Filipu 1:27 - ꞌRe Ihâimana Uꞌâsi Mono Zadawa Wasuꞌu

²⁷ Niha za ĩma romhâimana nherẽ, te za Cristuhu wasu'uwẽ zarina si 're anomro wẽ wa'aba mo, taha si aima pire za'ra wa'aba wa, ãma 're aihâimana za'ra wa'aba mono zéb da hã. Ãne 're aihâimana za'ra wa'aba mono ré, ãma atẽme ĩmorĩ za'ra wa'aba wamhã, wa za ai'ãma waihu'u za'ra wa'wa, simisutu asiptete sina asitob'ru norĩ da, 're aihâimana za'ra wa'aba mono zém na hã, asimirosa'rata misi na, taha zarina 'Re ihâimana u'âsi mono, da te dasina 're umnhasi za'ra mono da, Cristuhu wasu'uwẽ hã da te 're isaze za'ra mono zéb zarina. Duré ãté ãma atẽme ĩmorĩ za'ra wa'aba õ nherẽ, wa za tô õhõ na si ai'ãma waihu'u za'ra wa'wa, simisutu asiptete sina ãma 're aihâimana za'ra wa'aba mono na hã.

Filipu 1:27 ပူးပေါင်းရင်းမြစ်များ

Provébiu 22:23

E marĩ wa. Uburé Danhib'apito i'wawib za'ra isimapa'wa na 're hâimana mono wa za. Ta hã te za isimarĩ'õ norĩ ma, te te tãma 're irob'manharĩ za'ra mono norĩ ma hã te te 're arob'manharĩ wasété.

Mateu 12:25

Tawamhã te te ãma irosa'rata wasété za'ra na, ma tô sina waihu'u za'ra, Zezusi hã. Tahawa, te ãne tãma ãma romnhimiré'é za'ra: — Danhib'apito nhib'a'uwẽ norĩ hã 'râwim nherẽ, oto sisada 're simasa mono wamhã, te aré 're si'uprosi. Duré 'ri nho'õmo ãma 're idahâimana za'ra mono norĩ hã sisada 're hâimana za'ra mono wamhã, te aré 're si'uprosi. Duré dasisãnawã nherẽ, 'râwi dasisada 're dahâimana za'ra mono wa, 're dasi'wapé za'ra mono wamhã, te aré 're dasi'uprosi, 'râwim nherẽ.

Zezusihi zadawa wasuꞌuꞌwa norĩ nhimiromhuri na robꞌuiꞌéré 2:46

Awẽ sidâpâsi ma tô duré 're si'rã'õtõ, 'Re ihâimana u'âsi mono nhorõwa 'ri 'wawi wa'ra 're, 're mreme zusi mono da, tãma. Tinhorõwa mono bâ, ma tô duré 're si'rã'õtõ, i'u'ẽtẽ wapu na siré 're saihuri mono da. Sima 're sõprub za'ra mono wa, ma tô to sina tisa na hã siré 're saihuri.

Zezusihi zadawa wasuꞌuꞌwa norĩ nhimiromhuri na robꞌuiꞌéré 24:24

Bâdâ hã siwaptom na ãma ne pari, ma tô apito Peresi hã Pauluhu zô hâ, timro me, Durusiraha me. Durusira hã, zudeu. Tawamhã Cristu Zezusi hã da te dasina 're i'umnhasi za'ra mono zém na ma tô Paulu hã tãma rowasu'u zahuré. Apito Peresi hã ma tô isimirowasu'u hã wapari pese.

Zezusihi zadawa wasuꞌuꞌwa norĩ nhimiromhuri na robꞌuiꞌéré 4:32

Tawamhã isazei'wa norĩ hã uburé, ma tô sisaze za'ra, tinhimirosa'rata za'ra na hã. Ni'wam norĩ hã tinhibro te te sima 're sawi za'ra mono õ di, tite da si. Uburé, ma tô isibrob'õ norĩ udâna te te 're po'o za'ra.

Roma 1:16

'Re ĩnhisé mono õ di, Zezusihi wasu'uwẽ hã te dama 're wasu'u tõ mono da. E marĩ wa. 'Re ihâimana u'âsi mono hã siptete uptabi wa, iwasu'uwẽ na te te ãma 're da'anho'reptui mono da, Zezusi te te sina 're i'umnhasi za'ra mono norĩ hã. Zudeu norĩ si ma tô isãna'rata hawimhã te te 're sõ'reptu za'ra aré. Tane nherẽ, te oto ãhã na hã zudeu'õ norĩ zama te te 're anho'reptu.

Roma 1:5

'Re ihâimana u'âsi mono hã tinhoprubzéb zarina ma tô Cristuhu ma ĩpisutu siro, ĩpire na te dama 're sadawa wasu'u mono da. Cristuhu ma, te 're romhuri wẽ mono da, ma tô ĩpisutu, ĩnhimiromhurizéb zarina dapoto mono bâ, da te 're sazei pese za'ra mono da, duré da te 're sazei pese za'ra mono wa, isimiroti si, da te 're 'madâ'â pese za'ra mono da.

Roma 1:9

Wa hã 're ĩsihâiba zawi mono ãna, wa 'Re ihâimana u'âsi mono ma, te 're romhuri u'âsi, i'ra wasu'uwẽ hã te dama 're iwasu'u mono zém na hã. Wa ai'ãma 're ĩsipo're pu'u u'âsi za'ra wa'wa. Wa duré ai'ãma 're ĩmreme u'âsi za'ra wa'wa, 'Re ihâimana u'âsi mono ma. Tô sena, wa ãne na aima rowasu'u za'ra wa'wa, 'Re ihâimana u'âsi mono ma, ãne hã tãma waihu'u pese uptabi wa. Taha wi si, wa nasi ĩsima rowaptẽrẽ u'âsi ãhã na hã, te te sima iwẽzéb uwaibaba te te ĩma ãma uwaimrami da, ãma atẽme ĩmorĩ za'ra wa'aba da hã.

Roma 15:29

Tawamhã atẽme ĩwisi za'ra wa'aba wamhã, Cristuhu nhoprubzém na, sa'ẽtẽ uptabi na te za aihĩni wama ãma tirowẽ pese za'ra.

1 Corĩtu 1:10

Ĩsisãnawã norĩ, Corowihi nhorõwa ãma 're ihâimana za'ra mono norĩ hã ma tô we ĩma aiwasu'u za'ra wa'wa, 're asisada'âbâ u'âsi za'ra wa'aba mono na hã, asiwanhizari ãma 're aihâimana za'ra wa'aba mono da. Tahawa, Wanhib'apito Zezu Cristuhu zadawa para, wa za oto aima ãma roti pese za'ra wa'wa, simisutu ãma 're asisazei pese za'ra wa'aba mono da, asiwanhizari, ãma 're aihâimana za'ra wa'aba mono tõ da. Misi haré te za oto 're ipisutu za'ra wa'aba mo, simisutu asiré ãma 're aihâimana za'ra wa'aba mono da oto.

1 Corĩtu 15:58

Ĩsisãnawã norĩ, ĩma asawi pese za'ra wa'aba norĩ hã, tahawa, te za asiptete u'âsi Cristuhu ãma si 're anomro aba mo, tiwi 're aipizari za'ra wa'aba mono ãna. Wanhib'apito ma, 're iromhuri za'ra wa'aba mono zé hã taréi õ di. Ãne na asina waihu'u za'ra wa'aba wa, te za tãma 're iromhuri pese u'âsi za'ra wa'aba mo, asimi'ẽ na.

2 Corĩtu 13:11

Ĩsisãnawã norĩ, ĩnhimi'ui'éré na wa za oto aima ãma 'rãsutu za'ra wa'wa. 'Re aihâimana wasété za'ra wa'aba mono zé hã te za oto irẽme pese za'ra wa'wa. Te aima 're iroti za'ra wa'aba mono zé hã te za 're iwapari pese za'ra wa'aba mo. Tahawa, te za simisutu asimirosa'rata na 're asisazei pese za'ra wa'aba mo. Rowẽ na si asiré 're aihâimana u'âsi za'ra wa'aba mono da, te za duré asina 're irosa'rata wẽ u'âsi za'ra wa'aba mo. Ãne wamhã, 'Re ihâimana u'âsi mono hã isimizawi pe hã, te za 'râwi asiré 're hâimana u'âsi za'ra wa'wa, dama rowẽ nhomri'wa hã.

2 Corĩtu 4:4

Ta norĩ hã, Cristu te te 're saze za'ra mono õ wa, ma tô Wa'uburé hã ipo're'õ norĩ nhib'apito hã te te 're apo're nhito, tob'a ne 're hâimana za'ra mono da. Tahawa, Cristuhu wasu'uwẽ hã wẽ uptabi nherẽ, rob'uiwẽzém ne, te te dama 're rowa'a za'ra mono nherẽ, te te 're waihu'u za'ra mono õ di, ta norĩ hã. Cristu hã aiwa Timama ne 're morĩ wẽ uptabi nherẽ, ta norĩ hã te te siwi 're waihu'u za'ra mono õ di, sena na iwasu'uwẽ na hã.

2 Corĩtu 9:13

A norĩ wa'wa hã tãma asõprub za'ra wa'aba zém na, pawaptob za'ra wa'aba wa, te za tãma ãma i'uwaimrami za'ra wa'wa, 'Re ihâimana u'âsi mono ma hã. Tahawa, ahâ na te za tô 'Re ihâimana u'âsi mono ãma tiwata zara, Cristuhu wasu'uwẽ zarina 're anomro wẽ wa'aba mono na, duré asõprub uptabi na pawaptob za'ra wa'aba wa, ta norĩ hã, duré darob amoi ãma 're ihâimana za'ra mono norĩ hã, pawaptob za'ra wa'aba wa.

Galata 1:7

Aimawi rowasu'u hã Cristuhu wasu'uwẽ me, aiwa 're hâimana mono õ di. Mare uptabi di. E marĩ wa, wa tô ãne aima waihu'u za'ra wa'wa. Ni'wam norĩ hã ma tô sima te te 're wẽ za'ra, Cristuhu wasu'uwẽ upana te te ãma saprĩ za'ra da, aimawi rowasu'u u. Ta norĩ hã ma tô aimawi tinhimirowasu'u na aiwi ãma ro'wa'rutu za'ra wa'wa.

Éfézu 1:13

A norĩ wa'aba zama te oto wasiré Cristuhu ãma 're anomro aba mo. Danho'reptui'wai wasu'uwẽ hã ma tô iwapari za'ra wa'wa, asi'uihâ na. Tô sena Cristuhu wasu'uwẽ hã. Tawamhã wapari za'ra wa'aba wamhã, ma tô Danho'reptui'wa na asina 're i'umnhasi za'ra wa'aba mo, Cristu hã. Taha zarina ma tô 'Re ihâimana u'âsi mono hã Tipẽ'ẽzani hã we aima sõmri za'ra wa'wa, 'râwi asina 're waihu'u za'ra wa'aba mono da, isib'a'uwẽ oto 're anomro aba mono na. Ãne ma tô ai'ãma uwaimrami wẽ za'ra wa'wa, te te dama iropisutuzéb zarina.

Éfézu 1:15

Aiwasu'u wẽ za'ra wa'wa hã ma tô we ĩtẽme tiwisi 'wa, Wanhib'apito Zezusihi zazei'wa oto 're anomro aba mono na, duré asiré isazei'wa norĩ 're isawi pese za'ra wa'aba mono na zama.

Éfézu 4:1

Tahawa, wa za aima roti za'ra wa'wa, Wanhib'apito ma romhuri'wa 're ĩmorĩ 'ru te, dazazéb 're da te dasiwi 're ĩzai mono wa, 're ĩza mono ré. Ma'ãpé dama 're aihâimana wẽ za'ra wa'aba mono za, 'Re ihâimana u'âsi mono te te sima 're i'aiwẽ za'ra wa'aba mono zéb uwaibaba. Taha da, ma tô te te sima 're aipisutu za'ra wa'wa.

Filipu 1:5

Cristuhu wasu'uwẽ hã 're iwapari na'rata za'ra wa'aba mono zém hawim haré, te oto ĩsiré ãma 're iromhuri u'âsi za'ra wa'aba mo, wa te dama ãma 're iropéi mono zém na hã. Tahawa, wa ĩto sina ai'ãma 're ĩmreme u'âsi za'ra wa'wa, 'Re ihâimana u'âsi mono ma hã.

Filipu 2:12

Ĩsisãnawã norĩ, ĩma asawi pese za'ra wa'aba norĩ hã, ma'ãpé ĩwapari pese za'ra wa'aba za. Wa hã tame ai'rata ĩhâimana za'ra wa'aba ré, ma tô ĩnhimiroti hã iwapari pese za'ra wa'wa. Tane nherẽ, ãhã na oto ai'rata ĩhâimana za'ra wa'aba õ nherẽ, te duré ĩnhimiroti hã 're iwapari pese za'ra wa'aba mo, ãma atẽme ĩwisi za'ra wa'aba õ nherẽ. Aihâimana prédup sina, te za 're iromhuri pese za'ra wa'aba mo, 'Re ihâimana u'âsi mono te te asõ'reptu za'ra wa'aba zéb zarina, 're anomro wẽ wa'aba mono zém na tãma ãma asina 're uwaimrami u'âsi za'ra wa'aba mono da.

Filipu 2:24

Wanhib'apito si wa tô ĩsina umnhasi, te te ĩma pisutu da, ĩzama ãma atẽme ĩmorĩ za'ra wa'aba da, romhutu na hã.

Filipu 3:18

Ni'wam norĩ hã ahâ na Cristuhu zazei'wa 're hâimana za'ra mono newa, te tihâimana wasété zarina, Cristu hã wedepo'o nhonhi'rãmi na dazada idâ'âzé wasu'u da, 're hâimana za'ra. Ã norĩ wasu'u na hã ahâ na wa tô te ãma aima 're rowasu'u za'ra wa'wa. Tane nherẽ, ãhã na wa duré aima ãma sahu za'ra wa'wa, ĩwawa sina te ãma aima rowasu'u za'ra wa'aba nherẽ, rob'ui'éré na hã.

Filipu 3:20

Tane nherẽ, wa norĩ ma hã ti'ai ãma waza'rui uptabi hã wama 're hâimana za'ra mono õ di. Hâiwa ãma si te waza'rui uptabi hã wama 're hâimana za'ra. Ta hawi za wei wazô imorĩ zô si, wa wato sina wasina sô 're wanhimipari u'âsi za'ra, Wanho'reptui'wa zô, Wanhib'apito Zezu Cristuhu zô si.

Filipu 4:1

Tahawa, ĩsisãnawã norĩ, ĩma asawi pese za'ra wa'aba norĩ hã, ma'ãpé Wanhib'apito ãma asiptete sina 're aihâimana u'âsi za'ra wa'aba mono za. Ai'ãma ĩpẽ'ẽzé uptabi za'ra wa'aba wa, 'râwi te asabu za'ra wa'aba neza. Romhâ na nherẽ, te asina ĩma 're irowẽ zani za'ra wa'aba mo. Tahawa, wa tô te dama 're aiwasu'u wẽ za'ra wa'wa, ĩto sina. Ãne wa, te za asiptete sina õhõ ãma si 're aihâimana u'âsi za'ra wa'aba mo.

Colosu 1:10

Tawapsi, te za Wanhib'apito zazei'wa hâimanazéb zarina 're anomro wẽ wa'aba mono zém na, tãma ãma asina 're i'uwaimrami za'ra wa'aba mo. Marĩ iwẽ si 're 'manharĩ za'ra wa'aba mono wamhã, Wanhib'apito hã te za toi uptabi na aihâimanazém na te te 're ai'uzei pese za'ra wa'wa. Tawamhã 're aihâimana wẽ za'ra wa'aba mono zém hawi, te za tô marĩ 're i'manharĩ wẽ za'ra wa'aba mono zém na asima 're isa'ẽtẽ za'ra wa'aba mo. Tawamhã 'Re ihâimana u'âsi mono hã iwaihu'u za'ra wa'aba zém na te za duré asima 're isa'ẽtẽ za'ra wa'aba mo, asi'uihâ na.

Colosu 1:4

Cristu Zezusihi si asina 're i'umnhasi za'ra wa'aba mono zé wasu'u hã, duré uburé 'Re ihâimana u'âsi mono nhib'a'uwẽ 're isawi pese za'ra wa'aba mono zé wasu'u hã wa te 're wapari za'ra mono wa, wa ãma 're wawata u'âsi za'ra, 'Re ihâimana u'âsi mono ãma, ãne na oto 're aihâimana wẽ za'ra wa'aba mono wa.

1 Tesalonita 3:6

Tawamhã Timotiu hã ma tô we apâ watẽme tiwisi za'ra, aihawib za'ra wa'aba. Ma tô aiwasu'u wẽ za'ra wa'wa hã wei wama ãwisi za'ra. Ãhã wamhã, aiwasu'u wẽ za'ra wa'wa hã wa te wapari ze za'ra di. Cristu hã te, u, asina 're i'umnhasi pese za'ra wa'aba mo. Asimizawi pese za'ra wa'aba na te, u, 're anomro aba mo. Duré, iwẽ na si te, u, wa'ãma 're irosa'rata za'ra wa'aba mo. Iwazabu za'ra wa'aba da si, te, u, 're asimipari za'ra wa'aba mo. Ãne, aiwasu'u wẽ za'ra wa'wa hã, wa te wapari ze za'ra di. Tane tô, wa norĩ zama wa te asabu za'ra wa'aba neza. Wa duré sô mapari za'ra ni aré, wa te i'asabu za'ra wa'aba zéb zô hã.

1 Tesalonita 4:1

Wasisãnawã norĩ, wa tô aima waihu'u pari za'ra wa'aba ni, 're i'anomro wẽ wa'aba mono zéb da na, taha zarina, 'Re ihâimana u'âsi mono hã ai'ãma 're toi u'âsi za'ra wa'aba mono da. Taha zarina, te tô oto ãma 're anomro wẽ wa'aba mo. Ãhã na wa za duré aima roti pese za'ra wa'aba ni, 're anomro wẽ wa'aba mono zém nhipai u, asima 're sa'ẽtẽ za'ra wa'aba mono da, Wanhib'apito Zezusihi zadawa para.

1 Timotiu 1:11

Roti tô sena na si, wa tô te dama ãma 're aroti, Wanhib'apito wasu'uwẽ na te dama 're rowasu'u mono wamhã. Wẽ uptabi di, Wanhib'apito wasu'u hã. Taha da, ma tô ĩma pisutu, iwasu'uwẽ na te ãma 're da'apo're pu'u mono da, 'Re ihâimana u'âsi mono hã, rowẽ u'âsi 're imorĩ hã.

2 Timotiu 4:7

'Re dasi'wamhâri za'ra mono wa, danhiptete na dasiwi 're idawairébé mono ne, wa tô wa hã ĩnhiptete na 're ĩpusi. Duré dawara na dawi ĩwatobro ne, wa 're ĩhâimana, Wanhib'apito ma, ĩnhimiromhuri na te ĩsina tãma uwaimrami pari wa. Cristu umnhasi sina, wa tô duré 're morĩ u'â, isimiroti 'madâ'â sina. Ni'wa hã dawara na dawi watobro wẽ te, te za ropsu 'manharĩ hã sô tihâiba, da te ãma isõprezéb da hã. Tane, te marĩ iwẽ uptabi hã ĩzô 're hâimana, Wanhib'apito ma, ĩnhimiromhuri na te ĩsina tãma uwaimrami wẽ te. Nimahã na te za bâdâ hã iwa waptãrã, Wanhib'apito apâ we imorĩzéb da hã, dahâimanazém na te te ida'awaihu'uzéb zarina, te te da'ãma i'arowairébézéb da hã. Tawapsi, ta hã wẽ uptabi wa, te za marĩ iwẽ uptabi hã ĩma pisutu, i'uwaibaba si. E ĩma si te za pisutu. Mare di. Aihĩni Wanhib'apito zawi sina, wei imorĩzéb zô 're isimipari za'ra mono norĩ ma zama, te za duré marĩ iwẽ uptabi hã tãma pisutu za'ra.

Titu 2:10

Duré marĩ hã tinhib'apito wi te te 're simi'uri za'ra mono õ di za. Te za te te tãma 're romhuri wẽ za'ra, te te tiwi 're upa za'ra mono ãna. Tawamhã 'Re ihâimana u'âsi mono nhimiroti zarina si 're nomro wẽ mono wa, te za Wa'anho'reptui'wa nhimiroti wẽ na 're dawata za'ra.

Tiagu 3:18

Amnho iwẽ hã da te 're zuri mono wamhã, te za iwẽ si da te 're ubumro za'ra, amnho hã. Tane roti iwẽ na 're dasipawaptob za'ra mono wamhã, rowẽ na dasiré 're dahâimana za'ra mono da, duré isimiroti na 're danomro mono wamhã, dahâimana wẽ na si te za dasima 're dahâimana za'ra oto.

2 Pedru 3:11

Tawamhã uburé marĩ hã isi'utõrĩzém na hã aima waihu'u pese za'ra wa'aba wa, e niha te za tawamhã 're aihâimana za'ra wa'aba mo. Te za aiwẽ uptabi na 're aihâimana za'ra wa'aba mo, 'Re ihâimana u'âsi mono nhimiroti zarina si.

2 Pedru 3:14

Tahawa, ĩsiwadi norĩ, ĩma asawi pese za'ra wa'aba norĩ hã, rowẽ zô 're asimipari za'ra wa'aba mono sina, te za sada 're asiptete za'ra wa'aba mo, aihâimana wẽ na 're aihâimana za'ra wa'aba mono da, 'Re ihâimana u'âsi mono hã aihâimana wẽ uptabi na, te te 're aiwaihu'u za'ra wa'aba mono da, rowẽ u'âsi ãma 're anomro aba mono da.

Zuda 1:3

Ĩsisãnawã norĩ, ĩma asawi pese za'ra wa'aba norĩ hã, wa tô aré ĩsima rosa'rata, 'Re ihâimana u'âsi mono te te 're iwa'anho'reptui mono zém na te aima rob'ui'éré za'ra wa'aba da. Tane nherẽ, marĩ iwasétére hã ai'ãma 're hâimana za'ra wa'aba mono wa, wa tô ĩnhimirosa'rata na ĩsima ãma saprĩ, taha na si te ãma aima rob'ui'éré za'ra wa'aba da. Wa norĩ hã 'Re ihâimana u'âsi mono nhib'a'uwẽ, wa oto 're wahâimana za'ra. Ta hã ma tô misi haré te te wama 're anhomri, Cristuhu wasu'uwẽ na roti na ãma 're iwanomro mono zéb da hã. Tahawa, wa oto aima ãma rob'ui'éré za'ra wa'wa, tô da'ãma 're ai'aba'ré za'ra wa'aba mono da, Cristu, da te dasina 're i'umnhasi za'ra mono zéb udâna.