Daniéu 5:19 - ꞌRe Ihâimana Uꞌâsi Mono Zadawa Wasuꞌu

¹⁹ 'Re ihâimana u'âsi mono, da'madâ'â nhiptetezé te te aré tãma isõmri hã sa'ẽtẽ uptabi wa, ma tô uburé daro mono bâ isõ'remhã aré tãma 're darẽrẽ'ẽ za'ra. Tawamhã te te sima wẽ wamhã, te za ni'wa hã tiwĩ. Niha wamhã duré te te sima wẽ wamhã, te za tô ãma rosazâ, hâiba ré 're sãmra mono da. Duré ni'wa isimiromhuri zarina te za tô ãma hâimo, te te sima iwẽ hã. Te za duré ni'wai ãma hã ãma ti'awi, te te sima iwẽzéb zarina.

Daniéu 5:19 ပူးပေါင်းရင်းမြစ်များ

Provébiu 16:14

Apito 're isiti'rui mono zé hã dama simimnhasi uptabi di, dadâ'â da hã. Tane nherẽ, i'rãiwaihu'u wẽ hã te za te te 're hâimana wahâ, atãma na hã.

Daniéu 11:12

Tahawa, Ezitu ãma apito te za si'madâ'â zei pese, hâiwa nhimi'e niwĩ daza'ru apito te, dasi'wapéi 'manharĩ'wa norĩ ãma, te te ai'uté za'ra wẽ te, ahâ uptabi na te te uprosi za'ra wa. Tane nherẽ, taha tinhiptete na ãma hâimana hutu di za.

Daniéu 11:16

Ezitu u isisisi norĩ hã te za ezipsiu dasi'wapéi 'manharĩ'wa norĩ ma, sima iwẽ na niha hã marĩ tãma 'manharĩ za'ra, ni'wa hã sada hâimana za'ra ãna. Tawamhã ta norĩ hã te za Ti'a Iwẽ uptabi u asisi. Te za duré tô ãma ai'uté za'ra.

Daniéu 11:3

Taha parimhã ihâiba amo apito isi'wapé ze hã te za duré watobro. Tawamhã dama isi'i'rãnho'õmozé hã siptete uptabi wa, te za marĩ te te sima iwẽ na te te 're ab'manharĩ.

Daniéu 11:36

— Tame te za tô apito marĩ hã te te sima iwẽzéb zarina te te 're ab'manharĩ. Ta hã 're isi'madâ'â zei mono zarina, te za ihâiba'õ norĩ nhipai'u pire na 're ihâimana mono na, te te sina 're rosa'rata. Tahawa, te za duré 'Re ihâimana u'âsi mono ãma hã te te 're wasété, timreme wasété uptabi na. Ãne hã te za uburé te te 're ab'manharĩ, 'Re ihâimana u'âsi mono te te i'azârizéb u. Te te ãma sima irowairébé siromo zéb zarina, te za tô oto tãma rob'manha.

Daniéu 3:29

Tahawa, wa za roti ipire na hã 'manha, siwa'ru a'uwẽ norĩ hã dapoto mono bâ, daro mono bâ duré damreme mono bâ 're idamreme zusi mono hã ni'wa hã Sadraqui norĩ te, Mezaqui, Abide-Negu, 'Re ihâimana u'âsi mono nhisi na te te nharĩ wasété wamhã, da te sihâri mono da, duré za isõrõwa da te tiwi prub da. E marĩ wa. Aimawi ihâiba'õ hã 'maihâimana õ wa, 'Re ihâimana u'âsi mono sine hã, ã norĩ te te isõ'reptu za'ra ne hã.

Daniéu 3:4

Tawamhã apito mreme 'mahârâ'wa ma tô oto mreme 'rãihâ na dama sadawa 'mahâ ãne: — Uburé a'uwẽ norĩ daro mono bâ, dapoto mono bâ duré aimreme mono bâ i'aihâimana za'ra wa'aba norĩ, ãhãta apito te za ãhã na hã aima waihu'u za'ra wa'wa!

Daniéu 3:6

Tawamhã ni'wa, ropoto ãma dame wata da, hi'rãtitõ tãma sãmra õ wamhã, te za tô awa'awi dasiwi me ni, 'ri're wa'wa unhama ro'o u.

Daniéu 4:17

à hã ma tô hâiwa ãma romhuri'wa, sõtõ ãna 're isõpré u'âsi mono norĩ hã siwi ãma rowairébé, uburé danhipai u isiptede 'Re ihâimana u'âsi mono, daro mono bâ uburé da'rãnho'õmo nhimi'madâ'âzém nhipai u siptete na te te 're ida'a'madâ'â mono na, da te ãma waihu'u za'ra da hã. Ta hã te za da'rãnho'õmo na da'madâ'âzéb da hã, te te sima 're ida'awẽ mono zéb zarina te te dama 're apisutu, dama wapu na ni'wa 're hâimana mono nherẽ, oto dama pire da.’ ”

Daniéu 4:19

Tawamhã Daniéu, Béutésaza na isisi amo ãne hã te te wapari wa, ma tô tãma a'rã. Tahawa, te a'â rosa'rata ma za, ari'iwi. Tawamhã te apito tãma tinha ãne: — Béutésaza, aihâtâ'â tõ, rosawẽrẽ na hã duré za marĩ te te iwasu'uzém na hã. Tane nherẽ, ma tô Daniéu ãne ãma tãma wa'rã: — Apito, asimirosawẽrẽzé iwasu'u hã aré tô iwẽ ĩma hã, aihâiba upana asitob'ru norĩ hâiba u ihâimana da hã. Tane nherẽ, ta norĩ hâiba hã te te wasu'u õ di.

Daniéu 4:22

— Apito, wede hã, a hã te aiwasu'u. E marĩ wa. A hã asiptete 'manharĩ na asina 're hâimo u'âsi mono wa. Duré asiptete na 're i'aihâimana mono zé hã te te sina 're hâimo pese mono wa, ma tô hâiwa u hã wi. Taha wa, ma tô uburé pese 're ida'a'madâ'â mo, daro mono bâ.

Zuwã 19:11

Tawamhã Zezusi asa te tãma tinha, ãne: — 'Re ihâimana u'âsi mono, ma tô aipisutu, ĩma aipire da. Ĩma aipire da, te te aipisutu õ 'wa'âhã, aré ĩma aipire õ di. Tawamhã ĩma aipire da, te te aipisutu nherẽ, ĩ'ãma asimiroti wasété wamhã, tãma aiwẽ õ di za, aiwasédé hã ĩ'ãma 'manharĩ wa. Tane nherẽ, aibâ hã si'uihâ na te te aima ĩhâiba nhomri hã aiwasété nhipai u wasété uptabi di, ta hã.

Roma 13:1

Ti'ai ãma dama ipire norĩ hã, roti'wa norĩ hã si'uihâ na 're sipisutu za'ra mono õ di, dama 're si'apito za'ra mono da hã. 'Re ihâimana u'âsi mono te te 're i'apisutu mono zarina si, te dama 're hâimana za'ra uburé. Tahawa, te za uburé aihĩni 're iwapari pese za'ra wa'aba mo, isimiroti hã.

Apocalipsi 5:9

Tawamhã ta norĩ hã te Pone'ẽrebâi ma tinho're za'ra, tinho're itém na. Ãne te tãma tinho're za'ra: “A hã ma tô dasiwi aiwĩrĩ ni. Ma tô dazada hã atâ. Dazada atâ'âzém na ma tô ida'awa'â, dawasédé hã dama 're apari mono da ãma, 'Re ihâimana u'âsi mono nhib'a'uwẽ oto 're danomro mono da. Dapoto mono bâ a hã ma tô ida'awa'â, damreme sipo'o mono bâ 're idahâimana za'ra mono hã. Danhipai u aiwẽ uptabi di, a hã. Aiwaihu'u pese uptabi di duré. Tahawa, te aiwétési sada hã aihâiba, ibaihâ isinhai ré i'âri da hã, duré i'uptobzé hã aprub da.