Galata 3:9 - ꞌRe Ihâimana Uꞌâsi Mono Zadawa Wasuꞌu

⁹ Abra'ã hã ma tô 'Re ihâimana u'âsi mono hã te te sina 're sazei pese, te te tãma iropisutuzém na. Tahawa, rowẽ te te tãma ipisutuzéb zarina, ma tô rowẽ uptabi na 're hâimana. Tane duré Cristu Danho'reptui'wa na, da te dasina 're saze za'ra mono wamhã, Abra'ãhã ma te te ipisutu ne, te za dama 're irowẽ za'ra mono zéb da hã te te dama 're apisutu, 'Re ihâimana u'âsi mono hã.

Galata 3:9 ပူးပေါင်းရင်းမြစ်များ

Zenezi 24:1

Tawamhã Abra'ã hã ihi uptabi na te 're hâimana oto. Duré Uburé Danhib'apito ma tô marĩ iwẽ hã te te tãma 're apisutu u'âsi.

Roma 4:11

'Re ihâimana u'âsi mono hã, Abra'ã hã te te sina i'umnhasi pese zém na si, ma tô wẽsã, sihâiwata nhizâri õ nherẽ. Tahawa, sihâiwata nhizâri õ ré, Abra'ã hã, 'Re ihâimana u'âsi mono te te iwẽsãmrizém na hã, te wama wasu'u za'ra, tô sena na uburé da te 're iwaihu'u za'ra mono zéb da hã. Tahawa, Abra'ã hã uburé 'Re ihâimana u'âsi mono, da te dasina 're i'umnhasi za'ra mono norĩ hi'rada, ta hã. Duré sihâiwata nhihâri õ nherẽ, 'Re ihâimana u'âsi mono te te 're i'awẽsãmri mono norĩ hi'rada.

Roma 4:16

Tawamhã e marĩ hawi, ma tô 'Re ihâimana u'âsi mono hã Abra'ãhã ma ropisutu, isihudu norĩ ma ropibu ma. Abra'ã hã te te isazei pese zém hawi, ma tô tãma ropisutu. Te te tãma iropisutuzé wa'rãmi, asa tãma isiwa'âbâzéb zô 're isimnhasi mono õ na, da te dasina 're iwaihu'u pese za'ra mono zéb da hã, ma tô 'Re ihâimana u'âsi mono hã Abra'ã te te isazei pese zém hawip si, tãma ropisutu. E Mozésihi nhimi'ui'éré 'madâ'â'wa norĩ ma si, te 'Re ihâimana u'âsi mono nhimiropisutuzé hã tãma 're hâimana za'ra, zudeu norĩ te te 're isazei pese za'ra mono norĩ ma si. Mare di. Abra'ã hã, 'Re ihâimana u'âsi mono si te te sina i'umnhasi ne, uburé 're idahâimana za'ra mono norĩ ma zama, te tãma 're hâimana za'ra, 'Re ihâimana u'âsi mono nhimiropisutuzé hã. E marĩ wa. Abra'ã hã uburé wahi'rata wa, uburé wasiré isazei'wa norĩ hi'rata wa.

Roma 4:24

Wa norĩ zama, wa te wasina 're i'umnhasi za'ra mono norĩ hã te za duré te te 're wa'awẽsãmri, Wanhib'apito Zezusihi hâiwa'utu'wa, wa te wasina 're i'umnhasi za'ra mono norĩ hã.

Galata 3:14

Ãne ma tô Cristu Zezusi hã wa'awa'âbâ pa. E marĩ da. Simisutu isib'a'uwẽ ãma 're wanomro mono wa, zudeu'õ norĩ ma zama, iwẽ na 'Re ihâimana u'âsi mono te te tãma ãma 're a'uwaimrami mono da, Abra'ãhã ma te te iropisutuzéb zarina, duré wahâiba mono bâ wapẽ'ẽ 're, Tipẽ'ẽzani hã te te wama 're anhomri mono da, te te wama iropisutu za'ra zéb zarina, Zezu Cristu hã Danho'reptui'wa na, wa te wasina 're umnhasi za'ra mono wa.

Galata 4:28

Ĩsisãnawã norĩ, ãhã wasu'u zarina, te oto Abra'ãhã nhihudu na te te 're asisi za'ra wa'wa, 'Re ihâimana u'âsi mono hã. Izaqui hã ma tô podo, 'Re ihâimana u'âsi mono hã Abra'ãhã ma, te te iropisutuzéb zarina. Tane te te tãma iropisutuzéb zarina, te oto Abra'ãhã nhihudu na te te 're asisi za'ra wa'wa, 'Re ihâimana u'âsi mono hã.