Filipu 2:25 - ꞌRe Ihâimana Uꞌâsi Mono Zadawa Wasuꞌu

²⁵ Wasisãnawã Epafroditu hã ma tô we ĩtẽme isatõrĩ za'ra wa'wa, te te ĩma asadawa wasu'u za'ra wa'aba da, duré nasi ĩ'ãma siwãrĩ da, te robzépata wa, marĩ zô nasi ĩwi irowaptâ'â na hã. Cristuhu wasu'uwẽ na ĩsiré romhuri'wa ta hã, duré wanhitob'ru norĩ, wasiré wa te 're i'a'wapéi mono. Wẽ uptabi di, ta hã. Tane nherẽ, wa tô waihu'u, Timotiuhu wana, te ãma atẽme satõrĩ za'ra wa'aba da apâ.

Filipu 2:25 ပူးပေါင်းရင်းမြစ်များ

Provébiu 25:13

Rowa'ro na da te 're iroptehâri za'ra mono siwaprã, â idi'idi, dama 're ihâimana mono ne, te rowasu'u'wa i'umnha hã isatõrĩ'wai ma, te te ãma tãma 're rowẽ zani apâ.

Zuwã 13:16

Ma'ãpé ĩwapari pese za'ra wa'aba za. Danhib'apito norĩ hã 're sisawi za'ra mono ãna, te te 're dapawaptob za'ra mono wamhã, tãma iromhuri'wa norĩ zama, te za isine te te 're dapawaptob za'ra, 're sisawi za'ra mono ãna. Duré te te 're isatõrĩ za'ra mono hã 're sisawi za'ra mono ãna, te te 're dapawaptob za'ra mono wamhã, isadawa wasu'u'wa norĩ zama te za isine te te 're dapawaptob za'ra, 're sisawi za'ra mono ãna.

Zuwã 17:18

A hã we datẽme ĩzatõrĩ ne, wa za oto datẽme satõrĩ za'ra, te te dama 're ĩzadawa wasu'u za'ra mono da.

Roma 16:3

Ma'ãpé, duré ĩma sawi za'ra wa'aba za, Prisila norĩ hã Aquiraha me, te ãma isawi zahuré zéb zarina, rob'ui'éré na.

Roma 16:9

Duré Urbanuhu zama asiwi ĩma sawi wa'aba, wasiré romhuri'wa hã Cristuhu ma. Estaqui hã ĩsiwadi zama te za duré asiwi ĩma isawi wa'wa, ĩma isawi pese uptabi hã.

2 Corĩtu 2:13

Tane nherẽ, wa tô ĩhâtâ'â sina ĩhâimana, wasisãnawã Titu hã ĩzô sãmra õ wa, tame te sõpẽtẽ da nherẽ aré. Tahawa, wa tô õne haré ta hawimhã mo, Masédonia u we ĩmorĩ da hã.

Filipu 2:26

Ta hã te te duré apâ asabu ze za'ra wa'aba di, uburé ai'ãma pẽ'ẽzé za'ra wa'aba wa. Duré ai'ãma hâtâ'â za'ẽtẽ za'ra wa'aba di, ãme ihâzé na isiwasu'uzé hã wapari za'ra wa'aba wa. Tahawa, wa za tô ãma atẽme satõrĩ su'u za'ra wa'wa, Timotiuhu wana.

Filipu 4:18

Ãme wa tô uburé marĩ hã ĩsima waibui wẽ, we asiwi ĩpawaptob za'ra wa'aba zé hã. Epafroditu hã ma tô we ĩma ãwisi wẽ, we ĩma asõprub za'ra wa'aba zé hã. Tahawa, marĩ zô ĩwi rowaptâ'â õ di oto. Sa'ẽtẽ na te za oto marĩ hã ĩma tihâiba. Ãne wa, wa ĩsina ai'uze za'ra wa'wa, we ĩma asõprub za'ra wa'aba zém na hã. Asõprub za'ra wa'aba zé hã wẽ uptabi di, 'Re ihâimana u'âsi mono ma hã. Wedewati isadaze hã 'Re ihâimana u'âsi mono ma, da te 're izata za'ra mono zéb zarina, tãma ãma 're irowẽ pusi mono ne, tãma wẽ uptabi di duré ãhã na hã, we ĩma asõprub za'ra wa'aba zé hã.

Filipu 4:3

Duré a hã ĩpawapto wẽ 'wa na 're i'aihâimana mono hã, ma'ãpé ã pi'õ norĩ hã pawaptob zahuré na. Ta norĩ hã ma tô ĩsiré te te 're romhuri pese zahuré, Cristuhu wasu'uwẽ na wa te dama ãma 're iropéi mono na hã. Clemetihi siré zama ma tô te te 're romhuri zahuré, duré uburé ĩsiré romhuri'wa norĩ siré zama. Uburé te ã norĩ nhisi hã dame 're hâimana za'ra ibaihâ na hã, 'Re ihâimana u'âsi mono 'rata za 're idahâimana u'âsi za'ra mono norĩ nhisi ré, ibaihâ 're ihâimana mono na hã.

Colosu 1:7

Epafrasihi nhimirowasu'u zarina, ma tô ãma iwaihu'u za'ra wa'wa. Ta hã Cristuhu ma wasiré romhuri'wa, wama isawi pe hã. Simi'ẽ na te Cristuhu ma, te te ai'ãma 're romhuri pese za'ra wa'wa, wa'upana.

Colosu 4:11

Zozué hã te duré ãma asawi za'ra wa'wa, Zustu na isisi amo hã. Ã norĩ hã zudeu na 're ihâimana za'ra mono, si'ubdatõ ihâiba za'ra hã. Ĩsiré romhuri'wa norĩ hã ahâ uptabi nherẽ, si'ubdatõ si te zudeu norĩ hã te te ĩsiré 're romhuri za'ra, tô ã norĩ hã, 'Re ihâimana u'âsi mono, da'ãma 're isib'a'uwẽ mono zéb u, wa te tãma 're ida'awaibui mono na hã. Ã norĩ hã ma tô siwi ĩpawapto pese za'ra tô.

Filemo 1:24

Marcu hã te duré ãma asawi, duré Aristacu hã, duré Demasi, duré Luca. Ta norĩ hã, ĩsiré Wanhib'apito ma romhuri'wa norĩ. Ãne si, wa ĩnhimirob'ui'éré hã ãma aima 'rãsutu.

Hebreu 3:1

Ĩsisãnawã norĩ, a norĩ wa'aba zama ma tô 'Re ihâimana u'âsi mono hã aipisutu za'ra wa'wa, isib'a'uwẽ si oto 're anomro aba mono da, hâiwa ãma i'rata 're aihâimana u'âsi za'ra wa'aba mono da. Tahawa, te za Zezusihi ãma si 're irosa'rata u'âsi za'ra wa'aba mo, 'Re ihâimana u'âsi mono hã ti'ai u, we te te isatõrĩ na, duré dama isadawa wasu'u'wa na. Ta hã sasedoti ipire uptabi na te wa'ãma te te 're romhuri u'âsi, iwasu'uwẽ na wa te 're isaze za'ra mono zém na te te 're wa'apawapto mono da.