Éfézu 2:10 - ꞌRe Ihâimana Uꞌâsi Mono Zadawa Wasuꞌu

¹⁰ Cristu Zezusihi ãma 're wanomro mono wa, ma tô 'Re ihâimana u'âsi mono hã wama sõmri za'ra wahâimanazé ité hã, wa te ãma dama 're rob'manharĩ wẽ za'ra mono da, duré iwẽ na wa te 're dapawaptob za'ra mono da ãma, te te wa'ãma iroti siromo zéb zarina.

Éfézu 2:10 ပူးပေါင်းရင်းမြစ်များ

Salmu 100:3

Ma'ãpé, Uburé Danhib'apito ãma 're aipo're pu'u za'ra wa'aba mono, ta hã 'Re ihâimana u'âsi mono wa. Ta hã ma tô te te 're wa'apoto. Tahawa, wa ite na tãma 're wahâimana za'ra. Duré isib'a'uwẽ na wa tãma 're wahâimana za'ra, ite pone'ẽrebâ ne.

Salmu 119:3

Marĩ iwasédé te te 're i'manharĩ waihu'u za'ra mono õ norĩ si, te to sina 're nomro, Uburé Danhib'apito nhirã zarina si 're ihâimana za'ra mono norĩ hã.

Salmu 51:10

'Re ihâimana u'âsi mono, ma'ãpé ĩpẽ ĩpe hã sena uptabi hã ĩma sõmri. Ma'ãpé ipẽ'ẽ 're ĩnhiptede ité hã apâ ĩma sõmri.

Mateu 5:16

Tane duré, a norĩ wa'wa hã te za sõ'awi dama 're aihâimana za'ra wa'aba mo, rob'uiwẽzé hã sõ'awi te te dama 're irob'uiwẽ za'ra mono ne. Uburé marĩ hã te za dama 're i'manharĩ wẽ u'âsi za'ra wa'aba mo, dama 're i'manharĩ wẽ za'ra wa'aba mono zé hã da te 're i'madâ'â za'ra mono zéb zarina, Aimama za'ra wa'aba ãma 're dawata za'ra mono da, hâiwa ãma 're isãmra mono ãma.

Zuwã 3:21

'Re inomro wẽ mono norĩ si te za itẽme 're nomro, rowa'a u. E marĩ da. 'Re ihâimana u'âsi mono nhimiroti si te te 're i'madâ'â pese mono na, te te 're awaihu'u mono da.

Zezusihi zadawa wasuꞌuꞌwa norĩ nhimiromhuri na robꞌuiꞌéré 9:31

Tawamhã isazei'wa norĩ ma, rowẽ di oto, Zudéa ãma, duré Galiléa ãma, duré Samaria ãma zama. Uburé tãma rowẽ za'ra di oto, siré 're isi'rã'õtõ mono norĩ ma hã daro mono bâ. 'Re ihâimana u'âsi mono pẽ'ẽzani nhimipawaptobzém na ma tô isazei'wa norĩ hã 're hâimana nhiptete za'ra. Taha zarina, ma tô duré isazei'wa norĩ za'rada hã sina hâimo. Ta norĩ hã ma tô Wanhib'apito Zezusi hã te te 're wazé pese za'ra.

Zezusihi zadawa wasuꞌuꞌwa norĩ nhimiromhuri na robꞌuiꞌéré 9:36

Tawamhã pi'õ hã Zezusihi nhirã zarina 're imorĩ hã te 're hâimana, Zopi na 'ri nho'õmo nhisi ãma. Tabita na pi'õ nhisi hã. Gregu norĩ nhiminhisizém na Docasi na isisi amo hã. Isibrob'õ norĩ ãma te 're siwãrĩ u'âsi, Docasi hã. Marĩ iwẽ si te te dama 're ab'manharĩ u'âsi.

Roma 8:1

Cristu Zezusihi ãma 're inomro mono norĩ hã, 'Re ihâimana u'âsi mono te te siwi 're i'awẽ'õ mono zé hã hâimana õ di oto. Taha zarina, te te duré oto 're ahâ za'ra mono õ di za.

Roma 8:29

Duréihã marĩ õ ré hã, 'Re ihâimana u'âsi mono te te sima ãma irotizéb zarina, te te sima 're iwa'apisutu mono norĩ hã, i'ra ne, tô Zezusihi ne, oto 're wahâimana za'ra mono da, ma tô duré te te 're wa'apisutu siro. Ta hã uburé isazei'wa norĩ dub'rada, 're hâimana mono da, ma tô ãne te te 're wa'apisutu siro, sima.

2 Corĩtu 5:17

Ni'wam norĩ hã Cristu te te 're saze za'ra mono wa, simisutu tihâiba na sina 're sitob za'ra mono wamhã, 're idapoto téb za'ra mono zéb ré si, te za oto 're hâimana za'ra. Tahawa, te za 're inomro 'rata mono zé hã tãma 're si'utõrĩ za'ra. Ãhã wamhã, 're ihâimana 'rata za'ra mono zé hã tâibâ za oto. Taha wa'rãmi, te za oto 're idahâimana téb za'ra mono zém na si 're hâimana za'ra, iwẽ na si.

2 Corĩtu 5:5

'Re ihâimana u'âsi mono si, ma tô te te wama 're apisutu siro, ãne hã. Tipẽ'ẽzani hã ma tô te te wama 're anhomri, sena na wahâiba ité hã za te te wama 're i'anhomri mono na, wa te wasina 're waihu'u za'ra mono da.

2 Corĩtu 9:8

'Re ihâimana u'âsi mono hã waihu'u pese uptabi di, uburé marĩ iwẽ hã te te aima 're i'anhomri aba mono da hã, marĩ zô aiwi 're rowaptâ'â za'ra wa'aba mono tõ da, ãma 're aihâimana za'ra wa'aba mono zéb da hã, duré ãma 're idapawaptob za'ra wa'aba mono zéb da hã.

Galata 6:15

Danhihâiwata nhihâri ré si, 're idahâimana za'ra mono zé hã, marĩ dai õ di, 'Re ihâimana u'âsi mono ma hã. Duré danhihâiwata nhihâri ãna 're idahâimana za'ra mono zéb zama hã marĩ dai õ di, tãma hã. Dahâimanazép tém na, iwẽ na si oto 're idahâimana za'ra mono hã, taha si tãma hã iwẽ uptabi.

Éfézu 1:1

Wa hã Paulu, Cristu Zezusihi zadawa wasu'u'wa, wa 're ĩhâimana, 'Re ihâimana u'âsi mono te te sima ĩwẽzéb zarina. Tahawa, wa ãma aima rob'ui'éré za'ra wa'wa, Éfézu na 'ri nho'õmo nhisi ãma, 'Re ihâimana u'âsi mono nhib'a'uwẽ, 're i'aihâimana za'ra wa'aba mono norĩ ma. A norĩ wa'wa hã ma tô õne u'â Zezusihi ãma si 're anomro aba mo, aihâimana nhiptete sina.

Éfézu 1:4

Ta hã ti'a te te poto õ ré, ma tô romhâ ré te te 're wa'apisutu siro, tinhib'a'uwẽ da, Cristuhu ãma za 're wanomro mono wa, wawẽ uptabi na ãma 're wanomro mono da, marĩ, wa te 're 'manharĩ wasété za'ra mono ãna. Ta hã te te 're wa'apoto mono õ ré, ma tô romhâ ré te te 're wa'azawi pese.

Éfézu 2:13

Tane nherẽ, dasisiti 're idahâimana za'ra mono ne, 'Re ihâimana u'âsi mono nhiti, romhâ na 're aihâimana za'ra wa'aba mono õ di oto, asimirosa'rata aba na. Cristu hã wazada idâ'âzéb zarina, ma tô Wamama hã sitẽme ai'ãwisi za'ra wa'wa, Cristu Zezusihi ãma oto 're anomro aba mono da, 'râwi i'rata 're aihâimana za'ra wa'aba mono da oto, asimirosa'rata aba na hã.

Éfézu 2:15

'Re ihâimana u'âsi mono nhimiroti 'rata na rob'ui'éré hã sa'ẽtẽ na ma tô zudeu norĩ ma si 're hâimana za'ra, marĩ hã te te tãma ãma 're i'uwaimrami za'ra mono zéb da hã, taha zarina iwasédé hã te te tãma 're i'apari mono zéb da hã duré. Cristu hã wazada idâ'âzéb zarina, tâibâ oto 'Re ihâimana u'âsi mono nhimiroti 'rada hã, marĩ na dawasédé hã te te dama 're i'apari mono zéb da hã. Misi dahâiba ne, aiwapsi wa oto 're wahâimana za'ra, zudeu norĩ, zudeu'õ norĩ me, wahâimanazép tém na si, iwẽ na si ãma 're wanomro mono da, duré wasisawi pese sina oto 're wahâimana za'ra mono da wasiré.

Éfézu 2:2

Isazei'õ'wai hâimanazém na ma tô aré 're aihâimana za'ra wa'aba mo, wa'uburé norĩ nhib'apito nhimiroti na zama. Hâiwa nho're ãma te ta norĩ hã 're hâimana za'ra. Isimiroti hã tãma pire za'ra di, ipo're'õ norĩ ma hã. Tahawa, te ta norĩ hã isimiroti na si 're nomro, 'Re ihâimana u'âsi mono wapari'õ'wa norĩ hã.

Éfézu 2:6

Ta hã Cristu ab're hawi te te ihâiwa'utu ne, ma tô wapẽ'ẽ 're te te 're wa'ahâiwa'utu, hâiwa ãma 're wasi'ubumroi u'âsi mono da, Cristu Zezusihi 'rata.

Éfézu 4:1

Tahawa, wa za aima roti za'ra wa'wa, Wanhib'apito ma romhuri'wa 're ĩmorĩ 'ru te, dazazéb 're da te dasiwi 're ĩzai mono wa, 're ĩza mono ré. Ma'ãpé dama 're aihâimana wẽ za'ra wa'aba mono za, 'Re ihâimana u'âsi mono te te sima 're i'aiwẽ za'ra wa'aba mono zéb uwaibaba. Taha da, ma tô te te sima 're aipisutu za'ra wa'wa.

Éfézu 4:24

Da'uza hã ihâ tém na 're idasi'uza za'ra mono ne, te za oto aihâimanazép tém na si 're aihâimana za'ra wa'aba mo, iwẽ na si. Taha da, ma tô 'Re ihâimana u'âsi mono hã aipoto téb za'ra wa'wa aipẽ'ẽ 're, isine 're anomro wẽ wa'aba mono da, tô sena na duré dama 're aihâimana wẽ za'ra wa'aba mono da oto.

Filipu 1:6

Ta hã te te asõ'reptu za'ra wa'aba zém na, iwẽ na te te ai'ãma isãna'rata za'ra wa'aba zéb zarina, te za te te 're aipawaptob u'âsi za'ra wa'wa õne u'â, ti'ai u apâ we imorĩzéb u, Cristu Zezusi hã. Taha õ ré, te te aiwi sazâri waihu'u za'ra wa'aba õ di za, te te 're aipawaptob za'ra wa'aba mono zé hã. Iwẽ si te za tô te te aima 're 'manharĩ u'âsi za'ra wa'wa, ãma 're anomro wẽ u'âsi aba mono da. Ãne wa tô ai'ãma waihu'u za'ra wa'wa, tô sena na.

Filipu 2:13

E marĩ wa. 'Re ihâimana u'âsi mono hã aipẽ'ẽ 're, te te ai'ãma 're romhuri u'âsi za'ra wa'aba mono wa, isimipawaptobzém na marĩ na ãma 're sazei pese za'ra wa'aba mono da, duré taha zarina i'uwaibaba si marĩ hã tãma 're 'manharĩ wẽ za'ra wa'aba mono da, te te sima 're i'aiwẽ za'ra wa'aba mono zéb uwaibaba.

Colosu 1:10

Tawapsi, te za Wanhib'apito zazei'wa hâimanazéb zarina 're anomro wẽ wa'aba mono zém na, tãma ãma asina 're i'uwaimrami za'ra wa'aba mo. Marĩ iwẽ si 're 'manharĩ za'ra wa'aba mono wamhã, Wanhib'apito hã te za toi uptabi na aihâimanazém na te te 're ai'uzei pese za'ra wa'wa. Tawamhã 're aihâimana wẽ za'ra wa'aba mono zém hawi, te za tô marĩ 're i'manharĩ wẽ za'ra wa'aba mono zém na asima 're isa'ẽtẽ za'ra wa'aba mo. Tawamhã 'Re ihâimana u'âsi mono hã iwaihu'u za'ra wa'aba zém na te za duré asima 're isa'ẽtẽ za'ra wa'aba mo, asi'uihâ na.

Colosu 3:10

Taha wa'rãmi, te oto 're idanomro mono zé itém na si 're anomro aba mo, iwẽ na. 'Re ihâimana u'âsi mono, ma tô te te 're aipoto téb za'ra wa'wa aipẽ'ẽ 're, isine 're aihâimana u'âsi za'ra wa'aba mono da oto, taha zarina õhõ si duré 're waihu'u pese za'ra wa'aba mono da.

1 Timotiu 6:18

Ãne te za duré isibrob ahâ norĩ ma 're i'aroti mo, te te dama 're 'manharĩ wẽ u'âsi za'ra mono da. Te za duré uburé marĩ wẽ na dama 're sõprub za'ra. Te za duré simi'ẽ na marĩ na te te 're dazari u'âsi za'ra.

2 Timotiu 2:21

Tane ni'wam norĩ hã te aima iwaihu'u mono zéb zarina, tô senai'õ na rowasu'u'wa nhimiroti hã te te siwi 're wẽ'õ pese za'ra mono wamhã, Wanhib'apito ma, wẽ uptabi di za, romhuri hã za te te tãma 're i'apisutu mono da hã. Ãne wa, Wanhib'apito ma, sisõmri za'ra wa, te za tãma pisutu za'ra, iwẽ na te te tãma 're dapawaptob za'ra mono da.

2 Timotiu 3:17

Taha da, te dama 're hâimana, 'Re ihâimana u'âsi mono nhimiroti hã, tãma iromhuri'wa norĩ ma iwaihu'u pese zéb zarina, iwẽ na te te tãma ãma 're idapawaptob za'ra mono zéb da hã.

Titu 2:14

Ta hã ma tô wazada sisõmri za'ra, wazada dâ'â za'ra da, 're iwanomro wasété mono hawi, te te 're wa'anho'reptui mono da, isib'a'uwẽ si 're wahâimana za'ra mono da oto. E marĩ da. Sena na 're wanomro mono da, duré wawa'a ãna iwẽ na si wa te oto 're dapawaptob za'ra mono da.

Titu 2:7

A hã aihâimana wẽ na, te za dama ãma 're asanho mo, asirã zarina si 're danomro wẽ mono da. Dama 're rowahutu mono wamhã, aimreme tô sena na si, te za duré dama 're irowahutu mo.

Titu 3:1

Titu, isazei'wa norĩ hã te za 're i'apo're pu'u u'âsi mo, dama ipire norĩ nhimiroti si, duré roti'wa norĩ nhimiroti zama, te te 're wapari pese za'ra mono da. Simi'ẽ na te za imreme hã te te tãma ãma 're uwaimrami za'ra.

Titu 3:14

Wa tô ĩsima wẽ, wasiré isazei'wa norĩ hã marĩ zô dawi 're ro'wanhi'riti za'ra mono wamhã, te te 're dapawaptob za'ra mono da, taré 're hâimana za'ra mono tõ da, dapawaptob ãna.

Titu 3:8

Te aima irowasu'uzé hã tô sena. Tahawa, te za isazei'wa norĩ ma 're i'aroti mo, marĩ wẽ na te te 're dapawaptob u'âsi za'ra mono da. Te aima 're irowasu'u mono zé hã wẽ uptabi di, dama 're irowẽ za'ra mono zéb da hã.

Hebreu 10:24

Wa za duré wasi'ãma hã 're wapo're pu'u u'âsi za'ra, marĩ na 're iwasipawaptob za'ra mono zéb da na, duré taha zarina 're iwasisawi pese za'ra mono zém na wa te wasima ãma 're i'uwaimrami za'ra mono zéb da na, duré marĩ wẽ na wa te wasima ãma 're iwa'rãmi wẽ za'ra mono zém na da zama.

1 Pedru 2:12

A norĩ wa'wa hã Wanhib'apito zazei'õ'wa norĩ wazari, te 're aihâimana za'ra wa'aba mo. Tahawa, te za aihâimana wẽ na si dama 're aihâimana za'ra wa'aba mo. Tawamhã aihâimana wasété na, taré da te aima 're nharĩ za'ra wa'aba mono nherẽ, te za da te 're aiwaihu'u za'ra wa'wa, dama 're aihâimana wẽ za'ra wa'aba mono zém na. Tawamhã Cristu hã apâ wei morĩ wapsi, te za 'Re ihâimana u'âsi mono ãma tawata za'ra ni, isimiroti zarina aihâimana wẽ na, dama 're aihâimana za'ra wa'aba mono wa.

1 Zuwã 1:7

Tane nherẽ, 'Re ihâimana u'âsi mono nhimiroti zarina 're wahâimana za'ra mono wamhã, rowa'a na 're ihâimana mono ne, wa za duré wa norĩ hã rowa'a na 're wahâimana za'ra. Taha zarina, wa za duré 'râwi wasiré ãma 're wahâimana za'ra, wasisawi pese za'ra sina. 'Re ihâimana u'âsi mono 'ra hã te za duré wawasédé hã te te wama 're apari tidâ'âzém na Zezusi hã, wawasété ãna oto ãma 're wanomro mono da.