Galata 2:4 - ꞌRe Ihâimana Uꞌâsi Mono Zadawa Wasuꞌu

⁴ Ni'wam norĩ si, zudeu norĩ hã ma tô i'upana sima wẽ za'ra, Titu hã sihâiwata nhizâri ré 're imorĩ da hã. Ta norĩ hã wasiré Wanhib'apito zazei uptabi 'wa 're nomro mono newa, ma tô hâimana nhipese sina wasiré 're si'rã'õtõ, dama wapsãi'a'wa ne wahâimanazé ma, te te 're ropibu za'ra mono da, rowẽ na 're iwahâimana za'ra mono zéb zô, Cristu Zezusihi ãma. Ta norĩ hã zudeu norĩ hã, ma tô sima wawẽ za'ra, isine 'Re ihâimana u'âsi mono nhimiroti 'rata na rob'ui'éré zarina, wa te 're rob'manharĩ u'âsi za'ra mono da, taha zarina wanho'reptuzé hã wa te wasina 're uwaimrami za'ra mono da newa.

Galata 2:4 ပူးပေါင်းရင်းမြစ်များ

Salmu 119:45

Ĩsima iwẽ na, wa za 're ĩhâimana, te ĩsima 're romnhimimnhasi mono ãna, asimiroti na si 're ĩmorĩ da, sô 're ĩsi'wapéi u'âsi mono wa.

Salmu 51:12

Apâ rowẽzém na 're ida'anho'reptui mono zé hã, ma'ãpé apâ ĩma sõmri. Duré ma'ãpé asimiroti te 're iwapari pese mono da hã, 're ĩ'upari mono.

Luca 5:38

Itép si'uiwa 'rem na si te za rob'rãi wa'u isé tébre hã da te iwa 're 'masisi za'ra.

Zezusihi zadawa wasuꞌuꞌwa norĩ nhimiromhuri na robꞌuiꞌéré 15:1

Tawamhã aibâ norĩ hã ma tô aihutu Ãtioquia u, Zudéa hawi. Taha wamhã, te isazei'wa norĩ ma, roti za'ra, ãne: — Zudeu'õ norĩ hã, Mozési wahi'rata norĩ ma, te te ipisutu zarina, 're sisihâiwata nhihâri za'ra mono õ nherẽ, 'Re ihâimana u'âsi mono te te 're sõ'reptu za'ra mono õ di za.

Zezusihi zadawa wasuꞌuꞌwa norĩ nhimiromhuri na robꞌuiꞌéré 15:24

Wa norĩ hã wa tô romreme hã wapari za'ra ni. Aibâ norĩ hã, aré wasiré 're isi'ubumroi mono hã ma tô, u, ãma ai'aba'ré, atẽme za'ra wa'aba, wazadawa para õ nherẽ. Si'uihâ na ma te u, tinhimirowasu'u na aiwi ro'wa'rutu za'ra wa'wa. Ma duré asimirosa'rada hã aiwi 'wa'rutu za'ra wa'wa.

Zezusihi zadawa wasuꞌuꞌwa norĩ nhimiromhuri na robꞌuiꞌéré 20:30

Duré ni'wam norĩ hã asiré wa'aba nherẽ, te za aima sadawa hapese za'ra wa'wa, isiniwĩ 're anomro aba mono da, isazei'wa norĩ hã uburé isiniwĩ 're nomro mono da.

Roma 8:15

E marĩ da, ma tô 'Re ihâimana u'âsi mono hã Tipẽ'ẽzani te te aima 're sõmri za'ra wa'wa. E isimirob'manharĩzé ma, 're aipahi za'ra wa'aba mono sina, tãma 're romhuri za'ra wa'aba mono da, ma tô te te aima 're sõmri za'ra wa'wa. Mare di. Taha dai õ di. 'Re ihâimana u'âsi mono hã ai'ãma 're 'ra za'ra wa'aba mono da si, ma tô te te aima 're sõmri za'ra wa'wa, Tipẽ'ẽzani hã. Taha nhimipawaptobzéb zarina, wa 'Re ihâimana u'âsi mono hã wa te 're 'mahârâ za'ra, ãne: “Wamama, Wamama.” Ãne wa te 're i'mahârâ za'ra mono zé hã.

2 Corĩtu 11:13

Ta norĩ hã Zezusihi zadawa wasu'u'wa na, tô sena 're hâimana za'ra mono õ di. Sadawa nhipese na, te tô te te 're romhuri za'ra, Zezusihi zadawa wasu'u'wa newa, da te ãma 're rosa'rata wẽ za'ra mono da, dasima.

2 Corĩtu 11:17

Ãté Wanhib'apito te te ĩma iwaihu'uzéb zarina, aima ĩsiwasu'u za'ra wa'aba õ di, ãhã na hã. Ãté danhimiza'rese ãna 're idahâimana za'ra mono zéb zarina si, wa za aima ĩsiwasu'u za'ra wa'wa, ĩnhimiromhuri wẽ na hã.

2 Corĩtu 11:20

Ni'wam norĩ hã ma tô 're ihâimana za'ra mono zéb zarina, 're aihâimana za'ra wa'aba mono da, te te aima 're 'rui u'âsi za'ra wa'wa, ta norĩ zadawa para si, uburé marĩ hã 're 'manharĩ za'ra wa'aba mono da si. Tane nherẽ, asiwi 're wẽ'õ za'ra wa'aba mono õ di, ta norĩ hã. Sadawa nhipese na, aiwi 're sipsaihuri u'âsi za'ra wa'aba mono nherẽ, duré ta norĩ ma si, 're aihâimana za'ra wa'aba mono da, te te 're aiwaibui wa'aba mono nherẽ, e niha bâ bété, asiwi 're wẽ'õ za'ra wa'aba mono õ di. Ta norĩ si, aima pire na 're hâimana za'ra wa'aba mono newa, 'râwi 're si'madâ'â ze za'ra mono nherẽ, duré te te ai'ãma 're wasété za'ra wa'aba mono da, atob'rata wi te te 're aihâ za'ra wa'aba mono nherẽ, e asiwi hã 're wẽ'õ za'ra wa'aba mono ãna bété.

2 Corĩtu 11:26

Daro mono bâ 're ĩmorĩ ré hã, ĩma romnhimimnhasi uptabi nherẽ, wa tô âpré na te 're saprĩ, panho'õmo na hã. Duré isimisaihuri norĩ ahâ di, bâdâdi na hã, danhibrob zô dapãrĩ'wa norĩ hã. Ni'wam norĩ hã ĩsiré zudeu 're hâimana za'ra mono nherẽ, ma tô duré ĩzada 're hâimana wasété u'âsi za'ra, zudeu'õ norĩ zama hã duré. 'Ri nho'õmo mono bâ, ma tô duré da te dasima 're ĩ'ru za'ra, niha na da te ĩma 're rob'manharĩ za'ra mono da. A'ubuni wi 're ĩmorĩ ré hã, ĩsina romnhimimnhasi na, wa tô duré 're ĩhâimana, â poré na zama 're ĩmorĩ ré hã. Ni'wam norĩ hã tô sena Cristuhu zazei'wa 're hâimana za'ra mono newa, ma tô duré ĩzada 're hâimana za'ra, ta norĩ zama. Tahawa, ĩsina romnhimimnhasi uptabi nherẽ, wa tô 're ĩhâimana u'âsi.

2 Corĩtu 3:17

Wanhib'apito si, wa te 're saze za'ra mono wamhã, Tipẽ'ẽzani ma, te za te te 're wa'apisutu, taha si te te 're wa'apawapto mono da, rowẽ na ãma 're wanomro mono da, marĩ na wasi'uihâ na wa te wasina tãma ãma 're i'uwaimrami za'ra mono zém na, 'râwi 're wasi'madâ'â za'ra mono tõ da, duré taha zarina, 'Re ihâimana u'âsi mono hã te te 're wa'anho'reptui mono da newa.

Galata 1:7

Aimawi rowasu'u hã Cristuhu wasu'uwẽ me, aiwa 're hâimana mono õ di. Mare uptabi di. E marĩ wa, wa tô ãne aima waihu'u za'ra wa'wa. Ni'wam norĩ hã ma tô sima te te 're wẽ za'ra, Cristuhu wasu'uwẽ upana te te ãma saprĩ za'ra da, aimawi rowasu'u u. Ta norĩ hã ma tô aimawi tinhimirowasu'u na aiwi ãma ro'wa'rutu za'ra wa'wa.

Galata 4:25

Arabia na daza'ru nhisi ãma, Sina'i na ẽtẽ 'rãihâ nhisi hã, Aga te wasu'u. Zeruzalẽ na 'ri nho'õmo nhisi, Aga hã te tô duré wasu'u. E marĩ wa. Zeruzalẽ 're, 're idahâimana za'ra mono norĩ hã danhimiwada'uri zarina, dapawa'âbâ ãna 're idahâimana za'ra mono norĩ ne, te robzei õ na 're dahâimana za'ra.

Galata 4:3

Tane wa norĩ hã, ai'uté ne, roti sena hã wama iwaihu'u pese za'ra õ zarina, wa tô aré 're wahâimana za'ra, roti da te wama 're iwaihu'u za'ra mono zéb zarina si.

Galata 5:1

Zezu Cristu hã ma tô wa'anho'reptui pa, rowẽ na ãma 're wahâimana za'ra mono da. Tahawa, 'Re ihâimana u'âsi mono nhimiroti 'rata na rob'ui'éré zarina, wa te 're irob'manharĩ za'ra mono zém na, 're wanhopré mono õ di za oto, taha zarina te te õ hã 're wa'anho'reptui mono õ wa oto. Ãne wa, tô senai'õ na rowasu'u'wa norĩ wi 're asiptete za'ra wa'aba mono za oto, isimiroti na 're aihâimana za'ra wa'aba mono wa, apâ robzei'õ na 're anomro aba mono tõ da.

Galata 5:10

Tane nherẽ, simisutu Wanhib'apito nhib'a'uwẽ 're wanomro mono wa, wa za te 're ai'umnhasi za'ra wa'wa, te aima iwaihu'u za'ra wa'aba zéb zarina si, za apâ 're aihâimana za'ra wa'aba mono na. Aibâ hã dama pire na 're hâimana mono nherẽ, aimawi tinhimirowasu'u na te te aiwi 're ro'wa'rutu za'ra wa'aba mono wa, tãma 're rowẽ mono õ di za, ta hã 'Re ihâimana u'âsi mono si za te te azâri wa.

2 Timotiu 3:6

Ta norĩ hã hâimana nhipese na danhorõwa u te za datẽme 're sihutu. Te za duré pi'õ norĩ hã tizadawa nhipese na te te 're 'rãmi za'ra. Tawamhã sib'uwa na 're hâimana za'ra mono wamhã, te za te te ãma 're sasõmri za'ra. Ãhã wamhã, pi'õ norĩ marĩ ahâ na te te 're 'manharĩ wasété za'ra mono wa, te za robzei'õ na 're hâimana za'ra. Siwa'ru te za ta norĩ hã duré 're hâimana za'ra, te te sima 're iwẽ za'ra mono zéb uwaibaba.

Tiagu 1:25

'Re ihâimana u'âsi mono nhimiroti hã wẽ uptabi di. Ta hã wapawapto'wa da, te wama 're hâimana, wawasédé, wa te 're irẽme pese za'ra mono zéb da hã. Tawamhã isimiroti na da te 're rosa'rata pese za'ra mono wamhã, duré õne u'âsi ãma 're dahâimana za'ra mono wamhã, taré imreme wapari'wa 're danomro mono õ di za. Tô sena imreme wapari pese 'wa, te za oto 're danomro. Taha zarina rowẽ u'âsi te za ãma 're dahâimana za'ra.

1 Pedru 2:16

Pawa'âbâ ãna dama romhuri'wa norĩ ne, robzei'õ na 're aihâimana za'ra wa'aba mono õ di oto, a norĩ wa'wa hã. Tane nherẽ, Cristuhu ãma rowẽ na 're anomro aba mono nherẽ, ãne taré 'râwi asi'ãma 're rosa'rata za'ra wa'aba mono õ di za: Ĩwasédé te 're 'manharĩ mono nherẽ, rowẽ u'âsi wa za 're ĩhâimana. Ãne taré 'râwi asi'ãma 're rosa'rata za'ra wa'aba mono õ di za. 'Re ihâimana u'âsi mono ma romhuri'wa, 're aihâimana za'ra wa'aba mono wa, te za aihâimana wẽ na 're aihâimana za'ra wa'aba mo.

2 Pedru 2:19

Dasi'uihâ na dahâimanazém na 're dahâimana wasété za'ra mono nherẽ, rowẽ na si za 're idanomro mono na, te ta norĩ hã te te dama 're rowasu'u za'ra, taré. Tane nherẽ, rowẽ na si 're nomro mono õ di, ta norĩ hã, tihâimana wasété hawi iwairébézéb da hã, tãma waihu'u za'ra õ wa. Marĩ hã da te 're sei hõsi za'ra mono wamhã, dasi'uihâ na da te 're rẽme waihu'u za'ra mono õ di za. Tane, senai'õ na rowasu'u'wa norĩ hã si'uihâ na tiwasédé hã te te sahâri waihu'u za'ra õ di.

1 Zuwã 4:1

Ĩsisãnawã norĩ, ĩma asawi pese za'ra wa'aba norĩ hã, ãté ni'wam norĩ hã te za ãne aima 're siwasu'u za'ra wa'wa: “'Re ihâimana u'âsi mono ma tô Tipẽ'ẽzani hã te te wama 're anhomri. Ipẽ'ẽzani te te wama 're i'awaihu'u mono zéb zarina si, wa tô wa te dama 're sadawa wasu'u za'ra.” Ãne ni'wam norĩ hã aima 're siwasu'u za'ra wa'aba mono nherẽ, isimirowasu'u na 're saze su'u za'ra wa'aba mono õ di za, a'â. Ãhã na hã 'Re ihâimana u'âsi mono zadawa wasu'u uptabi 'wa newa, roti tô senai'õ na te te dama 're iroti za'ra mono norĩ hã ahâ uptabi na te oto 're hâimana za'ra. Daro mono bâ te dawazari 're hâimana za'ra. Tahawa, te za uburé roti hã tô sena zô 're ipibui u'âsi za'ra wa'aba mo, 'Re ihâimana u'âsi mono pẽ'ẽzani hawib zô si.

Zuda 1:4

E marĩ wa. Ni'wam norĩ hã, 'Re ihâimana u'âsi mono nhimiroti wẽ'õ'wa norĩ hã te aiwazari 're hâimana za'ra wa'wa. Sõ'awi te te 're rowahutu za'ra mono nherẽ, te ta norĩ hã roti na te te aiwi ãma 're upa za'ra wa'wa. Tahawa, isimiroti za'ra hã tô sena newa, te asiré isazei'wa norĩ hã te te 're wapari za'ra. Duré õ norĩ hã aibâ iwasété norĩ hã 'Re ihâimana u'âsi mono hã te te siwi 're wazé mono õ di. Duré Wanhib'apito Zezu Cristu hã misi uptabi 're ihâimana mono hã ma tô te te siwi 're wẽ'õ za'ra. 'Re ihâimana u'âsi mono nhimiroti hã te te duré 're 'madâ'â pese za'ra mono õ di. Aimawi na si te duré te te dama 're rowasu'u za'ra. Ãne isimiroti za'ra hã: “'Re ihâimana u'âsi mono hã te te 're da'azawi pese uptabi mono wa, te dawasédé hã te te dama 're apari. Tahawa, da te 're saze za'ra mono nherẽ, te za da te dasima 're iwẽ za'ra mono zéb uwaibaba, 're danomro wasété, 'Re ihâimana u'âsi mono nhimihâzém na dasina 're dapahi za'ra mono ãna.” Ãne isimiroti wasété za'ra hã, dama. Duréihã 'Re ihâimana u'âsi mono hã ma tô ta norĩ ãma waihu'u siro ibaihâ na hã, 're inomro wasété mono norĩ ãma, te te 're iwẽ'õ pese za'ra mono u'âbâ, za te te 're ihâ za'ra mono zém na hã.