Éfézu 4:12 - ꞌRe Ihâimana Uꞌâsi Mono Zadawa Wasuꞌu

¹² Ãne ma tô Cristu hã da'apisutu, 'Re ihâimana u'âsi mono nhib'a'uwẽ norĩ te te 're pawaptob za'ra mono da, taha zarina 're sipawapto pese za'ra mono wa, siptete sina duré oto 're hâimana za'ra mono da.

Éfézu 4:12 ပူးပေါင်းရင်းမြစ်များ

Luca 22:32

Sima, tane nherẽ, Ĩmama wi, wa tô te 're rowaptẽrẽ aima, te te 're aipawaptob u'âsi mono da, ĩ'ãma 're aimorĩ u'âsi da. Apâ ĩtẽme aipi'rai wapsi, te za asisãnawã norĩ hã 're ipawaptob za'ra mo, hâimana nhiptete na 're nomro mono da.

Zezusihi zadawa wasuꞌuꞌwa norĩ nhimiromhuri na robꞌuiꞌéré 11:23

Tamomo wisi wamhã, ma tô waihu'u, 'Re ihâimana u'âsi mono hã iwẽ na dama 're isõpru mono zém na hã tame. Tahawa, toi uptabi di, Banabé hã. Tawamhã ma tô dama roti, ãne: — Aihĩni, aipẽ'ẽ na sada 're asimi'ẽ za'ra wa'aba mono, Wanhib'apito niwĩp si 're aihâimana u'âsi za'ra wa'aba mono da.

Zezusihi zadawa wasuꞌuꞌwa norĩ nhimiromhuri na robꞌuiꞌéré 20:24

Tane nherẽ, ĩhâiba ré 're ĩmorĩ siroptu da hã, ĩhâiba te ĩsima sawi õ di, tarére wa, ĩma hã. Wanhib'apito Zezusi hã ma tô ĩnhimiromhuri hã ĩma tisõ, 'Re ihâimana u'âsi mono nhimizawi pese zé wasu'u na te dama 're sadawa wasu'u mono da. Ĩnhimiromhuri hã te tãma ãma uwaimrami da, wa tô ĩsima wẽ pese, taha si.

Zezusihi zadawa wasuꞌuꞌwa norĩ nhimiromhuri na robꞌuiꞌéré 20:28

Tahawa, te za 're asi'madâ'â pese za'ra wa'aba mo, 're anomro wẽ wa'aba mono da. Duré isazei'wa norĩ hã te za 're i'madâ'â pese za'ra wa'aba mo, siré 're isi'rã'õtõ mono norĩ hã. 'Re ihâimana u'âsi mono pẽ'ẽzani hã ma tô sima aipisutu za'ra wa'wa, isazei'wa norĩ hã tãma 're 'madâ'â za'ra wa'aba mono da. Ti'ra wapru na ma tô isazei'wa norĩ hã wa'â, tite da. Tahawa, pone'ẽrebâ 'madâ'â'wa norĩ ne, te za 're ida'madâ'â pese za'ra wa'aba mo, 'Re ihâimana u'âsi mono nhib'a'uwẽ norĩ hã.

Zezusihi zadawa wasuꞌuꞌwa norĩ nhimiromhuri na robꞌuiꞌéré 9:31

Tawamhã isazei'wa norĩ ma, rowẽ di oto, Zudéa ãma, duré Galiléa ãma, duré Samaria ãma zama. Uburé tãma rowẽ za'ra di oto, siré 're isi'rã'õtõ mono norĩ ma hã daro mono bâ. 'Re ihâimana u'âsi mono pẽ'ẽzani nhimipawaptobzém na ma tô isazei'wa norĩ hã 're hâimana nhiptete za'ra. Taha zarina, ma tô duré isazei'wa norĩ za'rada hã sina hâimo. Ta norĩ hã ma tô Wanhib'apito Zezusi hã te te 're wazé pese za'ra.

Roma 12:5

Tane hã wa oto wa norĩ hã wasiré isazei'wa norĩ hã Cristuhu ãma, wa'ahâ nherẽ, 're wahâimana za'ra, simisutu. Dahâiba misi nherẽ, dahâiba na marĩ hã ahâ na dama 're ihâimana za'ra mono hã, tite mono bâ te te 're iromhuri za'ra mono ne, wa oto wa norĩ hã wasiré isazei'wa norĩ hã wanhimiromhuri mono bâ sipu'u pese na, wa te 're romhuri za'ra, 'Re ihâimana u'âsi mono ma, dahâiba misi na 're idahâimana za'ra mono ne, simisutu wasiré 're wahâimana za'ra mono wa oto.

Roma 12:7

Duré ni'wam norĩ hã isazei'wa norĩ pawapto'wa da, te te sima 're apisutu mono wamhã, ta norĩ zama te za tô taha zarina si te te tãma 're dapawaptob u'âsi za'ra. Duré 'Re ihâimana u'âsi mono nhimiroti na dama rowahutu'wa da, te te sima 're i'apisutu mono norĩ hã te za tô ta norĩ zama isarina si te te ãma 're dapawaptob za'ra.

Roma 14:19

Tahawa, rowẽ na wasiré 're iwahâimana za'ra mono zéb zô si, wa za wasima 're wanhopré. Wanhib'apito ãma wahâimana nhiptete u'âsi 're wanomro mono da, 're iwasipawaptob za'ra mono zém na, wa za duré 're wanomro u'âsi.

Roma 15:14

Ĩsisãnawã norĩ, wa hã wa tô ai'ãma waihu'u pese za'ra wa'wa, asimizawi pese sina oto 're i'anomro wẽ wa'aba mono zém na hã. Duré aima waihu'u pese za'ra wa'aba di oto, 're aihâimana wẽ za'ra wa'aba mono zéb da hã. Ãne hã wa tô duré ai'ãma waihu'u pese za'ra wa'wa, Wanhib'apito nhimiroti na oto asima 're iroti waihu'u pese za'ra wa'aba mono zém na zama.

Roma 15:2

Wasiré isazei'wa norĩ hã marĩ te te sima 're iwẽ za'ra mono zéb zarina, wa za wa te ãma 're sazei pese za'ra, marĩ iwẽ na si, wa te ãma 're pawaptob u'âsi za'ra mono da, hâimana prédub sina oto ãma 're hâimana u'âsi za'ra mono da.

Roma 15:29

Tawamhã atẽme ĩwisi za'ra wa'aba wamhã, Cristuhu nhoprubzém na, sa'ẽtẽ uptabi na te za aihĩni wama ãma tirowẽ pese za'ra.

1 Corĩtu 12:27

A norĩ wa'wa hã te tô simisutu haré, Cristuhu nhib'a'uwẽ asiré 're anomro aba mo, aihâiba misi aima 're ihâimana za'ra wa'aba mono ne. Duré dahâiba na marĩ hã tite mono bâ te te 're i'manharĩ za'ra mono zéb da hã, dama 're ihâimana za'ra mono ne, te a norĩ wa'wa hã aihâiba mono bâ tãma 're aihâimana za'ra wa'aba mo, Cristuhu ma si, asimiromhuri aba mono bâ, tãma 're 'manharĩ za'ra wa'aba mono da.

1 Corĩtu 12:7

Wahâiba mono bâ, ma tô romhuri hã te te wama 're apisutu 'Re ihâimana u'âsi mono hã, Ipẽ'ẽzani hã sena na wapẽ'ẽ 're, 're ihâimana za'ra mono na, wa te wasina 're waihu'u za'ra mono da, duré wasiré isazei'wa norĩ hã ãma 're wasipawapto wẽ u'âsi za'ra mono da.

1 Corĩtu 14:12

A norĩ wa'wa hã bété. Ma tô sô 're asõpré u'âsi aba mo, 'Re ihâimana u'âsi mono Tipẽ'ẽzani na hã, romhuri mono bâ te te aima 're ipisutu za'ra wa'aba mono zéb zô, ãma 're asipawaptob za'ra wa'aba mono zéb da hã. Romhuri hã õhõ si 're hâimana za'ra mono õ di, ipire uptabi na hã. Sisarina si õ di, romhuri hã. Tahawa, romhuri iwẽ uptabi zô si, te za asima 're irob'ruiwapari u'âsi za'ra wa'aba mo, ãma 're asipawaptob za'ra wa'aba mono zéb da, Wanhib'apito ãma asiptete sina 're anomro u'âsi aba mono da, taha ãma si.

1 Corĩtu 14:14

Wasiré isazei'wa norĩ hã 're wasi'rã'õtõ mono wamhã, wa hã damreme ĩma waihu'u õ nherẽ, 'Re ihâimana u'âsi mono ma, ãma 're ĩmreme mono wamhã, te ãma 're rosa'rata waihu'u mono õ di, ĩma waihu'u pese õ wa. 'Râwi ĩpẽ'ẽ na si, wa tãma 're ĩmreme.

1 Corĩtu 14:26

Ĩsisãnawã norĩ, ãhã wasu'u na, wa za oto aima 'rãsutu za'ra wa'wa. Asiré 're asi'rã'õtõ aba mono wamhã, ni'wam norĩ si te za aima 're sõ're za'ra wa'wa, isazei'wa nho'rezém na. Ni'wam norĩ si te za duré isazei'wa norĩ 're aihâimana za'ra wa'aba mono zém na, te te aima 're roti za'ra wa'wa. Ni'wam norĩ si te za duré marĩ iwaihu'u'õ hã te te aima 're waihu'u za'ra wa'wa, 'Re ihâimana u'âsi mono hã ta norĩ ma si, te te 're iwaihu'u za'ra mono zéb zarina. Timreme nai õ nherẽ, te za duré ni'wam norĩ si 'Re ihâimana u'âsi mono hã te te aima 're sadawa wasu'u za'ra wa'wa, damreme aima iwaihu'u za'ra wa'aba õ na hã. Ni'wam norĩ si te za duré aimreme aba na, te te aima ãma 're wasu'u pese za'ra wa'wa sõ'awi, aré damreme aima iwaihu'u za'ra wa'aba õ na 'Re ihâimana u'âsi mono, da te aima 're isadawa wasu'u za'ra wa'aba mono zé hã. Asimiromhuri aba mono bâ, te za ãma 're asipawaptob u'âsi za'ra wa'aba mo aihâiba mono bâ wa'aba, Wanhib'apito ãma si asiptete sina 're anomro aba mono da.

2 Corĩtu 12:19

E taré wa'ãma 're rosa'rata wẽ za'ra wa'aba mono da, wa ãne na aima wasiwasu'u za'ra wa'aba ni. Mare di. Cristuhu zazei'wa oto 're wahâimana mono wa, wa ãne na aima wasiwasu'u za'ra wa'aba ni, 'Re ihâimana u'âsi mono nho'a. Wasisãnawã norĩ, wama asawi pese za'ra wa'aba norĩ hã, wa te 're aipawaptob za'ra wa'aba mono da si, wa tô uburé marĩ hã wa te 're ab'manharĩ, asiptete sina Cristuhu ãma si 're anomro aba mono da oto.

2 Corĩtu 13:11

Ĩsisãnawã norĩ, ĩnhimi'ui'éré na wa za oto aima ãma 'rãsutu za'ra wa'wa. 'Re aihâimana wasété za'ra wa'aba mono zé hã te za oto irẽme pese za'ra wa'wa. Te aima 're iroti za'ra wa'aba mono zé hã te za 're iwapari pese za'ra wa'aba mo. Tahawa, te za simisutu asimirosa'rata na 're asisazei pese za'ra wa'aba mo. Rowẽ na si asiré 're aihâimana u'âsi za'ra wa'aba mono da, te za duré asina 're irosa'rata wẽ u'âsi za'ra wa'aba mo. Ãne wamhã, 'Re ihâimana u'âsi mono hã isimizawi pe hã, te za 'râwi asiré 're hâimana u'âsi za'ra wa'wa, dama rowẽ nhomri'wa hã.

2 Corĩtu 13:9

A norĩ wa'wa hã tô sena Cristuhu ãma asiptete sina 're anomro wẽ wa'aba mono wamhã, wa za tô aima 're wato za'ra wa'wa. Ãne wamhã, Cristuhu zadawa para, wa te aihâ za'ra wa'aba õ di za. Wa te aihâ za'ra wa'aba õ wamhã, ãté ni'wam norĩ hã te za wa'ãma sima rosa'rata wasété za'ra, wawẽ'õ'wa norĩ hã, aima wapahi za'ra wa'aba na hã. Tane nherẽ, wẽ di tô wama hã, tô sena Cristuhu ãma si oto 're anomro wẽ wa'aba mono wamhã.

2 Corĩtu 4:1

'Re ihâimana u'âsi mono hã ma tô tinhimizawi pese zéb zarina wapisutu, isadawa wasu'u na wa te tãma 're romhuri mono da. Tahawa, wawi 're robzei'õ mono ãna, wa tô 're wahâimana u'âsi.

2 Corĩtu 5:18

Ãne hã ma tô iwẽ si te te wama 're ab'manharĩ, 'Re ihâimana u'âsi mono hã, ãma 're iwanomro mono zép téb da hã. Isitob'ru na, wa tô aré tãma 're wahâimana za'ra. Tane nherẽ, Cristuhu dâ'âzém na, ma tô wa'ãma 're siwadi za'ra oto. Wa norĩ hã dama isadawa wasu'u'wa norĩ hã ma tô duré wama pisutu za'ra, wa te da'ãma 're iromhuri za'ra mono zéb da hã, taha zarina, da'ãma zama 're siwadi mono da duré, wasine.

2 Corĩtu 6:3

Wa norĩ hã wa tô 'râwi 're wasi'madâ'â za'ra, 're iwanomro wẽ mono zéb zô, ni'wam norĩ hã wahâimanazém na te te 're wa'madâ'â za'ra mono wa, taha zarina, tiwasété na oto 're si'marõpãrĩ za'ra mono tõ da, Cristuhu wasu'uwẽ hã duré te te siwi 're wẽ'õ za'ra mono tõ da. Wa te dama 're iromhuri za'ra mono zé hã, da te dasiwi 're wẽ'õ za'ra mono tõ da, wa ãne na 'râwi wapẽ'ẽ 'remhã 're wasi'madâ'â za'ra, wa norĩ hã.

2 Corĩtu 7:1

Ĩsisãnawã norĩ, ĩma asawi pese za'ra wa'aba norĩ, ãne hã uburé 'Re ihâimana u'âsi mono te te wama 're i'aropisutu mono zé hã, oto wama 're hâimana za'ra mono wa, uburé marĩ iwasété wi, wa za 're wasi'madâ'â pese za'ra, ãma 're wasihâiba wasété za'ra mono tõ da, duré 'râwi wapẽ'ẽ 're, ãma 're wasiwasété za'ra mono tõ da. Tahawa, 'Re ihâimana u'âsi mono hã wa za wa te wasiwi 're wazé pese za'ra. Wa za duré tãma 're wasisõmri u'âsi za'ra, ãma 're wanomro wẽ u'âsi mono da.

Éfézu 4:16

Marĩ mono bâ wahâiba bâ wama 're hâimana za'ra mono nherẽ, wa za wa'rã zadawa para si marĩ hã wa te 're 'manharĩ za'ra. Tane wa norĩ hã Wanhib'apito zadawa para si marĩ hã wa te 're 'manharĩ za'ra mono wamhã, rowẽ na wa za wasiré 're wahâimana za'ra. Tawamhã 're iwasisawi pese za'ra mono zéb zarina, wa za 're wasipawaptob za'ra, wa te wasima 're sa'ẽtẽ za'ra mono da, wahâimana wẽ zé hã.

Éfézu 4:29

Aimreme wasété na dama 're aimreme zusi aba mono õ di za oto. Aimreme wẽ na si te za oto dama 're aimreme zusi aba mo, asimiroti wẽ na si 're dapawaptob za'ra wa'aba mono da ãma.

Éfézu 4:4

Cristuhu nhib'a'uwẽ mono bâ misi dahâiba ne, wa simisutu oto 're wahâimana za'ra. Misi te Ipẽ'ẽzani hã 're hâimana. Taha si te wama 're hâimana za'ra, wapẽ'ẽ mono bâ. Duré õhõ zô si wa 're wanhimipari za'ra oto, rowẽ uptabi zô. Taha zô 're asimipari za'ra wa'aba mono da, ma tô tinhib'a'uwẽ da, aipisutu za'ra wa'wa, 'Re ihâimana u'âsi mono hã.

Colosu 1:24

Wa hã ai'udâna za'ra wa'aba, te ai'ãma 're robzépata za'ra wa'aba mono nherẽ, wa ĩto sina 're ĩhâimana. Cristuhu ma si, te 're romhuri mono wa, wa tô te 're robzépata za'ẽtẽ tô, ta hã ti'ai ãma 're morĩ ré, dazada te te irobzépata ne. Tane nherẽ, Cristuhu nhib'a'uwẽ norĩ ma, ĩnhimiromhuri na te tãma ãma 're uwaimrami mono da, wa za tô taha na te 're robzépata u'âsi.

Colosu 1:28

Tahawa, Cristuhu si wa oto wa te dama 're wasu'u za'ra. Hâiwa hawi dahâimanazém na rowaihu iwẽ hã wa te 're iwaihu'u za'ra mono zéb zarina, wa tô duré wa te 're da'uwati wẽ za'ra dahâiba mono bâ, marĩ hã da te 're 'manharĩ wasété za'ra mono tõ da oto. Wa tô duré wa te dama 're roti za'ra, marĩ da te 're 'manharĩ wẽ za'ra mono da, i'uwaibaba si. Ni'wam norĩ hã Cristuhu ãma prédup sina 're inomro mono norĩ hã 'Re ihâimana u'âsi mono nho're u, wa te 're simroi mono da, wa tô ãne hã wa te dama 're roti za'ra, rosa'rata wẽ hã wa te oto 're iwaihu'u za'ra mono zém hawimhã.

Colosu 4:17

Arquipuhu ma, ma'ãpé ãne hã 'maiwaihu'u aba za: “'Re ihâimana u'âsi mono, romhuri te te aima ipisudu hã 'mairẽme õ di za. Uburé te za tãma ãma i'a'uwaimrami mo.” Ãne hã te za tãma i'maiwaihu'u 'wa, Arquipuhu ma hã.

1 Timotiu 1:12

Ãhã na wa za ãma ĩwata, Wanhib'apito Cristu Zezusihi ãma hã. Ta hã ma tô ĩwaihu'u siro, ĩnhimiromhuri hã za te tãma ãma 're i'uwaimrami mono na hã. Taha zarina ma tô ĩpisutu, dapawaptom na te tãma 're romhuri mono da. Taha da, ma tô te te 're ĩnhiptete u'âsi. Tahawa, wa za ãma 're ĩwata u'âsi, ĩma 're rowẽ mono wa. Wanhib'apito ãma wa tô aré te ãma 're wasété, ĩmreme wasété na. Isazei'wa norĩ hâiba u'âbâ, wa tô aré te tãma 're rob'manharĩ wasété. Ta norĩ hâiba u'âbâ, wa tô aré duré sada 're ĩsima'wara. Wanhib'apito Danho'reptui'wa na 're imorĩ na hã ĩma waihu'u õ di aré. Te duré sazei õ di aré. Tahawa, zahadu ĩnhimiza'rese ãna 're ĩmorĩ wa, ma tô ĩ'ãma tipẽ'ẽzé, 'Re ihâimana u'âsi mono hã, te te ĩ'azâri tõ da.

2 Timotiu 4:11

Lucaha si te ĩ'rata nhamra. Ãhã wa, Marcuhu zô rowaimrami mono za, sõpẽtẽ da, asiré we saprõni da, ĩnhimiromhuri na te te 're ĩpawapto mono da.

2 Timotiu 4:5

Ta norĩ ne 're aihâimana mono õ di za. Asimiza'rese te za 're aihâimana mo. Te za duré aihâimanazém na ãma 're ipibui pese mo. Duré, Wanhib'apito zazei'wa 're aimorĩ 'ru te, da te dasiwi aima 're rob'manharĩ wasété mono nherẽ, 're asisawi mono õ di za, 're robzépata mono tõ da. Te za duré Wanhib'apito wasu'uwẽ na 're ida'apo're pu'u u'âsi mo, 'Re ihâimana u'âsi mono te te aima ipisutuzéb zarina, asimiromhuri na tãma ãma 're uwaimrami mono da.

Hebreu 13:17

Asiré isazei'wa 'madâ'â'wa norĩ nhimiroti hã te za 're iwapari pese za'ra wa'aba mo. Te te aima 're iroti za'ra wa'aba mono zéb zarina, te za marĩ hã 're i'manharĩ za'ra wa'aba mo. Ta norĩ hã niwapsi te za 'Re ihâimana u'âsi mono ma siwasu'u za'ra, te te ai'ãma 're iromhuri za'ra wa'aba mono zém na hã. Tahawa, te ta norĩ hã ai'ãma 're hâtâ'â u'âsi za'ra wa'wa, te te 're i'ai'madâ'â za'ra wa'aba mono zém na hã, Cristuhu zazei'wa 're ihâimana za'ra mono zém na si 're anomro aba mono da. Ta norĩ nhimiroti hã 're wapari pese za'ra wa'aba mono wamhã, to sina te za tô ta norĩ hã te te ai'ãma 're romhuri za'ra wa'wa. Tane nherẽ, 're wapari za'ra wa'aba mono õ wamhã, robzei ãna te za te te 're romhuri za'ra. Ãne wamhã, te te 're aipawapto waihu'u za'ra wa'aba mono õ di za, ta norĩ hã.

Hebreu 6:1

Tahawa, Cristuhu wasu'uwẽ na 're saze za'ra wa'aba mono da, duréihã da te aima ãma 're irowasu'u na'rata za'ra wa'aba mono zém na si asima ãma 're rosa'rata u'âsi za'ra wa'aba mono õ di za oto. Taha nhipai u, te za 'Re ihâimana u'âsi mono nhimiroti mono bâ ipire uptabi hã 're iwaihu'u pese za'ra wa'aba mo Cristuhu wasu'uwẽ hã, aihâimana prédub sina ãma 're aihâimana za'ra wa'aba mono da. 'Re ihâimana u'âsi mono nhimiroti mono bâ, duréihã da te aima ãma 're irowasu'u na'rata za'ra wa'aba mono zém na apâ asima ãma 're roti zahu za'ra wa'aba mono õ di za oto. Taha na rowasu'u mono hã ma tô 're iwaihu'u pari za'ra wa'aba mo, dapẽ'ẽ 're, dadâ'â u'âsi ne dawasédé, da te 're 'manharĩ za'ra mono pari, ta hawi 're idasipizari za'ra mono zém na rowasu'u hã, duré 'Re ihâimana u'âsi mono, da te dasina 're i'umnhasi za'ra mono zém na rowasu'u hã.