Esdra 6:16 - ꞌRe Ihâimana Uꞌâsi Mono Zadawa Wasuꞌu

¹⁶ Tawamhã Izaraéu nhihudu norĩ, sasedoti norĩ, levita norĩ, duré uburé isiré norĩ apâ Babilonia hawi isi'aba'ré hã ma tô 'ri te te siwi isaiwĩrĩzé hã siwi 'manha. Ãhã wamhã, 'Re ihâimana u'âsi mono ãma 're idawata za'ra mono zéb da hã ma tô dato sina tãma hã sõmri za'ra ni.

Esdra 6:16 ပူးပေါင်းရင်းမြစ်များ

Esdra 4:1

Tawamhã Zudaha nhihudu norĩ nhitob'ru, Bẽzamihĩ nhihudu norĩ nhitob'ru me, ma tô Uburé Danhib'apito, Izaraéu nhihudu norĩ te, 'Re ihâimana u'âsi mono nhorõwa 'ri, Babilonia hawi apâ isi'aba'ré norĩ te te siwi i'ri téb za'ra zé hã waihu'u za'ra.

Esdra 6:22

Tawamhã 7 bâtâ 're, ma tô i'u'ẽtẽ duptoi'õ na dato hã siwi 'manha, to za'ẽtẽ za'ra sina. Tahawa, tãma hã rowẽ uptabi za'ra di, Uburé Danhib'apito hã, Asiriaha nhib'apito, niha oto te te 'rãi pi'rai wa, õ norĩ zawi na si oto 're hâimana mono da, taha zarina 'Re ihâimana u'âsi mono nhorõwa 'ri apâ te te siwi iwahutu na te te pawaptob za'ra da hã.

Neemia 12:27

Tawamhã 'ri nho'u Zeruzalẽ 'wawi wa'ra 'rãihâ isi'utõrĩzém na da te dasima romhu'u za'ra wamhã, ma tô levita norĩ 're ihâimana za'ra mono zém hawimhã da te simro, da te dasima iromhu'u za'ra zéb u, ta norĩ hã 'Re ihâimana u'âsi mono ãma danho're na dawatazém na te te dama ãma romhu'u za'ra da, rowamremezém na, isõrõ ta'a na, duré pratu 'manharĩ baihâ zapoto ne na ropta'azém na.

Neemia 12:43

Tawamhã tô taha bâtâ na 'Re ihâimana u'âsi mono ma, danhimizama da te 're izata za'ra mono hã ahâ uptabi na ma tô tãma sõmri za'ra ni. Tahawa, dama rowẽ uptabi za'ra di. E marĩ wa. 'Re ihâimana u'âsi mono hã ipẽ'ẽtozé te te tãma sa'ẽtẽ za'ra wa. Taha zarina, pi'õ norĩ zama, duré ai'uté norĩ zama ma tô dazu sima romhu'u za'ra. Ãhã wa, robruru te te siwi i'manharĩ hã te romhâ na uptabi nherẽ, dasiwi wapari za'ra ni.

Neemia 7:73

Tawamhã uburé a'uwẽ norĩ hã tite za'ra 'ri nho'õmo mono bâ duré 'ri wa'õtõ mono bâ 're isi'ubumroi mono zém na hã ma tô oto ãma sãna'rata za'ra, sasedoti norĩ hã, levita norĩ hã, 'ridawa za'ẽtẽ 'madâ'â'wa norĩ hã, isõ're'wa norĩ hã, 'Re ihâimana u'âsi mono nhorõwa 'ri 're romhuri'wa norĩ hã, ni'wam norĩ a'uwẽ taré 're isi'ubumroi mono norĩ hã, duré isõ'uma Izaraéu nhihudu norĩ hã.

Neemia 8:10

Ma'ãpé oto aiwairébé aba, 'ri tẽme ai'aba'réi aba da, rowẽ te, dato isa'ẽne hã asiwi 'manharĩ aba da. Tawamhã te za dasa norĩ hã, duré uwa 'rãi wa'u isé hã, ni'wam norĩ wi, tiwi sô irobaba za'ra norĩ ma, isõmri za'ra wa'aba mo. Ã hã bâdâ, te tô iwazéb zahi hã tãma tihâiba, Uburé Danhib'apito ma. Tahawa duré aiwi robzei'õ za'ra wa'aba tõ. E marĩ wa. Rowẽ isa'ẽne hã Uburé Danhib'apito te te aima isõmri za'ra wa'aba si te za asiptete za'ra wa'wa.

Daniéu 5:13

Tawamhã Daniéu, ma tô apito hâimanazéb u dasiwi saprõni ni. Tahawa, ma tô ãne sadanha: — E a hã Daniéu, zudeu norĩ siré hã, ĩmama apito Nabucodonozo, Zuda hawi, da te ai'ãma ai'uté za'ra wa'aba wa, we te te i'asaprõni dasiré.

Zuwã 10:22

Tawamhã zudeu norĩ hã daro mono bâ ma tô duré si'rã'õtõ, Zeruzalẽ ãma, 'Re ihâimana u'âsi mono ãma dawata za'ra da. E marĩ wa. Apâ 'ri za'ẽne hã te te tãma pisutu za'ra wẽ te, ãma 're idawata za'ra mono zéb da hã ma tô tasi'rã'õtõ ni, bâdâ dama ipire na, ãma dasipo're pu'u za'ra da, rowa'u'u wahâ, 're sa'wari mono ré. Tawamhã Zezusi hã te 'Re ihâimana u'âsi mono nhorõwa te, 'ri 'wawi wa'ra wa'wai baba 're mo, Apito Salomahã nhib'uriti na uriti nhisi wa'wai baba.

Filipu 4:4

Ma'ãpé atoi u'âsi 're aihâimana za'ra wa'aba mono, Wanhib'apito ãma oto 're anomro aba mono na dâ'âsina. Wa za duré aima ãma sahu za'ra wa'wa. Ma'ãpé atoi u'âsi ãma 're aihâimana za'ra wa'aba mono za.