Filipu 1:20 - ꞌRe Ihâimana Uꞌâsi Mono Zadawa Wasuꞌu

²⁰ Tahawa, wa tô wa hã ĩpẽ'ẽ 're, 're ĩsi'madâ'â pese, niwamhã ĩnhimiromhuri na 'Re ihâimana u'âsi mono ma, te ãma 're i'uwaimrami mono zém na ĩzô 're robaba tõ mono da, õne u'âsi ĩpahi ãna te tãma 're romhuri u'âsi mono da, ãhã na zama. Ãne wa, wa 'râwi te ĩsima 're 'ruiwapari u'âsi. Ãne na tô sena ãma 're ĩhâimana mono zém na da te 're ĩwaihu'u za'ra mono wamhã, te za Cristuhu ãma si 're dawata za'ra, ĩhâiba ré, ãma 're ĩhâimana mono na hã, duré ãté ĩdâ'â da nherẽ, ãma 're ĩhâimana u'âsi mono na zama.

Filipu 1:20 ပူးပေါင်းရင်းမြစ်များ

Salmu 119:116

Ma'ãpé 're ĩ'upari mono, ĩma iropisutuzéb zarina, a'â 're ĩhâimana hâ mono da, ĩhâiba ré. Duré 're ĩ'madâ'â rẽme mono tõ, taré 're ĩnhimipari mono zém na hã 're ĩtoi 'ré tõ mono da.

Salmu 119:80

Tô ibâ na asimiroti si te 're i'madâ'â pese mono da si, wa ĩsima te 're wẽ, ĩsima 're ĩnhisép tõ mono da.

Provébiu 10:28

Sena na 're ihâimana za'ra mono norĩ hã iwẽ uptabi zô 're isimipari za'ra mono zéb zarina te za robzei uptabi hã te te sima 're sani za'ra. Tane nherẽ, iwasété norĩ hã te te sima 're irowa'õtõ za'ra mono zé hã marĩ hã te te sima ãma 're sani za'ra mono dai õ di.

Provébiu 23:18

Ãne 're aihâimana mono wamhã, te za iwẽ hã aima 're hâimana. Duré marĩ iwẽ aima 're hâimana mono da, sô 're i'asimipari mono hã niwamhã isimini da hã mare di za.

Zuwã 21:19

Ãne sõ'awib õ nherẽ, ma tô tãma waihu'u siro, idâ'âzém na hã, za tãma iromhâimanazém na hã. Sihâiba zawi ãna, za dâ'â wa, te za 'Re ihâimana u'âsi mono ãma 're dawata za'ra. Tawamhã Zezusi te duré Pedruhu ma tinha, ãne: — 'Re ĩmorĩzém na te za 're aimo, ĩzarina.

Zezusihi zadawa wasuꞌuꞌwa norĩ nhimiromhuri na robꞌuiꞌéré 20:24

Tane nherẽ, ĩhâiba ré 're ĩmorĩ siroptu da hã, ĩhâiba te ĩsima sawi õ di, tarére wa, ĩma hã. Wanhib'apito Zezusi hã ma tô ĩnhimiromhuri hã ĩma tisõ, 'Re ihâimana u'âsi mono nhimizawi pese zé wasu'u na te dama 're sadawa wasu'u mono da. Ĩnhimiromhuri hã te tãma ãma uwaimrami da, wa tô ĩsima wẽ pese, taha si.

Zezusihi zadawa wasuꞌuꞌwa norĩ nhimiromhuri na robꞌuiꞌéré 21:13

Tawamhã asa te wama nharĩ za'ra, ãne: — E niha da, te aiwa'õ za'ra wa'wa. Ma tô ãma ĩwi irobzei'õ za'ra wa'wa. Zeruzalẽ u hã ĩmorĩ da si, wa tô ĩsima rowẽ upta. Zezusi hã, Wanhib'apito na te 're sisi mono wa, ãté te za dasiwi ĩnherẽ ni, dazazéb 're. Ãté, wa za dârâ. Tane nherẽ, ĩma hã wẽ di tô, tamomo ĩmorĩ da hã.

Zezusihi zadawa wasuꞌuꞌwa norĩ nhimiromhuri na robꞌuiꞌéré 4:31

Tawamhã 'Re ihâimana u'âsi mono ma, mreme zusi pari, 'ri ma tô iré tisãsã'ã za'ra. Tawamhã 'Re ihâimana u'âsi mono pẽ'ẽzani na ma tô aptete za'ra, ipẽ'ẽ mono bâ. Pahi ãna, ma tô dama sadawa wasu'u za'ra oto, 'Re ihâimana u'âsi mono hã.

Roma 12:1

Ĩsisãnawã norĩ, 'Re ihâimana u'âsi mono hã e wa'ãma 're pẽ'ẽzé mono õ di, wa'ãma 're isiwãrĩ mono zéb da hã. Wa'ãma 're ipẽ'ẽzé mono zé hã, tãma sa'ẽtẽ uptabi di. Tahawa, wa za oto aima roti pese za'ra wa'wa, ãne na hã. 'Re ihâimana u'âsi mono ma si, te za 're asisõmri u'âsi za'ra wa'aba mo, tiwi 're asisawi za'ra wa'aba mono ãna. Taha ma si, te za aiwẽ uptabi na tãma 're aihâimana za'ra wa'aba mo, te te 're ai'madâ'â wẽ u'âsi za'ra wa'aba mono da. Ãhã zarina, ãma 're anomro wẽ u'âsi aba mono wamhã, taha si tô sena, ãma 're i'aiwata za'ra wa'aba mono zé hã.

Roma 5:5

Ãhã zô, taré sô 're wanhimipari baba za'ra mono õ di za. E marĩ wa. 'Re ihâimana u'âsi mono hã Tipẽ'ẽzani te te wama 're i'anhomri mono na, tinhimizawi pese zé hã te te wama 're awaihu'u mono wa. Tahawa, taré sô 're wanhimipari za'ra mono õ di za, marĩ iwẽ hã te te wama 're i'apisutu mono zéb zô hã.

Roma 6:13

Duré marĩ iwasédé hã 're 'manharĩ za'ra wa'aba mono tõ da, te za aihâiba hã 're i'madâ'â pese za'ra wa'aba mo, aihâiba hawim na marĩ 're 'manharĩ za'ra wa'aba mono tõ da. 'Re atâ'â za'ra wa'aba mono wa, 'Re ihâimana u'âsi mono te te 're i'aihâiwa'utu za'ra wa'aba mono ne, te 're aihâimana za'ra wa'aba mo, 're anomro aba mono zép tém na hã. Tahawa, te za 'Re ihâimana u'âsi mono ma si, 're asisõmri u'âsi za'ra wa'aba mo, misi haré. Taha ma si, te za aihâiba hã duré 're isõmri u'âsi za'ra wa'aba mo õne haré, marĩ iwẽ si ãma 're i'manharĩ za'ra wa'aba mono zéb da hã.

Roma 6:19

'Re idahâimana za'ra mono zém na, wa tô aima ãma romnhimiré'é za'ra wa'wa, ĩnhimirowasu'u na hã asi'uihâ na sada asimirosa'rata nhiptete waihu'u za'ra wa'aba õ wa. Aihâiba hã aiwasété ma, ma tô 're isõmri za'ra wa'aba mo aré, taha na si 're aihâimana za'ra wa'aba mono da, aihâiba na asina 're aiwasété za'ra wa'aba mono da. Tane nherẽ, aihâiba hã 'Re ihâimana u'âsi mono ma si, te za oto 're isõmri za'ra wa'aba mo, taha nhimiroti na si oto 're aihâimana za'ra wa'aba mono da, aihâimana wẽ uptabi na.

Roma 8:19

'Re ihâimana u'âsi mono hã uburé te te i'apoto mono hã, simisutu te umnhasi sina sô 're simipari za'ra, bâdâ iwa iwaptã'ãzéb zô, uburé ti'ra na sõ'awi za te te oto dama iwasu'u hâi'ré za'ra zô.

Roma 9:33

Duréihã Izaia hã ma tô ãne na ãma rob'ui'éré, 'Re ihâimana u'âsi mono mreme na: “Ma'ãpé, ĩwapari pese za'ra wa'aba. Zeruzalẽ u, wa za ni'wa hã satõ, Siã na sa'a nhisi u. Ẽtẽ tõmo wawẽ hã bâdâdi wa, dawi 're isa'wari mono hã, te te 're da'marõpãrĩ za'ra mono wa, 're idasirẽme za'ra mono ne, 'Re ihâimana u'âsi mono 'rata 're idanomro u'âsi mono zé hã da te dasina 're uwaimrami za'ra mono õ di za, da te dasiwi 're wẽ'õ pese za'ra mono wa, 'Re ihâimana u'âsi mono Zeruzalẽ u te te isatõrĩ hã. Tane nherẽ, ni'wam norĩ hã te te sina 're umnhasi za'ra mono wamhã, taré te te sina 're umnhasi baba za'ra mono õ di za. Iwẽ hã te za tô te te tãma ãma 're a'uwaimrami, 'Re ihâimana u'âsi mono hã. Tahawa, tãma 're rowẽ u'âsi za'ra mono di za.” Ãne ma tô duréihã Izaia hã ãma rob'ui'éré siro, Cristu za da te dasiwi iwẽ'õzém na hã.

1 Corĩtu 15:31

Ĩsisãnawã norĩ, awẽ sidâpâsi aré 're ĩdâ'â u'âsi mono nherẽ, wa tô te dama 're rowasu'u u'âsi, iwasu'uwẽ na. Wa norĩ hã Wanhib'apito Cristu Zezusihi ãma simisutu oto 're wanomro mono wa, tô sena aima 're ĩtoi uptabi za'ra wa'aba mono zéb zarina, wa tô sena na aima ĩsiwasu'u za'ra wa'wa, ãne na hã.

1 Corĩtu 6:20

E marĩ wa, aihâiba hã ate za'ra wa'aba õ di oto. 'Re ihâimana u'âsi mono, ma tô aiwa'âbâ za'ra wa'wa, Cristuhu dâ'âzém na. Tahawa, uburé marĩ hã aihâiba na tãma 're i'manharĩ wẽ za'ra wa'aba mono zém na, te za ãma 're aiwata u'âsi za'ra wa'aba mo, 'Re ihâimana u'âsi mono ãma hã.

1 Corĩtu 7:34

Tahawa, maparane isimiromhuri te tãma 're hâimana za'ra, aibâ norĩ ma hã, te te sima sô 're irob'ruiwapari za'ra mono hã, Wanhib'apito ma, duré timro ma. Duré, pi'õi hâiba prédum norĩ, mro ãna 're ihâimana za'ra mono hã, duré pi'õ préduptém norĩ, mro ãna 're ihâimana za'ra mono hã ta norĩ hã te za simi'ẽ na Wanhib'apito ma si, te te tãma 're romhuri za'ra, wa'a ãna. Wanhib'apito ma si, tãma 're sihâiba nhomri u'âsi za'ra mono da, te za tô sena na te te sima 're wẽ za'ra, mro ãna 're hâimana za'ra mono wa, ta norĩ hã. Tane nherẽ, pi'õ norĩ, mro ré 're ihâimana za'ra mono norĩ hã, te za ti'ai ãma marĩ zô si sima 're sõpré u'âsi, timro udâna, robze na ãma 're hâimana za'ra mono da.

2 Corĩtu 10:8

Wanhib'apito hã ma tô wapisutu, isadawa para, wa te 're aipawaptob za'ra wa'aba mono da. E tawamhã, wanhimipawaptobzéb zarina, ãma 're anomro wẽ wa'aba mono zé hã, wa te aiwi 're uprosi za'ra wa'aba mono da, ma tô ãne hã wama pisutu. Mare di. Isadawa para, wa te 're i'aipawaptob za'ra wa'aba mono zéb zarina, asiptete sina ãma 're anomro aba mono da si, ma tô wapisutu, Wanhib'apito hã. Ãhã zarina si, aima 're ĩsiwasu'u za'ra wa'aba mono wa, ãma 're ĩnhisé mono õ di, tô sena aima 're ĩsiwasu'u za'ra wa'aba mono wa, ãne na hã.

2 Corĩtu 3:12

'Re ihâimana u'âsi mono te te dama iropisutuzép té hã, niwamhã wawi 're si'utõrĩ za'ra mono dai õ wa, wa taha umnhasi sina, wa te 're 'madâ'â u'âsi. Tahawa, wapahi ãna, wa tô wa te dama 're wasu'u u'âsi.

2 Corĩtu 4:10

Da te dasiwi wapãrĩ da si, te da te wa'ãma 're rosa'rata u'âsi za'ra aré, Zezusi hã da te dasiwi iwĩrĩ ne da. Zezusihi wasu'uwẽ hã wa te dama 're wasu'u mono wa, wa wasina romnhimimnhasi na 're wahâimana. E marĩ te wasu'u tawamhã, da te wa'ãma 're rob'manharĩ wasété u'âsi mono nherẽ, wadâ'â'õzé hã. Cristu hã dâ'â nherẽ, apâ ihâiwa'utuzé, te wasu'u, sena na iwaihu'u pese zéb da hã.

2 Corĩtu 5:15

Ãma 're inomro té mono norĩ hã, sima si ãma 're hâimana za'ra mono tõ da, ma tô dazada dârâ, Cristu hã. Taha zarina, te za sada idâ'â za'ra ma si, duré sada ihâiwa'utu za'ra ma si hã 're hâimana za'ra, Cristuhu ma.

2 Corĩtu 7:14

Titu hã ãma atẽme morĩ aba õ ré, wa tô tãma aiwasu'u wẽ za'ra wa'wa, isõwa, te te aiwaihu'u siromo za'ra wa'aba da. Tahawa, taré te ãma tãma ai'umnhasi baba za'ra wa'aba õ di, isõwamhã. Wa norĩ hã wazadawa nhipese ãna, wa tô wanhimirowasu'u wẽ na si, wa te aima 're rowasu'u u'âsi za'ra wa'wa, tô sena na ãma 're iwawaihu'u za'ra wa'aba mono zéb da hã. Taha zarina, Tituhu ma, wa te i'aiwasu'u wẽ za'ra wa'aba zém na hã, tô sena na te za taha zarina si oto da te 're aiwaihu'u za'ra wa'wa, a norĩ wa'wa hã.

2 Corĩtu 7:4

A norĩ wa'wa hã ĩma ai'umnhasi za'ra wa'aba di oto. Wa aima 're ĩtoi u'âsi za'ra wa'wa. Aiwasu'u wẽ wa'aba na, ma tô asina ĩma 're irowẽ zani za'ra wa'aba mo. Rowasédé hã wazada 're wairébé u'âsi mono nherẽ, wa ĩtoi uptabi na 're ĩhâimana u'âsi.

Filipu 1:14

Duré dazazéb 're ĩhâimana wa, te oto wasisãnawã norĩ hã ahâ na te te sina 're umnhasi u'âsi za'ra Wanhib'apito hã, taha si te te 're ĩpawaptob u'âsi mono wa. Tahawa, pahi ãna te oto 'Re ihâimana u'âsi mono wasu'u hã te te dama 're wasu'u za'ra, te te sina 're danhimimnhasi za'ra mono nherẽ, ta norĩ hã.

Filipu 2:17

Sasedoti norĩ hã 'Re ihâimana u'âsi mono ma, da'ãma romhuri'wa norĩ hã danhimizama na tãma danhoprubzé te te tãma 're izata za'ra mono ne, ma tô a norĩ wa'wa hã tãma 're asisõmri u'âsi za'ra wa'aba mo, tiwi 're asisawi za'ra wa'aba mono ãna, asina 're i'umnhasi za'ra wa'aba mono zéb zarina. Duré sasedoti norĩ hã uwa 'rãi wa'u isé hã, 'Re ihâimana u'âsi mono ma danhoprubzé, danhimizama te te tãma 're izata za'ra mono nhisiwi, te te 're isa'wari za'ra mono ne, ãté ĩwapru hã wa za sa'wa, sena na za da te dasiwi ĩwĩrĩ wamhã, ĩdâ'âzém na 'Re ihâimana u'âsi mono ma, ĩsina ĩnhoprubzéb da. Ãne na za ĩma romhâimana nherẽ, ĩma rowẽ uptabi di za. Duré aima ĩtoi uptabi za'ra wa'aba di za, ãne na ĩma romhâimana nherẽ.

Colosu 1:24

Wa hã ai'udâna za'ra wa'aba, te ai'ãma 're robzépata za'ra wa'aba mono nherẽ, wa ĩto sina 're ĩhâimana. Cristuhu ma si, te 're romhuri mono wa, wa tô te 're robzépata za'ẽtẽ tô, ta hã ti'ai ãma 're morĩ ré, dazada te te irobzépata ne. Tane nherẽ, Cristuhu nhib'a'uwẽ norĩ ma, ĩnhimiromhuri na te tãma ãma 're uwaimrami mono da, wa za tô taha na te 're robzépata u'âsi.

1 Tesalonita 5:23

'Re ihâimana u'âsi mono wi, rowẽ nhomri'wai wi, wa wa te 're rowaptẽrẽ za'ra, te te 're aipawaptob za'ra wa'aba mono da, asimi'ẽ na isine, iwẽ na si ãma 're aihâimana u'âsi za'ra wa'aba mono da, duré uburé asimirosa'rata wẽ na si, 're aihâimana u'âsi za'ra wa'aba mono da. Wanhib'apito Zezu Cristu hã apâ wei wazô morĩ za'ra wapsi, te za iwẽ na si hã ai'madâ'â za'ra wa'wa za.

1 Zuwã 2:28

Ĩ'ra norĩ, ãne wa za oto aima roti za'ra wa'wa. Zezusi hã apâ wei morĩ õ ré, ma'ãpé õhõ ãma si 're anomro u'âsi aba mono, niwa apâ za wei morĩ wa, tãma aipahi za'ra wa'aba tõ da, duré rowazép te, tãma ai'rãpo za'ra wa'aba tõ da.