Daniéu 9:13 - ꞌRe Ihâimana Uꞌâsi Mono Zadawa Wasuꞌu

¹³ Ãne na Mozési hã te te ãma irob'ui'éré zarina, ma tô oto marĩ ipipa hã wazô tiwatobro za'ra. Ãne nherẽ, wa norĩ wawasédé, wa te rẽme waihu'u za'ra õ di. Duré a hã Uburé Danhib'apito, wate 'Re ihâimana u'âsi mono apâ 're iwa'awẽsãmri mono zô hã, wasima 're wanhopré mono õ di, wawasété nhiti 're iwasi'ré za'ra mono zarina, duré sena na asimiroti hã wa te 're iwapari pese za'ra mono zéb da hã.

Daniéu 9:13 ပူးပေါင်းရင်းမြစ်များ

Salmu 119:18

Ma'ãpé ĩto hã ĩma 'ridawa zahuré na, asimiroti iwẽ uptabi sena hã te ãma 're 'madâ'â mono da.

Salmu 119:27

Uburé Danhib'apito, ma'ãpé ĩpawapto na, asimiroti te sadaihu'u wẽ da. Tawamhã wa za asimiroti wẽ na te ãma 're rosa'rata u'âsi.

Salmu 119:73

'Re ihâimana u'âsi mono, asib'rata na ma tô ĩpo. Ma'ãpé tahawa, ĩ'rã nhimiza'resezé hã ĩma sõmri, asimiroti te ãma iwaihu'uzéb da hã.

Daniéu 9:11

Uburé Izaraéu nhihudu norĩ hã ma tô tihâimanazém na asimiroti hã siwi pru. Ma duré asimiroti nhiti apa za'ra. Wawasédé hã wa te aiwi 're 'manharĩ za'ra mono wa, ma tô wama ipisutu za'ra, ropire hã duré romhâimanazé ipipa hã Mozési te te ãma irob'ui'éré zarina wanhisiwib za'ra waptã'ã da hã.

Luca 24:45

Tawamhã ma tô ãne tãma waihu'u za'ra, ibaihâ na rob'ui'éré zarina: — Romhâ ré ma tô ãne ĩ'ãma rob'ui'éré za'ra ni: “Danho'reptui'wa te za robzépata za'ẽtẽ, 'Re ihâimana u'âsi mono te te ipisudu hã. Tane nherẽ, bâdâ maparane ãma si'utõrĩ õ ré, te za hâiwa'udu apâ, ab're hawi.

Zuwã 6:45

Duréihã ma tô ãne na rob'ui'éré, 'Re ihâimana u'âsi mono zadawa 'mahârâ 'rata 'wa hã: “Timreme te za te te dama 're awaihu'u, 'Re ihâimana u'âsi mono hã.” Ãne ma tô ãma rob'ui'éré. Tawamhã Ĩmama, timreme te te dama 're i'awaihu'u mono na, da te ãma 're sazei pese za'ra mono wamhã, ĩmreme na zama te za duré da te 're ĩzazei pese za'ra.

Zuwã 8:32

Tawap si te za iwaihu'u pese za'ra wa'wa, sena na rowaihu iwẽ hã 'Re ihâimana u'âsi mono ãma. Taha zarina te za tô sena na rowaihu iwẽ hã te te 're asani za'ra wa'wa, asima iwẽ na 're aihâimana za'ra wa'aba mono zéb u.

Éfézu 4:21

A norĩ wa'wa hã ma tô Cristuhu wasu'uwẽ hã aipo're na 're iwapari za'ra wa'aba mo. Oto isiré 're aihâimana za'ra wa'aba mono wa, Zezusihi hawi roti tô sena hã aima waihu'u pese za'ra wa'aba di.

Tiagu 1:5

'Re ihâimana u'âsi mono hawi, dahâimanazém na rowaihu'u ré 're aihâimana za'ra wa'aba mono õ wamhã, te za asima tiwi 're irowaptẽrẽ za'ra wa'aba mo, ta hã sõpru uptabi wa. Duré uburé ta hã dama marĩ wẽ nhomri'wa. Ãne wa, tiwi 're irowaptẽrẽ za'ra wa'aba mono zéb uwaibaba, te za te te aima 're sõmri za'ra wa'wa, dahâimanazém na rowaihu iwẽ uptabi hã.