Esdra 1:6 - ꞌRe Ihâimana Uꞌâsi Mono Zadawa Wasuꞌu

⁶ Tawamhã a'uwẽ iwaptoma 're ihâimana za'ra mono norĩ, te te uburé ipawaptob za'ra norĩ hã ma tô nasi tãma sõmri za'ra, prata na piza hã, oru na hã, dasa hã, danhimizama hã, duré marĩ iwa'âbâ za'ẽtẽ norĩ hã. Duré 're idanhoprub za'ra mono zéb zama ma tô tãma sõmri za'ra, Zeruzalẽ ãma 'Re ihâimana u'âsi mono nhorõwa za te te siwi i'ri norĩ ma.

Esdra 1:6 ပူးပေါင်းရင်းမြစ်များ

Esdra 1:4

Tawamhã iwaptoma 're isi'ubumroi mono, te za Izaraéu nhihudu norĩ pawaptob za'ra, apâ tirob u si'aba'ré da. Tawamhã ẽtẽ waipo prã prata, ẽtẽ waipo pré oru, mra hã, duré danhimizama te za ta norĩ hã tãma sõmri za'ra. Duré danhoprubzéb da zama te za tãma sõmri za'ra, Zeruzalẽ ãma 'Re ihâimana u'âsi mono nhorõwa 're, te te tãma isõmri za'ra da hã.”

Esdra 8:33

Taha pari maparane si'uiwa na bâtâ ãma wa tô duré oto 'Re ihâimana u'âsi mono nhorõwa 'ri u hã ai'aba'ré ni. Tahawa, prata norĩ hã, oru hã, duré marĩ 'manharĩ mono hã wa tô pire pibu za'ra ni. Taha pari wa tô duré sasedoti Meremote, Uriaha 'ra ma sõmri za'ra ni. Taha siré te ã norĩ hã oto tihâimana za'ra: Finezaha 'ra Eriaza hã; duré maparane levita norĩ hã: Zesuaha 'ra Zozabade hã, duré Binu'ihi 'ra, Noadiasi hã.

Neemia 6:9

Õ norĩ hã ma tô aré wapahi te te wama sõmri za'ra da hã wapibu za'ra, romhuri na wa te ãma 'rãiwa'õmo za'ra tõ da. Tane nherẽ, wa tô ãne na 'Re ihâimana u'âsi mono ma mre: “'Re ihâimana u'âsi mono, ma'ãpé ãhã na ĩnhiptetezé hã sa'ẽtẽ na ĩma sõmri!”

Salmu 110:3

Nimahã na asitob'ru norĩ zada aihâimana da, bâdâ pisutu wamhã, te za asib'a'uwẽ norĩ hã oto aima sihâi'ré za'ra, sihawim na isipisutu za'ra norĩ hã. Awẽ wi atébré 're ihâimana mono ne, te za ihâiba tém norĩ hã ẽne iwazéb zahi ãma siwi asõpẽtẽ.

Ezodu 12:35

Tawamhã Izaraéu nhihudu norĩ hã ma tô oto rowaptẽrẽ za'ra, ezipsiu norĩ wi. Mozési te te tãma iwaihu'u za'ra zéb zarina ma tô tiwi rowaptẽrẽ za'ra, marĩ hã da te tãma sõmri za'ra da, niha wamhã, ẽtẽ waipo pré oru 'manharĩ hã, ẽtẽ waipo prã prata 'manharĩ hã, duré da'uza hã.

Ezodu 12:36

Tawamhã 'Re ihâimana u'âsi mono, ma tô ezipsiu norĩ ma tãma 'manharĩ za'ra, Izaraéu nhihudu norĩ hã te te wazéb za'ra da, taha zarina uburé marĩ te te tiwi iwaptẽrẽ za'ra zé hã te te tãma sõmri za'ra da. Ãne zarina ma tô oto marĩ iwẽ hã te te sima waibu, Izaraéu nhihudu norĩ hã, ezipsiu norĩ wi.

2 Corĩtu 9:7

'Râwi aipẽ'ẽ 're, asima iwaihu'u za'ra wa'aba zéb zarina si, te za aihâiba mono bâ dama asõprub za'ra wa'wa, ãté sa'ẽtẽ na, ãté suru na. Robzei'õ nherẽ, dama asõprub za'ra wa'aba õ di za. Duré taré da te aima i'ru za'ra wa'aba zéb zarina, dama asõprub za'ra wa'aba õ di za. Mare di. Asi'uihâ na si te za asima iwẽ za'ra wa'aba zéb zarina, dama asõprub za'ra wa'wa, ato sina. Ãne si iwẽ uptabi hã, 'Re ihâimana u'âsi mono ma hã, dato sina dasima 're idanhoprub za'ra mono zé hã.