Esdra 4:24 - ꞌRe Ihâimana Uꞌâsi Mono Zadawa Wasuꞌu

²⁴ Tawamhã 'Re ihâimana u'âsi mono nhorõwa 'ri 'manharĩ na romhuri ma tô aré dasiwi sazâri ni. Taha haré ma tô aré we ãma 're ropsa'wari, Persia ãma Dariu dama i'rãnho'õmo na maparane ãma iwahubzéb u hã.

Esdra 4:24 ပူးပေါင်းရင်းမြစ်များ

Esdra 3:8

Tawamhã apâ isi'aba'rézém na maparane wahub 're maparane a'amoi ãma, ma tô Izaraéu nhihudu norĩ, 'Re ihâimana u'âsi mono nhorõwa 'ri 'manharĩ tém na hã ãma siwi sãna'rata, Zeruzalẽ ãma za 're isa mono na. Zorobabé Salati'éhé 'ra hã, Zozué Zozadaquihi 'ra hã, isisãnawã norĩ isiré za'ra hã, sasedoti norĩ hã, levita norĩ hã, duré uburé a'uwẽ norĩ Zeruzalẽ u apâ te te sina isiri za'ra norĩ hã, ma tô siptete na romhuri hã siwi ti'â. Tawamhã levita norĩ 20 na ãma iwahub za'ra nhipai u ma tô uburé dama romhuri'wa da hã pisutu za'ra ni.

Esdra 4:23

Tawamhã apito Artazesihi nhimiromnhihâdâ hã ma tô Reum norĩ ma, dama romnhihâtâ 'manharĩ'wa Sĩsa'ĩhĩ me, duré isiré norĩ me hã tãma sõré za'ra ni. Tahawa awa'awi ma tô ta norĩ hã Zeruzalẽ u ai'aba'ré. Si'aba'réi wamhã, ma tô zudeu norĩ ma, tisi'wapézém na hã tãma amhâzépa za'ra, tinhimiromhuri te te sahâri za'ra da.

Esdra 4:5

Dama i'rãnho'õmo hawi tipawa'âbâ zô te te iromhuri za'ra norĩ ma hã, ma tô duré rob'uiprazé hã pi'uriwi tãma sõmri za'ra, Izaraéu nhihudu norĩ te te sima ãma irowa'õtõ za'ra zé hã te te tiwi ãma 'wa'rutu za'ra da. Ãne hã ma tô Persia nhib'apito Ciru 're hâimana mono ré, duré Persia ãma apito Dariu 're ihâimana mono zéb u hã uburé isitob'ru norĩ hã te te siwi 're 'manharĩ.

Esdra 5:1

Tawamhã 'Re ihâimana u'âsi mono zadawa 'mahârâ'wa Ageu norĩ, Idoho 'ra Zacariaha me hã Zuda ãma duré Zeruzalẽ ãma zudeu norĩ 're ihâimana za'ra mono norĩ ma, Izaraéu nhihudu norĩ te, 'Re ihâimana u'âsi mono timreme te te tãma iwaihu'u zahuré zém na ma tô dama ãma rowasu'u zahuré.

Esdra 5:5

Tane nherẽ, tite za'ra 'Re ihâimana u'âsi mono tõmobre, ma tô zudeu ma, i'rãnho'õmo norĩ hã tihâimana za'ra. Tahawa Persia ãma dama ipire norĩ hã ma tô marĩ te te a'â 'manharĩ za'ra tõ da, ãma sima rowairébé za'ra, apito Dariuhu ma, za taha na te te ãma iromnhihâtâ za'ra zé wa'rãmi, te te ãma sada'âbâ za'ra õ ré hã.

Esdra 6:1

Tawamhã apito Dariu ma tô dama ti'ru, Babilonia ãma ibaihâ nhimi'warazéb ãma dahi'rata norĩ wasu'u na romnhihâtâ mono na sô darĩtĩ za'ra da hã, Ciru hã 'ri te te dama i'ruzéb zô tinhimiromnhihâtâ na.

Esdra 6:14

Tawamhã zudeu norĩ nhib'ihâ'a hã ma tô 'ri na romhuri na te te ãma siwi uzusi, wẽ na. Taha siwaprã ma tô 'Re ihâimana u'âsi mono zadawa 'mahârâ'wa Ageu norĩ nhimirowasu'u, Idoho 'ra Zacariaha nhimirowasu'u me hã tãma tipẽ'ẽ to za'ra. Tawamhã ma tô 'ri hã siwi uprosi oto, Izaraéu nhihudu norĩ te, 'Re ihâimana u'âsi mono te te iwaihu'uzéb zarina, duré Persia nhib'apito norĩ Ciru, Dariu, Artazesi, ã norĩ hã te te iwaihu'u za'ra zéb zarina.

Esdra 6:15

Ãhã wa, ada na a'amo nhisi ãma bâdâ si'ubdatõ ihâimana ãma, ma tô oto 'ri hã ai'utõrĩ pese, Dariuhu ãma 6 na ãma iwahubzéb ãma dama i'rãnho'õmo na 're ihâimana mono zém na hã.

Neemia 6:3

Tawamhã wa tô ãne ré romreme 'wapéi'wa norĩ hã, itẽmeb zahuré hã 'mazatõrĩ za'ra: — Romhuri ipire hã wa 'manha. Tahawa tamomomhã te ãma atẽme wa'aba si'rai waihu'u õ di. E marĩ da, wa za bété ĩnhimiromhuri hã sazâ, a'â ãma atẽme ĩmorĩ aba da, te asõpẽtẽ aba da hã.

Neemia 6:9

Õ norĩ hã ma tô aré wapahi te te wama sõmri za'ra da hã wapibu za'ra, romhuri na wa te ãma 'rãiwa'õmo za'ra tõ da. Tane nherẽ, wa tô ãne na 'Re ihâimana u'âsi mono ma mre: “'Re ihâimana u'âsi mono, ma'ãpé ãhã na ĩnhiptetezé hã sa'ẽtẽ na ĩma sõmri!”

Daniéu 11:2

Hâiwa hawi romhuri'wa hã te zahadu timreme na ãma ĩma uzusi ãne: — Sena na marĩ na hã wa za oto aima rowasu'u. Si'ubdatõ te za Persia ãma apito norĩ danhib'ihâ'a na dama 're hâimana za'ra za. Ta norĩ za'u si, te za duré maparane si'uiwa na ãma dama si'apito, uburé apito norĩ iwana ihâimana za'ra nhipai'u isibro pe hã. Ta hã sibro pese uptabi wa, te za siptete na dama 're hâimana, i'rã nho'õmo na. Te za uburé tite dasi'wapéi 'manharĩ'wa norĩ hã 'rã'õtõ, Grécia ãma a'uwẽ te te 'wapé za'ra da hã.

Daniéu 9:25

Daniéu, marĩ waihu'u da, ma'ãpé ĩwapari pese. Zeruzalẽ apâ za da te dasiwi 'ri da, te te dama 'rui parimhã, te za 7 x 7 na wahu hã ai'utõ, 'Re ihâimana u'âsi mono dama i'rã nho'õmo da hã te te ipisutuzéb u. Tawamhã Zeruzalẽ 're, 'ri nhi'ridi ité ihâimana za'ra ãma hã, duré 'ri 'wawi wa'ra 'rãihâ ãma hã te za wahu hã ai'utõ, 62 x 7 na. Tane nherẽ, taha ré hã te za we romhâimana mono, robzépata za'ẽtẽ na hã.

1 Tesalonita 2:18

Wa te duré asabu téb za'ra wa'aba neza. Wa hã Paulu hã, apâ atẽme ĩmorĩ aba neza. Tahawa, atẽme ĩmorĩ aba da, bâdâ, wa tô nasi ĩsima pisutu. Tane nherẽ, Satanasi hã wanhitob'ru hã ma tô nasi wa'ãma ro'wa'rutu za'ra, ãma atẽme ĩwisi za'ra wa'aba tõ da.