Éfézu 4:16 - ꞌRe Ihâimana Uꞌâsi Mono Zadawa Wasuꞌu

¹⁶ Marĩ mono bâ wahâiba bâ wama 're hâimana za'ra mono nherẽ, wa za wa'rã zadawa para si marĩ hã wa te 're 'manharĩ za'ra. Tane wa norĩ hã Wanhib'apito zadawa para si marĩ hã wa te 're 'manharĩ za'ra mono wamhã, rowẽ na wa za wasiré 're wahâimana za'ra. Tawamhã 're iwasisawi pese za'ra mono zéb zarina, wa za 're wasipawaptob za'ra, wa te wasima 're sa'ẽtẽ za'ra mono da, wahâimana wẽ zé hã.

Éfézu 4:16 ပူးပေါင်းရင်းမြစ်များ

Zuwã 15:5

— Uwa 'ru na wa za ĩsina simiré'é. Uwa 'ru panhipti sisa'riti na wa za duré ai'ãma simiré'é za'ra wa'wa. Ĩ'ãma 're aihâimana u'âsi za'ra wa'aba mono wamhã, wa za te 're aipawaptob u'âsi za'ra wa'wa, 're anomro wẽ uptabi aba mono da. Asiwaprosi 're anomro wẽ waihu'u aba mono õ di za.

Roma 12:4

Dahâiba misi nherẽ, dahâiba na marĩ hã dama 're ihâimana za'ra mono hã ahâ di, tite mono bâ te te 're iromhuri za'ra mono zéb da hã, dapara norĩ hã duré danhib'rada, duré dato, uburé iré 're idahâimana za'ra mono hã.

1 Corĩtu 10:17

Zezusi hã wazada idâ'âzém na 're wasipo're pu'u za'ra mono da, wasiré 're wasi'rã'õtõ mono wamhã, wa'ahâ nherẽ, wa za i'u'ẽne hã wa te wasima 're wẽ'ẽ za'ra, misi nherẽ, wa te 're ihuri mono da hã. E marĩ te wama wasu'u za'ra, misi i'u'ẽne hã. Wa norĩ hã wasiré isazei'wa norĩ hã wa'ahâ nherẽ, simisutu Cristuhu siré 're iwahâimana za'ra mono zé, te wama wasu'u za'ra. Misi dahâiba ne oto 're iwahâimana za'ra mono zé, te duré wama wasu'u za'ra.

1 Corĩtu 13:13

Ãne, wa za oto aima ãma 'rãsutu za'ra wa'wa, isazei'wa norĩ nhimizawi pese hâimanazém na hã. 'Re ihâimana u'âsi mono hã da te dasina 're i'umnhasi pese za'ra mono zé hã, si'utõrĩ õ di za. Duré 'Re ihâimana u'âsi mono umnhasi sina, iwẽ zô dasina 're idanhimipari za'ra mono zé hã, si'utõrĩ õ di za. Duré 're idanhimizawi pese za'ra mono zéb zama hã, si'utõrĩ õ di za. E ma hã tawamhã, danhipai u ipire uptabi. 'Re idanhimizawi pese za'ra mono zé, ta hã danhipai u, ipire uptabi na te za 're hâimana.

1 Corĩtu 8:1

Rob'ui'éré na we asiwi ĩzadanharĩ za'ra wa'aba zém na, wa za duré aima ãma roti za'ra wa'wa, waihu'u pese newa romhâiba 'manharĩ ãma 're idawata za'ra mono zéb da, dasa hã da te tãma 're isõmri za'ra mono zém na, romhâiba 'manharĩ ma hã. Ãne ma tô we ĩma asiwasu'u za'ra wa'wa, rob'ui'éré na hã: “Wa norĩ hã isazei'wa oto 're wanomro mono wa, wama waihu'u pese za'ra di, 'Re ihâimana u'âsi mono nhimiroti hã. Taha zarina, wa za marĩ hã dasiré, wa te 're 'manharĩ za'ra, wa te wasima 're iwẽ za'ra mono zéb zarina.” Ãne na ma tô we ĩma asiwasu'u za'ra wa'wa. Tane tô. Uburé wa norĩ ma hã wama waihu'u pese za'ra di tô, 'Re ihâimana u'âsi mono nhimiroti hã. Tane nherẽ, marĩ hã da te 're waihu'u pese za'ra mono wẽ te, te za 're dasi'madâ'â ze za'ra, 'râwi. Tane nherẽ, isazei'wa norĩ hã 're isisawi pese za'ra mono zéb zarina si, te za 're sipawaptob u'âsi za'ra, siptete sina siré ãma 're hâimana u'âsi za'ra mono da.

Galata 5:22

Ãne 're danomro wasété mono õ di za, 'Re ihâimana u'âsi mono pẽ'ẽzani nhimiwada'uri zarina 're danomro mono wamhã. Te za da te 're dazawi pese za'ra. Duré dapẽ'ẽ 're datoi u'âsi, te za 're dahâimana za'ra. Duré dapẽ'ẽ toi u'âsi, te za 're dahâimana za'ra. Duré dawara sina dasisada 're dazahi za'ra mono õ di za. Duré danhimizawi pese na te za 're dahâimana za'ra. Duré marĩ iwẽ na te za dama 're danhoprub za'ra. Duré tô sena wa, ropisutu wẽ na, te za da te dama ãma 're rob'manharĩ wẽ za'ra.

Galata 5:6

Simisutu Cristu Zezusihi nhib'a'uwẽ oto 're wanomro mono wamhã, 'Re ihâimana u'âsi mono hã te te 're wa'aba'a mono õ di za, isihâiwata nhihâri ré norĩ hã, duré isihâiwata nhihâri õ norĩ hã. Zudeu na duré zudeu'õ na 're iwahâimana za'ra mono zém na hã, te te oto 're wa'awaihu'u mono õ di za. Zezu Cristu Danho'reptui'wa na, wa te wasina 're umnhasi za'ra mono wa, wanhimizawi pese na 're iwahâimana za'ra mono zém na si, te za oto te te 're wa'awaihu'u, 'Re ihâimana u'âsi mono hã.

Éfézu 1:4

Ta hã ti'a te te poto õ ré, ma tô romhâ ré te te 're wa'apisutu siro, tinhib'a'uwẽ da, Cristuhu ãma za 're wanomro mono wa, wawẽ uptabi na ãma 're wanomro mono da, marĩ, wa te 're 'manharĩ wasété za'ra mono ãna. Ta hã te te 're wa'apoto mono õ ré, ma tô romhâ ré te te 're wa'azawi pese.

Éfézu 3:7

'Re ihâimana u'âsi mono hã simizawi pese wa, ma tô ĩpisutu, tãma iromhuri'wa 're ĩmorĩ da, Cristuhu wasu'uwẽ hã te dama 're wasu'u mono da, tiwaihu'u pe hã te te ĩma sõmri na dâ'âsina.

Éfézu 4:12

Ãne ma tô Cristu hã da'apisutu, 'Re ihâimana u'âsi mono nhib'a'uwẽ norĩ te te 're pawaptob za'ra mono da, taha zarina 're sipawapto pese za'ra mono wa, siptete sina duré oto 're hâimana za'ra mono da.

Éfézu 4:15

Wa norĩ hã roti tô sena na si, wa za wasima wa te 're roti za'ra, 're wasisawi pese za'ra mono sina. Ãne wamhã, wahâimana wẽ na, wa za wa te 're sa'ẽtẽ za'ra. Tawamhã wa za oto wa te wasina 're uwaimrami za'ra, Cristuhu ne 're iwanomro wẽ uptabi mono zé hã, Wanhib'apito ne.

Filipu 1:9

'Re ihâimana u'âsi mono ma, wa duré ai'ãma 're ĩmreme u'âsi za'ra wa'wa, te te 're aipawaptob u'âsi za'ra wa'aba mono da, 're idazawi za'ra wa'aba mono zé hã aima 're sa'ẽtẽ u'âsi za'ra wa'aba mono da, duré 'Re ihâimana u'âsi mono nhimirowaihu hã 're waihu'u pese za'ra wa'aba mono da. Duré uburé marĩ hã iwẽ na ãma 're waihu'u za'ra wa'aba mono da, wa ai'ãma 're ĩmreme u'âsi za'ra wa'wa, duré iwasété na ãma 're waihu'u za'ra wa'aba mono da, asiwi 're wẽ'õ za'ra wa'aba mono da.

Colosu 2:19

Ta norĩ hã Cristuhu wasu'uwẽ si te te sima 're tété za'ra mono õ di. Cristu hã uburé tizazei'wa norĩ 'madâ'â'wa te pire na 're hâimana taha si, da'rã hã dahâiba ma pire na 're ihâimana za'ra mono ne. Dahâiba na danhorõ 're ihâimana za'ra mono hã te dahi hã te te sitẽme 're tété tete za'ra, danhiptete sina ãma 're dahâimana za'ra mono da, dahâiba na hã. Tane duré Cristu hã te za tinhib'a'uwẽ norĩ hã te te 're apawapto, ta norĩ hã 're sipawaptob za'ra mono da, siptete sina ãma 're hâimana u'âsi za'ra mono da. Te za duré te te 're apawapto, prédup sina ãma 're ihâimana za'ra mono zém na te te sima 're sa'ẽtẽ u'âsi za'ra mono da, 'Re ihâimana u'âsi mono te te tãma 're i'awẽ mono zéb zarina.

Colosu 2:2

Ta norĩ hã tipẽ'ẽzani wẽ ré, siptete sina 're hâimana za'ra mono da, wa tô te ãma 're romhuri pese za'ra. A norĩ wa'aba ãma zama wa tô duré te 're romhuri pese, aipẽ'ẽzani wẽ ré tô asiptete sina 're aihâimana za'ra wa'aba mono da. Tahawa, te za 'râwi simisutu siré 're hâimana za'ra ta norĩ hã, 're isisawi pese za'ra mono zéb zarina. A norĩ wa'aba zama te za duré ãne zarina simisutu asiré 're aihâimana za'ra wa'aba mo. Tawamhã 'Re ihâimana u'âsi mono wasu'uwẽ hã aré dama iwaihu'u'õ hã te te oto waihu'u pese za'ra wa, te za tô ta norĩ hã oto sena na te te 're waihu'u za'ra. Duré a norĩ wa'aba zama hã te za tô oto sena na 're iwaihu'u za'ra wa'aba mo. 'Re ihâimana u'âsi mono wasu'u hã aré dama iwaihu'u'õ hã, ã hã Cristuhu wasu'uwẽ, te dama wasu'u.

1 Tesalonita 1:3

Tãma 're wamreme zusi mono sina, wa ai'ãma 're wapo're pu'u u'âsi za'ra wa'wa, 're aihâimana wẽ za'ra wa'aba mono zém na, ãma 're wawata za'ra mono da. A norĩ wa'wa hã sazei pese za'ra wa'aba wa, marĩ iwẽ si te 're i'manharĩ za'ra wa'aba mo. Wamama hã, Wanhib'apito 'Re ihâimana u'âsi mono, te 're isawi pese za'ra wa'aba mo. Taha zarina, te duré 're idazawi pese za'ra wa'aba mo. Tahawa, dawi 're asisawi za'ra wa'aba mono õ di, marĩ iwẽ hã dama 're 'manharĩ za'ra wa'aba mono tõ da. Duré Wanhib'apito Zezu Cristu we imorĩzéb zô, asimi'ẽ na te sô 're asimipari u'âsi za'ra wa'aba mo. Ãne na 're anomro wẽ wa'aba mono na, wa ai'ãma 're wapo're pu'u u'âsi za'ra wa'wa, wawa'a ãna, Wamama ma 're wamreme zusi mono wamhã.

1 Tesalonita 2:13

'Re ihâimana u'âsi mono zadawa wasu'u hã wa te aima iwasu'u za'ra wa'wa hã wapari za'ra wa'aba wamhã, ma tô asima iwẽ za'ra wa'wa. Taré ti'ai ãma aibâ nhimirowasu'u newa, ãma 're rosa'rata za'ra wa'aba mono õ di. Tô sena 'Re ihâimana u'âsi mono mreme na, ma tô ãma irosa'rata za'ra wa'wa. Tane tô, 'Re ihâimana u'âsi mono zadawa wasu'u na si wanhimirowasu'u za'ra hã. Isadawa wasu'u hã te tô ai'ãma te te 're romhuri pese za'ra wa'wa, aipẽ'ẽ 're, iwẽ na si 're anomro aba mono da. Tahawa, 'Re ihâimana u'âsi mono ãma si, wa 're wawata za'ra, imreme hã asina 're waihu'u za'ra wa'aba mono wa.

1 Tesalonita 3:12

Tô sena ma tô 're asisawi pese za'ra wa'aba mo. Uburé ma tô duré 're idazawi pese za'ra wa'aba mo. Tane tô, wẽ di. Tahawa, wa duré wa te tiwi 're rowaptẽrẽ za'ra, Wanhib'apito wi, te te 're aipawaptob za'ra wa'aba mono da, awẽ sidâpâsi asimizawi pese za'ra wa'aba zé hã, te te aima 're sa'ẽtẽ za'ra wa'aba mono da. Sa'ẽtẽ na, wa te 're i'asawi pese za'ra wa'aba mono zém ne, aiwa sa'ẽtẽ na 're dazawi pese za'ra wa'aba mono da, wa wa te tiwi 're rowaptẽrẽ za'ra.

2 Tesalonita 1:3

Wasisãnawã norĩ, 'Re ihâimana u'âsi mono ãma, wa 're wawata u'âsi za'ra, 're aihâimana wẽ za'ra wa'aba mono wa. Ta hã te te 're aipawaptob za'ra wa'wa, tiwaihu'u pese na. Tawamhã ma tô oto 're isazei pese za'ra wa'aba mo. Awẽ sidâpâsi 're isazei pese za'ra wa'aba mono zé hã, te ãma asima 're isa'ẽtẽ za'ra wa'aba mo. Aihâiba mono bâ, te 're asisawi za'ra wa'aba mo. Duré awẽ sidâpâsi 're asisawi pese za'ra wa'aba mono zé hã te ãma 're isa'ẽtẽ za'ra wa'aba mo. Tahawa, 'Re ihâimana u'âsi mono ãma, wa 're wawata u'âsi za'ra. Ãne, wa te 're 'manharĩ za'ra mono da, wama 're wẽ za'ra mono di. Tô i'uwaibaba na si.

1 Timotiu 1:5

E marĩ da, wa tô ãne hã aima waihu'u. Wa tô ĩsima aiwẽ, isazei'wa norĩ hã 're pawaptob za'ra mono wa, Wamama zawi pese 'wa, duré dazawi pese 'wa 're nomro mono da hã. Isazei'wa norĩ hã simirosa'rata wẽ ré si, te za 're nomro. Ãne wamhã, marĩ te te 're i'manharĩ wasété za'ra mono na, 'râwi 're siwẽ'õ za'ra mono õ di za. Wanhib'apito zazei uptabi 'wa, te za 're nomro. Tawamhã te aima iwaihu'uzéb zarina 're nomro mono wamhã, te za tô dasisawizé hã ipẽ'ẽ 're tãma 're hâimana za'ra.

1 Pedru 1:22

Wanhib'apito nhimiroti hã, tô sena. A norĩ wa'wa hã ma tô isimiroti hã 're iwapari pese za'ra wa'aba mo. Tahawa, marĩ iwasété na asima 're rosa'rata za'ra wa'aba mono õ di oto. Aiwẽ na 're anomro aba mono da si, te oto asima 're irosa'rata za'ra wa'aba mo. Dazawizé hã tô sena te oto aima 're hâimana za'ra wa'wa, asiré Wanhib'apito zazei'wa norĩ ãma. Tahawa, te za õne u'âsi 're asisawi pese za'ra wa'aba mo.

1 Zuwã 4:16

'Re ihâimana u'âsi mono hã simizawi pese uptabi di. Tane ni'wam norĩ hã te te 're dazawi pese za'ra mono wamhã, ta norĩ si te 'Re ihâimana u'âsi mono ãma 're hâimana za'ra, 'râwi. Ta norĩ 'ratap si te duré 'Re ihâimana u'âsi mono hã 're sãmra, 'râwi. 'Re ihâimana u'âsi mono te te 're iwa'azawi pese mono zé hã wama waihu'u pese za'ra di oto. Taha na wa te wasiwi ãma 're wawã za'ra mono õ di za oto.