Daniéu 5:7 - ꞌRe Ihâimana Uꞌâsi Mono Zadawa Wasuꞌu

⁷ Tawamhã sa'ẽtẽ mreme 'rãihâ na ma tô marĩ 'manharĩ nhipese 'wa norĩ zô, rowaihu'u pese 'wa norĩ zô, duré wasi na romnhoré'wa norĩ zô dahãsi da hã dama ti'ru. Tawamhã ta norĩ sihutu wi, ma tô Béusaza hã tãma nharĩ za'ra ãne: — Ã hã 'ri na'rata na rob'ui'éré, ni'wa hã te te sõré waihu'u wamhã, duré marĩ te te iwasu'uzém na te te ãma ĩma saprĩ waihu'u wamhã, da'uza ihâ prépe iwa'âbâ za'ẽtẽ na te za ãma uza ni. Oru 'manharĩ na danho'rebzum na zama te za duré ãma sõ'rebzu ni za. Tahawa, wa za duré tãma pisutu, si'ubdatõ ãma dama ipire na ĩzahâpâmhã 're hâimana mono da, ĩnhimi'madâ'âzéb 'remhã.

Daniéu 5:7 ပူးပေါင်းရင်းမြစ်များ

Zenezi 41:8

Tawamhã awẽm na mararé te te isahoi mono zém na hã hâtâ'â di, duré tãma robzei õ di. Tahawa Ezitu ãma romhõsi'wa norĩ zô, duré rowaihu'u pese norĩ zô te uburé sô tihârâ za'ra. Tawamhã apito te tinhimirosawẽrẽ hã tãma wasu'u za'ra. Tane nherẽ, ni'wa te te ãma tãma saprĩ waihu'u õ di.

Ezodu 7:11

Tawamhã apito, rowaihu'u pese 'wa norĩ zô duré romhõsi'wa norĩ zô zama ma tô sô tihârâ za'ra, tô isine marĩ hã te te tãma 'manharĩ za'ra da.

Provébiu 1:9

Ta norĩ nhimiroti hã te za 're i'aihâimana wẽ mono zéb da hã te te 're asiptete, marĩ i'madâ'â ze asõpre na isimnhatã ne, niha wamhã, asõ'rebzu iwẽ i'madâ'â ze, aibutu na isa'o ne.

Daniéu 1:20

Tawamhã apito, uburé marĩ mono na te te ta norĩ 're sadanharĩ za'ra mono wamhã, uburé Babilonia ãma i'rãiwaihu'u pese norĩ nhipai u, duré marĩ 'manharĩ nhipese 'wa norĩ nhipai u, te te irowaihu'u pese za'ra na hã ma tô oto upsibi me za'ra.

Daniéu 1:4

uburé 'madâ'â ze na hâiba wẽ na 're ihâimana za'ra mono, ihâiba siwamnarĩ'õ hã, i'rãiwaihu'u pe hã, isimirowaihu'u pese norĩ hã, za apito nhimiromhurizé 'ri 'rãihâ 're, romhuri waihu'u pese 'wa norĩ da hã, duré za Babilonia norĩ mreme te te iwaihu'u za'ra da hã, duré ta norĩ mreme na rob'ui'éré na te te 're iromnhoré za'ra mono da hã.

Daniéu 2:2

Tahawa, i'rãiwaihu'u pese norĩ zô, marĩ 'manharĩ nhipese 'wa norĩ zô, simi'â ré norĩ zô, duré wasi na romnhoré'wa norĩ zô hã ma tô sô tihârâ za'ra, te te irosawẽrẽzém na te te ãma tãma saprĩ za'ra da. Tawamhã ta norĩ hã apito u sihutu wamhã, isõ're oto simasa wa,

Daniéu 2:27

Tawamhã Daniéu ma te ãma tãma wa'rã ãne: — Tô rowaihu'u pese 'wa nherẽ, marĩ 'manharĩ nhipese 'wa nherẽ, simi'â na romhuri'wa nherẽ, duré wasi norĩ na romnhoré'wa 're hâimana za'ra mono nherẽ, tiwi iwaptẽrẽ za'ra zé hã te te tô ta norĩ hã ãma aima saprĩ waihu'u za'ra õ di.

Daniéu 2:48

Tawamhã apito ma tô Daniéu danhipai u pire na danhib'ihâ'a na 're hâimana mono da hã pisutu oto. Ma tô duré ãma tãma tinhopru, marĩ iwa'âbâ za'ẽtẽ norĩ na hã. Ma tô duré Babilonia ãma daza'rui wa'õno ihâimana ãma dama i'rãnho'õmo na 're hâimana mono da hã, duré uburé rowaihu'u pese 'wa norĩ nhib'ihâ'a na 're hâimana mono da hã pisutu, ti'ai wa'õtõ nho'õmo 'remhã.

Daniéu 2:6

Tane nherẽ, te irosawẽrẽzé ĩma wasu'u za'ra wa'aba wamhã, duré ãma ĩma saprĩ wẽ za'ra wa'aba wamhã, wa za taré marĩ iwa'âbâ za'ẽtẽ na ãma aima ĩnhoprub za'ra wa'wa. Wa za duré aipisutu za'ra wa'wa, dama aipire na 're aihâimana za'ra wa'aba mono da. Tahawa, ma'ãpé te irosawẽrẽzém na hã ãma ĩma rowasu'u za'ra wa'aba. Taha pari te za duré marĩ te te iwasu'uzém na ãma ĩma isaprĩ za'ra wa'wa.

Daniéu 4:14

Ta hã ma tô mreme 'rãihâ na tinha ãne: ‘Ma'ãpé wede hã asiwi 'morõwĩrĩ aba. Asiwi 'morõwĩrĩ aba wamhã, te za ipanhipti asiwi isihâri aba mo. Te za duré isu hã asiwi isinarĩ aba mo. Duré i'rã asiwi sãmra aba wamhã, te za ãma asiwi iropéi wa'aba mo. Iwede awã zahâpâ abaze norĩ 're iwa'utu za'ra mono hã te za duré ta hawi asiwi iwano'õ aba mo, si norĩ ipanhipti na 're isimasa mono norĩ zama.

Daniéu 5:11

E tihai wa. Ãme asimi'madâ'âzéb ãma te ihâiba'õ norĩ pẽ'ẽzani ré aibâ hã tihâiba. Aimama Nabucodonozo, apito na 're hâimana mono ré hã, ma tô aibâ hã da te 're waihu'u za'ra, i'rã nhimiza'rese wẽ na hã, duré rowaihu'u pese 'wa na hã, ihâiba'õ norĩ ne. Tawamhã ta hã ma tô apito Nabucodonozo pisutu, rowaihu'u pese 'wa norĩ nhib'ihâ'a na, tiha 'manharĩ nhipese 'wa norĩ nhib'ihâ'a na, simi'â na romhuri'wa norĩ nhib'ihâ'a na, duré wasi na romnhoré'wa norĩ nhib'ihâ'a na tãma 're hâimana za'ra mono da hã.

Daniéu 5:15

Nimosi prã na ma tô rowaihu'u pese 'wa norĩ hã, duré wasi na romnhoré'wa norĩ hã we ĩtẽme da te simro, 'ri na'rata na rob'ui'éré te te aré ĩma sõré za'ra da, duré aré marĩ te te iwasu'uzém na te te ãma ĩma saprĩ za'ra da. Tane nherẽ, te te ĩma ãma saprĩ waihu'u za'ra õ di, ta norĩ hã.

Daniéu 5:16

Tane nherẽ, ma tô ni'wa hã ĩma aiwasu'u, a hã dama iwaihu'u'õ ipire hã za ãma isaprĩ waihu'u pese na hã. Tahawa, a hã 'ri na'rata na rob'ui'éré sõré waihu'u pese wamhã, duré ãma ĩma saprĩ waihu'u pese wamhã, te za da'uza ihâ prépe iwa'âbâ za'ẽtẽ na ai'uza ni za. Te za duré ẽtẽ waipo pré oru 'manharĩ na hã ãma asõ'rebzum ni za. Tawamhã wa za duré ĩte i'rãnho'õmo na si'ubdatõ ãma dama aipire na 're aihâimana mono da hã aima pisutu.

Daniéu 5:29

Tawamhã apito Béusaza, te Daniéu hã dama ti'ru, da'uzazé ihâ prépe iwa'âbâ za'ẽtẽ na da te dasiwi uza da, duré ẽtẽ waipo pré oru na da te dasiwi sõ'rebzu da hã. Tawamhã ma tô duré Daniéu hã pisutu, Babilonia ãma dama i'rãnho'õmo na si'ubdatõ ãma dama ipire na 're hâimana mono da.

1 Samuéu 17:25

Tahawa, te ãne sima nharĩ za'ra: — Ni'ã õ hã aibâ hã asiwi 'madâ'â aba. Ma'ãpé wazô ihârâ zahi za'ra zé hã wapari aba. Ni'wa hã filisteu te te wĩrĩ wamhã, te za tipawa'â isa'ẽne hã ti'â. Apito te za marĩ iwa'âbâ za'ẽtẽ uptabi hã ahâ na tãma sõmri za'ra. Te za duré ti'ra sipi'õ hã ãma imro da hã tãma tisõ. Tahawa, imama sisãnawã norĩ niwamhã tite rob'uiprazé apito ma, te te dame tãma 're i'arĩ za'ra mono da hã mare di za.