Galata 4:19 - ꞌRe Ihâimana Uꞌâsi Mono Zadawa Wasuꞌu

¹⁹ Ĩ'ra norĩ, ĩma asawi pese za'ra wa'aba norĩ, pi'õ tiwasã te te 're isépata za'ra mono ne, wa tô wa hã ĩpẽ hã te ai'ãma 're sépata za'ra wa'wa, Zezu Cristu 're imorĩzém na 're anomro aba mono õ wa. Ãma 're anomro wẽ wa'aba mono wapsi, ĩma 're rowẽ mono di za.

Galata 4:19 ပူးပေါင်းရင်းမြစ်များ

Luca 22:44

Tiwi robzei'õ uptabi nherẽ, ma tô duré mre, Timama ma, mreme 'rãihâ na. Tahawa, ma tô 're su'u a'a, dawapru ne, ti'ai wa.

Roma 13:14

Siwa'ru 'râwi asima iwẽzéb zarina, aipẽ'ẽ 're asimirosa'rata wasété aba na ãma 're rosa'rata za'ra wa'aba mono õ di za. Wanhib'apito Zezu Cristu 're imorĩzém na si te za oto 're aihâimana za'ra wa'aba mo, isine.

Roma 8:29

Duréihã marĩ õ ré hã, 'Re ihâimana u'âsi mono te te sima ãma irotizéb zarina, te te sima 're iwa'apisutu mono norĩ hã, i'ra ne, tô Zezusihi ne, oto 're wahâimana za'ra mono da, ma tô duré te te 're wa'apisutu siro. Ta hã uburé isazei'wa norĩ dub'rada, 're hâimana mono da, ma tô ãne te te 're wa'apisutu siro, sima.

2 Corĩtu 12:14

Si'ubdatõ ãma, wa za oto ãma atẽme ĩmorĩ 'wa, te duré asabu na sahu za'ra wa'aba da. Tawamhã ãma atẽme ĩmorĩ aba wamhã, asiwi ĩpawa'âbâ aba da, te aiwi rowaptẽrẽ za'ra wa'aba õ di za, asimarĩ za'ra wa'aba zô, ãma atẽme ĩmorĩ aba õ wa za. Taré Cristuhu wasu'uwẽ na te aipawaptob za'ra wa'aba da si, wa za tô ãma atẽme ĩmorĩ 'wa. E damama norĩ ma, te za da'ra norĩ hã te te 're ubumroi pese za'ra, dasazé hã. Mare di. Damama norĩ si, te za te te 're rob'ubumroi pese za'ra, ti'ra sazéb da hã. Tane duré wa hã, aimama za'ra wa'aba ne, aima 're ĩhâimana za'ra wa'aba mono wa, te 're aipawaptob za'ra wa'aba mono da si, wa tô te ai'ãma 're rosa'rata u'âsi za'ra wa'wa, ĩsima. Tahawa, asiwi ĩpawa'âbâ aba õ di za.

Éfézu 4:13

Tawamhã aihĩni wa za oto wanhimirosa'rata na wasina wa te 're sazei pese za'ra, Wanhib'apito wasu'uwẽ hã wa te ãma 're isaze za'ra mono zém na hã. Duré aihĩni wa za oto 'râwi wa te 're waihu'u za'ra, 'Re ihâimana u'âsi mono 'ra hã, niha 're ihâimana mono na. Ãne wamhã, wahâimana wẽ zé, wa za wasima wa te 're sa'ẽtẽ za'ra. Tawamhã wa za oto wasina wa te 're uwaimrami za'ra, Cristuhu ne 're iwanomro wẽ uptabi mono zé hã.

Éfézu 4:24

Da'uza hã ihâ tém na 're idasi'uza za'ra mono ne, te za oto aihâimanazép tém na si 're aihâimana za'ra wa'aba mo, iwẽ na si. Taha da, ma tô 'Re ihâimana u'âsi mono hã aipoto téb za'ra wa'wa aipẽ'ẽ 're, isine 're anomro wẽ wa'aba mono da, tô sena na duré dama 're aihâimana wẽ za'ra wa'aba mono da oto.

Filipu 1:8

'Re ihâimana u'âsi mono ma si, tãma ĩwaihu'u pese di, sena na ĩma asawi uptabi za'ra wa'aba na hã, duré ai'ãma 're ĩpẽ'ẽzé uptabi za'ra wa'aba mono na zama. Cristu Zezusihi ma, tãma asawi uptabi za'ra wa'aba ne, wa tô duré wa hã te 're asawi pese za'ra wa'wa duré.

Filipu 2:17

Sasedoti norĩ hã 'Re ihâimana u'âsi mono ma, da'ãma romhuri'wa norĩ hã danhimizama na tãma danhoprubzé te te tãma 're izata za'ra mono ne, ma tô a norĩ wa'wa hã tãma 're asisõmri u'âsi za'ra wa'aba mo, tiwi 're asisawi za'ra wa'aba mono ãna, asina 're i'umnhasi za'ra wa'aba mono zéb zarina. Duré sasedoti norĩ hã uwa 'rãi wa'u isé hã, 'Re ihâimana u'âsi mono ma danhoprubzé, danhimizama te te tãma 're izata za'ra mono nhisiwi, te te 're isa'wari za'ra mono ne, ãté ĩwapru hã wa za sa'wa, sena na za da te dasiwi ĩwĩrĩ wamhã, ĩdâ'âzém na 'Re ihâimana u'âsi mono ma, ĩsina ĩnhoprubzéb da. Ãne na za ĩma romhâimana nherẽ, ĩma rowẽ uptabi di za. Duré aima ĩtoi uptabi za'ra wa'aba di za, ãne na ĩma romhâimana nherẽ.

Filipu 2:5

Cristu Zezusi hã sima si 're hâimana mono õ di. Tahawa, isimirosa'rata ne, te za duré a norĩ wa'wa hã 're irosa'rata wẽ za'ra wa'aba mo.

Colosu 1:27

'Re ihâimana u'âsi mono hã ma tô sima ãma roti, ãhã wasu'u hã iwẽ uptabi hã aré da te 're iwaihu'u za'ra mono õ hã te te oto dama awasu'u hâi'ré da sõ'awi, dapoto mono bâ da te oto 're waihu'u za'ra mono da, zudeu'õ norĩ zama. Ãhã wasu'u hã aré da te 're iwaihu'u za'ra mono õ hã, ãne: Cristu hã te oto aipẽ'ẽ 're, 're sãmra za'ra wa'wa. Tahawa, te za tô taha zô si 're asimipari za'ra wa'aba mo, 'Re ihâimana u'âsi mono, iwẽ uptabi hã za te te wama 're i'apisutu mono zô si. Ãne 'Re ihâimana u'âsi mono wasu'u hã, ã hã aré da te 're iwaihu'u za'ra mono õ.

Colosu 2:1

Wa hã wa ĩsima wẽ ãne hã, te ai'ãma 're iromhuri pese za'ra wa'aba mono na asiwi ĩwaihu'u za'ra wa'aba da, ĩhâiba pibu za'ra wa'aba õ nherẽ. Duré Laudiséa na 'ri nho'õmo nhisi ãma isazei'wa norĩ 're isi'ubumroi mono norĩ ãma te 're iromhuri pese mono na asiwi ĩwaihu'u za'ra wa'aba da, wa duré ĩsima wẽ, daro mono bâ ni'wam norĩ ãma te duré 're iromhuri pese mono na zama, uburé te te 're ĩhâiba pibu za'ra mono õ norĩ ãma hã.

Colosu 3:10

Taha wa'rãmi, te oto 're idanomro mono zé itém na si 're anomro aba mo, iwẽ na. 'Re ihâimana u'âsi mono, ma tô te te 're aipoto téb za'ra wa'wa aipẽ'ẽ 're, isine 're aihâimana u'âsi za'ra wa'aba mono da oto, taha zarina õhõ si duré 're waihu'u pese za'ra wa'aba mono da.

Colosu 4:12

Epafrasi te duré ãma asawi za'ra wa'wa, tame asiré isazei'wa norĩ siré 're ihâimana mono hã, Cristu Zezusihi ma romhuri'wa hã. Ta hã te ai'ãma 're mreme u'âsi 'wa simi'ẽ na, 'Re ihâimana u'âsi mono ma, taha si te te 're aipawaptob u'âsi za'ra wa'aba mono da, asiptete sina ãma 're anomro aba mono da, duré aihâimana prédup sina 're aihâimana wẽ za'ra wa'aba mono da, ta hã te te aima 're iwẽ za'ra wa'aba mono zéb zarina si. Cristu hã asina 're i'umnhasi za'ra wa'aba mono zém na 're asiptete za'ra wa'aba mono da, te duré ai'ãma 're mreme u'âsi za'ra wa'wa.

1 Tesalonita 2:7

Cristu hã ma tô wazatõrĩ za'ra, iwasu'uwẽ hã wa te dama 're waihu'u za'ra mono da, isadawa para. Tahawa, dama wamreme pire za'ra di. Tane nherẽ, wamreme pire na, wa te duré 're aiwari za'ra wa'aba mono õ wa, wa te ãma aiwi robzei'õ za'ra wa'aba õ di. Mare di. Ãnei õ di, wa te aima i'manharĩ za'ra wa'aba zé hã. Wamreme wẽ na si, wa tô aima rowasu'u za'ra wa'aba ni. Wa tô ai'madâ'â pese za'ra wa'aba ni, dana norĩ hã ti'ra te te 're i'madâ'â pese za'ra mono ne.

Titu 1:4

Titu, tahawa, wa ãma aima rob'ui'éré. Te i'aipawaptobzéb zarina, wasiré Wanhib'apito zazei'wa 're aimorĩ wa, wa ĩ'ra na asisi, asawi te. Wamama ma, wa ai'ãma 're ĩmreme u'âsi, 'Re ihâimana u'âsi mono ma, duré Wanhib'apito Cristu Zezusihi ma zama, isimizawizé hã ai'ãma 're hâimana u'âsi mono da, rowẽ u'âsi, ãma 're aimorĩ da.

Filemo 1:10

Ãne ãhã na Onezimuhu ãma, wa za aima rowaihu'u. Wa za duré aiwi rowaptẽ, Onezimuhu ma. Cristuhu zazei'wa te oto 're mo, ta hã. Wanhib'apito wasu'uwẽ hã wa tô tãma waihu'u, dazazéb 're ĩnhamra ré. Ãhã wamhã, ma tô saze. Tahawa, ĩ'ra ne, te oto ĩma 're hâimana, Onezimu hã.

Filemo 1:19

Tô sena, ĩmreme hã. Wa hã Paulu hã wa za aima wa'â. Ãne wa oto aima rob'ui'éré, waihu'u da. A hã, Zezusihi zazei'wa. Ãhã na Zezusihi wasu'uwẽ zarina, robze na te oto 're aimo, iwasu'uwẽ hã te aima waihu'u wa, wa hã.

Hebreu 5:7

Zezusi hã ti'ai ãma 're morĩ ré hã, ma tô wawa sina Timama ma mre, mreme 'rãihâ na, za te te irobzépatazém na te te pawaptob da. Tawamhã 'Re ihâimana u'âsi mono, Zezusihi mreme te te wapari wamhã, ma tô sima wẽ tô, te te pawaptob da. Zezusi hã uburé marĩ hã Imama te te tãma ipisutuzéb uwaibaba si, te te 're ab'manharĩ mono da, te te sima 're wẽ u'âsi mono wa, ma tô Imama hã sima wẽ, te te pawaptob da. Duré 'Re ihâimana u'âsi mono, niha na hã te te sima wẽ 'wa'âhã, te aré tô tiwaihu'u pese na hã sõ'reptu, dâ'â tõ da.

Tiagu 1:18

Te te sima 're ida'awẽ mono zéb uwaibaba, ma tô timreme na te te 're wa'apoto té, wapẽ'ẽ 're, uburé isimipoto norĩ nhipai u, isib'a'uwẽ tãma 're wahâimana za'ra mono da oto. Ma tô, tô sena na timreme na te te 're wa'apoto té, wapẽ'ẽ 'remhã.

1 Zuwã 2:1

Ĩ'ra norĩ, ĩma asawi pese za'ra wa'aba norĩ hã, e marĩ da, wa ãne na aima rob'ui'éré za'ra wa'wa. Aiwasété ãna oto ãma 're aihâimana za'ra wa'aba mono zéb da hã, wa ãne ĩnhimi'ui'éré na ãma aipo're pu'u za'ra wa'wa. Tane nherẽ, aiwasédé hã 're 'manharĩ za'ra wa'aba mono wamhã, 're 'manharĩ za'ra wa'aba mono nherẽ, Zezu Cristu hã 're imorĩ wẽ uptabi hã te za ai'ãma 're sisaprĩ za'ra wa'wa, tinhimiroti wẽ na. Timama ma, te za ãne te te 're aiwasu'u za'ra wa'wa, Zezusi hã: “Ã norĩ hã, tiwasédé te te 're 'manharĩ za'ra mono wa, asiwi 're awẽ'õ mono õ di za. Wa hã wa tô i'upana sada ĩdâ'â za'ra, uburé iwasédé hã te tãma 're i'apari mono zéb da hã.” Ãne te za Timama wi te te 're rowaptẽrẽ, ai'upana za'ra wa'aba.

1 Zuwã 2:12

Ĩ'ra norĩ, ĩma asawi pese za'ra wa'aba norĩ, 'Re ihâimana u'âsi mono aiwasété 'wa hã te te ai'ãma 're ab'madâ'â aba mono õ di oto, Zezusi hã dazada idâ'âzéb zarina. Duré Wamama hâimanazé hã aima waihu'u pese za'ra wa'aba di. Tahawa, wa aima ãma rob'ui'éré za'ra wa'wa. Iprédum norĩ, duréihã marĩ õ uptabi ré, 're ihâimana mono siré 'râwi 're aihâimana za'ra wa'aba mono wa, wa duré aima rob'ui'éré za'ra wa'wa. Duré ipréduptém norĩ, Iwasété uptabi ãma ai'uté za'ra wa'aba wa, wa aima rob'ui'éré za'ra wa'wa. Duré, 'Re ihâimana u'âsi mono zadawa wasu'u zarina si asiptete na 're aihâimana za'ra wa'aba mono wa, wa oto ãne aima ãma rob'ui'éré za'ra wa'wa.

1 Zuwã 5:21

Ĩ'ra norĩ, ĩma asawi pese za'ra wa'aba norĩ hã, 'Re ihâimana u'âsi mono upana waihu'u pese newa, marĩ na 're idawata za'ra mono norĩ wi, te za 're asi'madâ'â pese za'ra wa'aba mo 'râwi, da'ãma 're sasõmri za'ra wa'aba mono tõ da.

3 Zuwã 1:4

Ãne hã ĩ'ra norĩ ãma te 're wapari wẽ za'ra mono wa, ĩma 're rowẽ uptabi mono di, Wanhib'apito wasu'uwẽ na te ãma 're ipo're pu'u za'ra mono zéb zarina te te 're isazei pese za'ra mono norĩ ãma. Ĩ'ra norĩ 're ihâimana wẽ za'ra mono wasu'u te 're wapari mono wamhã, ĩma 're rowẽ uptabi mono di. Marĩ na uburé rowasu'u hã te 're wapari wẽ mono nherẽ, te te siwi ãma 're wabzu mono õ di, ĩ'ra norĩ wasu'u te 're iwapari zei mono zé hã.