Daniéu 9:24 - ꞌRe Ihâimana Uꞌâsi Mono Zadawa Wasuꞌu

²⁴ — Daniéu, asib'a'uwẽ ma, duré ate 'ri nho'u iwazéb zahi ma, 'Re ihâimana u'âsi mono nhimihâzé ai'ãma za'ra wa'aba ihâimanazéb ãma hã te za ãma tiwahu, 70 x 7 na ãma iwahum na, õhõ wi 're i'aiwasété za'ra wa'aba mono zé hã isi'utõrĩzéb u. Tahawa, te za isib'a'uwẽ norĩ, 'Re ihâimana u'âsi mono, iwasédé te te oto ãma 're i'ab'madâ'â mono õ zé hã te te sina 're uwaimrami za'ra. Te za duré 'Re ihâimana u'âsi mono, i'uwaibaba na te te dama 're i'arowairébé mono zé isi'utõrĩ'õ hã dama pisutu. Duré uburé marĩ we i'a'madâ'â mono zém na, duré 'Re ihâimana u'âsi mono zadawa 'mahârâ'wa nhimirowasu'u na te za te te ãma a'uwaimrami. Te za duré isõrõwa 'ri 'rãihâ iwazéb zahi na apâ ãma da te dasima 're romhu'u za'ra.

Daniéu 9:24 ပူးပေါင်းရင်းမြစ်များ

Salmu 2:6

Tawamhã te ãne tinha: “Apito da, te ipisudu hã wa tô dasimasisizé ipire na hã tisã, Siã ẽtẽ 'rãihâ nhisi ĩte iwazéb zahi ãmamhã.”

Salmu 45:7

Dawẽ na 're idanomro mono zép si, te 're isawi u'âsi mo. Dawasété na 're idanomro mono zép si hã te 're i'ruiwapari u'âsi mo. Tahawa, ate 'Re ihâimana u'âsi mono ma tô aipisutu. Taha zarina ma tô robzezé hã te te aima 're anhomri, uburé ti'ai ãma danhib'apito 're ihâimana za'ra mono norĩ nhipai u hã.

Mateu 1:21

I'ra hã 'watébrémi na te za tãma podo. Tawamhã Zezusi na te za isisi. Danho'reptui'wa te wasu'u, isisi hã. Taha si te za tinhib'a'uwẽ hã te te 're anho'reptu, iwasété hawi, duré 'Re ihâimana u'âsi mono te te 're idahâ za'ra mono zém hawi.

Mateu 11:13

Zuwãhã wana ré hã, ma tô 'Re ihâimana u'âsi mono zadawa 'mahârâ 'rata 'wa norĩ hã te te ãma 're rob'ui'éré za'ra Mozésihi zama, 'Re ihâimana u'âsi mono, za da'ãma 're isib'a'uwẽ mono zé wasu'u na hã.

Mateu 4:5

Taha pari, Wa'uburé hã ma tô Zezusi saprõ Zeruzalẽ u, 'ri nho'u iwẽ uptabi u, te te duré pibu da. 'Re ihâimana u'âsi mono nhorõwa 'ri u, te saprõ, 'ri nhisi u, sab da hâimo, 'ri 'rãihâ uptabi nhisi.

Marcu 1:24

— Zezusi, Nazaré nhihudu, e marĩ zô te we aimo. E wa'uprosi da, te we aimo. A hã ĩma aiwaihu'u pese di, 'Re ihâimana u'âsi mono, we te te i'asatõrĩ na hã. Duré aiwẽ uptabi di, a hã.

Luca 1:35

Tawamhã asa te duré tãma tinha, ãne: — 'Re ihâimana u'âsi mono, te za we aipawapto, tiwaihu'u pese na aiwasã da, ai'ra da. Taha da, te za Tipẽ'ẽzani hã we atẽme satõ. Tahawa, 'Re ihâimana u'âsi mono 'ra na, te za ai'ra hã da te 're sisi za'ra.

Luca 21:22

'Re ihâimana u'âsi mono te te dama 're arob'manharĩ mono wa, te za rowasété si a'â 're sa'wari. Taha ré, te za marĩ hã uburé dazô pusi, romhâ ré, 'Re ihâimana u'âsi mono zadawa 'mahârâ'wa norĩ hã te te ãma irob'ui'éré za'ra zéb zarina.

Zuwã 1:41

Tawamhã tidub'rata zô te mo, Ãdré hã. Te te sãmri wamhã, ãne te tãma rowasu'u: — Danho'reptui'wa hã wa tô sõpẽtẽ ni, 'Re ihâimana u'âsi mono te te ipisudu hã. Danho'reptui'wa hã ta hã “Cristu”, damreme amo na hã.

Zuwã 3:34

Ti'ra we te te satõrĩ wamhã, ma tô Tipẽ'ẽzani hã tãma tisõ, iré 're morĩ u'âsi da. Tahawa, te Timama nhimiroti si te te dama 're wasu'u.

Zezusihi zadawa wasuꞌuꞌwa norĩ nhimiromhuri na robꞌuiꞌéré 3:14

Zezusi hã 're morĩ wẽ uptabi nherẽ, ma tô asiwi iwẽ'õ za'ra wa'wa. Rob'manharĩ wasété'wa si ma tô asima iwẽ za'ra wa'wa, dazazém hawi da te dasiwi wazere da, Zezusihi upana.

Zezusihi zadawa wasuꞌuꞌwa norĩ nhimiromhuri na robꞌuiꞌéré 3:22

Duréihã, Mozési ma tô wahi'rata norĩ ma rowasu'u siro, ãne: “Uburé Danhib'apito uptabi, 'Re ihâimana u'âsi mono hã ma tô ĩpisutu, tizadawa wasu'u'wa da, Asib'apito za'ra wa'wa hã. Ãne ni'wa hã asiré wa'wa hã te za ĩza'u si aima pisutu za'ra wa'wa, 'Re ihâimana u'âsi mono hã, ĩsine te te aima 're sadawa wasu'u za'ra wa'aba mono da. Tawamhã te za isimirowasu'u na 're iwapari pese za'ra wa'aba mo.

Zezusihi zadawa wasuꞌuꞌwa norĩ nhimiromhuri na robꞌuiꞌéré 4:26

Roti'wa norĩ hã te sada aimasa. Isadawa para da'uwati'wa norĩ me, ma sada atob za'ra, Wanhib'apito 'Re ihâimana u'âsi mono zada, duré Danho'reptui'wa da, te te ipisutu zada.”

Roma 5:10

'Re ihâimana u'âsi mono nhitob'ru, wa aré 're wanomro. Tane nherẽ, ti'ra dâ'âzém na ma tô wa'ãma 're siwadi za'ra oto. Tawamhã isiwadi oto 're wahâimana za'ra mono wa, te za tô oto Zezusi hã te te 're wa'anho'reptu, dâ'â nherẽ, apâ hâiwa'utu wa, dâ'â ãna 're hâimana u'âsi mono wa za oto.

1 Corĩtu 1:30

'Re ihâimana u'âsi mono nhimipisutuzéb zarina si, te oto Cristu Zezusihi ãma 're anomro aba mo. Cristuhu ãma si oto 're anomro aba mono wa, te tinhimirowaihu iwẽ hã te te aima 're waihu'u u'âsi za'ra wa'wa. Cristuhu dâ'âzém na si, ma tô 'Re ihâimana u'âsi mono hã te te 're wa'awẽsãmri, wawasédé hã te te oto wa'ãma 're i'ab'madâ'â mono õ zarina. Taha zarina si, ma tô duré te te 're wa'apisutu, isib'a'uwẽ si oto tãma 're wahâimana wẽ za'ra mono da. Taha zarina si, ma tô duré wawasété hawi wa'anho'reptu, sitẽme te te 're wa'awaibui mono da.

Filipu 3:9

Misi haré Cristuhu ãma si oto 're ĩhâimana mono da, wa tô ĩhâimanazéb 'rada hã 'râwi ĩsiwi wẽ'õ pese. 'Re ihâimana u'âsi mono nhimiroti na Mozési te te ãma irob'ui'éré hã, ĩsi'uihâ na te 're i'madâ'â pese mono na 'Re ihâimana u'âsi mono te te ĩwẽsãmri da, ĩsina 're ĩnhimipari mono õ di oto. Cristu hã te ĩsina 're i'umnhasi mono zéb zarina si, 'Re ihâimana u'âsi mono te te ĩwẽsãmrizéb ré si, wa oto 're ĩhâimana, taha si te te ĩpisutu wa oto.

Colosu 1:20

Ma tô duré sima ãma roti siro, i'ra hã wedepo'o nhonhi'rãmi na dazada idâ'âzém na oto da'ãma 're siwadi mono da, uburé hâiwa ãma 're idahâimana za'ra mono norĩ ãma hã, duré uburé ti'ai ãma 're idahâimana za'ra mono norĩ ãma zama.

Colosu 2:14

Wawasédé wa te 're i'manharĩ za'ra mono zém na te te aré wa'ãma sima irob'ui'éré za'ra zé hã ma tô te te wama 're apari, wawasété na wa te aré tãma 're iwa'âbâ za'ra mono õ na wa'ãma rob'ui'éré hã. Isimiroti hã wa te wasina ãma 're i'uwaimrami za'ra mono õ zarina, wawasété na te te wa'ãma 're i'arob'ui'éré mono zé hã ma tô te te wama 're a'uprosi oto. Niha 're idahâimana za'ra mono zéb da, duréihã te te dama 're i'aroti 'rata mono hã ma tô duré te te dama 're a'uprosi oto. Cristu hã wedepo'o nhonhi'rãmi na wazada idâ'âzém na ma tô te te wama 're a'uprosi tô oto.

Hebreu 10:14

Misi haré 'Re ihâimana u'âsi mono ma, dazada sisõmri wa, ma tô dawasété hawi te te 're da'awaibu, 'Re ihâimana u'âsi mono nhib'a'uwẽ si oto ãma 're danomro mono da.

Hebreu 2:17

Tahawa, tisisãnawã norĩ me, aiwa uptabi a'â 're hâimana mono da, ma tô si'a'uwẽ Zezusi hã, sasedoti 'Re ihâimana u'âsi mono ma, da'ãma romhuri'wa tisiré norĩ nhipai u ipire uptabi ne 're hâimana mono da, tãma umnhasi na te te tãma 're romhuri mono da, da'ãma pẽ'ẽzé uptabi sina. Taha da, ma tô si'a'uwẽ tô, taha zarina dawasédé hã te te oto dama 're apari mono da. Ta hã dasiré si'a'uwẽ õ 'wa'âhã, ãne hã te te aré sina uwaimrami waihu'u õ di, 'Re ihâimana u'âsi mono ma hã.

Hebreu 7:26

Tahawa, te oto õhõ si sasedoti ipire uptabi na hã wama 're hâimana za'ra, Timama ma, te te wa'ãma 're romhuri mono da. Taha si te 're timorĩ wẽ uptabi. Õhõ si ma tô 'Re ihâimana u'âsi mono hã te te 're wẽsãmri, marĩ te te 're ab'manharĩ wasété mono õ wa. Tahawa, iwasédé hã sena na da te ãma 're sa'ra waihu'u za'ra mono õ di. 'Re ihâimana u'âsi mono hã ma tô tãma pisutu, ti'ai ãma dawasété na 're idanomro mono norĩ nhiti 're sãmra mono da oto, hâiwa ãma danhipai u dama pire uptabi na 're hâimana u'âsi mono da.

Hebreu 9:26

Cristu hã wahub sidâpâsi 'Re ihâimana u'âsi mono ma, dazada 're sisõmri u'âsi mono 'wa'âhã, te aré ropoto na'rata hawim haré dazada 're dâ'â u'âsi. Tawamhã robzépata za'ẽtẽ na te aré tô te te 're robzépata u'âsi. Tane nherẽ, za rob'rãsutu u irob'umhutuzéb u si ma tô misi haré tãma sisõ, 'Re ihâimana u'âsi mono ma hã, dazada dâ'â da, taha zarina dawasédé hã te te dama 're apari mono da oto, 'Re ihâimana u'âsi mono hã.

2 Pedru 1:1

Wa hã Sima Pedru, Zezu Cristuhu ma romhuri'wa, duré isadawa wasu'u'wa, wa ãma aima rob'ui'éré za'ra wa'wa, wasiré isazei'wa 're i'anomro aba mono norĩ ma. Wanhib'apito 'Re ihâimana u'âsi mono hã wẽ uptabi di. Duré wa'anho'reptui'wa Zezu Cristuhu zama wẽ uptabi di. Wẽ uptabi zahuré wa, ma tô te te 're aipawaptob za'ra wa'wa, wasine asina 're umnhasi za'ra wa'aba mono da, te te 're asõ'reptu za'ra wa'aba mono da.

1 Zuwã 3:8

Wa'uburé hã, wa'rui'wa hã ropoto na'rata hawim haré, te tiwasédé hã te te 're ab'manharĩ u'âsi. Tahawa, ni'wam norĩ hã tiwasédé te te 're 'manharĩ u'âsi za'ra mono wamhã, ta norĩ hã te Wa'uburé nhib'a'uwẽ na 're hâimana za'ra. Taha nhimiromhuri wasédé hã te te tiwi pari da, ma tô 'Re ihâimana u'âsi mono 'ra hã we ti'ai u hã datẽme mo.

Apocalipsi 14:6

Tawamhã wa tô duré 'madâ, hâiwa ãma 'Re ihâimana u'âsi mono ma, romhuri'wa hã. Hâimo uptabi te 're wara. Iwasu'uwẽ hã te dama 'mahâ, isi'utõrĩ'õ hã, dapoto mono bâ 're idahâimana za'ra mono norĩ ma, duré damreme sipo'o mono bâ 're idahâimana za'ra mono norĩ ma zama.

Apocalipsi 3:7

— Te za oto duré irob'ui'é, Filadéufia na 'ri nho'õmo nhisi ãma ĩzazei'wa norĩ 'madâ'â'wai ma. Te aima iwaihu'uzém na te za tãma irob'ui'é, ãne: “Wa hã 're ĩwasété mono õ, wa za oto aima roti za'ra wa'wa, ĩnhimiropisutuzéb zarina, sena na te dama ãma 're i'a'uwaimrami mono 'wa hã. Duréihã Dawi hã te 're hâimana, dama ipire hã. Isõrõwa hã i'ri za'ẽtẽ uptabi. Tame te ni'wa hã 're sãmra, 'ridawazéb ré hã, te te dama 're i'ridawa mono da hã, duré te te dawi 're i'ridawa nhito mono da hã. Tane wa hã, wa hâiwa ãma Ĩmama nhorõwa 'ridawazéb ré 're ĩhâimana u'âsi, ĩwétési. Wa hã te dama 'ridawa wamhã, ni'wa apâ te te dawi sito waihu'u õ di. Duré te 'ridawa nhito wamhã, ni'wa hã te te 'ridawa waihu'u õ di.