Galata 1:13 - ꞌRe Ihâimana Uꞌâsi Mono Zadawa Wasuꞌu

^13-14 Wa hã wasiré zudeu norĩ nhimizazezéb zarina 're ĩmorĩ ré, wa tô ĩsima wẽ upta, wasiré iwaprédu mono norĩ nhipai u, wahi'rata norĩ nhimiroti zarina si, 're ĩmorĩ da. Ãne 're ĩmorĩ ré, 'Re ihâimana u'âsi mono nhib'a'uwẽ norĩ ma, ĩwasété na wa tô te 're arob'manharĩ aré, Wanhib'apito zazei'wa norĩ ma hã. Wa tô te ĩsima 're awẽ, te 're uprosi mono da. Ãne ma tô ĩwasu'u wasédé hã 're iwapari za'ra wa'aba mo.

Galata 1:13 ပူးပေါင်းရင်းမြစ်များ

Zezusihi zadawa wasuꞌuꞌwa norĩ nhimiromhuri na robꞌuiꞌéré 8:1

Estewã da te iwĩrĩzém na hã ma tô Saulu tawamhã dapa'uze. Tawamhã aibâ norĩ hã ma tô Estewã siwi tisẽ, 'Re ihâimana u'âsi mono zadawa 'madâ'â pese 'wa norĩ hã. Te te siwi sẽrẽ wamhã, te ãma ti'ru'ru, wawai 'rãihâ na. Tawamhã Estewã dâ'â parimhã, bâtâ na ma tô awa'awi sada tazahi za'ra ni, isazei'wa norĩ zada. Tahawa, isazei'wa norĩ hã Zeruzalẽ ãma 're isi'ubumroi mono zô, ma tô rowasédé hã sô tiwatobro na'rata za'ra, sada danhiti'ru za'ra wa. Saulu hã Zezusihi zazei'wa norĩ ãma ma tô rowasutu, isazei'wa hâimanazé hã si'utõrĩ da. 'Ri baba te nasi zasi, isazei'wa norĩ zô. Tawamhã rob u te te nasi da'anhamra, aibâ hã duré pi'õ norĩ hã. Taha pari, te nasi te te da'ãma arobâdâ, te te nasi da'a'maza da, dazazéb 're. Tahawa, isazei'wa norĩ hã ma tô te te siwi ropé, Zeruzalẽ hawi. Ta hawimhã Zudéa u ma tô te te ropé, duré Samaria na danhipti'a nho'õmo nhisi u zama, daza'rui mono bâ. Zezusihi zadawa wasu'u'wa norĩ si te zahadu 're si'ubumro, Zeruzalẽ ãma hã.

Zezusihi zadawa wasuꞌuꞌwa norĩ nhimiromhuri na robꞌuiꞌéré 9:21

Da te wapari za'ra wamhã, aihĩni, ma tô ãma tatob'uzu za'ra ni. Tahawa, te ãne dasima nharĩ za'ra ni: — Oro õ hã Zezusihi zazei'wa te te 're 'mapãrĩ mono za, Zeruzalẽ ãma hã. Oro we wisi za duré ãwa, Zezusihi zazei'wa norĩ zô, pawasisi ré apâ te te simroi mono da, sasedoti ipire norĩ u.

Zezusihi zadawa wasuꞌuꞌwa norĩ nhimiromhuri na robꞌuiꞌéré 9:26

Tawamhã Zeruzalẽ u te oto mo, Saulu hã. Tamomo oto wisi wamhã, Zezusihi nhirã zarina 're inomro mono norĩ siré 're hâimana mono da hã nherẽ, ta norĩ hã te te pipa za'ra di. Saulu hã isazei uptabi 'wa na tãma siwasu'u za'ra wamhã, te te ãma saze za'ra õ di, isiwasu'uzém na hã.

1 Corĩtu 10:32

Marĩ hã 're 'manharĩ za'ra wa'aba mono õ di za oto, da te ãma 're ai'madâ'â za'ra wa'aba mono wa, dawasété u 're darere'e mono tõ da. Ãne hã dazada 're 'manharĩ za'ra wa'aba mono õ di za, zudeu norĩ da, duré zudeu'õ norĩ da, duré 'Re ihâimana u'âsi mono nhib'a'uwẽ 're ihâimana za'ra mono norĩ da.

1 Corĩtu 15:9

Wa hã uburé ĩsiré Zezusihi zadawa wasu'u'wa norĩ zapari, wa 're ĩhâimana, tãma ĩwapu za'ra na. E marĩ wa. Te sazei õ ré, wa tô 'Re ihâimana u'âsi mono nhib'a'uwẽ ma, te tãma 're rob'manharĩ wasété u'âsi za'ra. Tahawa, ibâi õ di aré, isadawa wasu'u'wa na, da te 're ĩwaptẽrẽ za'ra mono zé hã.

Filipu 3:6

Wasiré zudeu norĩ hâimanazém na, 'Re ihâimana u'âsi mono ma, 're ĩhâimana mono da, wa tô 're ĩsiwasutu u'âsi aré. Tahawa, Zezusihi zazei'wa norĩ ma, wa tô te tãma 're rob'manharĩ wasété za'ra, Zezusi hã 'Re ihâimana u'âsi mono 'ra õ newa, ta norĩ hã te 're i'ruiwapari za'ra mono zéb zarina, te te 're robzépata za'ra mono da. Uburé 'Re ihâimana u'âsi mono nhimiroti 'rada hã wa tô duré te 're 'madâ'â pese tô, taha zarina 'Re ihâimana u'âsi mono te te ĩwẽsãmri da newa. Tahawa, nima hã isimiroti te ãma i'upa na da te dasiwi ĩwaihu'u õ di.

1 Timotiu 1:14

Wanhib'apito hã tinhimizawi pese zém na ma tô ĩpawapto pese, te saze da, duré dazawizéb da hã, ĩma hâimana da. Aihĩni Cristu Zezusihi ãma 're ihâimana za'ra mono norĩ hã te te 're ipawaptob za'ra mono ne, ma tô ĩpawapto duré.