Daniéu 6:7 - ꞌRe Ihâimana Uꞌâsi Mono Zadawa Wasuꞌu

⁷ Uburé wa norĩ, dama i'rãnho'õmo norĩ hã, 'ri nho'õmo 're, dama ipire norĩ hã, daza'rui wa'õtõ mono bâ dama i'rãnho'õmo norĩ hã, duré uburé aimawi dama ipire norĩ hã wasi'rã'õtõ wamhã, wa tô ãma wasisaze za'ra ni, asimiroti itede i'manharĩ da hã, wa te aiwi waptẽrẽ za'ra da, ãma idanhimipari prédu, i'ru zahi hã. Tahawa, te za a hã dama iwaihu, 30 bâtâ 'remhã aiwi si, da te 're rowaptẽrẽ za'ra mono da. Tawamhã taha ré ni'wam norĩ, marĩ siwa'ru ihâiba'õ norĩ wi, duré siwa'ru dawi te te 're rowaptẽrẽ za'ra mono wamhã, te za hu'u zérépa ma, ab're 'remhã dasiwi sãmra ni.

Daniéu 6:7 ပူးပေါင်းရင်းမြစ်များ

Salmu 10:9

Hu'u zérépa ne, te tô 're isima'uri mono zéb ãma hã dazô 're simipari. Te duré si'wawi 're isimapa waihu'u õ norĩ zô hã 're rĩtĩ. Simire sina te sô 're simipari za'ra. Te te da'mai'âri wamhã, te za te te da'ãma robâdâ.

Salmu 2:2

Ti'ai ãma isib'apito norĩ hã, duré dama i'rãnho'õmo norĩ hã te Uburé Danhib'apito zada te te sima 're rowa'õtõ za'ra, duré za apito te te ipisutu da zama.

Salmu 94:20

A hã, senai'õ na da'ãma rowairébé'wa norĩ hã 're awẽsãmri mono õ di. Ta norĩ hã te senai'õ na roti zarina te te dawi 're rowamnarĩ za'ra ãma.

Daniéu 2:4

Tawamhã ta norĩ hã aramaicu na damreme wamri na, ma tô apito ma ãne nharĩ za'ra: — Apito, 're aihâimana u'âsi mono da si, wa wasima wẽ za'ra ni! Ma'ãpé irosawẽrẽ hã wama wasu'u za'ra na. Tawamhã wa za marĩ te te iwasu'u na hã aima ãma saprĩ za'ra ni.

Daniéu 3:11

Ni'wa hã ãne na roti te te wapari õ wamhã, te za 'ri're wa'wa unhama ro'o u dasiwi me ni.”

Daniéu 3:2

Taha pari ma tô dama i'rãnho'õmo norĩ ma, 'ri nho'õmo 're, dama ipire norĩ ma, daza'rui wa'õtõ mono bâ dama i'rãnho'õmo norĩ ma, te te da'ãma 're irowairébé za'ra mono norĩ ma, rob'uiprazé ubumroi'wa norĩ ma, damrami'wa 'madâ'â'wa norĩ ma, dama roti'wa norĩ ma, duré uburé aimawi dama ipire norĩ ma, ma tô tãma waihu'u za'ra, ropoto saiwĩrĩ u hã sitẽme sitob da.

Daniéu 3:27

ma tô uburé dama ipire õme ihâimana za'ra 'râwi itẽme isihutu norĩ hã 'madâ'â za'ra, unhama ro niha te te ihâiba wamnarĩ za'ra õ na hã. Tawamhã duré unhama ro hã te te séré hõmo za'ra õ di. I'uza za'ra te te duré tiwi hâzata za'ra õ di. Duré hâiba uzé za'ra õ di, unhama nhizédé na hã.

Daniéu 3:6

Tawamhã ni'wa, ropoto ãma dame wata da, hi'rãtitõ tãma sãmra õ wamhã, te za tô awa'awi dasiwi me ni, 'ri're wa'wa unhama ro'o u.

Daniéu 6:16

Tahawa apito, ma tô Daniéu hã dama ti'ru, da te dasiwi saprõni da, hu'u zérépa ma, ab're 're, da te dasiwi me da. Tahawa, te apito, Daniéu ma tinha ãne: — Ate 'Re ihâimana u'âsi mono, ãma 're i'aihâimana mono hã, duré õne u'â tãma 're i'asisõmri mono hã te te asõ'reptu zô, wa za wa hã rob'madâ.

Daniéu 6:22

Ĩte 'Re ihâimana u'âsi mono, tite hâiwa ãma romhuri'wa we te te isatõrĩ hã ma tô te te siwi ĩ'u'a tõ da, sadawa nhiptob za'ra, hu'u zérépa norĩ hã. 'Re ihâimana u'âsi mono ma, wa hã marĩ iwasédé te tiwi i'manharĩ õ na hã tãma ĩwaihu'u pese wa, ma tô ãne hã ĩma 'manha. Duré niwamhã aiwi zama marĩ te aiwi 'manharĩ wasété õ di.

Mateu 12:14

Tawamhã te te pese pari, ma tô farizeu norĩ hã wairé, te te sima ãma roti za'ra da, Zezusihi ãma, da te dasiwi wĩrĩ da, isadawa parab za'ra.

Mateu 26:4

Tawamhã sitẽme si'rã'õtõ wamhã, ma tô sima ãma rosa'rata za'ra. Tahawa, te roti hã pi'uriwi siwi ãma 'manha, Zezusi hã pi'uriwi te te siwi âri da, da te oto dasiwi wĩrĩ da hã.

Marcu 15:1

Tawamhã awẽm na mararé, ma duré si'rã'õtõ, sasedoti ipire norĩ hã, duré zudeu norĩ ma roti'wa norĩ hã, duré 'Re ihâimana u'âsi mono nhimiroti 'rata na rob'ui'éré na dama rowahutu'wa norĩ hã. Zezusihi ãma te te sima roti za'ra da, ma si'rã'õtõ, dama roti'wa ipire norĩ me. Taha pari, ma oto siwi pawasisi Zezusi hã, Pilatuhu u te te siwi saprõni da. Tawamhã itẽme te te siwi ãwisi wamhã, Pilatu te Zezusi sadanha, ãne: — E a hã, zudeu norĩ nhib'apito. Tawamhã Zezusi te asa tãma tinha, ãne: — Tahata ma te tô tane hã isarina ĩ'ãma iwaihu.

Zuwã 12:10

Tawamhã Lazaru hã da te sabu za'ra wamhã, da'ahâ na ma tô Zezusi hã Danho'reptui'wa na saze za'ra ni. Ta norĩ ma, oto wapu za'ra di, 'Re ihâimana u'âsi mono ma, da'ãma romhuri'wa ipire norĩ mreme hã, sasedoti ipire norĩ mreme hã. Tahawa, Zezusi, da te saze za'ra 'ru te, te sima ãma roti za'ra Lazaruhu ãma, taha zama da te siwi wĩrĩ da.