Esdra 9:1 - ꞌRe Ihâimana Uꞌâsi Mono Zadawa Wasuꞌu

¹ Tawamhã ãne hã uburé da te 'manharĩ za'ra pari, ni'wam norĩ Izaraéu nhihudu norĩ ma i'rãnho'u hã ma tô we ĩtẽme ai'aba'ré, te te ĩma rowasu'u za'ra da, ãne: “A'uwẽ Izaraéu nhihudu norĩ, sasedoti norĩ, duré levita norĩ, tisiré a'uwẽ'õ norĩ 're ihâimana siwamnarĩ za'ra mono zé wi 're sisawi za'ra mono õ di, cananeu norĩ wi, hitita norĩ wi, perizeu norĩ wi, zebuzeu norĩ wi, amonita norĩ wi, moabita norĩ wi, ezipsiu norĩ wi, duré amoreu norĩ wimhã.

Esdra 9:1 ပူးပေါင်းရင်းမြစ်များ

Zenezi 15:16

Asihudu norĩ, maparane si'uiwa na ãma idapoto ãmap si te za apâ we sina siri za'ra. E marĩ wa. Zahadu amoreu norĩ wasété zé ibâ na hâimana õ wa, niha na te tãma irob'manharĩ za'ra da hã.

Esdra 10:2

Tawamhã Zei'éhé 'ra, Secaniasi, Elãhã hawi a'uwẽ hã te Esdraha ma tinha ãne: — Wa norĩ 'Re ihâimana u'âsi mono wi, wa tô wawasété za'ra ni, wasiré a'uwẽ'õ norĩ wasété na 're ihâimana za'ra mono sipi'õ na 're iwamro za'ra mono hã. Tane nherẽ, te zahadu Izaraéu nhihudu norĩ, marĩ iwẽ zô sima 're isõpré mono zé hã tãma 're hâimana za'ra.

Esdra 10:8

Tawamhã ma tô dama i'rãnho'õmo norĩ nhimirowaihu'u na duré danhib'ihâ'a nhimirowaihu'u na dapo're pu hã dasiwi 'manharĩ ni, ni'wa hã si'ubdatõ bâtâ pisutu pese upana wisi wamhã, za tinhimarĩ te te isiminizém na hã, duré za Izaraéu nhihudu norĩ hawimhã da te dasiwi iwazere na hã.

Neemia 13:23

Tô taha bâtâ mono na hã, zudeu norĩ ahâ uptabi na, Asidodi norĩ sipi'õ na, amonita norĩ sipi'õ na duré moabita norĩ sipi'õ na 're imro za'ra mono zéb zama hã wa tô a'upsibi me.

Neemia 4:3

Tawamhã Amo na ti'ai wa'õtõ nho'õmo nhisi hawimhã, Tobia isababa isa hã te ãne duré tinha: — E niha te za merẽ 'ri 'wawi wa'ra hã bété siwi 'manha, wapsã wawẽre ãma sarõtõ wa, te te prub da nherẽ, apâ hã!

Neemia 4:7

Tane nherẽ, ma tô Sãbalati, Tobia, Arabia hawi a'uwẽ norĩ, Amo na romnhisi ãma 're idahâimana za'ra mono norĩ, duré Asidodi na 'ri nho'õmo nhisi ãma 're idahâimana za'ra mono norĩ, ma tô tizahi pese za'ra, Zeruzalẽ ãma 'ri 'wawi wa'ra 'manharĩ pese na romhuri hã wa te ãma i'uzusi za'ra zé te te waihu'u za'ra wa, duré 'ri 'wawi wa'ra isiprum na dazasizé mono hã wa te wasiwi isito mono zé, te te waihu'u za'ra wa.

Neemia 9:2

Izaraéu nhihudu norĩ na 're ihâimana za'ra mono norĩ hã ma tô uburé tisiré a'uwẽ'õ norĩ nhiti sisani za'ra. Tawamhã tite mono bâ tisi'ubumrozém hawi para na oto hâiwi simasa wamhã, ma tô tiwasété na hã duré tihi'rata norĩ wasété na hã siwẽ'õ za'ra.

Ezodu 13:5

Uburé Danhib'apito tô sena ma tô duréihã aihi'rata norĩ wa'aba ma hã ropisutu, i'uirĩ na za'ra ti'a te te aima sõmri za'ra wa'aba da, cananeu norĩ te hã, hitita norĩ te hã, amoreu norĩ te hã, heveu norĩ te hã, duré zebuzeu norĩ te zama. Ta hã ti'a hã iwẽ, duré ãma iropoto wẽ. Tawamhã 'Re ihâimana u'âsi mono nimahã bâtâ na ti'ai u te te oto asimroi wa'aba mono wamhã, tawamhã a norĩ wa'wa hã te za dato hã 're i'manharĩ za'ra wa'aba mo, wahub sidâpâsi a'amo za'ratazé imorĩ'rada iwa 're iwaptã'ã mono sidâpâsi.

Ezodu 33:16

E niha te za duré wasiré aimorĩ za'ra õ nherẽ, aimawi a'uwẽ norĩ hã waihu'u za'ra, asib'a'uwẽ norĩ ãma, duré ĩ'ãma i'aipẽ'ẽtozém na hã. Wasiré 're i'aihâimana u'âsi za'ra mono zé, te za aimawi na 're iwahâimana za'ra mono zé hã te te dama 're ahâi'ré.

Zozué 23:12

Tane nherẽ, ãma 're i'anomro aba mono zé 're rẽme za'ra wa'aba mono wamhã, a'uwẽ isi'mairẽme norĩ aiwazari wa'aba 're ihâimana za'ra mono norĩ me 're asihâiba tob za'ra wa'aba mono wamhã, duré ta norĩ me oto asina 're aimro za'ra wa'aba mono wamhã,