Esdra 8:18 - ꞌRe Ihâimana Uꞌâsi Mono Zadawa Wasuꞌu

¹⁸ Tawamhã 'Re ihâimana u'âsi mono iwẽ na te te wapawaptob za'ra wa, ma tô aibâ Serebia na isisi marĩ tãma iwaihu'u pe hã wei watẽme satõrĩ za'ra, levita Malihi hawi a'uwẽ hã. Tahawa, ma tô 18 na i'ra norĩ hã duré isisãnawã norĩ hã we isiré ai'aba'ré.

Esdra 8:18 ပူးပေါင်းရင်းမြစ်များ

Esdra 7:28

Wa hã, Uburé Danhib'apito ĩsiré 're ihâimana mono zém na te ĩsina waihu'u wa, wa tô ĩnhiptete na ĩpahi ãna apito norĩ, timreme na te te siwi 're ipawaptob za'ra mono norĩ me, isiré norĩ siptete na dama roti'wa norĩ me, te te ĩwẽsãmri za'ra zé hã tãma ĩsina wazere za'ra. Ãne Uburé Danhib'apito, ĩte 'Re ihâimana u'âsi mono, ĩnhiptede te te ĩma isõmri zarina, wa tô Izaraéu nhihudu norĩ nhib'ihâ'a norĩ hã ahâ nherẽ ĩmreme na ãma ai'uté za'ra, ĩsiré si'aba'ré da apâ, wanhipti'a za'ra u hã.

Esdra 7:6

Esdra hã rowaihu'u pese 'wa. Duré Uburé Danhib'apito, Izaraéu nhihudu norĩ te 'Re ihâimana u'âsi mono, Mozésihi ma, tinhimiroti na rob'ui'éré hã te te tãma isõmri waihu'u wẽ 'wa, te 're mo. Tawamhã ta hã ma tô apito Artazesihi u hã mo. Morĩ wamhã, ma tô uburé te te tiwi iwaptẽrẽzé hã tãma tisõ. E marĩ wa. Uburé Danhib'apito, Esdraha ma, iwẽ si te te tãma 're apisutu mono wa. Ãne ma tô ta hã Babilonia hawimhã mo, Zeruzalẽ u hã,

Esdra 8:16

Tahawa, 9 na dama i'rãnho'õmo norĩ hã wa tô waibu, ã norĩ hã: Eriézé, Ari'é, Semaia, Elnatã, Zaribe, Elnatã ihâiba amo, Natã, Zacaria, duré Mesulã. Tawamhã duré maparane dama romnhoré'wa norĩ hã wa tô timra, Zoiaribe norĩ hã Elnatãhã me, rowaihu'u pese 'wa norĩ hã.

Esdra 8:19

Tawamhã ma tô we tãma rob'ru za'ra Hasabiasihi ma hã, duré Zesaiasi, Merarihi hawi a'uwẽ ma hã, duré 20 na i'ra norĩ ma hã, duré isisãnawã norĩ ma hã.

Esdra 8:22

Wa hã wa tô apito ma tinha, wate 'Re ihâimana u'âsi mono, uburé te te sina 're i'umnhasi za'ra mono norĩ te te 're i'madâ'â pese za'ra mono na hã, duré te te 're irẽme za'ra mono norĩ da, isiptetezé, duré isiti'ruzé sada 're ihâimana za'ra mono na hã. Tahawa, wa hã ĩnhiséb di, apito wi, awaru na dasi'wapéi 'manharĩ'wa norĩ wasi'aba'réi ré te te wa'madâ'â za'ra mono da, te tiwi iwaptẽrẽ da hã.

Esdra 8:24

Tawamhã wa hã, sasedoti ipire norĩ 'remhã wa tô pisutu za'ra, ã norĩ hã: Serebia, Hasabiasi, duré 10 na isiré norĩ hã.

Neemia 12:24

Tawamhã levita i'rãnho'õmo norĩ hã ãne: Hasabiasi, Serebia, Zesua, Binu'i, duré Cadmi'é. Tawamhã ta norĩ siré, ma tô 'Re ihâimana u'âsi mono ãma 're iwata za'ra mono zém na isõ're na te te ãma 're sada'âbâ za'ra, isõ're simasap sina, 'Re ihâimana u'âsi mono nhib'a'uwẽ Dawi, tinhimiroti te te ihirizéb zarina.

Neemia 2:8

Tawamhã wa tô duré waptẽ rob'ui'éré hã, Asafi apito marã 'madâ'â'wai ma da hã, wede norĩ te te ĩma 'mai'ru da, 'Re ihâimana u'âsi mono nhorõwa 'ri 'wawi 'ri isiptede 're isimapa mono 'ridawa za'ẽtẽ norĩ hã da te dasiwi ãma 'manharĩ da, duré 'ri nho'õmo 'wawi wa'ra 'rãihâ 'manharĩzéb da hã, duré ĩnhorõwa 'manharĩzéb da hã. Tawamhã apito ma tô uburé ĩma sõmri za'ra, te tiwi iwaptẽrẽ hã. E marĩ wa, 'Re ihâimana u'âsi mono hã ĩsiré hâimana wa.

Neemia 8:7

Tawamhã apâ dawahutu za'ra wamhã, ma tô dasimasabzé mono bâ apâ dasimasa. Tawamhã levita norĩ ma tô 'Re ihâimana u'âsi mono nhimiroti na rob'ui'éré na hã ãma dama saprĩ za'ra. Ãne isisi norĩ hã: Zesua, Bani, Serebia, Zami, Acube, Sabeta'i, Hodia, Maaséia, Quelita, Azaria, Zozabade, Hana duré Pelaia.

Provébiu 24:3

Rowaihu iwẽ zarina te danhorõwa hã da te dasima 're 'ri wẽ za'ra. Duré danhimiza'rese wẽ zarina te 'ri nhiptete na hã 're simasa.

Provébiu 3:6

Uburé marĩ 're i'ab'manharĩ mono na 'Re ihâimana u'âsi mono ãma 're aipo're pu'u mono. Taha wamhã bâdâdi awa'awi inomro hã te za te te aima 're hâi'ré u'âsi.

Daniéu 1:20

Tawamhã apito, uburé marĩ mono na te te ta norĩ 're sadanharĩ za'ra mono wamhã, uburé Babilonia ãma i'rãiwaihu'u pese norĩ nhipai u, duré marĩ 'manharĩ nhipese 'wa norĩ nhipai u, te te irowaihu'u pese za'ra na hã ma tô oto upsibi me za'ra.

1 Corĩtu 14:20

Ĩsisãnawã norĩ, ai'uté norĩ hã siwa'ru te te sima 're irosa'rata za'ra mono ne, asima ãma 're rosa'rata za'ra wa'aba mono õ di za, te aima ãma irowasu'u za'ra wa'aba zém na hã. Duré ai'utépré norĩ hã tiwasédé te te 're i'manharĩ za'ra mono õ ne, te za aiwasété ãna 're anomro aba mo. Aihâimana prédub sina, te za asima ãma 're irosa'rata u'âsi za'ra wa'aba mo.