Tawamhã Zona hã ma tô oto sima rob'ubumro, morĩ da aré. Tane nherẽ, Uburé Danhib'apito te te tãma irob'ruzéb upana, ma tô aimawi Zope na 'ri wa'õtõ nhisi u si mo. Tame ma tô uba're isa'ẽne hã sõpẽtẽ, Espãnha na romnhisi u iwara da hã. Ma tô sima wa'â, ãma imorĩzéb da. Taha pari ma tô oto ãzé uba're wa dame, isari'wa norĩ me, Espãnha u morĩ da, Uburé Danhib'apito nhiti hâimana da, romhâ na.
Galata 2:11 - ꞌRe Ihâimana Uꞌâsi Mono Zadawa Wasuꞌu11-12 Tawamhã Ãtioquia ãma ĩnhamra ré, ma tô Pedru hã ãma ĩzarina wi. Tawamhã zudeu'õ norĩ ãma tinhimirosa'rata na te te upai wa, wa tô danho'a tãma rowaihu'u. Ãne tinhimirosa'rata na te te i'upazé hã. Ãtioquia u wisi wamhã, ma tô aré zudeu'õ norĩ me 're sa, Wanhib'apito zazei'wa norĩ me hã. Tawamhã isarina si ma duré aibâ norĩ hã aihutu, Tiaguhu hawimhã. Ta norĩ hã ma tô te te sima 're wẽ za'ra, Wanhib'apito zazei'wa norĩ zudeu'õ hã, sihâiwata nhihâri ré si 're nomro mono da, tawapsi sizudeu za'ra na 're hâimana za'ra mono da. Tawamhã zudeu'õ norĩ hã, Wanhib'apito zazei'wa oto wasiré 're wahâimana za'ra mono nherẽ, ma tô Pedru hã tiwi sisawi za'ra, oto dasiré 're sa tõ mono da. E marĩ wa. Zudeu'õ norĩ siré 're sai u'âsi mono wa, te te siwi wẽ'õ za'ra õ'umnhasite, we isihutu norĩ hã. အခန်းကိုကြည့်ပါ။ |
Galata 2:11
31 ပူးပေါင်းရင်းမြစ်များ
Tawamhã Zezusi hã ma tô aipi'ra, Pedruhu u. Ãne te tãma tinha: — Satanasi, mo oto aimorĩ, ĩnhiti. Marĩ hã bâdâdi wa, 're isimi'wara mono, te te 're ida'marõpãrĩ za'ra mono ne, te ĩwasutu u'âsi mo, Ĩmama te te ĩma ipisutuzéb zarina te ĩsina dama uwaimrami tõ da. 'Re ihâimana u'âsi mono nhimirosa'rata nei õ di, asimirosa'rada hã. Ti'ai ãma danhimirosa'rata zarina si te a hã ĩ'ãma irosa'ra.
Tawamhã Estewã da te dasiwi iwĩrĩzéb zarina, isazei'wa norĩ ãma da te rowasété za'ra wa, ma tô da te ropé, isazei'wa norĩ hã Zeruzalẽ hawi. Penisiza na danhipti'a nho'õmo nhisi u, ma tô da te ropé, duré Sipri na danhipti'a nho'õmo nhisi u, duré Ãtioquia na 'ri nho'õmo nhisi u zama. Si'aba'réi ré, zudeu norĩ ma si ma tô 'Re ihâimana u'âsi mono zadawa wasu'u na rowasu'u za'ra, Zezusihi wasu'uwẽ na. Zudeu'õ norĩ ma, zahadu te te ãma rowasu'u za'ra õ di.
Tane nherẽ, ihâiba amo norĩ hã, Sipri na danhipti'a nho'õmo nhisi ãma aré 're ihâimana za'ra mono norĩ hã, duré Sireni ãma danhipti'a nho'õmo amoi ãma aré 're ihâimana za'ra mono norĩ hã, ma tô ai'aba'ré, Ãtioquia u. Ta norĩ hã zudeu norĩ ma si, te te rowasu'u za'ra õ di, Wanhib'apito Zezusihi wasu'uwẽ na hã. Zudeu'õ norĩ ma zama, ma tô ãma rowasu'u za'ra.
Tawamhã ni'wam norĩ hã ma hâiwi aimasa, farizeu norĩ hã te te dama rowasu'u za'ra da. Tawamhã te dama nharĩ za'ra, ãne: — Isazei'wa norĩ ma, wa te roti za'ra wa'aba, zudeu'õ norĩ hã, dame 're sisihâiwata nhihâri za'ra mono da, uburé 'Re ihâimana u'âsi mono nhimiroti 'rata na Mozésihi nhimi'ui'éré zarina 're nomro mono da.
Cristuhu zadawa wasu'u'wa na, asiwi ĩwaihu'u za'ra wa'aba õ wa, wa tô ĩnhimiromhuri wẽ na si aima ĩsiwasu'u za'ra wa'wa, ãne hã te ĩsima wẽ õ nherẽ. Ãté ĩnhimiza'rese'õ ne, wa tô ãne na aima ĩsiwasu'u za'ra wa'wa, a norĩ wa'wa hã dama 're ĩwasu'u wẽ za'ra wa'aba mono õ 'ru te. 'Re ihâimana u'âsi mono te te 're ĩpawapto mono õ 'wa'âhã, aré marĩ dai õ di, 're ĩhâimana mono zé hã tô. Tane nherẽ, Zezusihi zadawa wasu'u'wa newa, senai'õ na te te aima 're iroti za'ra wa'aba mono norĩ ma, ĩwapu na tãma 're ĩhâimana za'ra mono õ di.
Ãne wa, ti'ai ãma isazei'õ'wa norĩ nhimirosa'rata zarina, wa te da'ãma 're rosa'rata za'ra mono õ di za oto, 're idahâimana za'ra mono zém na hã. Wa hã bété. Isazei'õ'wa norĩ nhimirosa'rata zarina, wa tô aré te 're rosa'rata, Cristu 're ihâimana mono zém na hã, taré newa. Tane nherẽ, taha zarina, te ãma 're rosa'rata mono õ di oto, wa hã.
Ãne na ma tô Pedru norĩ hã tinhimirosa'rata na upa za'ra, zudeu'õ norĩ ãma hã. Tô sena Cristuhu wasu'uwẽ zarina si oto dama 're hâimana za'ra mono õ di, Pedru norĩ hã. Ãne wa tô ãma waihu'u za'ra. Tahawa, wa tô Pedruhu ma tinha, uburé Wanhib'apito zazei'wa norĩ nho'a, ãne: “A hã zudeu nherẽ, ma tô zudeu'õ norĩ siré 're asai mo aré, a hã zudeu'õ 're aihâimana mono newa. E niha ma tô bété oto tiwi asisawi za'ra, zudeu'õ norĩ wi, a'â sizudeu za'ra da, isazei'wa norĩ hã.” Ãne wa tô tãma tinha.
Tahawa, ma tô oto Tiagu norĩ hã ĩ'ãma waihu'u za'ra, tãma ĩzawi pese wa, 'Re ihâimana u'âsi mono te te sima ĩpisutuzém na hã. Õ norĩ hã isimiroti pire na ma tô Wanhib'apito zazei'wa norĩ hã ãma waihu'u za'ra, Tiagu hã, Pedru hã, duré Zuwã. Tawamhã ta norĩ hã 'Re ihâimana u'âsi mono te te ĩpisutuzém na te te ĩ'ãma waihu'u za'ra wa, ma tô tinhib'rata na siwi wazawi za'ra, Banabéhé me. Wama wẽ za'ra di, wa norĩ hã zudeu'õ norĩ u si 're waneb da, Cristuhu wasu'uwẽ na, wa te tãma 're romhuri za'ra mono da. Duré wama wẽ za'ra di, Tiagu norĩ si, tisiré zudeu norĩ u si 're inomro mono da hã, Pedru norĩ me. Ãne na wa tô wanhimirosa'rata na wasisaze za'ra ni.
Ĩsisãnawã norĩ, ĩma asawi pese za'ra wa'aba norĩ hã, wa tô aré ĩsima rosa'rata, 'Re ihâimana u'âsi mono te te 're iwa'anho'reptui mono zém na te aima rob'ui'éré za'ra wa'aba da. Tane nherẽ, marĩ iwasétére hã ai'ãma 're hâimana za'ra wa'aba mono wa, wa tô ĩnhimirosa'rata na ĩsima ãma saprĩ, taha na si te ãma aima rob'ui'éré za'ra wa'aba da. Wa norĩ hã 'Re ihâimana u'âsi mono nhib'a'uwẽ, wa oto 're wahâimana za'ra. Ta hã ma tô misi haré te te wama 're anhomri, Cristuhu wasu'uwẽ na roti na ãma 're iwanomro mono zéb da hã. Tahawa, wa oto aima ãma rob'ui'éré za'ra wa'wa, tô da'ãma 're ai'aba'ré za'ra wa'aba mono da, Cristu, da te dasina 're i'umnhasi za'ra mono zéb udâna.
ကြော်ငြာတွေ