Daniéu 8:11 - ꞌRe Ihâimana Uꞌâsi Mono Zadawa Wasuꞌu

¹¹ Hâiwa ãma dasi'wapéi 'manharĩ'wa norĩ wada'uri'wa zada ma tô duré tihâiba. Tahawa, bâtâ sidâpâsi õ norĩ wada'uri'wai ma, marĩ zata na 're idanhoprub za'ra mono zé hã ma tô tiwi pari pese za'ra. Ma tô duré isõrõwa 'ri 'rãihâ hã tiwi pru pese.

Daniéu 8:11 ပူးပေါင်းရင်းမြစ်များ

Daniéu 11:22

Ta hã te za uburé tinhitob'ru dasi'wapéi 'manharĩ'wa norĩ ãma hã ai'uté za'ra. Duré sasedoti dama isa'ẽne ipire uptabi hã te za tiwĩ.

Daniéu 11:31

Tawamhã duré ite dasi'wapéi 'manharĩ'wa norĩ hã te za 'Re ihâimana u'âsi mono nhorõwa 'ri 'rãihâ siwi wasété pese. Te za duré bâtâ sidâpâ abaze zata na 're idanhoprub za'ra mono zé hã siwi sizâ. Tahawa, te za duré 'Re ihâimana u'âsi mono nhorõwa 'ri 'remhã siwi tisã, marĩ ipipa iwasété uptabi hã.

Daniéu 12:11

Abaze zata na 're idanhoprub za'ra mono zé da te isizârizé bâtâ hawim haré, duré 'Re ihâimana u'âsi mono nhorõwa 'ri 'rãihâ 're, marĩ iwasété uptabi, da te dasiwi isãrĩ hawim haré te za 1.290 na bâdâ hã ãma ai'utõ za.

Daniéu 5:23

Tane nherẽ, hâiwa ãma Uburé Danhib'apito da, i'aihâimanazéb zarina, ma tô hâsizé 'Re ihâimana u'âsi mono nhorõwa 'ri 'rãihâ 're, 're isimasa mono, da te iwaibu za'ra hã dama i'ru, da te we 'wasari da, sô i'aihârâ za'ra dama ipire norĩ hã duré aimro norĩ, duré aimro prã aima 're ihâimana za'ra wa'aba norĩ te te uwa 'rãi wa'u isé iwa âhuri da hã, asiré. Taha nhipai u ma tô duré ihâiba'õ norĩ ãma hã aiwa, ẽtẽ waipo prã prata 'manharĩ na, ẽtẽ waipo pré oru 'manharĩ na, ẽtẽ topsada brõzi 'manharĩ na, isi'uwazi tete 'manharĩ na, wede 'manharĩ na, duré ẽtẽ 'manharĩ na, te te 're irob'madâ'â waihu'u mono õ na, duré 're isimipari waihu'u mono õ na, marĩ te te 're iwaihu'u za'ra mono õ na. Tane nherẽ, a hã, 'Re ihâimana u'âsi mono dapãrĩ waihu'u pese 'wa na duré dahâiba ré na te te 're ida'arẽme mono ãma aiwata õ di, uburé marĩ aima 're hâimana mono da, te te sima 're irowairébé mono ãma hã.

Daniéu 7:25

Ta hã te za uburé danhipai u Isiptede 'Re ihâimana u'âsi mono zada hã 're hâimana. Te za duré isib'a'uwẽ norĩ ma hã te te 're arob'manharĩ wasété. Duré te za 'Re ihâimana u'âsi mono nhimiroti na duré isib'a'uwẽ nhibâtâ norĩ na te te ãma tiwi saprĩ za'ra da hã, te te 're pibui u'âsi za'ra, Te za duré si'ubdatõ wahu aiwa ãma isipo'o na 'Re ihâimana u'âsi mono nhib'a'uwẽ norĩ isib'ratamhã a'â tihâimana za'ra.

Daniéu 8:12

Duré bâtâ sidâpâsi 're idanhoprub za'ra mono zéb upana, ma tô iwasété na si 're danhoprub za'ra oto. Õ hã ma tô duré sena na danhimizaze 're ihâimana mono hã uprosi. Duré uburé marĩ te te 're i'a'manharĩ mono zém na ma tô te te sima ãma 're a'uwaimrami.

Daniéu 8:24

Tawamhã te za duré isiptetezé hã we te te tãma sina hâimo u'âsi. Tane nherẽ, tinhiptete na we sihawi siptete mono õ di za. Taha na te za te te dawi 're arowamnarĩ, tipipa uptabi na. Te za duré a'uwẽ isiptete norĩ hã uprosi, 'Re ihâimana u'âsi mono tinhib'a'uwẽ da, te te ipisutu norĩ zama. Marĩ te te sima iwẽzéb zarina, te za tô we te te sima ãma 're a'uwaimrami.

Daniéu 8:25

Ti'rã nhipese zarina te za tô sima te te 're irowa'õtõ mono zé hã ãma sima te te 're a'uwaimrami. Te za duré 're isi'madâ'â zei mono na, we te te sina 're hâimo u'âsi. Te za duré te te 're ida'ahâiba za'réi mono zarina, da'ahâ na te te 're da'a'mapãrĩ. Uburé apito norĩ nhipai u Isiptede 'Re ihâimana u'âsi mono zada, te za duré tihâiba, ti'ai ãma apito iwasédé hã. Tane nherẽ, ti'ai ãma apito iwasédé hã te za wamnarĩ ni, a'uwẽ nhiptete nai õ na hã.

Daniéu 9:25

Daniéu, marĩ waihu'u da, ma'ãpé ĩwapari pese. Zeruzalẽ apâ za da te dasiwi 'ri da, te te dama 'rui parimhã, te za 7 x 7 na wahu hã ai'utõ, 'Re ihâimana u'âsi mono dama i'rã nho'õmo da hã te te ipisutuzéb u. Tawamhã Zeruzalẽ 're, 'ri nhi'ridi ité ihâimana za'ra ãma hã, duré 'ri 'wawi wa'ra 'rãihâ ãma hã te za wahu hã ai'utõ, 62 x 7 na. Tane nherẽ, taha ré hã te za we romhâimana mono, robzépata za'ẽtẽ na hã.

Luca 21:24

Sib'ézé 'wapa na hã da'ahâ na te za tadâ'â za'ra ni. Duré, ni'wam norĩ hã daro mono bâ, te za da te simro. Te za da te ãma ropé, daro mono bâ. 'Re ihâimana u'âsi mono zazei'õ'wa norĩ hã sahi sina te za a'â te te dama 're roti za'ra, Zeruzalẽ ãma, zudeu'õ norĩ hã. Bâdâ hã iwa tãma iwaptã'ã za'ra zéb u, te za da'madâ'â 'rãsutu za'ra.

2 Tesalonita 2:4

Ta hã, 'Re ihâimana u'âsi mono upana waihu'u pese newa, ãma 're idawata za'ra mono norĩ hã te za dawi wẽ'õ za'ra, ta norĩ ãma 're dawata za'ra mono tõ da oto. Romhâiba hã te za duré dawi wẽ'õ za'ra, ãma 're dawata za'ra mono tõ da. Duré 'Re ihâimana u'âsi mono te te dama 're i'apisutu mono hã te za dawi wẽ'õ za'ra. Uburé ãma 're idawata za'ra mono na te te ãma ida'rãnhipa na, te za siwasu'u ãne dama: “Wa hã, Ĩwaihu'upe. Wa hã 'Re ihâimana u'âsi mono.” Ãne te za siwasu'u. Tawamhã ti'ai ãma 'Re ihâimana u'âsi mono nhorõwa 'ri u, te za ãzé, tame sãmra da.

Hebreu 2:10

'Re ihâimana u'âsi mono hã ma tô uburé te te ro'apoto. Taha ma si te uburé marĩ hã tãma 're hâimana. Ta hã tô ibâ, ma ti'ra hã pisutu Zezusi hã, dazada dâ'â wa, te te robzépata da a'â, taha zarina te te 're da'anho'reptui mono da, te te sina uwaimrami da, 'Re ihâimana u'âsi mono te te tãma ipisutuzéb zarina. Da'ahâ na hâiwa ãma rowẽ uptabi na i'rata 're danomro u'âsi mono da, ma tô ãne da hã tãma pisutu, 'Re ihâimana u'âsi mono hã.

Apocalipsi 17:14

Te za duré ropoto siwamnarĩ siré siwi 'wapé, Pone'ẽrebâ hã. Tane nherẽ, te za Pone'ẽrebâ hã ãma ai'uté za'ra. Ta hã Pone'ẽrebâ danhipai u Uburé Danhib'apito uptabi na 're hâimana mono wa, duré danhipai u dama pire na 're hâimana mono wa, te za ãma ai'uté za'ra. Ni'wam norĩ hã isirã zarina si 're nomro mono da, Pone'ẽrebâ te te 're i'apisutu mono norĩ hã, duré simi'ẽ na õhõ ãma si 're inomro mono norĩ hã, te za Pone'ẽrebâ siré ãma ai'uté za'ra, ropoto siwamnarĩ norĩ ãma hã.