Éfézu 4:24 - ꞌRe Ihâimana Uꞌâsi Mono Zadawa Wasuꞌu

²⁴ Da'uza hã ihâ tém na 're idasi'uza za'ra mono ne, te za oto aihâimanazép tém na si 're aihâimana za'ra wa'aba mo, iwẽ na si. Taha da, ma tô 'Re ihâimana u'âsi mono hã aipoto téb za'ra wa'wa aipẽ'ẽ 're, isine 're anomro wẽ wa'aba mono da, tô sena na duré dama 're aihâimana wẽ za'ra wa'aba mono da oto.

Éfézu 4:24 ပူးပေါင်းရင်းမြစ်များ

Zenezi 5:1

à hã rob'ui'éré, Adãhã nhihudu norĩ za'ratazém na. 'Re ihâimana u'âsi mono, a'uwẽ te te apoto mono wamhã, ma tô tisine da hã ab'manha.

Zuwã 17:17

Asimiroti hã tô sena uptabi. Tawamhã te za asimiroti na 're ipawaptob u'âsi za'ra mo, ai'ãma si 're nomro wẽ uptabi mono da.

Roma 12:2

Ti'ai ãma dahâimana wasété na 're idanomro mono norĩ ãma hã, 're sasõmri za'ra wa'aba mono õ di za. 'Re ihâimana u'âsi mono wi si, te za 're irowaptẽrẽ u'âsi za'ra wa'aba mo, asimirosa'rata wẽ na si, aipẽ'ẽ 're, 're aihâimana za'ra wa'aba mono zé hã te te aima 're pisutu za'ra wa'aba mono da, 're aihâimana za'ra wa'aba mono zép tém na si, oto 're anomro aba mono da. Tawapsi te za 'Re ihâimana u'âsi mono, te te aima 're ipisutu za'ra wa'aba mono hã asina 're iwaihu'u pese za'ra wa'aba mo, marĩ iwẽ si tãma 're i'manharĩ za'ra wa'aba mono zém na hã.

Roma 13:12

Robra isi'utõrĩzéb u hã romhuture di oto, ti'ai ãma ré dawasédé, da te 're i'manharĩ za'ra mono hã. Tâibâ za oto. Cristu hã we apâ morĩ wapsi, rowa'a si te za oto 're hâimana u'âsi, robra wa'rãmi. Tahawa, robra 'rowi dawasédé, da te 're i'manharĩ za'ra mono ne, 're wanomro mono õ di za oto. Wawasédé hã wa za oto wa te 're sahâri pese za'ra. Duré Zezusihi nhimirowa'a na si wa za 're wanomro, robra wi wanhiptete sina ãma 're iwahâimana za'ra mono zéb da hã, danhimnhi'ãsi na dawi 're idasisõpa za'ra mono ne.

Roma 13:14

Siwa'ru 'râwi asima iwẽzéb zarina, aipẽ'ẽ 're asimirosa'rata wasété aba na ãma 're rosa'rata za'ra wa'aba mono õ di za. Wanhib'apito Zezu Cristu 're imorĩzém na si te za oto 're aihâimana za'ra wa'aba mo, isine.

Roma 6:4

Tawamhã â dawabzuri hã oto wa te 're 'manharĩ za'ra mono wamhã, â da te 're iwanhamra mono zé, Cristuhu siré 're iwadâ'â za'ra mono zé, te wa'ãma simiré'é za'ra. Ab're 're, isiré da te 're iwanheme mono zéb zama, te wa'ãma wasu'u za'ra. E marĩ da, wa tô bété Zezusihi siré 're wadâ'â za'ra. Cristu hã dâ'â nherẽ, Imama hã tiwaihu'u pese na te te ihâiwa'utu ne, 're iwanomro mono zép tém na si, oto 're wahâimana za'ra mono da hã, wa tô isiré 're wadâ'â za'ra, wa norĩ hã. Ãne wa'ãma isimiré'é za'ra zé hã te wasu'u.

Roma 7:6

Tane nherẽ, 'Re ihâimana u'âsi mono hã ma tô te te wama 're apisutu oto, isimiroti na rob'ui'éré 'rada hã wa te wasina tãma ãma 're i'uwaimrami za'ra mono zéb zarina, wawasédé hã te te wa'ãma 're i'ab'madâ'â mono zéb da, 're wasi'madâ'â za'ra mono tõ da oto. Isimiroti na rob'ui'éré 'rada hã wa te wasina tãma ãma 're i'uwaimrami za'ra mono zéb zarina, te te 're iwa'anho'reptui mono zéb zô, 're wanhopré mono sina, wa te oto tãma 're romhuri za'ra mono õ di, 're iwahâimana 'rata za'ra mono zém na hã. Ipẽ'ẽzani hã te te wama 're i'aroti mono zéb zarina si, wa oto wa te tãma 're romhuri za'ra, 're iwahâimana za'ra mono zép tém na si.

Roma 8:29

Duréihã marĩ õ ré hã, 'Re ihâimana u'âsi mono te te sima ãma irotizéb zarina, te te sima 're iwa'apisutu mono norĩ hã, i'ra ne, tô Zezusihi ne, oto 're wahâimana za'ra mono da, ma tô duré te te 're wa'apisutu siro. Ta hã uburé isazei'wa norĩ dub'rada, 're hâimana mono da, ma tô ãne te te 're wa'apisutu siro, sima.

1 Corĩtu 15:53

Ti'ai ãma ré hã, wahâiba hã si'utõrĩ pese di. Tane nherẽ, wa za tô niwapsi wahâiba itém na saprĩ za'ra ni, za oto wawi 're isi'utõrĩ waihu'u za'ra mono õ, u hã, iré 're wahâimana u'âsi za'ra mono da oto, õne u'âsi.

2 Corĩtu 3:18

Wa norĩ hã wasiré isazei'wa norĩ hã da'rã ubu ãna ne, wa oto 're wahâimana za'ra. Tahawa, Wanhib'apito 're imorĩ wẽ uptabi zé hã wama waihu'u pese za'ra di oto. Ipẽ'ẽzani te te 're iwa'apawapto mono zéb zarina, wa za oto 're iwanomro wẽ mono zém na, wa te wasima ãma 're sa'ẽtẽ za'ra, isine ãma 're iwahâimana za'ra mono zéb da hã.

2 Corĩtu 4:16

Tahawa, niwamhã wawi 're robzei'õ waihu'u mono õ di. Tô sena ãne hã mare uptabi di. Awẽ sidâpâsi wahâiba prédubzéb u, duré wahâiba téb ré wanhiptetezé hã wawi 're si'ré u'âsi mono nherẽ, wa wapẽ'ẽ 're apâ 're wanhiptete u'âsi. Tahawa, tô wawi hã 're robzei'õ waihu'u mono õ di tô.

2 Corĩtu 5:17

Ni'wam norĩ hã Cristu te te 're saze za'ra mono wa, simisutu tihâiba na sina 're sitob za'ra mono wamhã, 're idapoto téb za'ra mono zéb ré si, te za oto 're hâimana za'ra. Tahawa, te za 're inomro 'rata mono zé hã tãma 're si'utõrĩ za'ra. Ãhã wamhã, 're ihâimana 'rata za'ra mono zé hã tâibâ za oto. Taha wa'rãmi, te za oto 're idahâimana téb za'ra mono zém na si 're hâimana za'ra, iwẽ na si.

Galata 3:27

Ma tô duré â dawabzuri hã i'manharĩ za'ra wa'wa, Cristu 're imorĩzém na si oto ãma 're anomro wẽ wa'aba mono da, simisutu Cristuhu nhib'a'uwẽ 're anomro aba mono wa.

Galata 6:15

Danhihâiwata nhihâri ré si, 're idahâimana za'ra mono zé hã, marĩ dai õ di, 'Re ihâimana u'âsi mono ma hã. Duré danhihâiwata nhihâri ãna 're idahâimana za'ra mono zéb zama hã marĩ dai õ di, tãma hã. Dahâimanazép tém na, iwẽ na si oto 're idahâimana za'ra mono hã, taha si tãma hã iwẽ uptabi.

Éfézu 2:10

Cristu Zezusihi ãma 're wanomro mono wa, ma tô 'Re ihâimana u'âsi mono hã wama sõmri za'ra wahâimanazé ité hã, wa te ãma dama 're rob'manharĩ wẽ za'ra mono da, duré iwẽ na wa te 're dapawaptob za'ra mono da ãma, te te wa'ãma iroti siromo zéb zarina.

Éfézu 2:15

'Re ihâimana u'âsi mono nhimiroti 'rata na rob'ui'éré hã sa'ẽtẽ na ma tô zudeu norĩ ma si 're hâimana za'ra, marĩ hã te te tãma ãma 're i'uwaimrami za'ra mono zéb da hã, taha zarina iwasédé hã te te tãma 're i'apari mono zéb da hã duré. Cristu hã wazada idâ'âzéb zarina, tâibâ oto 'Re ihâimana u'âsi mono nhimiroti 'rada hã, marĩ na dawasédé hã te te dama 're i'apari mono zéb da hã. Misi dahâiba ne, aiwapsi wa oto 're wahâimana za'ra, zudeu norĩ, zudeu'õ norĩ me, wahâimanazép tém na si, iwẽ na si ãma 're wanomro mono da, duré wasisawi pese sina oto 're wahâimana za'ra mono da wasiré.

Éfézu 6:11

Dasi'wapé 'manharĩ'wa norĩ hã te za sisada 're si'uza za'ra. Tane te za 'Re ihâimana u'âsi mono nhimipawaptobzéb ré, 're anomro aba mo, Wa'uburé nhimiroti da, asiptete sina sada 're aihâimana za'ra wa'aba mono da.

Titu 2:14

Ta hã ma tô wazada sisõmri za'ra, wazada dâ'â za'ra da, 're iwanomro wasété mono hawi, te te 're wa'anho'reptui mono da, isib'a'uwẽ si 're wahâimana za'ra mono da oto. E marĩ da. Sena na 're wanomro mono da, duré wawa'a ãna iwẽ na si wa te oto 're dapawaptob za'ra mono da.

Hebreu 1:8

Tazahã, i'ra si dama pire uptabi na 're ihâimana mono zém na ma tô rowasu'u 'Re ihâimana u'âsi mono hã, ãne: “A hã Ropoto'wa. Da'ãma 're asib'a'uwẽ mono zé hã aiwi 're si'utõrĩ mono õ di za. Te za tô aima 're hâimana u'âsi. Duré marĩ na 're upai mono ãna, te za 're ida'ab'madâ'â u'âsi mo.

Hebreu 12:14

Rowẽ zô te za 're asõpré wa'aba mo, dasiré 're aihâimana za'ra wa'aba mono da. Duré 'Re ihâimana u'âsi mono ma si 're asisõmri u'âsi za'ra wa'aba mono da, te za 're asi'madâ'â pese za'ra wa'aba mo. Ãne hã ni'wam norĩ hã 're hâimana wẽ za'ra mono õ nherẽ, niwamhã Wanhib'apito hã titõmo na te te dame 'madâ'â za'ra õ di za, ta norĩ hã.

1 Pedru 2:2

Ai'uté ipoto té hã tina hâiwa'u zô 're i'ru'ru mono ne, te za Wanhib'apito nhimiroti zô si 're irob'ruiwapari za'ra wa'aba mo, ãma 're asiptete za'ra wa'aba mono da, aihâimana wasété hawi asõ'reptuzé hã 'râwi oto asina 're waihu'u za'ra wa'aba mono da.

2 Pedru 1:4

Ãne zarina, te te wama 're i'aropisutu mono zéb zarina, ma tô marĩ iwẽ hã wapẽ'ẽ 're, te te wama 're anhomri, sa'ẽtẽ na. Wama wẽ uptabi di, wama 're isõprub za'ra mono zé hã. E marĩ da, ma tô wama 're sõprub za'ra. Isine wahâimana wẽ na oto ãma 're wahâimana za'ra mono da. Ãne wamhã, isazei'õ'wa norĩ ne, wawasété zô 're wasiwasutu u'âsi za'ra mono õ di za, wawasété na 're wahâimana za'ra mono da hã.