Filipu 3:21 - ꞌRe Ihâimana Uꞌâsi Mono Zadawa Wasuꞌu

²¹ Taha si te uburé marĩ hã tiwaihu'u pese na te te 're ab'madâ'â, siptete uptabi wa. Tahawa, tiwaihu'u pese na te za wahâiba itém na wama ãma saprĩ za'ra, wahâiba isib'uware ré 're iwanomro 'rata mono zém hawi, isi'utõrĩ pese hawimhã. Tawamhã wahâiba itéb ré, Cristuhu hâiba ne iwẽ uptabi ré, wa za oto 're wahâimana u'âsi za'ra, i'rata.

Filipu 3:21 ပူးပေါင်းရင်းမြစ်များ

Mateu 17:2

Tawamhã tame si'ubumroi ré, ma tô Zezusi hã isõ'a za'ra aimawi tihâiba na hã saprĩ. Ma tô ti'uburã pese, bâtâ ro'o ne. Duré i'uza hã hâ zarob'a uptabi di, bâtâ ro te te 're irowa'a pese mono ne.

Mateu 22:29

Tawamhã Zezusi hã asa te tãma nharĩ za'ra, ãne: — Ab're hawi apâ 're idahâiwa'utu za'ra mono zé wasu'u na, 'Re ihâimana u'âsi mono nhimiroti 'rata na rob'ui'éré hã aima iwaihu'u za'ra wa'aba õ zarina, ma tô ãma i'upa za'ra wa'wa, asimirosa'rata aba na hã. 'Re ihâimana u'âsi mono, tiwaihu'u pese na te te 're ida'ahâiwa'utu mono zé wasu'u na zama, aima iwaihu'u za'ra wa'aba õ zarina, ma tô asimirosa'rata na ãma i'upa za'ra wa'wa.

Mateu 28:18

Tawamhã Zezusi hã ma tô 'râwi itẽme timorĩ za'ra oto. Taha wamhã, ma tô tãma nharĩ za'ra, ãne: — Ĩmama hã ma tô ĩma pisutu, isadawa para dama ĩpire na 're ĩhâimana mono da, ti'ai ãma, duré hâiwa ãma zama.

Roma 8:29

Duréihã marĩ õ ré hã, 'Re ihâimana u'âsi mono te te sima ãma irotizéb zarina, te te sima 're iwa'apisutu mono norĩ hã, i'ra ne, tô Zezusihi ne, oto 're wahâimana za'ra mono da, ma tô duré te te 're wa'apisutu siro. Ta hã uburé isazei'wa norĩ dub'rada, 're hâimana mono da, ma tô ãne te te 're wa'apisutu siro, sima.

Colosu 3:4

Cristuhu ãma si tô sena 're wahâimana za'ra mono wamhã, taha na si ãma 're iwanomro mono zép té, te wama wasu'u za'ra. Ta hã nimahã na tinhimirowa'a na ti'ai u apâ wei morĩ wamhã, a norĩ wa'wa hã te za duré danho'a isiré aihâimana za'ra wa'wa, isine aiwẽ uptabi na 're aihâimana za'ra wa'aba mono na, da te oto ãma 're i'aiwaihu'u za'ra wa'aba mono zéb da hã.

1 Zuwã 3:2

Ĩsisãnawã norĩ, ĩma asawi pese za'ra wa'aba norĩ hã, 'Re ihâimana u'âsi mono 'ra, wa oto 're wahâimana za'ra. Tane nherẽ, za 're iwahâimana za'ra mono zéb da hã, zahadu wama waihu'u prã za'ra di. Cristu hã apâ wei wazô morĩ wamhã, isine wa za oto 're wahâimana za'ra. Ãhã si wama waihu'u pese za'ra di. E marĩ wa, wa za isine 're wahâimana za'ra. Tô sena Cristu hã 're ihâimana mono zém na 'râwi wa te oto wasiwi 're waihu'u za'ra mono wa, wa za oto tô isine 're wahâimana za'ra.

Apocalipsi 1:8

'Re ihâimana u'âsi mono, dama isiwaihu'uzé hã, ãne: “Wa hã imorĩ'rata na, wa tô 're ĩhâimana u'âsi. Õne u'â, wa za duré 're ĩhâimana u'âsi. Uburé marĩ hã si'utõrĩ pese nherẽ, duré wa hã isarina za'ra ĩsi'utõrĩ da hã mare di za.”