Filipu 1:4 - ꞌRe Ihâimana Uꞌâsi Mono Zadawa Wasuꞌu

⁴ Duré 'Re ihâimana u'âsi mono ma, ai'ãma 're ĩmreme za'ra wa'aba mono sidâpâsi, wa ãma aima 're ĩtoi u'âsi za'ra wa'wa, aihâiba mono bâ wa'aba.

Filipu 1:4 ပူးပေါင်းရင်းမြစ်များ

Marcu 5:5

Bâtâ sidâpâsi, duré mara sidâpâsi te adâ'â 'ru ãma, duré ẽtẽ 'rãihâ ãma zama hã 're hâimana, sadari sina. Ẽtẽ na te duré 're sisihâri u'âsi.

Luca 15:10

— Tane duré, ni'wa hã siwa'ru 're imorĩ hã, tiwasédé hã te te oto rẽme pese wamhã, hâiwa ãma 'Re ihâimana u'âsi mono ma romhuri'wa norĩ hã te za ãma 're to za'ra, tiwasédé hã te te rẽme pese wẽ te, misi nherẽ.

Luca 15:7

— Tane duré, ni'wa hã siwa'ru 're imorĩ hã tiwasédé hã te te oto rẽme pese wamhã, hâiwa ãma 're isi'ubumroi mono norĩ hã te za tãma 're to za'ra, misi nherẽ. Õhõ ãma si, te za 're toi uptabi za'ra, 're inomro wẽ mono norĩ nhipai u hã, 99 na ihâiba za'ra nhipai u hã. Ta norĩ hã 're nomro wẽ mono wa, tiwasété na 're isiwẽ'õ za'ra mono da hã, mare di.

Roma 1:9

Wa hã 're ĩsihâiba zawi mono ãna, wa 'Re ihâimana u'âsi mono ma, te 're romhuri u'âsi, i'ra wasu'uwẽ hã te dama 're iwasu'u mono zém na hã. Wa ai'ãma 're ĩsipo're pu'u u'âsi za'ra wa'wa. Wa duré ai'ãma 're ĩmreme u'âsi za'ra wa'wa, 'Re ihâimana u'âsi mono ma. Tô sena, wa ãne na aima rowasu'u za'ra wa'wa, 'Re ihâimana u'âsi mono ma, ãne hã tãma waihu'u pese uptabi wa. Taha wi si, wa nasi ĩsima rowaptẽrẽ u'âsi ãhã na hã, te te sima iwẽzéb uwaibaba te te ĩma ãma uwaimrami da, ãma atẽme ĩmorĩ za'ra wa'aba da hã.

Filipu 2:2

Tahawa, ma'ãpé duré ãma asiwi 're sisiwi wa'aba mono, asabâdâb za'ra wa'aba ãma ĩma 're irowẽ pusi u'âsi mono zéb da hã. Aiwapsi te za 're irosa'rata za'ra wa'aba mo. Aiwapsi te za duré 're asisawi pese za'ra wa'aba mo. Simisutu rosa'rata wẽ na, te za misi haré duré rosa'rada hã 're i'manharĩ u'âsi za'ra wa'aba mo, uburé marĩ na ãma 're asisaze za'ra wa'aba mono da. Ã norĩ na te za ãma asiwi 're isisiwi za'ra wa'aba mo. Tawapsi, ĩma 're rowẽ uptabi mono di za duré, ai'ãma za'ra wa'aba hã.

Filipu 3:18

Ni'wam norĩ hã ahâ na Cristuhu zazei'wa 're hâimana za'ra mono newa, te tihâimana wasété zarina, Cristu hã wedepo'o nhonhi'rãmi na dazada idâ'âzé wasu'u da, 're hâimana za'ra. Ã norĩ wasu'u na hã ahâ na wa tô te ãma aima 're rowasu'u za'ra wa'wa. Tane nherẽ, ãhã na wa duré aima ãma sahu za'ra wa'wa, ĩwawa sina te ãma aima rowasu'u za'ra wa'aba nherẽ, rob'ui'éré na hã.

Filipu 4:1

Tahawa, ĩsisãnawã norĩ, ĩma asawi pese za'ra wa'aba norĩ hã, ma'ãpé Wanhib'apito ãma asiptete sina 're aihâimana u'âsi za'ra wa'aba mono za. Ai'ãma ĩpẽ'ẽzé uptabi za'ra wa'aba wa, 'râwi te asabu za'ra wa'aba neza. Romhâ na nherẽ, te asina ĩma 're irowẽ zani za'ra wa'aba mo. Tahawa, wa tô te dama 're aiwasu'u wẽ za'ra wa'wa, ĩto sina. Ãne wa, te za asiptete sina õhõ ãma si 're aihâimana u'âsi za'ra wa'aba mo.

Colosu 2:5

Ai'rata ĩnhamra aba õ nherẽ, ĩpẽ'ẽ na wa tô te ai'ãma 're rosa'rata u'âsi za'ra wa'wa, 'râwi asiré 're ĩhâimana za'ra wa'aba mono ne. Cristu hã asina 're i'umnhasi za'ra wa'aba mono zém na, simisutu asiré 're aihâimana nhiptete za'ra wa'aba mono wa, wa ai'ãma 're ĩtoi u'âsi za'ra wa'wa, romhâ na nherẽ.

1 Tesalonita 1:2

Wa norĩ hã 'Re ihâimana u'âsi mono ãma, wa 're wawata u'âsi za'ra, 're aihâimana wẽ za'ra wa'aba mono wa. Ai'ãma 're wamreme zusi aba mono wamhã, wa duré wa te tiwi 're rowaptẽrẽ za'ra, te te 're aipawaptob za'ra wa'aba mono da.

Filemo 1:7

A hã ĩno. Ĩma asawi di. 'Re asimizawi pese mono wa, ĩto ti. Duré ĩtoi uptabi di, ĩpẽ'ẽ 'remhã. Tahawa, ĩma rowẽ uptabi di. Duré uburé isazei'wa norĩ hã robze na oto 're si'ubumroi mono wa, marĩ na a hã 're apawapto mono wa, ĩtoi uptabi di, aima.

2 Zuwã 1:4

Ni'wam norĩ hã asiré 're i'aihâimana za'ra wa'aba mono norĩ hã iwasu'uwẽ tô sena zarina si te, u, 're hâimana za'ra, Wamama te te wama 're i'aroti mono zéb zarina si. Ãne hã te wapari wamhã, ma tô iwasu'u wẽ za'ra hã ĩma rowẽ waze. Tahawa, ĩtoi uptabi di, ãhã na mono hã.