Ezodu 4:5 - ꞌRe Ihâimana Uꞌâsi Mono Zadawa Wasuꞌu

⁵ Tahawa te Uburé Danhib'apito tãma tinha ãne: — Ãne te za Izaraéu nhihudu norĩ nho'a hã i'manha, Uburé Danhib'apito, aihi'rata norĩ te, Abra'ãhã te, Izaquihi te, Zacoho te, 'Re ihâimana u'âsi mono, aima ĩsihâi'rézém na te te ãma asaze za'ra da hã.

Ezodu 4:5 ပူးပေါင်းရင်းမြစ်များ

Zenezi 12:7

Tawamhã tame Uburé Danhib'apito, Abrãhã u wisi wamhã, ma tô ãne tãma tinha: — Asihudu norĩ ma, wa za ã ti'a hã tãma sõmri za'ra. Tawamhã tame Abrã ma tô ẽtẽ za'ra hã 'manha, tinhimizama te te tãma ãma zata da, Uburé Danhib'apito ma. E marĩ wa. Tame hâimana ré, itẽmemhã wisi wa.

Zenezi 17:1

Tawamhã Abrãhã ãma 99 na iwahub ãma, ma tô Uburé Danhib'apito tãma sihâi'ré. Tahawa, ma tô ãne tãma tinha: — Wa hã 'Re ihâimana u'âsi mono, ĩwaihu'u pese uptabi. Aipẽ'ẽ na te za ĩ'ãmap si 're aimo. Te za duré ĩmreme 're iwapari pese mo.

Zenezi 18:1

Tawamhã Uburé Danhib'apito, Abra'ãhã ma, ma tô tãma sihâi'ré, rowede iwazéb zahi, Mare na isisi 'rata hâimana ré. Tawamhã Abra'ã, hâiwahâ tẽme rowa'ro wa, ma tô romhâ 'manharĩ na tinhorõwa 'ridawa zahâpâmhã nhamra rowi.

Zenezi 26:2

Tawamhã tame Uburé Danhib'apito ma tô Izaquihi ma, sihâi'ré. Tahawa, te ãne tãma tinha: — Ezitu u hã aimorĩ õ di za. Ti'a te aima ipisutuzéb ãmap si te za 're asãmra mo.

Zenezi 28:13

Tahawa, te te isahoi mono 'remhã te Uburé Danhib'apito, sai'urizé zababamhã za. Ãhã wamhã, te tãma tinha ãne, ta hã: — Wa hã Uburé Danhib'apito, ai'rada Abra'ãhã te, duré Izaqui aimama te, 'Re ihâimana u'âsi mono. Ti'a iwa i'anomrozé hã wa za aima tisõ. Asihudu norĩ ma zama wa za tãma sõmri za'ra.

Zenezi 48:15

Taha pari ma tô ti'ra Zuzéhé ãma, 'Re ihâimana u'âsi mono ma hã mre, ãne: “'Re ihâimana u'âsi mono, ĩmama norĩ Abra'ã, Izaquihi me te te aima 're iromhuri zahuré mono hã ma'ãpé ã hã ipréduptém norĩ ma, iwẽ hã tãma 're apisutu zahuré mono. Duré 'Re ihâimana u'âsi mono, ibâ na 're ĩmorĩ ré ã bâtâ u hã ĩnhimizama 'madâ'â na 're ĩhâimana mono ré, we ĩzaprõni wẽ 'wa, ma'ãpé iwẽ hã tô tãma 're apisutu zahuré mono.

Zenezi 48:3

Tawamhã oto itẽme wisi wamhã, ma tô ãne Zuzéhé ma tinha: — 'Re ihâimana u'âsi mono danhipai u iwaihu'u pe, 'ri nho'u Rowa'a na isisi ãma ma tô ĩma sihâi'ré, Cana'ã ti'ai ãma 're ĩhâimana mono ré. Tahawa, ma tô ĩwẽ hã ĩma pisutu.

Ezodu 19:9

Tahawa, õ hã te duré Mozésihi ma tinha ãne: — Wa te wasima irobzanhamrizé da te wapari za'ra wa, ta hawim haré oto da te dasiwi 're ai'umnhasi mono da hã, wa za hâiwa nhirõno i'rãdâ'â hawi aima tinha. Tawamhã Mozési, da te ãma isada'âbâ za'ra zé, te Uburé Danhib'apito ma hã wasu'u uburé.

Ezodu 3:15

Uburé Danhib'apito, 'Re ĩhâimana u'âsi mono aihi'rata norĩ te, Abra'ãhã te, Izaquihi te, Zacoho te, ma tô we atẽme za'ra wa'aba hã ĩzatõ. Taha nhisi hã te õne u'â 're hâimana. Tahawa, taha nhisi na te za õne u'â a norĩ wa'wa hã ãma 're asipo're pu'u za'ra wa'aba mo.”

Ezodu 3:16

Tawamhã taha pari te 'Re ihâimana u'âsi mono duré ãne tãma tinha: — Aimorĩ, Izaraéu norĩ ma, i'rãnho'u 'rã'õtõ da. Tawamhã te za ãne tãma ĩzadawa wasu'u za'ra. Wa hã Uburé Danhib'apito aihi'rata norĩ te, 'Re ihâimana u'âsi mono, Abra'ãhã nhib'apito, Izaquihi nhib'apito, duré Zacoho nhib'apito. Wa tô aima ĩsihâi'ré. Duré wa tô aima waihu'u, ãne na tãma ĩzadawa wasu'u za'ra da: “Wa hã 're irobzépata za'ra wa'aba mono zé hã wa tô te 're 'madâ'â. Duré ezipsiu norĩ te te aima 're irob'manharĩ wasété za'ra wa'aba mono zé hã ĩma waihu'u pese di.

Ezodu 3:18

— Tawamhã duré ãne tãma ĩzadaihu'u za'ra wamhã, te za ĩnhib'a'uwẽ norĩ aiwapari za'ra. Taha pari te za Izaraéu nhihudu norĩ ma i'rãnho'õmo norĩ me hã ai'aba'réi wa'wa, Ezitu te apito ma, nharĩ za'ra wa'aba da hã. Tahawa, te za ãne tãma inharĩ za'ra wa'wa za: “Uburé Danhib'apito, hebreu norĩ te 'Re ihâimana u'âsi mono, ma tô wama za'ra hã sihâi'ré. Tahawa, wama rowairébé za'ra na, a'ubuni wi rop si 're irosa'wari mono u wasi'aba'ré da. Tawamhã wasi'aba'réi ré te za si'ubdatõ bâdâ hã wa'ãma tineb za'ra, Uburé Danhib'apito wate 'Re ihâimana u'âsi mono ma, wanhimizama zata na tãma ãma wanhoprub za'ra da hã.”

Ezodu 3:4

Tawamhã Uburé Danhib'apito, Mozési 'râwi itẽme te te sina irotété na te te 'madâ'â wamhã, ma tô wede iro'o wa'wa hawi 'mahâ ãne: — Mozési! Mozési! Tawamhã awa'awi ma sada'â ãne, Mozési hã: — E marĩ. Ãhãta, ãme wa za.

Ezodu 3:6

— Wa hã aihi'rata norĩ nhib'apito 'Re ĩhâimana u'âsi mono, Abra'ãhã nhib'apito, Izaquihi nhib'apito, duré Zacoho nhib'apito. Tawamhã Mozési ma tô si'ubu zuwa, pahi wa, 'Re ihâimana u'âsi mono te te i'madâ'â da hã.

Ezodu 4:1

Tawamhã Mozési, 'Re ihâimana u'âsi mono ma, ma te ãne ãma sada'â: — Izaraéu nhihudu norĩ te te ai'ãma siwi ĩzaze da hã mare di. Duré ĩma i'asihâi'rézém na te tãma aiwasu'u za'ra wamhã, te te siwi ĩwapari õ di za.

Ezodu 4:31

Tawamhã ma tô uburé ãma saze za'ra, isimirowasu'u na hã. Uburé Danhib'apito itẽme imorĩ za'ra zém na te te sina waihu'u za'ra wa, duré da te tãma 're irob'manharĩ wasété za'ra mono zém na te te 're i'madâ'â za'ra mono na te te sina waihu'u za'ra wa, hi'rãtitõ ma tô asimro, 'Re ihâimana u'âsi mono ãma wata za'ra da hã.

Ezodu 4:4

Tawamhã Uburé Danhib'apito, te Mozésihi ma waihu'u ãne: — Ma'ãpé asib'rada sô wẽ na, isarébé na âri da apâ! Tawamhã isarébé na ma tô ti'â. Te te âri wi, ma tô apâ siwedehu isib'rata.

Zuwã 11:15

Hâzé ré i'rata ĩnhamra õ nherẽ, ĩma rowẽ di. E marĩ wa. Romhâimanazéb zarina, ĩwaihu'u pese na ĩzaze za'ra wa'aba wa za, ĩma rowẽ di. Oto itẽme wasi'aba'réi wa'aba.

Zuwã 20:27

Tawamhã Zezusi te Tomehẽ ma tinha, ãne: — We ĩtẽme aimorĩ, ĩnhib'rada 'madâ'â da. Ĩnhib'rata zapu'uzéb 're, asipto hã sẽrẽ. Duré ĩ'a're wi ĩwa'rézéb 're, asib'rada hã sẽrẽ. Ĩhâiwa'utuzém na ĩwasu'u na, ĩwawã tõ. Te za oto ĩzaze, ĩhâiwa'utuzém na hã.

Zuwã 20:31

Danho'reptui'wa da, 'Re ihâimana u'âsi mono te te ipisutu na, Zezusihi si 're saze za'ra wa'aba mono da, duré 'Re ihâimana u'âsi mono 'ra na 're saze za'ra wa'aba mono da, ma tô rob'ui'éré'wa hã ãne na ãma romnhihâtâ. E marĩ da, te za Zezusihi si asina 're i'umnhasi za'ra wa'aba mo. Rowẽ u'âsi ãma 're anomro aba mono da, duré 're atâ'â za'ra wa'aba mono ãna 're aihâimana u'âsi za'ra wa'aba mono da, 'Re ihâimana u'âsi mono 'rata, hâiwa ãma. Taha da, te za Zezusihi si asina 're i'umnhasi za'ra wa'aba mo.

Zezusihi zadawa wasuꞌuꞌwa norĩ nhimiromhuri na robꞌuiꞌéré 7:2

Tawamhã Estewã ma tô tãma rob'rãzarõtõ za'ra, dahi'rata norĩ wasu'u na hã, ãne: — Wasiré Izaraéu nhihudu norĩ, duré wamama norĩ zama hã, ĩwapari za'ra wa'aba. 'Re ihâimana u'âsi mono hã, rowa'a na 're isãmra mono hã duréihã ma tô Abra'ãhã ma sihâi'ré, wahi'rata ma. Mezopotãmia na danhipti'a nho'õmo nhisi ãma 're sãmra mono ré, ma tô itẽme wi, zahadu Harã na 'ri nho'õmo nhisi u morĩ õ ré. Ãne te tãma tinha: “Ma'ãpé airom nhiti aiwatobro, asisãnawã norĩ nhiti aimorĩ da. Airop téb u wa za asaprõ, tame 're aihâimana mono da oto.” Ãne ma tô tãma roti.

Hebreu 11:16

Tane nherẽ, daro iwẽ uptabi zô si ma tô ta norĩ hã sima 're sõpré, hâiwa ãma sô 're ihâimana za'ra mono zô si, iwa 're isi'ubumroi u'âsi mono zéb da hã. Tahawa, 'Re ihâimana u'âsi mono te te siwi wẽ'õ za'ra õ di, tinhib'apito na te te 're sisi za'ra mono tõ da hã. Taha zarina, ma tô oto tô 'ri nho'u hã iwẽ uptabi hã tãma 'manharĩ za'ra, iwa 're isi'ubumroi u'âsi mono zéb da hã, tirop téb ãma.