Esdra 4:4 - ꞌRe Ihâimana Uꞌâsi Mono Zadawa Wasuꞌu

⁴ Tawamhã õhõ ti'ai ãma a'uwẽ norĩ hã ma tô Izaraéu nhihudu norĩ wi, te te ãma tiwi irobzei'õ za'ra da hã nasi niha na hã tãma rob'manharĩ za'ra. Ma tô duré nasi tãma rob'rãmi za'ra, pahi za'ra da, 'ri 'manharĩ na te te ãma uzusi za'ra tõ da.

Esdra 4:4 ပူးပေါင်းရင်းမြစ်များ

Esdra 3:3

Tawamhã tô õ hã ti'ai 're, a'uwẽ norĩ 're isi'ubumroi mono ma, pahi za'ra nherẽ, ma tô apâ iwana 're isa mono ne hã siwi 'manha, 'Re ihâimana u'âsi mono ma, danhoprub zata nhomrizé hã. Tahawa, ma tô taha nhisiwi ãma siwi sãna'rata tinhoprubzéb hã mararé nhidâpâsi, duré hâiwahâ nhidâpâsi.

Esdra 4:5

Dama i'rãnho'õmo hawi tipawa'âbâ zô te te iromhuri za'ra norĩ ma hã, ma tô duré rob'uiprazé hã pi'uriwi tãma sõmri za'ra, Izaraéu nhihudu norĩ te te sima ãma irowa'õtõ za'ra zé hã te te tiwi ãma 'wa'rutu za'ra da. Ãne hã ma tô Persia nhib'apito Ciru 're hâimana mono ré, duré Persia ãma apito Dariu 're ihâimana mono zéb u hã uburé isitob'ru norĩ hã te te siwi 're 'manharĩ.

Neemia 4:11

Wanhitob'ru norĩ, ma tô ãne sima nharĩ za'ra: “Te te wa'upsibi me za'ra wana ré, duré titõmo na te te wa'madâ'â za'ra wana ré, 'râwibre wa za iwa'wab za'ra hã wahâimana za'ra ni. Tahawa, wa za wasiwi simro ni za. Wa za duré isimiromhuri hã tiwi uprosi za'ra ni za.”

Neemia 4:2

Tawamhã tisiré norĩ nho'a, duré samaritanu dasi'wapéi 'manharĩ'wa norĩ nho're, ma tô tinha ãne: — E marĩ te bété zudeu norĩ tarére 're ihâimana za'ra mono norĩ hã siwi 'manha. E te za apâ 'ri nho'õmo 'wawi wa'ra hã siwi 'manharĩ pese. E te za duré tinhimizama zata na 'Re ihâimana u'âsi mono ma, apâ tãma ãma 're sõprub za'ra. E te za misi bâtâ na siwi uprosi, romhuri hã. E te za duré ẽtẽ na 'rizé hã apâ hâiwa'utu za'ra, 'ri 'wawi wa'razé isiprum hawi, te te ãma siwi 'manharĩ téb da, da te ãma dasiwi sazu za'ra nherẽ.

Neemia 6:9

Õ norĩ hã ma tô aré wapahi te te wama sõmri za'ra da hã wapibu za'ra, romhuri na wa te ãma 'rãiwa'õmo za'ra tõ da. Tane nherẽ, wa tô ãne na 'Re ihâimana u'âsi mono ma mre: “'Re ihâimana u'âsi mono, ma'ãpé ãhã na ĩnhiptetezé hã sa'ẽtẽ na ĩma sõmri!”

Daniéu 10:13

Tawamhã hâiwa ãma romhuri'wa, Persia ãma apito norĩ nhimi'madâ'âzéb 'wawi 're isimapa mono hã ma tô 21 na bâdâ imorĩ 'rem na ĩzada tihâiba. Tane nherẽ, Migueu hâiwa ãma romhuri'wa norĩ nhib'ihâ'a siré, ma tô te te ĩpawaptob da, we ĩtẽme mo, ĩsiwaprosi Persia te apito norĩ zada, ĩhâimana wa.

Daniéu 10:20

Tawamhã te ĩma tinha ãne oto: — Marĩ wa, we atẽme ĩmorĩzé hã, e ma tô iwaihu. Sena na Ibaihâ nhisi 're, rob'ui'éré ihâimana na te ãma aima rowasu'u da, wa we atẽme mo. Tane nherẽ, ãhã na hã Persia u ĩmorĩ da si, hâiwa ãma romhuri'wa Persia 'madâ'â'wa, te 'wapé da. Wasi'wapézé tâibâ wamhã, hâiwa ãma romhuri'wa Grécia 'madâ'â'wa hã te za wei mo. Tane nherẽ, ni'wa te te ĩpawaptob da hã mare di za. Niha wamhã, Miguehe si, te za ĩpawapto, Izaraéu nhihudu norĩ 'wawi 're isimapa mono hã.