Daniéu 8:21 - ꞌRe Ihâimana Uꞌâsi Mono Zadawa Wasuꞌu

²¹ Pone'ẽrebâ zéré uzé si'aibâ, Grécia ãma apito, te wasu'u. Duré i'õmo za'ẽne imorĩ'rata na ã hã ti'ai wa'õtõ nho'õmo ãma za isi'apito hã te wasu'u.

Daniéu 8:21 ပူးပေါင်းရင်းမြစ်များ

Daniéu 10:20

Tawamhã te ĩma tinha ãne oto: — Marĩ wa, we atẽme ĩmorĩzé hã, e ma tô iwaihu. Sena na Ibaihâ nhisi 're, rob'ui'éré ihâimana na te ãma aima rowasu'u da, wa we atẽme mo. Tane nherẽ, ãhã na hã Persia u ĩmorĩ da si, hâiwa ãma romhuri'wa Persia 'madâ'â'wa, te 'wapé da. Wasi'wapézé tâibâ wamhã, hâiwa ãma romhuri'wa Grécia 'madâ'â'wa hã te za wei mo. Tane nherẽ, ni'wa te te ĩpawaptob da hã mare di za. Niha wamhã, Miguehe si, te za ĩpawapto, Izaraéu nhihudu norĩ 'wawi 're isimapa mono hã.

Daniéu 11:2

Hâiwa hawi romhuri'wa hã te zahadu timreme na ãma ĩma uzusi ãne: — Sena na marĩ na hã wa za oto aima rowasu'u. Si'ubdatõ te za Persia ãma apito norĩ danhib'ihâ'a na dama 're hâimana za'ra za. Ta norĩ za'u si, te za duré maparane si'uiwa na ãma dama si'apito, uburé apito norĩ iwana ihâimana za'ra nhipai'u isibro pe hã. Ta hã sibro pese uptabi wa, te za siptete na dama 're hâimana, i'rã nho'õmo na. Te za uburé tite dasi'wapéi 'manharĩ'wa norĩ hã 'rã'õtõ, Grécia ãma a'uwẽ te te 'wapé za'ra da hã.

Daniéu 11:3

Taha parimhã ihâiba amo apito isi'wapé ze hã te za duré watobro. Tawamhã dama isi'i'rãnho'õmozé hã siptete uptabi wa, te za marĩ te te sima iwẽ na te te 're ab'manharĩ.

Daniéu 2:39

Tawamhã danhib'ihâ'a na 're aihâimana mono parimhã, te za aimawi danhib'apito hã 'maihãzé, asapari siptete prã na 're ihâimana mono da hã oto. Taha parimhã te za duré aimawi hã 'maihãzé si'ubdatõ ãma hã, ẽtẽ topsada brõzi na ãma isimiré hã uburé te te 're ida'a'madâ'â mono da hã, ro pâ.

Daniéu 7:6

Taha pari si'ubdatõ ãma ropoto siwamnarĩ wa tô duré 'madâ, hu'u hâiba ne hã. Iba na isaribi hã maparane si'uiwa na, tô si norĩ zaripi ne. Duré maparane si'uiwa na i'rã hã. Taha ma, pire na i'rãnho'õmo na te te 're ida'a'madâ'â mono zéb da hã ma tô tãma pisutu ni.

Daniéu 8:20

Pone'ẽrebâ zéré mapure si'aibâ maparane i'u i'madâ hã, Média ãma apito, Persia ãma apito me, te wasu'u zahuré.

Daniéu 8:22

Duré i'u da te iwẽ'ẽ nho'wa're're, maparane si'uiwa na i'u ipoto za'ra hã, maparane si'uiwa na ti'ai ãma dama i'rã nho'õmo nhimi'madâ'â za'ra zé, te wasu'u, ti'ai wa'õtõ nho'u za sima isipo'o za'ra hã. Tane nherẽ, ã hã dama i'rã nho'õmo norĩ hã imorĩ'rata na isiptede tãma 're ihâimana mono ne, tãma 're hâimana za'ra mono õ di za, ta norĩ ma.