Esdra 8:21 - ꞌRe Ihâimana Uꞌâsi Mono Zadawa Wasuꞌu

²¹ Tawamhã Aava na panho'õmo 'rata, wa tô wasai ãna misi bâtâ na wahâimana za'ra da hã dama pisutu, taha ré uburé wa norĩ hã wate 'Re ihâimana u'âsi mono nho'remhã wahi'rãtitõ tãma wasisimro da, wa'ra norĩ ré, duré uburé wanhimarĩ ré, wasi'aba'réi ré we te te wanhimroi wẽ mono da, wa te tiwi waptẽrẽ za'ra da hã.

Esdra 8:21 ပူးပေါင်းရင်းမြစ်များ

Esdra 8:15

Tawamhã wa hã Esdra, 'rinho'u Aava na isisi tẽme â hã 're ipraba mono 'rata, wa tô uburé a'uwẽ norĩ hã 'rã'õtõ. Tame wa tô si'ubdatõ bâtâ na wa te wasima i'ri nhoré mono zéb ãma ai'ubumro ni. Tawamhã duré tame a'uwẽ norĩ, atãma na te ab'madâ'â pese mono wamhã, wa tô sasedoti norĩ dawazari isi'ubumro hã sãmri za'ra. Tane nherẽ, levita norĩ dasiré hã 'maihâimana õ di.

Esdra 8:31

Tawamhã a'amo imorĩ'rata ãma 12 bâtâ na wa tô Zeruzalẽ u apâ wasi'aba'ré da hã, Aava na pa nho'õmo nhisi hawimhã wawairébé ni. Tahawa, ma tô wasi'aba'réi ré, wate 'Re ihâimana u'âsi mono hã wasiré hâimana. Taha ré, ma tô duré wanhitob'ru isipãrĩ ze dazô 're iwairébé za'ra mono norĩ wi hã te te wa'madâ'â u'âsi za'ra.

Neemia 9:1

Tawamhã a'amo 24 bâtâ ãma ma tô Izaraéu nhihudu norĩ hã si'rã'õtõ, sai ãna a'â hâimana za'ra da. Tahawa, ma tô duré sa'u ihâiro na si'uza za'ra. Ma tô duré ti'a na hã si'rã zazub za'ra.

Salmu 5:8

Uburé Danhib'apito, ma'ãpé ate bâdâdi iwẽ na hã 're ĩzaprõni wẽ u'âsi mono, ĩnhitob'ru norĩ ĩzada 're ihâimana za'ra mono norĩ wi. Duré ate bâdâdi hã ma'ãpé ĩma hiri wẽ na, ĩnhowamhã!

Salmu 5:9

Ĩnhitob'ru norĩ nhoto hawi imreme za'ra hã umnhasi õ di, ta norĩ hã da'uprosizém na si te te sima 're rosa'rata u'âsi za'ra mono wa. Isõ're'ré za'ra hã aiwa da'ru sitob ãna 'ridawa haré 're isimi'wara mono ne. Tinhoto na te ta norĩ hã mreme su'u nherẽ, timreme amo na hã te te dama 're robzanhamri za'ra.

Salmu 8:2

Ai'uté norĩ, duré dapam norĩ zama te tizaihâ na asisi za'ẽtẽ na hã 're wata za'ra. A hã ma tô 'ri isiptede hã asima i'manha, asitob'ru norĩ wi asi'wawi 're aimapa mono da hã, uburé asada 're ihâimana za'ra mono norĩ hã 're a'uprosi mono da.

Provébiu 3:6

Uburé marĩ 're i'ab'manharĩ mono na 'Re ihâimana u'âsi mono ãma 're aipo're pu'u mono. Taha wamhã bâdâdi awa'awi inomro hã te za te te aima 're hâi'ré u'âsi.

Daniéu 9:3

Ĩma robzei'õ zarina, da'uza ihâi hâza'õtõ na wa tô ĩsi'uza. Taha wa, wa tô duré 'ru'a wa nhamra. Ĩsa hã wa tô duré tirẽ. Wa tô Uburé Danhib'apito 'Re ihâimana u'âsi mono ma, sa'ẽtẽ mre, te tiwi iwaptẽrẽzé te te ĩma 'manharĩ da.

Zuéu 1:14

Ma'ãpé asisô aihârâ za'ra wa'aba, ubumroi wa'aba da, 'Re ihâimana u'âsi mono nhorõwa 'ri ãma, misi bâtâ na asaihuri aba ãna aihâimana za'ra wa'aba zé hã asima pisutu za'ra wa'aba da. Duré ubumroi wa'aba, uburé dama ipire norĩ, duré uburé daza'rui 're, 're i'ai'ubumroi wa'aba mono norĩ, Uburé Danhib'apito wate 'Re ihâimana u'âsi mono nhorõwa 'ri 'rãihâ ãma, aimreme 'rãihâ na tãma aimreme zusi aba da, tiwi iwaptẽrẽ za'ra wa'aba zém na, te te aipawaptob za'ra wa'aba da.

Zona 3:5

Tahawa Niniwé 're, 're idahâimana za'ra mono norĩ hã ma tô saze za'ra, 'Re ihâimana u'âsi mono hã. Ma tô duré sima pisutu za'ra, hâiba mono bâ mreme zusi da, sai ãna a'â. Tawamhã dahâiba mono bâ dama ipire norĩ hã duré dama iwapu norĩ zama ma tô uburé pese si'uza za'ra sa'u ihâiro na, tiwasété na isiwẽ'õ za'ra zém na sihâi'ré za'ra da hã.

Zona 3:7

Ma tô duré dama ti'ru, da te ãma dapo're pu'u za'ra da, 'ri nho'õmo 're, 're idahâimana za'ra mono norĩ hã ãne: “Ã hã apito nhimiroti, duré isapari tãma iromhuri'wa norĩ nhimiroti zama. Ni'wa isa da hã mare di za. Aihĩni norĩ hã, duré abaze norĩ hã, powawẽ norĩ hã duré pone'ẽrebâ zéré mapure norĩ zama isaihuri da hã, mare di za. Duré â te te i'âhuri da hã mare di za, uburé marĩ wa'u norĩ zama.

Zezusihi zadawa wasuꞌuꞌwa norĩ nhimiromhuri na robꞌuiꞌéré 2:39

Ãne ma tô aima ropisutu siromo za'ra wa'wa, te te aima 're sõmri za'ra wa'aba mono da, asihudu norĩ ma zama. Wasiré'õ norĩ ma zama ma tô tãma ropisutu siromo za'ra. Wanhib'apito, 'Re ihâimana u'âsi mono, za sitẽme sô 're ihârâ za'ra mono norĩ ma, ma tô ropisutu siromo za'ra, Tipẽ'ẽzani na hã.

Zuize 20:26

Tahawa uburé Izaraéu nhihudu norĩ, ma tô Bétéu u apâ ai'aba'ré, 'ru'ru da hã. Tawamhã tame Uburé Danhib'apito nho're hâimana za'ra wamhã, saihuri ãna, ma tô tihâimana za'ra, ãma ihâiwahâ pese za'ra zéb u. Tawamhã tinhimizama zata na ma tô tãma tinhoprub za'ra, 'Re ihâimana u'âsi mono ma, danhoprubzé ãma irowẽ za'ẽtẽ na.

1 Samuéu 7:6

Tawamhã ãne ma tô uburé Izaraéu nhihudu norĩ hã si'rã'õtõ, Mispa ãma. Tahawa, ma tô â hã duré siwi waze. Ta hã ma tô duré siwi sa'wa, Uburé Danhib'apito ma tinhoprubzém na hã. Tawamhã si'upari ãna ma tô bâtâ bâre tihâimana za'ra. Tahawa, te ãne tãma siwẽ'õ za'ra, 'Re ihâimana u'âsi mono ma: — Uburé Danhib'apito, wa norĩ hã wa tô wawasédé hã 'manharĩ za'ra ni aiwi. Tawamhã tame ma tô Samuéu hã Izaraéu nhihudu norĩ ma si'ĩ'rãnho'u, Mispa ãma. Tame ma tô duré da'ãma rowairébé'wa na hã 're hâimana.