãne isimiroti hã zudeu'õ norĩ ãma hã. Tahawa, ma tô ãne Abra'ãhã ma waihu'u siro, 'Re ihâimana u'âsi mono hã: “Te aima iropisutuzém na asina ĩzazei pese zéb zarina, wa za dama 're irowẽ za'ra mono zéb da hã te dama 're apisutu, dapoto mono bâ.” Ãne ma tô iwasu'uwẽ na romhâ ré ãma po're pu'u siro.

Galata 4:22

Ãne ta norĩ wasu'u na, rob'ui'éré hã: Abra'ãhã 'ra norĩ hã, maparane aibâ te tãma 're hâimana zahuré. Imorĩ'rada hã Agaha 'ra, iwada'uri zarina si pawa'âbâ ãna 're ihâimana mono 'ra. Duré ihâiba amo hã Saraha 'ra wada'uri ãna 're ihâimana mono zé're hawimhã, te 're hâimana.

Galata 4:31

Ãhã wa, ĩsisãnawã norĩ, wa za oto marĩ hã iwasu'u na waihu'u za'ra ni. 'Re ihâimana u'âsi mono hã Agaha nhihudu na te te 're wa'anhisi mono õ di za oto, danhimiwada'uri zarina 're imorĩ nhihudu, 're iwahâimana za'ra mono na hã. Mare di. Danhimiwada'uri zarina 're ihâimana mono õ nhihudu, 're iwahâimana za'ra mono na, te oto te te 're wa'anhisi, 'Re ihâimana u'âsi mono hã, Saraha nhihudu uptabi na. Tahawa, wa norĩ hã wama 're rowẽ uptabi za'ra mono di oto.

Tiagu 4:5

Duréihã ma tô ãne imreme na rob'ui'éré, 'Re ihâimana u'âsi mono zadawa 'mahârâ'wa hã, ãne: “Wamama, Tipẽ'ẽzani te te wama 're isõmri mono hã, wapẽ'ẽ 're wama 're hâimana za'ra mono da, te te sima 're wa'awẽ uptabi, Wamama zawi'wa na oto 're wanomro mono da.” E taré ma tô ãne na hã rob'ui'éré, ibaihâ na hã. Mare di. Taré te te ãma rob'ui'éré õ di. Tô sena ma tô ãma rob'ui'éré.