Éfézu 1:21 - ꞌRe Ihâimana Uꞌâsi Mono Zadawa Wasuꞌu

²¹ Tame te pire uptabi na dama 're hâimana, pire na hâiwa ãma 're ihâimana za'ra mono norĩ ma, duré tame siptete na 're ihâimana za'ra mono norĩ ma zama. Taha na dâ'âsina wa, ti'ai ãma duré hâiwa ãma zama tipire na te te ãma siwi wabzu za'ra õ di, dama ipire za'ra norĩ hã. Õne u'â te za tipire na te te 're da'a'rãnhipai u'âsi.

Éfézu 1:21 ပူးပေါင်းရင်းမြစ်များ

Daniéu 7:27

Tawamhã ti'ai ãma da'madâ'âzé hã duré danhimiroti nhiptetezé hã te za uburé danhipai u Isiptede 'Re ihâimana u'âsi mono nhib'a'uwẽ ma hã tãma sõmri za'ra ni. Ta norĩ hã te za ti'ai mono bâ uburé pese õne u'â te te 're da'madâ'â za'ra. Tahawa, uburé pese dapoto mono bâ te za tãma 're dahâimana za'ra. Te za duré isimiroti hã uburé da te 're wapari pese za'ra.

Mateu 12:32

Duré ni'wam norĩ hã dasiré ĩpoto ãma te te ĩ'ãma 're wasété za'ra mono wa, oto tiwasété na 'Re ihâimana u'âsi mono ma, 're siwasu'u za'ra mono wamhã, tãma waihu'u pese di, ãne hã iwasédé hã te te tãma 're i'apari mono zéb da hã, te te oto ãma 're 'madâ'â za'ra mono tõ da. Tane nherẽ, ni'wam norĩ hã 'Re ihâimana u'âsi mono pẽ'ẽzani ãma te te 're wasété za'ra mono wamhã, te za taha na iwasédé hã te te ãma 're a'madâ'â u'âsi, 'Re ihâimana u'âsi mono hã.

Zezusihi zadawa wasuꞌuꞌwa norĩ nhimiromhuri na robꞌuiꞌéré 4:12

Danho'reptuzé hã, Zezusihi ãma si te za da te 're sõpẽtẽ za'ra. Ni'wa hã, aimawi hã 'Re ihâimana u'âsi mono te te dama pisutu õ di, ti'ai ãma te te 're ida'anho'reptui mono da hã. Tahawa, Zezusihi si uburé Danho'reptui'wa hã.

Éfézu 2:2

Isazei'õ'wai hâimanazém na ma tô aré 're aihâimana za'ra wa'aba mo, wa'uburé norĩ nhib'apito nhimiroti na zama. Hâiwa nho're ãma te ta norĩ hã 're hâimana za'ra. Isimiroti hã tãma pire za'ra di, ipo're'õ norĩ ma hã. Tahawa, te ta norĩ hã isimiroti na si 're nomro, 'Re ihâimana u'âsi mono wapari'õ'wa norĩ hã.

Éfézu 3:10

Ta hã ma tô sima wẽ, hâiwa ãma pire na 're ihâimana za'ra mono norĩ hã te te waihu'u za'ra da oto, hâiwa hawi dahâimanazém na rowaihu'u wẽ hã ahâ na tãma 're ihâimana mono na hã. Simisutu isib'a'uwẽ norĩ hã oto tãma 're hâimana za'ra mono wa, te za oto ãne na waihu'u za'ra, duréihã te te sima da'ãma irotizé hã te te da'ãma uwaimrami wa, Wanhib'apito Cristu Zezusi te te ida'anho'reptuzéb zarina.

Éfézu 6:12

Wa norĩ hã wasiré 're iwahâimana za'ra mono norĩ me, 're wasi'wapé za'ra mono õ di. Wa'uburé norĩ me si, wa za 're wasi'wapé za'ra, hâiwa nho're ãma simiroti wasété na 're ihâimana za'ra mono norĩ me. Wa'uburé norĩ hã ti'ai ãma dapo're'õ na 're idanomro mono norĩ ma hã, simiroti pire di, Wanhib'apito nhimiroti waihu'u'õ'wa ta norĩ hã 're nomro mono wa.

Colosu 2:10

Tane duré a norĩ wa'wa hã, Cristuhu ãma 're anomro aba mono wa, marĩ zô aiwi 're rowaptâ'â za'ra wa'aba mono õ di, rowẽ na ãma 're i'anomro u'âsi aba mono zéb da hã. Cristu hã uburé ihâiba'õ norĩ 'madâ'â'wa norĩ nhipai u, te pire uptabi na õhõ si 're hâimana u'âsi, siwaprosi.

Colosu 2:15

Uburé hâiwa nho're ãma ihâiba'õ norĩ nhiptetezé hã ma tô tiwi uprosi za'ra 'Re ihâimana u'âsi mono hã, dapo're'õ norĩ ma simiroti pire na tãma 're ihâimana za'ra mono norĩ nhiptetezé hã aré. Da'wapéi'wa norĩ nhib'apito hã tinhitob'ru norĩ ãma te te ai'uté za'ra wẽ te, da'ahâ nho'a sisarina te te isimroi mono ne, ma tô danho'a ta norĩ ãma ai'uté za'ra, wedepo'o nhonhi'rãmi na Cristuhu dâ'âzém na hã, Cristuhu ma wapu na 're ihâimana za'ra mono na, uburé da te oto ãma 're waihu'u za'ra mono da.

Hebreu 1:4

Imama hã ma tô isisi hã tãma pisutu, sisi pire da, 'Re ihâimana u'âsi mono 'ra na isisi da hã, uburé hâiwa ãma tãma iromhuri'wa norĩ nhisi ma, pire uptabi da. Tane ma duré Imama hã pisutu, hâiwa ãma romhuri'wa norĩ ma, pire uptabi na 're hâimana mono da oto, i'ra hã.

Hebreu 2:5

Za 're idahâimana téb za'ra mono na, wa tô aima ãma rowasu'u pari za'ra wa'wa. E tahawa, te za hâiwa ãma tãma iromhuri'wa norĩ hã pisutu za'ra 'Re ihâimana u'âsi mono hã, ta norĩ hã pire na te te 're da'madâ'â za'ra mono da, za 're idahâimana téb za'ra mono ãma hã. Mare di. Ta norĩ hã danhib'apito da, te te pisutu za'ra õ di.

Hebreu 4:14

Sasedoti ipire uptabi na te tô ni'wa hã te te wa'ãma 're romhuri u'âsi. Ta hã Zezusi, 'Re ihâimana u'âsi mono 'ra. Timama u ma tô mo hâiwa u, 'râwi te te tiwi 're rowaptẽrẽ u'âsi mono da, wama za'ra. Tahawa, Zezusi, wa te 're isaze za'ra mono zém na tô sena dama 're iwasiwasu'u za'ra mono zéb zarina, wa za tô ta hawim haré wanhiptete sina ãma 're wahâimana u'âsi za'ra.

1 Pedru 3:22

Cristu hã hâiwa u morĩ wa, te oto pire na Timama nhimire niwĩ 're sãmra, Danho'reptui'wa hã. 'Re ihâimana u'âsi mono ma romhuri'wa norĩ 'madâ'â'wa, te 're hâimana. Uburé hâiwa nho're ãma, pire na duré waihu'u pese na 're ihâimana za'ra mono norĩ ma zama, te pire uptabi na hã tãma 're hâimana za'ra.