Daniéu 9:2 - ꞌRe Ihâimana Uꞌâsi Mono Zadawa Wasuꞌu

² Isi'apitozém na zahadu misi ãma iwahub ãma, wa hã Daniéu wa tô ibaihâ iwazéb zahi na hã ãma romnhoré. Uburé Danhib'apito, tizadawa 'mahârâ'wa Zeremiaha ma, te te inharĩzéb zarina Zeruzalẽ 'ri siprum haré za 70 na ãma iwahubzém na hã wa tô duré ãma rosa'rata.

Daniéu 9:2 ပူးပေါင်းရင်းမြစ်များ

Esdra 1:1

Tawamhã Persia te apito, Ciru dama isi'i'rãnho'õmozém na misi imorĩ'rata na ãma iwahub ãma, ma tô Uburé Danhib'apito, isadawa 'mahârâ'wa Zeremiaha nhimirowasu'u zarina timreme hã ãma uwaimra oto. Tawamhã Uburé Danhib'apito ma tô apito Ciru hã 'rãi pi'ra. Tahawa, ma tô dama ti'ru, daro mono bâ tinhimi'madâ'âzéb 'remhã isimiroti na, da te ãma dasima ropéi mono da, rob'ui'éré na duré da'ahâ nho'a da te dasima 're isõré za'ra mono zéb da hã, ãne isimiroti na:

Salmu 119:24

Asimiroti na ãma ĩma rosa'rata zei uptabi di. Ta hã ĩma 're iroti mono 'wa na, te ĩma 're hâimana za'ra.

Daniéu 9:3

Ĩma robzei'õ zarina, da'uza ihâi hâza'õtõ na wa tô ĩsi'uza. Taha wa, wa tô duré 'ru'a wa nhamra. Ĩsa hã wa tô duré tirẽ. Wa tô Uburé Danhib'apito 'Re ihâimana u'âsi mono ma, sa'ẽtẽ mre, te tiwi iwaptẽrẽzé te te ĩma 'manharĩ da.

Mateu 24:15

Tawamhã Zezusi hã ma duré ãne na tãma rowaihu'u siromo za'ra: — Zahadu wapsi, te za asiwi i'madâ'â za'ra wa'wa, marĩ iwasété uptabi hã. 'Re ihâimana u'âsi mono nhorõwa ãma te za tihâiba, te te siwi iwẽ'õ pe hã. Taha ãma ma tô Daniéu hã rob'ui'éré siro duréihã, 'Re ihâimana u'âsi mono zadawa 'mahârâ 'rata 'wa hã. (Ãhã wasu'u na rob'ui'éré hã 're sõré za'ra wa'aba mono wamhã, ma'ãpé ãma 're rosa'rata pese za'ra wa'aba mono za, waihu'u za'ra wa'aba da.) Tawamhã ãne hã za oto daré romhâimana wamhã, rowasété si te za a'â daré 're sa'wari. Tahawa, Zudéa ãma 're isi'ubumroi mono norĩ hã, wara sina te za 're sisa're, ẽtẽ 'rãihâ u tiwi simani za'ra da, duré tiwi sisõ'reptu za'ra da.

Marcu 13:14

Tawamhã ma duré tãma waihu'u za'ra: — Nimahã na te za asiwi i'madâ'â za'ra wa'wa, 'Re ihâimana u'âsi mono te te siwi iwẽ'õ pe hã, te te dawi irosawizéb ãma isa hã. (Ãhã wasu'u na rob'ui'éré hã 're sõré za'ra wa'aba mono wamhã, ma'ãpé ãma 're rosa'rata pese za'ra wa'aba mono za, waihu'u za'ra wa'aba da.) Tawamhã ãne hã za oto daré romhâimana wamhã, rowasété si te za a'â daré 're sa'wari. Tahawa, Zudéa ãma 're isi'ubumroi mono norĩ hã, wara sina te za sisa're, ẽtẽ 'rãihâ u ta norĩ hã tiwi simani za'ra da, duré sisõ'reptu za'ra da.

Zezusihi zadawa wasuꞌuꞌwa norĩ nhimiromhuri na robꞌuiꞌéré 8:34

Tawamhã aibâ te oto sadanha, Filipi hã, ãne: — Isadawa 'mahârâ'wa hã e 'wa hã te wasu'u. E te siwasu'u. E aimawi hã te wasu'u. Ma'ãpé, ĩma wasu'u na.

1 Timotiu 4:13

Nimahã na wa za ãma atẽme wi. Ma'ãpé, ãma atẽme ĩwisi õ ré hã, dama 're sõré u'âsi mono za, 'Re ihâimana u'âsi mono nhimiroti 'rata na rob'ui'éré hã. Te za duré Wanhib'apito wasu'uwẽ na dama 're irowasu'u u'âsi mo. Te za duré 're idapawaptob u'âsi mo, isimiroti zarina 're danomro wẽ mono da. Taha da, te za asina 're i'madâ'â u'âsi mo.

Apocalipsi 1:3

Tawamhã ãhã wasu'u hã za 're iromhâimana mono zém na ni'wa te te dama 're sõré mono wamhã, tãma 're rowẽ u'âsi mono di za. Duré, ãhã wasu'u hã ni'wa te te 're wapari pese mono wamhã, ãma tãma 're rowẽ u'âsi mono di za. Ãma ronomro õ ré, te za 're romhâimana, 'Re ihâimana u'âsi mono te te iwaihu'uzém na hã. Tahawa, ni'wa hã hâimana nhimiza'rese sina, te te 're wapari pese mono wamhã, tãma hã 're rowẽ u'âsi mono di za ãma.