Duré iwẽ te te aima 're i'manharĩ za'ra mono norĩ ma, wa hã wa za duré iwẽ hã te tãma 're 'manharĩ u'âsi za'ra, isimi'manharĩ za'ra zé wa'rãmimhã aima. Duré te te aima 're irob'manharĩ wasété za'ra mono norĩ ma, wa za duré iwẽ'õ hã te tãma 're pisutu za'ra, isimi'manharĩ wasété za'ra zé wa'rãmi, aima hã. Tawamhã duré ai'u'âbâmhã, wa hã wa za ti'ai ãma uburé a'uwẽ mono bâ 're idahâimana za'ra mono norĩ ma, iwẽ hã te dama 're anhomri u'âsi.
Galata 3:8 - ꞌRe Ihâimana Uꞌâsi Mono Zadawa Wasuꞌu8 Zahadu romhâ uptabi nherẽ, ma tô zudeu'õ norĩ ãma sima roti, 'Re ihâimana u'âsi mono hã. Ãne isimiroti hã: Zudeu'õ norĩ hã, Cristu Danho'reptui'wa na te te sina 're umnhasi za'ra mono wamhã, ta norĩ ma zama te za duré tãma 're irowẽ za'ra mono zéb da hã te te tãma 're apisutu, 'Re ihâimana u'âsi mono hã. Iwasédé hã te te oto ãma 're i'ab'madâ'â mono õ zéb zarina, te za te te 're awẽsãmri. Taha zarina wasété za'ra 'ru te, te te ahâ za'ra õ di za, rob'rãsutuzéb ãma hã. Ãne isimiroti hã zudeu'õ norĩ ãma hã. Tahawa, ma tô ãne Abra'ãhã ma waihu'u siro, 'Re ihâimana u'âsi mono hã: “Te aima iropisutuzém na asina ĩzazei pese zéb zarina, wa za dama 're irowẽ za'ra mono zéb da hã te dama 're apisutu, dapoto mono bâ.” Ãne ma tô iwasu'uwẽ na romhâ ré ãma po're pu'u siro. အခန်းကိုကြည့်ပါ။ |
Galata 3:8
25 ပူးပေါင်းရင်းမြစ်များ
Asihudu norĩ hã ti'a zapru ropâ 're ihâimana za'ra mono ne, ahâ uptabi na te za 're hâimana za'ra. Ta norĩ te za hâiwa nhimi'e niwĩb ãma ro 're ihâimana mono u hã, hâiwa nhimire niwĩb ãma ro 're ihâimana mono u hã, bâtâ pusizém niwĩb ãma, ro 're ihâimana mono u hã, duré bâtâ zasizém niwĩb ãma ro 're ihâimana mono u hã te te ropé. Tawamhã ai'u'âbâ, asihudu norĩ u'âbâb zama wa za daro mono bâ uburé 're idahâimana za'ra mono norĩ ma hã, iwẽ te dama 're apisutu.
Duréihã ma tô ãne â u'âsi na rob'ui'éré, 'Re ihâimana u'âsi mono zadawa 'mahârâ'wa hã: “Â u'â hã 're sidototo u'âsi mono wamhã, dama 're irowẽ za'ra mono zé hã te za dama 're hâimana u'âsi za'ra, isipti hã. Tane Danho'reptui'wa na da te dasina 're ĩ'umnhasi za'ra mono wamhã, taha zarina te za rowẽ nhomri'wa hã dama 're hâimana za'ra.” Ãne ma tô ãma rob'ui'éré, ibaihâ na hã.
Duréihã ma tô Mozési hã ãne na ãma rob'ui'éré, 'Re ihâimana u'âsi mono hã apito Fara'oho ma te te irowasu'uzém na, ãne: “Wa hã wa tô aipisutu, dama asi'apito da. Wa tô duré nasi ai'rãnhito, asimirosa'rata nhiptete na aihâimana mono da, a'â. Wa tô duré nasi aima rob'manharĩ wasété, ĩnhimiwaihu'u pese zém na, da te 're ĩwaihu'u za'ra mono da, duré daro mono bâ ĩnhisi na, da te 're ĩwaihu'u pese za'ra mono da oto.”
E marĩ te wama wasu'u za'ra, tawamhã, ã hã. E niha, wa za tawamhã ãma waihu'u za'ra ni, ãhã wasu'u na hã. Ãne, wa za ãma waihu'u za'ra ni. Zudeu'õ norĩ hã 'Re ihâimana u'âsi mono, iwasédé hã te te ãma 're i'ab'madâ'â mono õ zarina, te te 're iwẽsãmri za'ra mono zéb da hã, te te aré sô 're rob'ruiwapari za'ra mono õ nherẽ, ma tô te te 're awẽsãmri, taré te te 're isaze za'ra mono zém na si nherẽ.
Tane nherẽ, daro mono bâ te dawasété na 're danomro. Dasi'uihâ na dawasété wi 're dasipizari waihu'u za'ra mono õ di tô. Ãne, da te iwaihu'u za'ra zéb da hã, ma tô 'Re ihâimana u'âsi mono zadawa 'mahârâ'wa hã ãma rob'ui'éré. E marĩ da. Zezu Cristu Danho'reptui'wa na, da te dasina 're umnhasi za'ra mono da, tawapsi 'Re ihâimana u'âsi mono iwẽ hã te te dama ãma 're uwaimrami mono da, te te dama iropisutuzéb zarina.
Ta norĩ hã 'Re ihâimana u'âsi mono nhimiropisutu wẽ hã te te wapari za'ra nherẽ, te te sina uwaimrami za'ra õ di, te te ãma saze za'ra õ wa. Tane duré, wa norĩ zama wa tô 'Re ihâimana u'âsi mono wasu'uwẽ hã wa te 're wapari za'ra. Tane aiwa isimiropisutu wẽ na wa te 're saze za'ra mono õ wamhã, wa norĩ zama tô wa te wasina 're uwaimrami za'ra mono õ di za, te te wama iropisutu za'ra zé hã, 're idawa'utu u'âsi za'ra mono ne, 're wahâimana za'ra mono da hã oto, rowẽ uptabi na.
Tawamhã 7 ãma hâiwa ãma romhuri'wa hã ma tô tinhimnhihârâzém na amnhihârâ. Simnhihârâ wi, hâiwa ãma damreme 'rãihâ hã wa tô wapa. Ãne te nharĩ za'ra: — Satanasihi nhimi'madâ, 're danomro mono da, ma tô da te dasima 're wẽ za'ra aré, daro mono bâ. Tane nherẽ, ropâ te za oto 'Re ihâimana u'âsi mono nhimi'madâ'â si 're danomro, Wanhib'apito nhimi'madâ hã. Danho'reptui'wa da, te te ipisutu nhimi'madâ'â zama te za 're dahâimana za'ra oto. Wanhib'apito hã te za tô te te 're da'ab'madâ'â u'âsi oto, õne u'âsi.
ကြော်ငြာတွေ