Filipu 3:20 - ꞌRe Ihâimana Uꞌâsi Mono Zadawa Wasuꞌu

²⁰ Tane nherẽ, wa norĩ ma hã ti'ai ãma waza'rui uptabi hã wama 're hâimana za'ra mono õ di. Hâiwa ãma si te waza'rui uptabi hã wama 're hâimana za'ra. Ta hawi za wei wazô imorĩ zô si, wa wato sina wasina sô 're wanhimipari u'âsi za'ra, Wanho'reptui'wa zô, Wanhib'apito Zezu Cristuhu zô si.

Filipu 3:20 ပူးပေါင်းရင်းမြစ်များ

Salmu 16:11

A hã te 're idanomro mono zép té na bâdâdi hã ĩma 're iwasu'u mo. Duré ĩsiré 're i'aihâimana mono zé hã te rowẽ hã te te ĩma 're sa'ẽtẽ. Te duré õne u'â ĩma 're irowẽ mono zé hã te te ĩma 're sani.

Provébiu 15:24

Isimiza'rese wẽ norĩ hã bâdâdi na rowẽ na 're idahâimana hâ za'ra mono zém na si te 're nomro. Bâdâdi, 're idadâ'â za'ra mono zép te na 're inomro mono da hã mare di.

Mateu 19:21

Tawamhã Zezusi te asa tãma tinha, ãne: — Rowẽ na 're aihâimana mono zéb zô, 're rosa'rata mono wamhã, mo oto aimorĩ, uburé asibro hã dama wede mono da, da te aiwi i'uipra za'ra zé rob'uiprazé hã isibrob'õ norĩ ma, sõmri mono da. Tawapsi asibro pese di za, hâiwa ãma. Taha parip si te za we apâ ĩtẽme hã aimo, ĩsiré 're aimorĩ da oto.

Luca 12:21

— Tane, danhimarĩ hã dasima si, da te 're ubumroi pese za'ra mono wamhã, 'Re ihâimana u'âsi mono ma, 're danhoprub za'ra mono ãna, te za taré da te dasima 're ubumroi pese za'ra, danhimarĩ hã.

Luca 14:14

Ãne wamhã, aima 're rowẽ mono di za. E marĩ wa. Ta norĩ hã simarĩ õ di, marĩ na te te aima ãma iwa'rãmi za'ra zéb da hã. 'Re ihâimana u'âsi mono si, te za asõprubzé wa'rãmi aima tisõ. 'Re inomro wẽ mono norĩ te te ahâiwa'utu wapsi, te za aima ãma uwaimra.

Zezusihi zadawa wasuꞌuꞌwa norĩ nhimiromhuri na robꞌuiꞌéré 1:11

Tawamhã ãne te tãma nharĩ za'ra: — Galiléa ãma 're aihâimana za'ra wa'aba mono norĩ, e marĩ da, te aimasap sina, hâimo ãma isawẽrẽ za'ra wa'aba mo. Zezusi hã 'Re ihâimana u'âsi mono, hâiwa u te te aiwi i'âri za'ra wa'wa hã, ta hã te za we apâ mo. Hâiwa u ãma morĩ ré, ma tô isawẽrẽ za'ra wa'aba mo. Hâiwa u ãma aiwi imorĩ aba ne, te za we apâ mo.

1 Corĩtu 1:7

Tahawa, Wanhib'apito Zezu Cristu apâ we imorĩzéb zô, 're asimipari za'ra wa'aba mono ré, 'Re ihâimana u'âsi mono, tinhoprubzéb zarina iwẽ hã te te aima 're isõmri za'ra wa'aba mono zéb zô, aiwi 're rowaptâ'â za'ra wa'aba mono õ di za oto.

1 Corĩtu 15:48

Uburé ti'ai ãma 're idahâimana za'ra mono norĩ hã te Adãhã hâiba ne, iré 're dahâimana za'ra, ti'ai 'manharĩ na ihâiba 'manharĩ na'rata ne ré. Tane nherẽ, ni'wam norĩ si hâiwa ãma za 're ihâimana za'ra mono norĩ si, te za hâiwa ãma 're imorĩ hâiba ne ré 're hâimana u'âsi za'ra, tô Cristuhu hâiba 'manharĩ sine ré.

2 Corĩtu 4:18

Uburé marĩ hã ti'ab ré, datõmo na da te 're i'madâ'â za'ra mono si hã, si'utõrĩ pese di. Hâiwa ãma marĩ hã datõmo na da te 're i'madâ'â waihu'u za'ra mono õ si, 're si'utõrĩ waihu'u mono õ di za. Te za 're hâimana u'âsi za'ra. Tahawa, ti'ab ré datõmo na da te 're i'madâ'â za'ra mono zô si, wa te 're rob'ruiwapari mono õ di za. Datõmo na da te 're i'madâ'â waihu'u za'ra mono õ zô si, wa za wa te 're rob'ruiwapari u'âsi, wa norĩ hã.

2 Corĩtu 5:8

Wa norĩ hã wato sina, wa oto 're wahâimana u'âsi za'ra. E marĩ wa. Ti'ab ré, wahâiba hã wawi 're si'utõrĩ pese za'ra mono nherẽ, wẽ uptabi di za, taha nhowa're're, hâiwa ãma Wanhib'apito 'rata 're iwahâimana u'âsi za'ra mono zé hã.

Galata 4:26

Ãnei õ di, Zeruzalẽ ihâiba amo hã, hâiwa ãma 're isa mono hã. Rowẽ na si, te iwa 're dahâimana za'ra. Zeruzalẽ hã hâiwa ãma 're isa mono hã, wana Sara aihĩni dana te wasu'u.

Éfézu 2:19

Tahawa, zudeu'õ nherẽ, dasiré'õ ne 're aihâimana za'ra wa'aba mono õ di oto. 'Re ihâimana u'âsi mono nhib'a'uwẽ te oto dame 're aihâimana za'ra wa'aba mo. Te duré i'ra na dame 're aihâimana za'ra wa'aba mo oto.

Éfézu 2:6

Ta hã Cristu ab're hawi te te ihâiwa'utu ne, ma tô wapẽ'ẽ 're te te 're wa'ahâiwa'utu, hâiwa ãma 're wasi'ubumroi u'âsi mono da, Cristu Zezusihi 'rata.

Filipu 1:10

Tawapsi te za iwẽ si asima 're ipisutu u'âsi za'ra wa'aba mo, ãma 're anomro wẽ wa'aba mono da hã. Ãne wapsi, 'râwi aiwasété na 're asi'marõpãrĩ za'ra wa'aba mono õ di za, nimahã na Cristu apâ we imorĩzéb u hã. Ãhã zarina si, te za aiwasété wi, aihâimana nhiptete sina 're anomro u'âsi aba mo.

Filipu 1:27

Niha za ĩma romhâimana nherẽ, te za Cristuhu wasu'uwẽ zarina si 're anomro wẽ wa'aba mo, taha si aima pire za'ra wa'aba wa, ãma 're aihâimana za'ra wa'aba mono zéb da hã. Ãne 're aihâimana za'ra wa'aba mono ré, ãma atẽme ĩmorĩ za'ra wa'aba wamhã, wa za ai'ãma waihu'u za'ra wa'wa, simisutu asiptete sina asitob'ru norĩ da, 're aihâimana za'ra wa'aba mono zém na hã, asimirosa'rata misi na, taha zarina 'Re ihâimana u'âsi mono, da te dasina 're umnhasi za'ra mono da, Cristuhu wasu'uwẽ hã da te 're isaze za'ra mono zéb zarina. Duré ãté ãma atẽme ĩmorĩ za'ra wa'aba õ nherẽ, wa za tô õhõ na si ai'ãma waihu'u za'ra wa'wa, simisutu asiptete sina ãma 're aihâimana za'ra wa'aba mono na hã.

Colosu 1:5

Cristuhu wasu'uwẽ hã tô sena uptabi hã imorĩ'rata na da te atẽme ãwisi za'ra wa'aba wamhã, tame ma tô iwapari na'rata za'ra wa'wa, iwẽ uptabi hã hâiwa ãma dazô 're isimi'wara mono zé wasu'u hã, duré taha zô si 're idanhimipari u'âsi za'ra mono zé wasu'u zama. Taha zô asina 're asimipari za'ra wa'aba mono zéb zarina, ma tô Cristuhu si asina 're i'umnhasi pese za'ra wa'aba mo. Taha zarina ma tô duré 'Re ihâimana u'âsi mono nhib'a'uwẽ norĩ hã 're isawi pese za'ra wa'aba mo. Hâiwa ãma, wẽ uptabi na asô 're isimi'wara aba mono hã, te tô 'Re ihâimana u'âsi mono hã te te asô 're 'madâ'â pese za'ra wa'wa. Taha zô si te tô asina 're asimipari u'âsi za'ra wa'aba mo.

1 Tesalonita 1:10

I'ra hã hâiwa hawi apâ we imorĩzéb zô, te 're simipari u'âsi za'ra, ab're hawi apâ te te ihâiwa'utu zô.” Ãne te wama aiwasu'u za'ra wa'wa. Tane tô. Ta hã Zezusi hã, Wanho'reptui'wa. Ma tô wanho'reptu za'ra, 'Re ihâimana u'âsi mono hã za te te idahâ za'ra zé wi hã.

1 Tesalonita 4:16

Tô sena, Wanhib'apito hã te za wei wazô si'ra za'ra, hâiwa hawi. Tawamhã te za tãma wa'ru za'ra, hâiwa ãma tãma iromhuri pese 'wai ma. Hâiwa ãma tãma iromhuri pese 'wa hã, te za wei hâ, hârâ 'rãihâ na, 'Re ihâimana u'âsi mono nhimnhihârâzém na. Tawamhã isazei'wa norĩ hã 're idâ'â za'ra mono norĩ hã, te za uimrehẽne apâ hã hâiwa'utu za'ra za.

Titu 2:13

Ãne wa za 're wanomro, Wa'anho'reptui'wa zô wanhimipari sina. Wa za rowẽ u'âsi 're wahâimana za'ra, wasina 're wanhimipari za'ra mono sina. Rowa'a za'ẽtẽ ré, apâ wei morĩ wapsi, wa za watõmo na 'madâ'â za'ra ni, danhipai u 're ihâimana mono hã, Wanhib'apito Zezu Cristu hã.

Hebreu 12:22

Tazahã, a norĩ wa'wa hã tane 're aihâimana za'ra wa'aba mono õ di oto, ãhã na hã. 'Re ihâimana u'âsi mono u aipẽ'ẽ na 'râwi asina 're rob'umhutu za'ra wa'aba mono wamhã, hâiwa ãma Siã na ẽtẽ 'rãihâ nhisi u ne, ma tô 're irob'umhutu za'ra wa'aba mo. Duré hâiwa ãma Zeruzalẽ hã 'ri nho'õmo u ne, ma tô 're irob'umhutu za'ra wa'aba mo, 'Re ihâimana u'âsi mono 're isãmra u'âsi mono zéb u hã, hâiwa ãma tãma iromhuri'wa norĩ hã ahâ uptabi na, i'rata 're isi'ubumroi mono zéb u zama.

Hebreu 9:28

Tane ma tô duré Cristu hã misi haré dazada dârâ, dawasédé hã da'ahâ na te te oto dama ãma 're i'apari mono zéb da hã. Tawamhã niwa ti'ai u apâ wei morĩ zahu wamhã, ta hã oto dazada dâ'â da hã, wei morĩ õ di za, taha zarina dawasédé hã te te duré dama 're apari mono da hã. Ãne hã mare di za. Sô 're isimipari za'ra mono norĩ si, te te oto isõ'reptui pese za'ra da si, te za wei mo apâ Cristu hã, ta norĩ zô si.

Apocalipsi 1:7

Ma'ãpé, asiwi waihu'u pese za'ra wa'aba. Zezusi hã te za wei mo, hâiwa'a na. Wei morĩ wamhã, uburé te za dasiwi 'madâ'â za'ra ni. I'a're wi, siwi iwa'ré'wa norĩ hã te za duré 'madâ'â za'ra, siwi iwĩrĩ'wa norĩ hã. Tawamhã da'upsãtã mono bâ te za sô aiwa'õ za'ra ni, daro mono bâ. Tô sena te za ãne hã tiromhâiba.