Éfézu 1:18 - ꞌRe Ihâimana Uꞌâsi Mono Zadawa Wasuꞌu18-19 Wa hã wa ĩsima wẽ, 'Re ihâimana u'âsi mono te te 're aipawaptob za'ra wa'aba mono da, isimiroti hã 're waihu'u pese za'ra wa'aba mono da, duré rowẽ uptabi zô te te i'aipisutu za'ra wa'aba zé wasu'u hã, 're waihu'u za'ra wa'aba mono da. Duré uburé marĩ iwẽ uptabi na wama 're isõprub za'ra mono zéb da hã tinhib'a'uwẽ norĩ ma, te te iropisutuzéb zarina, taha wasu'u zama 're waihu'u za'ra wa'aba mono da, wa ĩsima te 're aiwẽ za'ra wa'wa. အခန်းကိုကြည့်ပါ။ |
Éfézu 1:18
49 ပူးပေါင်းရင်းမြစ်များ
E marĩ wa. Dapẽ'ẽ 're, da te 're irosa'rata za'ra mono zé hã sitom haré te za iré 're dahâimana u'âsi za'ra, da te ĩ'ãma 're rosa'rata wẽ za'ra mono õ wa. Dapo're nhitom haré, te za duré 're dahâimana za'ra, ĩnhimiroti hã da te 're wapari ze za'ra mono õ wa. Duré datõmo nhitom haré te za 're dahâimana za'ra, ĩnhimiromhuri hã dama 'madâ'â zei õ wa. Ãnei õ 'wa'âhã, te aré ĩnhimiromhuri hã da te 're 'madâ'â ze za'ra, datõmo na. Te aré duré dapo're na da te 're wapari ze za'ra, ĩnhimiroti hã. Te aré duré da te 're ĩwaihu'u pese za'ra, dapẽ'ẽ 're, da te ĩ'ãma 're rosa'rata wẽ za'ra mono wa. Taha zarina si, te aré duré ĩtẽme 're dasipizari za'ra, dawasété wi hã. Tawamhã dahâzé wa, da te 're idapese za'ra mono ne, wa aré dawasédé hã te dama 're apari, te da'ãma 're ab'madâ'â tõ mono da hã oto.”
Tame te pi'õ hã nhamra, Lidia na isisi hã. Tiatira na 'ri nho'õmo nhisi ãma 're isãmra mono aré ta hã, Lidia hã. Zazahâ iwẽ hã te te dama 're i'awede mono, ihâpré pe hã. Ta hã, 'Re ihâimana u'âsi mono ãma 're iwata mono duré. Tawamhã Pauluhu nhimirowasu'u te te wapari wamhã, Wanhib'apito hã ma tô pawapto, te te ãma saze da.
Datob'a ne 're danomro mono wa, da te 're idato pese za'ra mono ne, te za 'Re ihâimana u'âsi mono nhimiroti na 're ipo're pu'u za'ra mo, zudeu'õ norĩ hã. Robra na 're inomro mono hã te za 're i'awaibui mo, rowa'a na oto 're nomro mono da, ta norĩ hã. Satanasihi nhiptetezém hawi te za 're i'apizari mo, 'Re ihâimana u'âsi mono niwĩ 're nomro mono da oto, te te sina 're ĩ'umnhasi za'ra mono zéb zarina, 'Re ihâimana u'âsi mono hã iwasédé hã te te tãma 're apari mono da, duré ãma 're sib'a'uwẽ za'ra mono da oto dame.” Tawamhã Paulu te duré siwasu'u, ãne:
Ãté te za ãne asima 're inharĩ za'ra wa'aba mo: “'Re ihâimana u'âsi mono hã simizawi pese uptabi di. Dasi'uihâ na dawasédé hã da te 're 'manharĩ u'âsi za'ra mono nherẽ, da'ãma 're wa'a su'u mono õ di. Tahawa, ĩwasédé te 're 'manharĩ mono nherẽ, te te 're ĩ'ahâri su'u mono õ di.” Ãne hã asi'uihâ na asi'ãma 're rosa'rata za'ra wa'aba mono õ di za. 'Re ihâimana u'âsi mono hã aiwasété wi 're aipizari za'ra wa'aba mono da si, te simi'ẽ na te te 're ai'madâ'â za'ra wa'wa, simizawi pese uptabi na. E ãne hã zahadu aima waihu'u za'ra wa'aba õ di bété.
Ta norĩ hã, Cristu te te 're saze za'ra mono õ wa, ma tô Wa'uburé hã ipo're'õ norĩ nhib'apito hã te te 're apo're nhito, tob'a ne 're hâimana za'ra mono da. Tahawa, Cristuhu wasu'uwẽ hã wẽ uptabi nherẽ, rob'uiwẽzém ne, te te dama 're rowa'a za'ra mono nherẽ, te te 're waihu'u za'ra mono õ di, ta norĩ hã. Cristu hã aiwa Timama ne 're morĩ wẽ uptabi nherẽ, ta norĩ hã te te siwi 're waihu'u za'ra mono õ di, sena na iwasu'uwẽ na hã.
Duréihã ropoto na'rata hawimhã, 'Re ihâimana u'âsi mono ma tô tinha, ãne: “Ãhã na hã robra si 're asa'wari mono nherẽ, oto airowa'a na.” Ãne te tinha. Tane ma tô duré wapẽ'ẽ 're, te te wama 're arowa'a oto, isadawa wasu'u hã wa te oto ãma 're iwaihu'u pese za'ra mono zéb da hã. Cristu hã ma tô wama waihu'u za'ra, Imama 're imorĩ wẽ uptabi na hã.
Ãnei õ di, wa norĩ hã. Cristu Danho'reptui'wa na, wa tô wasina wa te 're saze za'ra. Taha zarina, wa wasina sô 're wanhimipari za'ra, rob'rãsutuzéb ãma, 'Re ihâimana u'âsi mono te te wama iwaihu'u za'ra zéb zô, wawasédé te te oto wa'ãma 're i'ab'madâ'â mono õ zéb zarina, te te 're iwa'awẽsãmri mono zém na. Ãne 'Re ihâimana u'âsi mono pẽ'ẽzani te te wama 're i'awaihu'u mono zéb zarina, wa wasina sô 're wanhimipari za'ra oto.
'Re ihâimana u'âsi mono hã marĩ na te te sima 're aroti mono wamhã, te za tô te te ãma 're a'uwaimrami. Ta hã ma tô wa'apisutu siro, isib'a'uwẽ 're wanomro mono da, Cristuhu ãma za 're wanomro mono wa. Ãne duréihã te te wa'ãma sima irotizéb zarina, ma tô wa'ãma uwaimrami za'ra, danho'reptui'wa zô 're iwanhimipari 'rata za'ra mono norĩ ma, ãma 're iwawata u'âsi za'ra mono zéb da hã.
Cristu hã wedepo'o nhonhi'rãmi na wazada dâ'â wamhã, ma tô tidâ'âzém na wa'awa'â. Marĩ, wa te 're i'manharĩ wasété za'ra mono zé hã ma tô duré te te wama 're apari, wawasédé hã te te wa'ãma 're ab'madâ'â tõ mono da oto. Ãne wamhã, ma tô Wamama hã wa'ãma uwaimrami wẽ, sa'ẽtẽ na tãma 're hâimana mono wa, te te 're iwa'azawi pese mono zé hã.
Wamama te hã iwaihu'upe hã, te sa'ẽtẽ na 're hâimana tãma. Ãne wa, wa tiwi te 're rowaptẽrẽ u'âsi, aima za'ra wa'aba, Tipẽ'ẽzani na te te 're aipawaptob u'âsi za'ra wa'aba mono da, aihâimana nhiptete sina, ãma 're aihâimana u'âsi za'ra wa'aba mono da, Cristu hã aipẽ'ẽ 're, 're sãmra u'âsi za'ra wa'aba mono da, iwaihu'u pese na asina 're i'umnhasi za'ra wa'aba mono zéb zarina. Wa duré aima za'ra wa'aba, te tiwi 're rowaptẽrẽ u'âsi, te te 're aipawaptob u'âsi za'ra wa'aba mono da, dazawizé hã aima 're ihâimana za'ra wa'aba mono zéb zarina, dama 're 'manharĩ wẽ u'âsi za'ra wa'aba mono da. Dazawizé hã sa'ẽtẽ uptabi na, te Cristuhu ma 're hâimana. Ãne wamhã, uburé asiré isazei'wa norĩ me, te te 're asawi pese za'ra wa'aba mono na, 'râwi asina 're waihu'u za'ra wa'aba mono da, wa ĩsima te 're aiwẽ za'ra wa'wa, ti'ab ré wa te wasina 're waihu'u uptabi za'ra mono õ nherẽ, Cristu te te 're iwa'azawi pese mono zé hã. E marĩ da. Uburé marĩ iwẽ si, 'Re ihâimana u'âsi mono ma 're ihâimana za'ra mono ne, aima zama 're hâimana za'ra wa'aba mono da, dazawizé hã, duré dahâimanazém na rowaihu'u wẽ zéb zama hã.
Tahawa, wa za aima roti za'ra wa'wa, Wanhib'apito ma romhuri'wa 're ĩmorĩ 'ru te, dazazéb 're da te dasiwi 're ĩzai mono wa, 're ĩza mono ré. Ma'ãpé dama 're aihâimana wẽ za'ra wa'aba mono za, 'Re ihâimana u'âsi mono te te sima 're i'aiwẽ za'ra wa'aba mono zéb uwaibaba. Taha da, ma tô te te sima 're aipisutu za'ra wa'wa.
Cristuhu nhib'a'uwẽ mono bâ misi dahâiba ne, wa simisutu oto 're wahâimana za'ra. Misi te Ipẽ'ẽzani hã 're hâimana. Taha si te wama 're hâimana za'ra, wapẽ'ẽ mono bâ. Duré õhõ zô si wa 're wanhimipari za'ra oto, rowẽ uptabi zô. Taha zô 're asimipari za'ra wa'aba mono da, ma tô tinhib'a'uwẽ da, aipisutu za'ra wa'wa, 'Re ihâimana u'âsi mono hã.
A norĩ wa'wa hã roti sena hã aré waihu'u za'ra wa'aba õ di, Cristuhu nhimiroti hã. Tahawa, datob'a na 're idanomro mono ne, ma tô aré robra na 're anomro aba mo, aiwasété na. Cristuhu ãma oto 're anomro aba mono wa, rowa'a na damorĩ wẽ na 're idanomro mono ne, te oto isimiroti ré 're anomro aba mo. Tahawa, te za oto ãma 're anomro wẽ wa'aba mono sina, 're aihâimana za'ra wa'aba mo. Ni'wam norĩ hã Wanhib'apito nhimiroti na 're nomro mono wamhã, te za te te dama 're rob'manharĩ wẽ za'ra. Te za duré 're nomro wẽ. Duré tô sena na si te za te te dama 're rowasu'u za'ra. Dahâimanazé tô sena na si te za dama 're hâimana za'ra. Tahawa, a norĩ wa'wa hã roti sena zarina si te za oto 're anomro wẽ wa'aba mo, Cristuhu nhimiroti na.
Ãne wamhã, Wamama ãma te za duré ãma 're aiwata u'âsi za'ra wa'aba mo. Ta hã ma tô aima pisutu za'ra wa'wa, hâiwa ãma tinhib'a'uwẽ norĩ ma, iwẽ uptabi hã te te sô 're i'apisutu mono hã aima za'ra wa'aba zama aima 're hâimana mono da dasine, da'ãma 're isib'a'uwẽ mono zéb ãma hã rowa'a za'ẽne 're isa'wari u'âsi mono ãma hã.
Tahawa, õne haré te za Cristuhu wasu'uwẽ si asina 're i'umnhasi za'ra wa'aba mo asiptete sina, 'ri hã ẽtẽ nhisiwi siptete na 're sa mono wa, simei waihu'u õ na 're isa mono ne. Te za tô ãma 're aihâimana u'âsi za'ra wa'aba mo, tiwi asina 're aipahâ za'ra wa'aba mono ãna. Imorĩ'rata na Cristuhu wasu'uwẽ hã wapari na'rata za'ra wa'aba wamhã, iwẽ uptabi hã hâiwa ãma asô 're isimi'wara aba mono wasu'u wi, tiwi asina 're ai'ré za'ra wa'aba mono õ di za, sô 're asimipari za'ra wa'aba mono wasu'u wi hã. Ãhã wasu'uwẽ hã ropâ ma tô da te dasima 're wasu'u za'ra, da te 're waihu'u za'ra mono da. Duré wa hã Paulu, wa ãhã wasu'uwẽ na te dama 're romhuri u'âsi.
'Re ihâimana u'âsi mono hã ma tô sima ãma roti, ãhã wasu'u hã iwẽ uptabi hã aré da te 're iwaihu'u za'ra mono õ hã te te oto dama awasu'u hâi'ré da sõ'awi, dapoto mono bâ da te oto 're waihu'u za'ra mono da, zudeu'õ norĩ zama. Ãhã wasu'u hã aré da te 're iwaihu'u za'ra mono õ hã, ãne: Cristu hã te oto aipẽ'ẽ 're, 're sãmra za'ra wa'wa. Tahawa, te za tô taha zô si 're asimipari za'ra wa'aba mo, 'Re ihâimana u'âsi mono, iwẽ uptabi hã za te te wama 're i'apisutu mono zô si. Ãne 'Re ihâimana u'âsi mono wasu'u hã, ã hã aré da te 're iwaihu'u za'ra mono õ.
Cristuhu wasu'uwẽ hã tô sena uptabi hã imorĩ'rata na da te atẽme ãwisi za'ra wa'aba wamhã, tame ma tô iwapari na'rata za'ra wa'wa, iwẽ uptabi hã hâiwa ãma dazô 're isimi'wara mono zé wasu'u hã, duré taha zô si 're idanhimipari u'âsi za'ra mono zé wasu'u zama. Taha zô asina 're asimipari za'ra wa'aba mono zéb zarina, ma tô Cristuhu si asina 're i'umnhasi pese za'ra wa'aba mo. Taha zarina ma tô duré 'Re ihâimana u'âsi mono nhib'a'uwẽ norĩ hã 're isawi pese za'ra wa'aba mo. Hâiwa ãma, wẽ uptabi na asô 're isimi'wara aba mono hã, te tô 'Re ihâimana u'âsi mono hã te te asô 're 'madâ'â pese za'ra wa'wa. Taha zô si te tô asina 're asimipari u'âsi za'ra wa'aba mo.
Ta norĩ hã tipẽ'ẽzani wẽ ré, siptete sina 're hâimana za'ra mono da, wa tô te ãma 're romhuri pese za'ra. A norĩ wa'aba ãma zama wa tô duré te 're romhuri pese, aipẽ'ẽzani wẽ ré tô asiptete sina 're aihâimana za'ra wa'aba mono da. Tahawa, te za 'râwi simisutu siré 're hâimana za'ra ta norĩ hã, 're isisawi pese za'ra mono zéb zarina. A norĩ wa'aba zama te za duré ãne zarina simisutu asiré 're aihâimana za'ra wa'aba mo. Tawamhã 'Re ihâimana u'âsi mono wasu'uwẽ hã aré dama iwaihu'u'õ hã te te oto waihu'u pese za'ra wa, te za tô ta norĩ hã oto sena na te te 're waihu'u za'ra. Duré a norĩ wa'aba zama hã te za tô oto sena na 're iwaihu'u za'ra wa'aba mo. 'Re ihâimana u'âsi mono wasu'u hã aré dama iwaihu'u'õ hã, ã hã Cristuhu wasu'uwẽ, te dama wasu'u.
Cristu hã te za te te 're aipawaptob u'âsi za'ra wa'wa, rowẽ na asiré ãma 're aihâimana za'ra wa'aba mono da. Tahawa, te za aipẽ'ẽ 're iré 're anomro u'âsi aba mo, uburé marĩ hã i'uwaibaba si ãma 're i'manharĩ za'ra wa'aba mono zéb da hã, 'râwi asina 're waihu'u za'ra wa'aba mono da. 'Re ihâimana u'âsi mono hã ma tô aipisutu za'ra wa'wa, simisutu dahâiba misi ne, asiré 're aihâimana za'ra wa'aba mono da, taha zarina aipẽ'ẽ 're rowẽ na asiré 're aihâimana za'ra wa'aba mono da, ãma. Tahawa, te za ãma 're aiwata u'âsi za'ra wa'aba mo, 'Re ihâimana u'âsi mono ãma si.
Duré da te aima 're amhâzépa za'ra wa'aba mono nherẽ, wa tô ãma aima robze za'ra wa'aba ni iwasu'uwẽ na, aiwi 're robzei'õ tõ za'ra wa'aba mono da. Wa tô aima roti pese za'ra wa'aba ni, 'Re ihâimana u'âsi mono nho'a 're anomro wẽ wa'aba mono da, toi uptabi na te te 're ai'madâ'â za'ra wa'aba mono da. Ta hã ma tô te te sima 're aiwẽ za'ra wa'wa, hâiwa ãma ihâiba na rowa'a na isiré 're aihâimana u'âsi za'ra wa'aba mono da, rowẽ uptabi na.
Tazahã, wa norĩ hã Wanhib'apito apâ we imorĩzéb zô, 're wanhimipari za'ra mono wa, wanhimi'ẽ na sô 're wanhopré mono sina, wa za 're wahâimana za'ra. Tawamhã wa za wasi'upari za'ra ni za, wanhitob'rui wi, Wanhib'apito wa te 're isaze za'ra mono zém na, duré 're iwanhimizawi pese za'ra mono zém na, duré Zezusi te te 're iwanho'reptu za'ra mono zéb zô, 're iwanhimipari za'ra mono zém na. Da'wapéi'wa norĩ hã, tinho'utu'u ihâtete na te 're si'uza za'ra. Te duré ti'rãzaza ihâ tete na 're si'rãzaza za'ra, tinhitob'rui wi, da te 'manhiptâ'â tõ da. Ãne na wa norĩ hã, Wanhib'apito wa te 're isaze za'ra mono zém na, duré 're wanhimizawi pese za'ra mono zém na, wa za 're wahâimana za'ra, wapẽ'ẽ wẽ te te wawi wasété tõ da, wanhitob'ru hã. Duré Zezusi te te 're iwanho'reptu za'ra mono zéb zô, 're iwanhimipari za'ra mono zém na, wa za 're wahâimana za'ra, wanhimirosa'rata na te te wawi 're ro'wa'rutu tõ za'ra mono da.
Tahawa, Wanhib'apito 'Re ihâimana u'âsi mono wi, wa wa te 're rowaptẽrẽ u'âsi za'ra, iwẽ na te te 're aipawaptob za'ra wa'aba mono da, taha zarina, 're idanomro mono zép tém na 're anomro wẽ wa'aba mono da, te te aima 're ipisutu za'ra wa'aba mono zéb zarina si. Wa duré wa te tiwi 're rowaptẽrẽ za'ra, asimirosa'rata wẽ 'manharĩ'wai wa'wa hã, tiwaihu'u pese na te te aima ãma 're uwaimrami za'ra wa'aba mono da, marĩ hã, iwẽ si 're 'manharĩ za'ra wa'aba mono da, 're sazei pese za'ra wa'aba mono wa.
'Re ihâimana u'âsi mono hã Wamama hã, te te 're wa'azawi pese. Te duré te te 're wa'apawapto, wapẽ'ẽ 're, 're wanomro wẽ u'âsi mono da, wahâimana nhiptete sina wanhimi'ẽ na sô 're wanhimipari u'âsi za'ra mono da, iwẽ zô. Tahawa, wa za Wamama wi, wa te 're rowaptẽrẽ u'âsi za'ra, duré Wanhib'apito Zezu Cristuhu wi zama, ato sina 're aihâimana za'ra wa'aba mono da, duré asiptete sina iwẽ na si tãma 're romhuri pese za'ra wa'aba mono da, asimirowasu'u wẽ za'ra wa'aba na hã.
Wawasété na 're wanomro mono nherẽ, ma tô te te 're wa'azawi pese, 'Re ihâimana u'âsi mono hã. Tahawa, ma tô te te 're wa'awẽsãmri, wawasédé hã te te oto wa'ãma 're i'ab'madâ'â mono õ zéb zarina, rowẽ isi'utõrĩ'õ ãma i'rata 're wasi'ubumroi u'âsi mono da. Tahawa, wa za wasina sô 're wanhimipari u'âsi za'ra, i'rata 're iwasi'ubumroi u'âsi mono zéb zô hã.
Ma'ãpé, ãma asipo're pu'u za'ra wa'aba, duréihã Cristu hã Danho'reptui'wa na asina 're iwaihu'u na'rata za'ra wa'aba mono zém na hã, 'Re ihâimana u'âsi mono nhimipawaptobzéb zarina. Ta hawim haré, Cristuhu zazei'wa oto 're anomro aba mono wa, marĩ na 're robzépata za'ẽtẽ za'ra wa'aba mono nherẽ, ma tô asiptete sina ãma 're aihâimana u'âsi za'ra wa'aba mo, tiwi 're aipizari za'ra wa'aba mono ãna.
Ãté ni'wam norĩ hã te za 'Re ihâimana u'âsi mono nhimiroti hã sena na te te 're waihu'u za'ra, taha zarina 'Re ihâimana u'âsi mono nhimirowa'a na si 're hâimana za'ra mono da oto. Ãté dasa ise hã taré da te 're itẽ'ẽ za'ra mono ne, te za 'Re ihâimana u'âsi mono nhoprubzé hã duré tẽ'ẽ za'ra, ta norĩ hã. Ãté 'Re ihâimana u'âsi mono pẽ'ẽzani ré, te za duré ta norĩ hã dame 're hâimana za'ra. 'Re ihâimana u'âsi mono mreme hã te za duré ãté waihu'u za'ra, isei uptabi hã, si'uihâ na. Ãté te za duré 'Re ihâimana u'âsi mono pẽ'ẽzani nhimipawaptobzé hã isiré 're hâimana u'âsi za'ra, te te 're waihu'u pese za'ra mono wa, ãma 're ihâimana wẽ za'ra mono da hã. Ãté ta norĩ hã Cristuhu nhimipawaptobzé hã te te duré waihu'u pari za'ra nherẽ, te za oto tiwi 're sipizari za'ra, apâ hã. E tawamhã apâ da te 're pizari waihu'u pese za'ra mono di za, 'Re ihâimana u'âsi mono u hã. Mare di. 'Re ihâimana u'âsi mono 'ra, wedepo'o nhonhi'rãmi na dâ'â da, da te dasiwi sasõmri wa, da te dasiwi iwẽ'õ pese za'ra ne, te za duré ta norĩ hã siwi wẽ'õ pese za'ra oto, Cristu hã. Taha zarina, te za duré Cristuhu ãma da te 're wasété za'ra, Cristuhu wi apâ 're sipizari za'ra mono wa, ta norĩ hã.
'Re ihâimana u'âsi mono ãma si oto 're wawata u'âsi za'ra wa'aba mono, Wanhib'apito Zezu Cristuhu mama ãma. E marĩ wa. Ipẽ'ẽzézé hã sa'ẽtẽ na tãma 're hâimana mono wa, ma tô wa'apoto té, wapẽ'ẽ 're, wahâimanazép té iwẽ na si oto ãma 're wahâimana za'ra mono da. Zezu Cristu hã dâ'â uptabi nherẽ, ma tô Imama hã ab're hawi hâiwa'utu, tiwaihu'u pese na. Taha zarina, wa za duré wasina sô 're wanhimipari za'ra, 're wadâ'â za'ra mono pari, te te 're iwa'ahâiwa'utu mono zéb zô.
Duré asada 're dahâimana wasété za'ra wa'aba mono wamhã, asa dama ãma 're wa'rãmi za'ra wa'aba mono õ di za, aihâimana wasété na. Duré dapẽ'ẽ na taré da te 're ai'ruiwapari za'ra wa'aba mono wa, da te aima 're nharĩ za'ra wa'aba mono nherẽ, asa dama ãma 're wa'rãmi za'ra wa'aba mono õ di za, aimreme wasété na hã. Wamama wi si, te za ta norĩ ma 're iwaptẽrẽ za'ra wa'aba mo, iwẽ si te te tãma 're sõmri za'ra mono da, ta norĩ ma hã. Ãne da, ma tô Wamama hã sitẽme asô tihârâ za'ra wa'wa, iwẽ na si aima 're sõprub za'ra wa'aba mono da.
Tane nherẽ, 're robzépata hâ za'ra wa'aba mono õ ré, rowẽzé hã te za te te aima ãma 're a'uwaimrami 'wa, 'Re ihâimana u'âsi mono hã. Taha si te za te te 're asiptete u'âsi za'ra wa'wa, tiwaihu'u pese na, asiptete u'âsi ãma 're aihâimana za'ra wa'aba mono da. Õhõ ma si te isimizawizé hã sa'ẽtẽ na tãma 're hâimana. Tahawa, ma tô sitẽme asô tihârâ za'ra wa'wa, rowẽ isi'utõrĩ'õ ãma isiré 're aihâimana u'âsi za'ra wa'aba mono da, Cristuhu nhib'a'uwẽ oto 're anomro aba mono wa.
ကြော်ငြာတွေ