Daniéu 9:3 - ꞌRe Ihâimana Uꞌâsi Mono Zadawa Wasuꞌu

³ Ĩma robzei'õ zarina, da'uza ihâi hâza'õtõ na wa tô ĩsi'uza. Taha wa, wa tô duré 'ru'a wa nhamra. Ĩsa hã wa tô duré tirẽ. Wa tô Uburé Danhib'apito 'Re ihâimana u'âsi mono ma, sa'ẽtẽ mre, te tiwi iwaptẽrẽzé te te ĩma 'manharĩ da.

Daniéu 9:3 ပူးပေါင်းရင်းမြစ်များ

Esdra 10:6

Tawamhã Esdra, 'Re ihâimana u'âsi mono nhorõwa 'ri nho're hawi ma tô watobro. Watobro wamhã, ma tô Eriasibehe 'ra si'aibâ Zoãnahã za'warizéb u mo. Tame ma tô ãma timara. Ma tô duré ãma ti'awẽ, sai ãna, duré te te hâ'rẽne ãna, tãma robzei'õ uptabi wa, Babilonia hawi a'uwẽ norĩ apâ te te sina isiri za'ra, 'Re ihâimana u'âsi mono ãma si 're nomro mono õ wa.

Esdra 8:21

Tawamhã Aava na panho'õmo 'rata, wa tô wasai ãna misi bâtâ na wahâimana za'ra da hã dama pisutu, taha ré uburé wa norĩ hã wate 'Re ihâimana u'âsi mono nho'remhã wahi'rãtitõ tãma wasisimro da, wa'ra norĩ ré, duré uburé wanhimarĩ ré, wasi'aba'réi ré we te te wanhimroi wẽ mono da, wa te tiwi waptẽrẽ za'ra da hã.

Esdra 9:5

Tawamhã oto hâiwa hâ te, danhoprub zatazéb da, bâdâ iwa waptã'ã wamhã, wa tô oto udu, ĩwi irobzei'õzé ĩma sipari wa. Tawamhã ĩhi'rãtitõ wa tô duré 'Re ihâimana u'âsi mono ma, ĩmreme da hã nhamra, ĩ'uza te ihâi wazui ré. Ãhã wa, Uburé Danhib'apito, ĩte 'Re ihâimana u'âsi mono ma, ĩnhib'rada te tãma wẽ sina,

Neemia 9:1

Tawamhã a'amo 24 bâtâ ãma ma tô Izaraéu nhihudu norĩ hã si'rã'õtõ, sai ãna a'â hâimana za'ra da. Tahawa, ma tô duré sa'u ihâiro na si'uza za'ra. Ma tô duré ti'a na hã si'rã zazub za'ra.

Daniéu 6:10

Tawamhã apito tinhimirotizém na isisi hâtâzém na te te waihu'u wamhã, ma tô tinhorõwa u apâ hã mo. Hâimo ãma 'ri 're wa'õno ihâimana ãma te nhamra, zanela 'ri zadazâri norĩ Zeruzalẽ nho'õmoi baba ihâimana za'ra ãma. Tawamhã Daniéu ma tô 'ri zadazâri hã sima 'ridawa za'ra. Taha pari ma tô hi'rãtitõ nhamra. Ma tô duré tite 'Re ihâimana u'âsi mono ma hã mre, awẽ sidâpâsi si'ubdatõ na ãma isahu na tãma 're imreme u'âsi mono ne.

Daniéu 9:2

Isi'apitozém na zahadu misi ãma iwahub ãma, wa hã Daniéu wa tô ibaihâ iwazéb zahi na hã ãma romnhoré. Uburé Danhib'apito, tizadawa 'mahârâ'wa Zeremiaha ma, te te inharĩzéb zarina Zeruzalẽ 'ri siprum haré za 70 na ãma iwahubzém na hã wa tô duré ãma rosa'rata.

Daniéu 9:20

Tawamhã wa zahadu tãma mre. Zahadu wa duré ĩwasété na tãma ĩsiwẽ'õzém na, duré ĩnhib'a'uwẽ norĩ wasété za'ra zém na zama hã te tiwi irowaptẽrẽ na ãma uzusi, Uburé Danhib'apito, ĩte 'Re ihâimana u'âsi mono wi, sa'a ite iwazéb zahi ma ropibu ma.

Daniéu 9:4

Ãne wa tô Ĩnhib'apito, ĩte 'Re ihâimana u'âsi mono ma ĩsiwẽ'õ sina hã tãma mre: — Uburé Danhib'apito 'Re ihâimana u'âsi mono, a hã asa'ẽtẽ uptabi di, duré asiptete uptabi di! A hã ma tô asimiropisutu zahi hã te te 're i'asawi pese za'ra mono norĩ ma, duré asimiroti te te 're iwapari pese za'ra mono norĩ ma, tãma 're i'madâ'â u'âsi za'ra mo. Õne u'â te duré ta norĩ ma asimizawizé hã tãma 're ihâi'ré u'âsi za'ra mo.

Zuéu 1:13

Sasedoti norĩ, wedezane 'manharĩ nhisiwi, danhoprubzé 're isa'ra za'ra wa'aba mono norĩ, ma'ãpé zazahâ hâiro na asi'uza za'ra wa'aba, iré ai'ru'ru wa'aba da. 'Re ihâimana u'âsi mono ma da'ãma romhuri'wa norĩ, we ai'aba'réi wa'aba, 'ri zahâpâ u, ai'ru'ru wa'aba da marabâre, 'Re ihâimana u'âsi mono nhorõwa 'ri 'rãihâ ãma. E marĩ wa. Wate 'Re ihâimana u'âsi mono nhorõwa ãma hã amnho na duré uwa 'rãi wa'u isé na danhoprubzé hã hâimana õ wa oto.

Zuéu 2:12

Uburé Danhib'apito te tinha ãne: “Tane nherẽ, ma'ãpé oto apâ ĩtẽme aipizari za'ra wa'aba, aipẽ'ẽ na, asai ãna aihâimana za'ra wa'aba sina, duré aiwawa za'ra wa'aba sina, duré ai'ru'ru wa'aba sina.

Zona 3:5

Tahawa Niniwé 're, 're idahâimana za'ra mono norĩ hã ma tô saze za'ra, 'Re ihâimana u'âsi mono hã. Ma tô duré sima pisutu za'ra, hâiba mono bâ mreme zusi da, sai ãna a'â. Tawamhã dahâiba mono bâ dama ipire norĩ hã duré dama iwapu norĩ zama ma tô uburé pese si'uza za'ra sa'u ihâiro na, tiwasété na isiwẽ'õ za'ra zém na sihâi'ré za'ra da hã.

Zezusihi zadawa wasuꞌuꞌwa norĩ nhimiromhuri na robꞌuiꞌéré 10:30

Tawamhã Coneliu te asa tãma rowasu'u oto, ãne: — Bâdâ si'ubdatõ ma tô ĩ'ãma ai'utõ, aibâ ĩtẽme iwisizém na hã. 'Re ihâimana u'âsi mono ma, ĩmreme ré, ma tô ĩtẽme wi, bâdâ sipra wi. Ti'uza hâirã na ma tô rob'uiwẽ, rowa'a nherẽ.