Daniéu 7:5 - ꞌRe Ihâimana Uꞌâsi Mono Zadawa Wasuꞌu

⁵ Tawamhã ropoto siwamnarĩ isãna'reb ãma hã wa tô duré 'madâ, ursu hâiba ne hã. Ta hã ma tô duré para na hâiwi za wahu na, tizadawa 're, ti'wa na marĩ waihi te te tété sina. Taha ré, te ni'wa tãma tinha ãne: “Aiwahutu, asima iwẽ na romnhi hã 'mairẽne da.”

Daniéu 7:5 ပူးပေါင်းရင်းမြစ်များ

Provébiu 17:12

Robzahi ursu wi, i'ra da te tiwi 're iwaibui mono, da te 're sõpẽtẽ za'ra mono wamhã, pipa di. Tane nherẽ, isimiza'rese'õ tihâimana nhimiza'rese'õ zarina marĩ te te 're 'manharĩ mono ré, da te ãma 're sõpẽtẽ mono wamhã, taha si ipipa uptabi hã.

Daniéu 11:2

Hâiwa hawi romhuri'wa hã te zahadu timreme na ãma ĩma uzusi ãne: — Sena na marĩ na hã wa za oto aima rowasu'u. Si'ubdatõ te za Persia ãma apito norĩ danhib'ihâ'a na dama 're hâimana za'ra za. Ta norĩ za'u si, te za duré maparane si'uiwa na ãma dama si'apito, uburé apito norĩ iwana ihâimana za'ra nhipai'u isibro pe hã. Ta hã sibro pese uptabi wa, te za siptete na dama 're hâimana, i'rã nho'õmo na. Te za uburé tite dasi'wapéi 'manharĩ'wa norĩ hã 'rã'õtõ, Grécia ãma a'uwẽ te te 'wapé za'ra da hã.

Daniéu 2:39

Tawamhã danhib'ihâ'a na 're aihâimana mono parimhã, te za aimawi danhib'apito hã 'maihãzé, asapari siptete prã na 're ihâimana mono da hã oto. Taha parimhã te za duré aimawi hã 'maihãzé si'ubdatõ ãma hã, ẽtẽ topsada brõzi na ãma isimiré hã uburé te te 're ida'a'madâ'â mono da hã, ro pâ.

Daniéu 5:28

PERES na damreme hã, dama i'rãnho'õmo na asimi'madâ'âzé hã za sima isipo te wasu'u. Média norĩ ma, te za sõmri zahuré ni, Persiaha me hã.

Daniéu 7:4

Imorĩ'rada hã hu'u zérépa hâiba ne, si'õmo wawẽ zaripi ré hã. Ta hã te 'madâ'â ré, ma tô isaribi hã tiwi sani ni. Tahawa, ma tô hâiwi sab da, dasiwi sãrĩ ni, a'uwẽ hâiwi 're isimasa mono ne. Ma tô duré a'uwẽ nhimirosa'rata ne hã oto tãma sõmri ni.

Daniéu 7:6

Taha pari si'ubdatõ ãma ropoto siwamnarĩ wa tô duré 'madâ, hu'u hâiba ne hã. Iba na isaribi hã maparane si'uiwa na, tô si norĩ zaripi ne. Duré maparane si'uiwa na i'rã hã. Taha ma, pire na i'rãnho'õmo na te te 're ida'a'madâ'â mono zéb da hã ma tô tãma pisutu ni.

Apocalipsi 13:2

Duré ihâiba hã, hu'u hâiba ne. Ipara hã robzahi para ne hã ursu para ne. Duré isadai'ré hã, aiwa hu'u zérépa zadai'ré ne, isadai'ré hã. Tawamhã ho'orã hâiba ne ropoto siwamnarĩ hã, Satanasi hã ma tô tinhiptetezé hã tãma tisõ, isadawa para siré te te da'ãma 're romhuri wasété zahuré mono da, isimiromhuri waihu'u pese zém na.