Éfézu 2:22 - ꞌRe Ihâimana Uꞌâsi Mono Zadawa Wasuꞌu

²² Tane a norĩ wa'wa hã, ẽtẽ ahâ na 'ri misi da, da te dasiwi i'ri ne, te za te te aima 're nharĩ u'âsi za'ra wa'wa, simisutu Wanhib'apito ãma 're aihâimana za'ra wa'aba mono da, isõrõwa misi tãma 're aihâimana za'ra wa'aba mono da oto, 'Re ihâimana u'âsi mono ma, Ipẽ'ẽzani hã aipẽ'ẽ za'ra wa'aba 're, 're ihâimana mono zéb zarina.

Éfézu 2:22 ပူးပေါင်းရင်းမြစ်များ

1 Corĩtu 3:16

Duréihã 'Re ihâimana u'âsi mono nhorõwa 'ri 're, ma tô õ hã dama 're hâimana, 'ri iwẽ uptabi wa. Tane te oto aipẽ'ẽ 're, ai'ãma 're sõrõwa za'ra wa'wa. Ipẽ'ẽzani hã te oto duré aipẽ'ẽ 're, 're sãmra u'âsi za'ra wa'wa. E ãne hã 'râwi asina waihu'u za'ra wa'aba õ di bété.

1 Corĩtu 6:19

'Re ihâimana u'âsi mono pẽ'ẽzani si, te oto aipẽ'ẽ 're ai'ãma 're sõrõwa za'ra wa'wa. Aipẽ'ẽ 're, te oto aima 're hâimana u'âsi za'ra wa'wa. 'Re ihâimana u'âsi mono hã ma tô te te aima 're sõmri za'ra wa'wa. Tahawa, aihâiba za'ra wa'wa hã ate za'ra wa'aba õ di oto. 'Re ihâimana u'âsi mono te si, te oto aihâiba za'ra wa'wa hã 're hâimana za'ra. E ãne hã zahadu asina waihu'u za'ra wa'aba õ di.

2 Corĩtu 6:16

Romhâiba 'manharĩ hã ãma 're idawata za'ra mono zé hã, e 'Re ihâimana u'âsi mono nhorõwa 'ri 're, te aré da te 're sa'ra, 'ri wa. Mare di. E marĩ wa. Aiwab õ wa, dama hã. Tane duré, wa norĩ hã 'Re ihâimana u'âsi mono ãma 're iwata za'ra mono õ norĩ siré, 're wahâimana waihu'u za'ra mono õ di za oto. E marĩ wa. 'Re ihâimana u'âsi mono hã wapẽ'ẽ 're, wa'ãma 're sõrõwa za'ra mono wa oto. Tahawa, 'Re ihâimana u'âsi mono nhorõwa ne, wa oto 're wahâimana za'ra wasiré isazei'wa norĩ hã, 'ri 'rãihâ wam ne, wapẽ'ẽ 're, 're sãmra mono wa oto. Duréihã 'Re ihâimana u'âsi mono zadawa 'mahârâ'wa norĩ hã ma tô imreme na rob'ui'éré za'ra, romhâ ré isib'a'uwẽ norĩ ãma hã, ãne: “Ĩnhib'a'uwẽ norĩ siré, wa za oto 're ĩhâimana u'âsi za'ra, 'râwi i'rata. Wa za duré tô isiré 're ĩmorĩ u'âsi za'ra. Isib'apito, wa za oto tãma 're ĩhâimana za'ra. Tawamhã ĩnhib'a'uwẽ te za duré ĩma 're hâimana za'ra.”

1 Zuwã 3:24

Ni'wam norĩ hã 'Re ihâimana u'âsi mono nhimiroti te te 're 'madâ'â pese za'ra mono wamhã, tô sena te ta norĩ hã ãma 're hâimana za'ra, 'Re ihâimana u'âsi mono ãma. Ta hã te duré i'rata 're sãmra u'âsi za'ra, 'râwi. E niha wa za tawamhã, wasina waihu'u pese za'ra ni, 'Re ihâimana u'âsi mono, wa'rata 're isãmra u'âsi mono zém na hã. Ta hã ma tô Tipẽ'ẽzani hã te te wama 're anhomri, wapẽ'ẽ 're, 're sãmra mono da, uburé marĩ hã te te wama 're awaihu'u mono da. Taha na wa za wasina waihu'u za'ra ni, wa'rata 're isãmra mono na, 'Re ihâimana u'âsi mono hã.

1 Zuwã 4:13

E niha wa za wasina waihu'u pese za'ra ni, 'Re ihâimana u'âsi mono ãma si 're iwanomro mono na, duré õhõ si wa'rata 're isãmra u'âsi mono na. 'Re ihâimana u'âsi mono hã ma tô Tipẽ'ẽzani hã te te wama 're anhomri. Taha na wa za wa te wasina 're waihu'u pese za'ra.

1 Zuwã 4:16

'Re ihâimana u'âsi mono hã simizawi pese uptabi di. Tane ni'wam norĩ hã te te 're dazawi pese za'ra mono wamhã, ta norĩ si te 'Re ihâimana u'âsi mono ãma 're hâimana za'ra, 'râwi. Ta norĩ 'ratap si te duré 'Re ihâimana u'âsi mono hã 're sãmra, 'râwi. 'Re ihâimana u'âsi mono te te 're iwa'azawi pese mono zé hã wama waihu'u pese za'ra di oto. Taha na wa te wasiwi ãma 're wawã za'ra mono õ di za oto.